Luke 1
1
Luke Ewed Ɔnɔ Theophilus Abaŋa Jesus
1Mme owo ama odome nte mmɔ ewede ŋkpɔ abaŋade Jesus, se okotubede ke otu nnyin nte Abasi ɔkɔwɔŋɔde.
2Mmɔ ewed ukem-ukem ŋkpɔ eke mme ntienche akatiŋde ɔnɔ nnyin, mme ntienche okud mme ŋkpɔ eken ke akpa ŋtɔŋɔ ndien mmɔ akabade isuŋ utom Abasi eke ɔnɔde nnyin etop.
3Edima odod ukpono Theophilus, ede eti ŋkpɔ ɔnɔ min, siak nyenede ɔyɔhɔ ifiɔk mbaŋa kpukpru ŋkpɔ eken ke akpantɔŋɔ, iwed nnɔ fin, se okotubede ke nde ke nde.
4Ma ɔdiɔŋɔ ke se mmɔ ekekpede fin ede akpanikɔ.
Anam Zachariah Ɔdiɔŋɔ Abaŋa Emana John
(John 1.5-25)
5Ke ini ukara Herod, Ɔbɔŋ Judea, oku Abasi chied ama odu eke awade uwa ekerede Zachariah. Eke otode nka Abijah, e-nyene aŋwan ekerede Elizabeth. Mmɔ mba-mba oto uben Aaron.
6Mmɔ mba-mba ede nti owo ke iso Abasi, nte mmɔ asaŋade ke nkopitem ɔnɔ mbet Abasi, mmɔ inyeneke ɔduɔhɔ.
7Ede mmɔ inyeneke eyen siak Elizabeth edede ada tutu mmɔ akabade ɔchɔŋ ke isua.
8Ntoro ke ini Zachariah anamde utom nte oku ke iso Abasi, siak ekedede ini nka nsie inam utom ke temple.
9Nte ido mme oku Abasi edede, afia ɔwɔrɔ ɔnɔ-e, ete eduk temple Abasi (itie ufɔp uwa mme Jew) ɔkɔfɔp uwa.
10Ede efiri otu owo ɔbɔŋ akam ke aŋwa ke ini efɔpde incense. 11Ndien angel Ɔbɔŋ ɔwɔrɔ ada-e ke iso, ke ubɔk nechia ke itie efɔpde incense.
12Ede ke ini Zachariah okude angel odo echid otumere-e ndik anam suhɔ-e.
13Ede angel ete-e, “kuyak ndik anam fin, Zachariah, siak Abasi ama okop akam mfo, aŋwan mfo Elizabeth iyeyome idubi iman eyen eden inɔ fin, enyiŋ nsie ikere John.
14Ede uyenyene inem-echid ma idaraechid, uwak owo idadara emana nsie.
15Ndien ikpokpon ke iso Abasi, imɔwɔŋke ufiop mmin mma ɔfɔfɔp. Ede iyɔyɔk ma edisana spirit ke idem nsie, ɔtɔŋɔde ke idubi mma nsie.
16Ede uwak mben Israel ifafiak ichene Ɔbɔŋ Abasi mmɔ ke ntak nsie.
17Isasaŋa ke iso Abasi ke ukem spirit ma ke odudu Elijah, Inanam mme ete ama nditɔŋ mmɔ. Inanam mben uchɔŋ iboud asaŋa ke nteme mben eke enende, ma anam mme owo ebeŋeidem ɔnɔ ididi Abasi.”
18Ede Zachariah ɔdɔhɔ angel ete, “Nnam didie ndiɔŋɔ ŋkpɔ eken? Ami mɔchɔŋ, aŋwan mi okpon ke isua emana.”
19Ede angel ɔbɔrɔ ete, “Ami nde Gabriel, eke ndade ke iso Abasi, ɔkɔdɔŋ min nda etimbuk eken nsɔk fin.
20Ede che-che, udede imum umatiŋke aba ikɔ, tutu ŋkpɔ eken otube, sia unumke ikɔ mmi ke akpanikɔ, eke itube ke ekem ini.”
21Ede mben obio ebed Zachariah, idem akpa mmɔ, se anamde ebihi ke temple.
22Ede ke ini ewɔrɔde edi, ikanke itiŋ ikɔ, mmɔ ɔdiɔŋɔ ke ama okud nkukud ke temple, ndien eda ubɔk anam idiɔŋɔ ɔnɔ mmɔ.
23Ekede ntoro ke ini usen utom nsie ekwerede enyɔŋ ufɔk nsie.
24Ke uwak usen ebede aŋwan nsie Elizabeth oyome etie ke ufɔk, iwɔrɔke aŋwa ke ɔfiɔŋ ition, ndien e-dɔhɔ ete.
