Luke 5
5
Jesus Okud Mme Ako Iyak Inaŋ Edi Mbed Nsie
(Matthew 4.18-22; Mark 1.16-20)
1Usen kied, nte Jesus adade ekpere mben inyaŋ obi emi ekerede Gennesaret, emi ekudde ŋko inyaŋ Galilee. Otu owo obunede akanade Enye akuk mbak Enye ɔkwɔrɔ iko Abasi ono mmo. 2Jesus ekwid ukpɔk ubum iba nte anade ke mben inyaŋ, edi mme ako-iyak ama ɔwuɔŋɔ ke mme ubum oro ada ekpere do, osuk adarade iyire mmo. 3Jesus aduk ubum oro edide eke Simon, Onyuŋ ɔdɔhɔ Simon ete awad ubum oro ɔkpɔŋ mben esuk asisid. Ndin Jesus ɔsuhɔde etetie ke ubum ekpep otu owo mkpo.
4Kini Enye ekpepde mme owo mkpo ama, Enye ɔdɔhɔ Simon ete, “Wad ubum oro wɔrɔ utuŋe mmɔŋ nyuŋ sin iyire mfo mbak imum iyak.”
5Simon aboro ete, Andikpep, “Nnyin ima isin iyire ofri okuneyi ikupke mmem idem, edi nnyin inyuŋ imimke ukpɔk iyak kied. Edi ami ndifiak nsin iyire, siak edide ofo ɔdɔhɔ mi nsin.” 6Kini Simon ye mme nsaŋa nsie anamde kpak nte Jesus ɔdɔhɔde, mmo amim ate ediwak iyak. Iyak ama awak tutu iyire mmo oyum ndiwuaha. 7Ndin mmo ada okud mme nsaŋa mmo emi odude ke ubum eŋwen ako iyak, ke ubɔk, ete edi ediŋwam mmumo. Mbun oro edi edidɔŋ iyak ɔyɔhɔ ubum mbiba, tutu mmɔŋ ɔtɔŋɔ ndiyɔhɔ ubum.
8Kini Simon emi mme owo onyuŋ okudde Peter ekwidde se Jesus anamde, enye ɔtɔŋɔ edɔŋ ke isi Jesus, onyuŋ ɔdɔhɔ ete, “Ɔbɔŋ, mbɔk, daha kpɔŋ nŋi, koro ami ndide anam idiɔk mkpo. Ami ndudke ndisaŋa mkpere Fi.” 9Peter akatiŋ emi koro idem akpade enye ye mme nsaŋa nsie eti-eti, ke uto uwak iyak emi mmo akamumde. 10James ye akpri eyin-eka nsie John emi ekedide mme nsaŋa Simon onyuŋ odu ke ate mkpi-idem. Mmo mbi-iba ekedi ndito Zebedee. Ndin Jesus ɔdɔhɔ Simon ete, “kufehe ndik, tɔŋɔde ke emi ka isi ofo uyanam mme owo ɔbuɔdidem ye Ami, kpak nte ako-iyak amumde mme iyak.” 11Kini mme ako-iyak oro awadde ubum ebehe ke esuk, mmo ɔkpɔŋ kpukpri mkpo mmo etiene Jesus onyuŋ edi mbed Nsie.
Jesus Anam Owo Akpa-Mfia Asana
(Matthew 8.1-4; Mark 1.40-45)
12Nte Jesus osuk odude ke obi kied ke otu mme obi emi esinede ke Galilee, owo emi udɔŋɔ akpa-mfia ɔyɔhɔde idem odu do. Kini enye ekwidde Jesus, enye ɔtɔŋɔ edɔŋ ke isɔŋ akibi isi nsie ke isɔŋ ndiwid ukpono, onyuŋ ekpe Jesus ubɔk ete aŋwam emo. Owo akpa-mfia emi ete, “Ɔbɔŋ, Ami mɔdiɔŋɔ nte edieke Ofo enyimede ndiŋwam mi, emekeme ndikɔk nŋi udɔŋɔ nnyuŋ nnam mi nsana.”
