Ma-thi-ơ 4
4
Abilêh palwô ngal Pô Yê-su
(Mag 1:12-13; Lu-ka 4:1-13)
1 #
Hê 2:18; Hê 4:15. Hadei di nan, Pô Nưbi Ginrơh ba Pô Yê-su tamư dalam bhum kamrang piêh ciup Abilêh palwô ngal. 2Hadei di tuk ikak tian ơk pāk pluh harei thong pāk pluh mưlam, Bhô lipa. 3Ra palwô ngal mưrai jek, đôm thong Bhô: “Mưyah hư nạn Anưk Pô Lingik, yơ xang ngak ka dôm patau ni jiơng tapei mek.” 4Pô Yê-su thuuk: “Hu panôic vak laic: ‘Mưnuix urang diup ôh njaup ciêt nhơ di tapei thoh ô, min lijang nhơ di abih panôic đôm mưng pabah Pô Lingik.’” 5Abilêh ba Bhô tamư dhan likam, padok Bhô ngok pabung huji, 6thong đôm: “Mưyah hư nạn Anưk Pô Lingik, yơ xang palao drei trun mek; kaywa hu panôic vak:
‘Mưca Pô thurah ka dôm umat,
Mưca dôm umat tapông vơh hư ngok tangin,
Ô mưca takai hư gok hanek patau ô.’”
7Pô Yê-su bican: “Lijang hu panôic vak: ‘Hư jôi padau Pô nạn Pô Lingik hư.’”
8Abilêh gilaic ba Bhô tagôk pabung cơk glong, pato ka Bhô ƀôh abih dit biya ngok dunya thong gruk cahya khol nhu, 9thong đôm: “Mưyah hư pam rup sambah ita, mưca ita brei ka hư abih paka ni.” 10Pô Yê-su bican thong nhu laic: “Hơic Sa-tan xang kadun mek! Kaywa hu panôic vak: ‘Hư xang bhuktik Pô nạn Pô Lingik hư, thong ciêt ragxa tha drei Bhô min.’” 11Abilêh klāk nao, thong dêh, dôm umat mưrai ragxa Bhô.
Rapajan Pô Yê-su tak nưgar Ga-li-lê
(4:12 – 18:35)
Pô Yê-su raup rapajan
(Mag 1:14-15; Lu-ka 4:14-15)
12 #
Mat 14:3; Mag 6:17; Lu 3:19,20. Bihu khao Yâng gok mưk, Pô Yê-su gilaic mai nưgar Ga-li-lê. 13#Yâ 2:12.Bhô niga dhan Na-xa-ret, mưrai mưdok tak dhan Ka-ƀê-na-um gah takai tathik, dalam canar tanưh Sa-ƀu-lôn thong Nep-ta-li, 14Piêh ka panôic hôr Ê-sai krung hu đôm bihu thit:
15“Nưgar Sa-ƀu-lôn thong Nep-ta-li,
Jalan tabiak tathik, gah dêh krong Yô-đar,
Nưgar Ga-li-lê anưd mưnuix Bôl-Lingiu —
16Bôl dok dalam bhôlir
Krung hu ƀôh tanrak hadah prong;
Thong dôm urang dok dalam libik binguk gruk mưtai om;
Krung hu ƀôh tanrak hadah blau tagôk.”
17 #
Mat 3:2. Mưng tuk nan, Pô Yê-su raup rao lang laic: “Khol hư xang tumal, kaywa Dit Biya Thôr Riga krung hu mưrai jek.”
Pô Yê-su iêu dôm anưk xêh tamưrơp
(Mag 1:16-20; Lu-ka 5:1-11)
18Tuk krưh dok nao thôi takai tathik Ga-li-lê, Bhô ƀôh dwa dei ai nạn Si-môn, lijang iêu nạn Phi-e-rơ thong adei nạn Ar-rê krưh dok lek nhôl di tathik, kaywa khol nhu takrung ngak danok tong ikan. 19Bhô bican thong khol nhu: “Xang tui Ita, mưca Ita ngak ka khol hư gilaic hajiơng urang tong nhôl di mưnuix.” 20Khol nhu binhêt klāk nhôl, nao tui Bhô. 21Kakal nao, Bhô ƀôh dwa dei ai pakan nạn Ya-kơ, anưk Xê-ƀê-đê, thong adei nạn Yâng krưh dok mưthong amư drei krưh dok bal nhôl ngok gilai. Bhô iêu khol nhu. 22Dwa urang niga vêt gilai thong amư drei bloh tui Bhô.
Pô Yê-su lang pato, lang pahơh, pajru dhit
(Lu-ka 6:17-19)
23 #
Mat 9:35; Mag 1:39. Pô Yê-su nao graup nưgar Ga-li-lê, pato pakai dalam dôm thang nhom, rao lang Khao Siam#4:23 Khao Siam: Ngan nạn Panôic Hanim. ka Dit Biya Thôr Riga, thong pajru dhit rim paka rwak hakik pađik pađwa dalam bôl bhap. 24Nưm angan Bhô ravak graup nưgar Si-ri. Mưnuix urang ba dôm urang pađik rwak, gok ralô paka rwak hakik pađik pađwa, gok ajin mưk, dang dui, mưtai arak mưrai ka Bhô, thong Bhô pajru dhit abih. 25Biak ralô urang mưng nưgar Ga-li-lê, Đê-ka-ƀô-lơ,#4:25 Đê-ka-ƀô-lơ: Ar nạn “Tha pluh Dhan.” dhan Yê-ru-sa-lem, nưgar Yu-đê, thong bhum gah dêh krong Yô-đar jhaw jhaw nao tui Bhô.
ទើបបានជ្រើសរើសហើយ៖
Ma-thi-ơ 4: CJM2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.