25“Che nte Abasi anamde ma ami, ke mme usen eken eke afande ma ami, ma emen obud ke idem mi efep ke otu owo.”
Anam Mary Ɔdiɔŋɔ Abaŋa Emana Jesus
(Luke 1.26-38)
26Ke ɔyɔhɔ ɔfiɔŋ itiochied nte Elizabeth asaŋade ma idubi, Abasi ɔdɔŋ angel Gabriel utom ke obio Galilee ekerede Nazareth.
27Ɔnɔ eyen aŋwan chied eke idiɔŋɔke eden, eke mmɔ ɔkɔŋwɔŋɔde inɔ Joseph ke ndɔ, Joseph odo otode ufɔk David, ndien enyiŋ eyen aŋwan odo ekere Mary.
28Ede angel ɔduk ufɔk okosobe ma Mary ete, “dara ofo eken enyenede akwa mfaniso, Abasi odu ma ofo; ɔdiɔŋ fin ke otu mme iban!”
29Ede ke ini Mary okutde angel echid otumede-e, ekere se ekɔm odo ɔwɔrɔde.
30Ndien angel ɔdɔhɔ Mary ete, “kufɔhɔ ndik, koro omokud mfaniso ke iso Abasi.
31Ede che-che, uyoyome idubi uman eyen eden, usio-e enyiŋ Jesus.
32Ikpokpon, ifiak ekere Eyen nkoŋ nkan Abasi, Ɔbɔŋ Abasi inanam ede ɔbɔŋ nte David ntete nsie.
33Ede ikakara ufɔk Jacob ke nsi-nsi, obio ubɔŋ nsie imekwereke.”
34Mary ɔdɔhɔ angel ete, “ŋkpɔ eken inam didie isu siak nkadiɔŋɔke eden?”
35Ede angel ɔbɔrɔ ete, “Edisana Spirit idodoro fin ke idem, ndien odudu nkoŋ nkan Abasi ifɔfuk fin; Edisana eyen eke umande ikekere Eyen Abasi.
36Ndien che-che, ɔruk mfo Elizabeth, oyome idubi eyen eden ke ini uchɔŋ nsie, ɔfiɔŋ itiochied oduomi eyomede, ami mmɔ ekekuotde ada.
37Koro inyeneke ŋkpɔ eke ɔchɔŋde akan Abasi inam.”
38Ndien Mary ete, “che-che ami nde ɔfun-aŋwan Abasi, yak osu ɔnɔ min nte ofo atiŋde” ndien angel adaha ɔkpɔŋ-e.
Mary Ekeche Elizabeth
(Luke 1.39-45)
39Ede usen ikebihike, Mary ibeŋeidem ke usɔp, aka ke obio Judea eke odude ke ɔbud.
40Ndien eka ɔkɔduk ke ufɔk Zachariah ɔkɔm Elizabeth.
41Ndien, ke ini Elizabeth okopde uyo ekɔm Mary, eyen ɔtɔrɔ ke idubi Elizabeth. Ndien Elizabeth ɔyɔhɔ ma Edisana Spirit.
42Ndien emeŋede uyo nsie ke ɔnyɔŋ ete, “afafan ɔnɔ fin ke otu mme iban afafan ɔnɔ mfri idubi mfo!
43Nso mfaniso eke eka Ɔbɔŋ mi edide ke ufɔk mi?
44Ede ke akpanikɔ, nte ŋkopde ekɔm mfo, eyen ɔtɔrɔ min ke idubi ɔnɔ inemechid.
45Afafan ɔnɔ fin siak onumde ke akpanikɔ, koro ŋkpɔ eke Abasi atiŋde ɔnɔ fin isosu.”
Ikwɔ Mary
(Luke 1.46-56)
46Ndien Mary ɔdɔhɔ ete,
“Ukpɔŋ mmi ɔsuk okpono ɔbɔŋ mmi,
47Ede spirit mmi adara ma Abasi andiyaŋa min.
48Koro echede usuhɔde itie ɔfun-aŋwaŋ nsie,
Ndien kami kpukpru emana ikokoud min afafan.
49Koro Abasi eke okponde amanam akwa ŋkpɔ ɔnɔ min,
Enyiŋ nsie ede edisana.
50Ede mbɔm nsie ana ɔnɔ mben eke abakde-e,
Ɔtɔŋɔde ke emana ma emana.
51A-kada ubɔk nsie awiri odudu nsie,
Asuan mben ŋwiridem abaŋa ekikere echid mmɔ.
52Ede emen mbɔŋ efep ke itie ubɔŋ mmɔ,
Ede oforo mben eke odude ke usuhɔde itie.