13Ndin Jesus anyan ubɔk atuk enye, ete, “Menyime ndikɔk fi udɔŋɔ nyuŋ nnam fi asana. Sana.” Ndondo oro, akpa-mfia ɔkpɔŋ enye. 14Ndin Jesus akpan enye ete, kutiŋ uno ukpɔk owo kied nte esaŋade ekɔk fi udɔŋɔ enyuŋ enam fi asana. Edi ka kawid oku Abasi idem mfo ke temple yak enye ɔduŋɔre onyuŋ ekwid ete ke ema ekɔk fi udɔŋɔ enyuŋ enam fi asana. Ndin wa uwa kpak nte ibed Moses eketemede ete, yak kpukpri mbun emi ekɔkde mmo udɔŋɔ akpa-mfia awa. Ke ndinam ntem, kpukpri owo iyɔdiɔŋɔ ete ke ekɔk fi udɔŋɔ enyuŋ enam fi asana.
15Okposuk edi Jesus akpande enye ikitiŋ ino ukpɔk owo kied, edi etup Jesus aka isi onyuŋ ɔdɔdiɔŋ asuana esin uwak-uwak owo. Ke ntak oro, ediwak otu owo obune ndikup mme ukpep mkpo Nsie, mbak Enye onyuŋ ɔkɔk udɔŋɔ mbun oro ɔdɔŋɔde. 16Edi kpukpri ini Jesus onyuŋ ama ndikpɔŋ otu owo ŋka ŋkodu ke wilderness ikpɔŋ mbɔŋ akam nno Abasi.
Jesus Efen Onyuŋ Ɔkɔk Owo Akpa-Ubeŋ Udɔŋɔ
(Matthew 9.2-8; Mark 2.1-12)
17Usen efen, kini Jesus osuk ekpepde mme owo iko Abasi ke ufɔk, mme ada idaha ke iko Abasi emi enyuŋ ediɔŋɔde mmo ŋko nte Pharisee, ye mme ekpep ibed emi okotude ke kpukpri obi Galilee ye Judea, ye ke Jerusalem, onyuŋ etiedo. Abasi onyuŋ ono Enye odudu ndikɔk udɔŋɔ mbun oro ɔkɔdɔŋɔde.
18Nte Jesus osuk ekpepde mkpo, mme owo ebim ɔdɔŋɔ akpa-ubeŋ kied ke mbri edi ufɔk oro. Mbun emi oyum usuŋ ndida owo udɔŋɔ oro nduk esid ufɔk mbak enim enye ke isi Jesus. 19Edi siak mmo mikwe usuŋ se mmo asaŋade ada enye aduk esid ufɔk oro, ke ntak otu owo, mmo adok enyɔŋ ɔkɔm ɔkpɔk ndusuk ŋkanya esi, ɔsuhɔde owo udɔŋɔ ke mbri nsie enim ke ufuɔd ke isi Jesus. 20Kini Jesus ekwidde mbuɔdidem emi owo akpa-ubeŋ ye mbun ekemende enye edi enyenede, Enye ɔdɔhɔ owo oro ete, “Ete, efen mme idiɔk-mkpo mfo.”
21Edi mme ekpep ibed mme Jew ye mme Pharisee ɔtɔŋɔ ndinini ke otu idem mmo, ete, “Ene idi emi osuŋide Abasi? Ene ikeme ndifen mme idiɔk-mkpo kebede Abasi ikpɔŋ?” 22Edi Jesus ɔdiɔŋɔ se mmo onyuŋ ekerede, Enye ɔdɔhɔ mmo ete, “Nsinam mmufo ikerede ke esid ete ke emi ɔwɔrɔ ndisuŋi Abasi?” 23Mkpo iba odu emi mkpɔdɔhɔde owo emi: Mefen kpukpri idiɔk-mkpo emi ofo anamde, me Ami ndidɔhɔ ete, daha ke enyɔŋ nyuŋ saŋa. Efe imem ikan nditiŋ? 24Edi Ami ndikɔk udɔŋɔ owo emi mbak mmufo idiɔŋɔ ete, ke Ami Eyin Abasi menyene odudu ke erimbud emi ndifen mme idiɔk-mkpo. Ke Enye atiŋde ntra ama, Jesus ɔwɔŋɔde esie ɔdɔŋɔ akpa-ubeŋ oro, ete, ndɔhɔ fi nte, “Daha ke enyɔŋ, nyuŋ men mbri mfo nyɔŋ ufɔk.”
25Nte kpukpri owo osuk esiede, ɔdɔŋɔ akpa-ubeŋ adahada ke isi mmo, emen mbri nsie ɔnyɔŋ ufɔk, onyuŋ ono Abasi iture. 26Ndin idem akpa kpukpri owo emi ekwidde se itibede, mmo onyuŋ oture Abasi. Ndik anam mmo abaŋa se Jesus anamde. Mmo onyuŋ atiŋ ke otu idem mmo ete, “Nnyin imekwid mme utibe mkpo mfin.”
