လုကာ 1
1
အခန်း (၁)
သော်ဖိလုသို့
1လေးစားနက်ပိုဟေကား သော်ဖိလို၊ လူးရက်နာ ငါရက်ကကြားယာ ဖြစ်ပျက်တက်ကား အဖြစ်ပျက်ရက်အင် ရေးကဇိစ် ကြိုးစားဒက်ဟေ။ 2အိမ်မှဒေရေးကရပ် အမာရက်နာ အစကရပ်ပင်း ငါဒက်ကို့ ဖြစ်ပျက်တက်ကား အဖြစ်ပျက်ရက်အင် ပိုဒက်ပိုဟေကားလူးရက်အာဘင်း ငါ့ဆနပ်တက်ကား အူဇာရက်အင် ရေးကို့ပီဒက်ဟေ။ 3မှကြောင်း ငါစာ အစကရပ်ပင်း အကြောင်းအရာစုတ်ရက်အင် ဂရုတစိုက်လေ့လာဒက်ကို့ အဖြစ်ပျက်ရက်အင် နနိန်ရက်ကအတွက် ကနင်းဖူး(ဖ်)ဆာ ရေးကဇိစ် ဆုံးဖြတ်တက်ဟေ။ 4နနိန်ရက် ဆနိန်ဒက်ဂါ အကြောင်းရက်နာ မှန်ကန်ဂါအကြောင်းငင် ချေးကဇိစ် နနိန်ရက်ကမား အတတ်ကဒေလေ အစီစဉ်တကျ ရေးအီနက်အန်ပေါ်ဂါဖြစ်ဟေ။
ဟမန်းဒေဝါနာ အိန်းမြှုပ်မင်္ဂလာဆရာယောဟန် ကေဟေကားအကြောင်းငင် ကြိုတင်ငါ့ဟေကား
5ယုဒပြည်ယာ ဟေရုဒ်မင်းကြီးအုပ်ချုပ်ကအချိန်ငါ#1:5 ဟေရုဒ်မင်းကြီးဟေရုဒ်မင်းကြီးနာ ရောမလူမျိုးရက် ခန့်အပ်ပီးဟေကား ဘုရင်တစ်ပါးဖြစ်ကို့ ယုဒပြည်ယင် (၃၇ bce မှ 4bce)အထိ ဘုန်းတန်ခိုးကြီးမားမူအိမ် ရက်စက်ကြမ်းကြုက်မူရက် ရောနှောကို့ အုပ်ချူပ်ဒက်ကား ဘုရင်တစ်ပါးဖြစ်ဟေ။ ဇာခရိငါ့ကိုအော်ဟေကား ဂျူးပုရောဟိတ်စာ#1:5 ပုရောဟိတ်ရက်စာ မြင့်မြတ်ဟေကား ဓလေ့ထုံးတမ်းရက်အင် လိစ်ကဇိစ် အခွင့်အာဏာငါဟေကား ဂျူးဘာသာရေးအကြီးအကဲရက်ဖြစ်ဟေ။ အမာရက်နာ လူးရက်ကကိုယ်စား ဗိမာန်တော်ဝါ ဘာသာရေးဆိုင်ရာ အမူကိစ္စရက် လိစ်ပိုဟေကားလူးရက်အ(လ်)ဖြစ်ဟေ။ အဘိယငါ့ဂိုအော်ဟေကား ပုရောဟိတ်အဖွဲ့ဝင်ဟူးဝါဖြစ်လင်ကဟေ#1:5 အဘိယငါ့ဟေကနာ ဂျူးပုရောဟိတ်ဟူးဝါဖြစ်ကအမိန်းဖြစ်ကို့ ဂျေရုဆလင်ဗိမာန်တော်ဝါ အမူတော်ဆောင်ကဇိစ် ဖွဲ့စည်းပီးဟေကား ဂျူးပုရောဟိတ်အဖွဲ့ခွဲ ၂၄ ဖွဲ့ထဲယာက အိမ်မှပုရောဟိတ်ကအမိန်းငင်စွဲကို့ ခေါ်ဟေကားအဖွဲ့ဆူးဝါကအမိန်းဖြစ်ဟေ။။ အမှာဂါအအီးတာက အမိန်းနာ ဧလိရှဗက်ဖြစ်ကို အမာနာ အစ္စရေးပြည်က