53Ede emen nti ŋkpɔ ɔnɔ mben ɔbiɔŋ,
Ede anam mben inyene ɔnyɔŋɔ ubɔk-ubɔk.
54E-eŋwam Israel ɔfun nsie,
Ma e-ti mbɔm nsie,
55Nte ekatiŋde ɔnɔ mme ntoŋ nnyin, mbɔm eke ekatuade
Abraham mma nditɔŋ nsie ke nsi-nsi.” 56Ede Mary etie ma Elizabeth ke ŋkpɔ nte ɔfiɔŋ ita, ndien enyɔŋ ufɔk nsie.
Emana John
57Ndien ekem ini eke Elizabeth imande eyen, eman eyen-eden.
58Mme mbɔhɔ nsie ma mme ɔruk nsie okop ete Abasi edi ediwiri akwa mbɔm ke idem Elizabeth, ndien mmɔ adara emana eyen.
Unum Mbobi John
(Luke 1.59-66)
59Ndien ekem ke ɔyɔhɔ usen itiaita mme mbɔhɔiduŋ ma uben Zachariah, edi idara eyen ma inum eyen mbobi, mmɔ eyem isio-e enyiŋ nte koko ete, Zachariah.
60Ndien eka ɔbɔrɔ ete, “idaha ntoro, esio eyen odo enyiŋ ete ikere John.”
61Ede mmɔ ɔdɔhɔ eka eyen ete, “owo chied-chied ke ɔruk mbufo ikereke ntoro.”
62Ntoro se mmɔ anam idiɔŋɔ ebip ete eyen, enyiŋ eke eyen ikerede.
63Ede e-nam idiɔŋɔ ɔdɔhɔ mmɔ ete, “ada itiad ŋwed ɔsɔk-e ma ewed, ete, eyen ikere John.” Ndien idem akpa kpukpru owo.
64Nde-nde odo inua Zachariah ma edeme nsie atara, ndien etiŋ ikɔ, otoro Abasi.
65Ndien idem akpa kpukpru mbɔhɔiduŋ mmɔ, mmɔ asuan etop abaŋade ŋkpɔ odo ke mme ɔbud Judea.
66Ede kpukpru mben eke ekopde mbuk eken, mmɔ omum akama ke echid, ete, “nsutɔ owo se eyen eken ide?” Ede ubɔk Abasi odu ma-e.
Nkukud Zachariah
67Ndien Ntete John, Zachariah ɔyɔhɔ mma edisana spirit, atiŋ ikɔ nte asiak uduak Abasi, ete:
68“Itoro enyene Ɔbɔŋ Abasi Israel,
Koro edi iche uben nsie Israel ma efak mmɔ,
69Ede anam nduk edinyaŋa otube ɔnɔ nnyin,
Ke ufɔk owo nsie David
70Suhɔ nte ekadade inua mme edisana asiak uduak atiŋ,
Ami okodude toto ke ntɔŋɔ ererimbon
71Ma aŋyaŋa nnyin ke ubɔk mme asua,
Ma kpukpru owo eke asuade nnyin,
72Itua mme ntoŋ nnyin mbɔm ma
E-ti edisana ediemi nsie,
73Uŋwɔŋɔ odo ekewɔŋɔde ɔnɔ Abraham ntoŋ nnyin:
74Aŋyaŋa nnyin ke ubɔk mme asua nnyin,
Ma nnyin inam ŋkpɔ inɔ Abasi ndik idu-e,
75Ke edisana ido ma ke edinen ido ke iso Nsie ke kpukpru usen uwem nnyin.
76Ede ofo, eyen, ukekere asiak uduak Abasi eke okoŋde akan, koro ofo ubobom Ɔbɔŋ iso uneŋere usuŋ Nsie,
77Innɔ uben nsie ifiɔk edinyaŋa ke ifen mme idiɔk ŋkpɔ mmɔ,
78Oto ke echid mbɔm Abasi,
Edɔŋ Messiah nte utun asiahade ke ikpa ɔnyɔŋ edi ke usen ubɔk ɔnɔ nnyin;
79Ediyama ɔnɔ mben eke etiede ke okum mfud mkpa,
Ma eteme ukod nnyin iduk ke usuŋ emem ma Abasi.”
80Ndien eyen odo ɔkɔri afiak okpon ke spirit, ɔduŋ ke nchad isɔŋ tutu osum ini eke mmɔ emende-e awiri efiri Israel.
ទើបបានជ្រើសរើសហើយ៖
Luke 1: UKQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ukwa Bible by Beyond Translation is licensed under Creative Commons Attribution-ShareAlike 4.0 License.