Matthew Abo Akuk Nno Ukara Rome (Tax)
(Matthew 9.9-13; Mark 2.13-17)
27Ndin ke mme mkpo emi ama ekebe, Jesus adaha ɔkpɔŋ itie oro. Enye ekwid abo akuk nno Ukara Rome kied, emi ekerede Levi, nte enye etiede ke itie ubo akuk. Jesus ɔdɔhɔ enye ete, “Tiene Minyuŋ didi mbed Nni.” 28Ndin Levi adaha ɔkpɔŋ itie ubo akuk nsie oro onyuŋ etiene Jesus ndidi mbed Nsie.
29Ke oro ebede, Levi anam akwa usɔrɔ udia ke ufɔk nsie ndida nno Jesus ukpono. Ediwak mme abo akuk nno Ukara Rome ye mbun efen onyuŋ odu do adia udia ye mmo. 30Ndin mme Pharisee ye mme ekpep ibed mme Jew asuk Jesus uyi. Mmo ete, “Nsinam mmufo idiade udia, inyuŋ iŋwɔŋde mmin ye mme abo akuk nno Ukara Rome emi, ye mme idiɔk owo eŋwen?”
31Jesus aboro mbun Pharisee oro ke ŋke ete, “Mbun emi idem ɔsɔŋde iyumke abia-ibɔk; edi mbun udɔŋɔ oyum abia-ibɔk.” 32Kpasuk ntra ŋko, Ami ŋkedighe ndikud nti owo nte osioŋo idem ɔkpɔŋ idiɔk-mkpo, “Edi ŋkedi ndikud mme idiɔk owo, nte osioŋo idem ɔkpɔŋ mme idiɔk mkpo mmo onyuŋ etiene Mi.”
Ebup Jesus Mbume Abaŋa Utre-udia
(Matthew 9.14-17; Mark 2.18-22)
33Ndin ndusuk owo ebup Jesus ete, “Mbed John baptist awak nditie utre udia, nnyuŋ mbɔŋ akam. Mbun oro okponode ukpep mkpo mme Pharisee, etre udia onyuŋ ɔbɔŋ akam. Edi, mme mbed Mfo adia onyuŋ ɔŋwɔŋ mmin kpukpri ini idukke utre udia.”
34Jesus ɔdɔhɔ mmo ete; “Ndi mmufo imekeme ndinam mbun emi ekudde mmo edi usɔrɔ ndo ikidia udia kini ebe ndo odude ye mmo?” 35“Edi mme usen kedi emi imende ebe-ndo ikpɔŋ mmo. Kpasuk ntra, mme mbed Nni ikemeke nditre udia kini ami nsuk ndude ye mmo. Edi usen ke edi emi imende mi ikpɔŋ mmo. Ndin mmo iyetre udia.”
36Ke oro ebede, Jesus onyuŋ otup ŋke eŋwen ono mmo, ete, “Owo ndumekied isiake ubak abufa ɔfɔŋ-idem nsie inyuŋ ikim idian ye akani ɔfɔŋ-idem. Edieke enye anamde ntra, abufa ɔfɔŋ-idem oro iyawuaha, inyuŋ ikemeke ŋko ndiyie ke akani ɔfɔŋ oro.”
37Jesus onyuŋ ɔdɔhɔ mmo ete, “Owo isinke abufa mmin ke akani akpo mmin inim. Koro edieke abufa mmin oro okohodede, akani akpo oro iyatara onyuŋ obume. Ndin mmin oro iyɔduɔhɔ, akpo onyuŋ abiara.” 38Ke ntak oro, mmufo inyene ndisin abufa mmin ke abufa akpo mmin emi ɔsɔŋde idem, mbak mmin ye akpo oro ekeme ndifɔn. 39Edi akpaniko ŋko ete mme owo emi emehede ke edinwɔŋ akani mmin, idiyumke ndiwɔŋ abufa mmin. Koro mmo iyɔdɔhɔ ke akani mmin enem akan abufa.
ទើបបានជ្រើសរើសហើយ៖
Luke 5: IDE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Idere Bible by Beyond Translation is licensed under Creative Commons Attribution-ShareAlike 4.0 License.