ပထမဆုံးပုရောဟိတ် အာရုန်မျိူးရိုးယာဘင်း ဆက်သက်ကလူဖြစ်ဟေ။ 6အိမ်မှာနိမ့်ဟူးနာ ဘုရားရှင်ဂါး ပညတ်တရားရက်အင်#1:6 ပညတ်တော်ငါ့ဟေကနာ ဘုရားရှင်ကတရားတော်ဖြစ်ဟေ။ အပြည့်အဝ လိုက်နာဂို ဘုရားရှင်ကရှေ့ယာ ဖြောင့်မတ်ကလူးရက်ဖြစ်ဟေ#1:6 ဖြောင့်မတ်ကလူးငါ့ဟေကားနာ ဘုရားရှင်ကပညတ်တော်ရက်အိမ် ငါ့ဟေကတားတူးရက်အင် လိုက်နာကို့တုန်း ဟေကားလူးဖြစ်ဟေ။ ။ 7ညီးငါ့ဒင့်ယေ အမာရက်က အဆာ၊ဆအိပ်အငါပါ(လ်)။ အဇာရိကို့အငါနဲ့ ဧလိရှဗက်နာ ဘင်းစားမက်ဖြစ်ကအကြောင့်#1:7 မန်ဆာအလှုထောင်ကားတဆလောင် မြုံတုန်းဂါတဆလောင်မန်ဆာအလှုကတောင်မာဒင့် အမာရက်က နိမ့်ဟူးစလုံးယေ့ အဆက်ရက်နာ တဗျင်းပြာတုန်းနန်းကအကြောင့်ဖြစ်ဟေ။ 8ယက်တာဂါရပ် ဇာခရိရက်ကအဖွဲ့နာ ဗိမ္မာန်တော်ဝင်းအတာဟုန်းငါ#1:8 ဗိမာန်တော်ငါ့ဟေကနား ဂျေရုဆလင်မြို့ဝါငါ့ဟေကား ဂျူးလူမျိူးရက် ဝတ်ပြုဆုစိန်ဟေကားနေရာ ဘုရားကျောင်း အမူတော်လိစ်ပိုကား တာဝန်အလှည့်ဟိုက်ကို့ ဇာခရိနာ ဘုရားရှင်ကရှေ့ယာ ပုရောဟိတ်ဟူးဝါအဖြစ် ဆောင်ရွက်တုန်းကရပ် 9ပုရောဟိတ်ရက်က ထုံးစံအတိုင်း အရှင်ကဗိမာန်တော်ထဲယာ အမွှေးနံ့ဆာရက်အိမ် ထွန်းဂို့ပူဇော်ကဇိစ် မဲနှိုက်ကို ရွေးချယ်ကရပ် ဇာခရိအင် ရွေးချယ်လင်ကဟေ။ 10မဒေဖြစ်ကို ဇာခရိစာ အမွှေးတိုင်းငင် ထွန်းဂို့ပူဇော်ကားအချိန်ငါ လူးရက်နာ ဘုရားရှင်ကဗိမ္မာန်တော်ဝင်းအတာဟုန်းငါ ဆုစိန်ဂိုတုန်းလင်ဂါဟေ။ 11ကျီးကအိမ် ဘုရားရှင်ဖြောက်နက်အန်ဟေကား ဟမန်းဒေဝါစာ#1:11 ဟမန်းဒေဝါငါ့ဟေကနာ ဘုရားရှင်ကမှဘင်းဗန်(ဖ်)ကို့ ကင်းထင်ပါ(လ်)အီဟေကားဟမန်း(မှီးဟေကားဟမန်း) ဇာခရိအမွှေးနံ့ဆာရက်ထွန်းဂိုပူဇော်ကနေရာ ပလ္လင်ကပုတ်ဆလက်ဖက်အာ#1:11 ပလ္လင်ငါ့ဟေကနာ ဘုရားရှင်ငင် အမွှေးနံဆာအိန်းပူဇော်ဂါနေရာ တစ်နည်းအားဖြင့်ငါ့ပိုကငါ့နဲ့ ဘုရားစင်ပုံစံမျိုး ဇာခရိဇိစ် ကိုယ်ထင်ဆနပ်ကို စက်တုန်းလင်ကဟေ။ 12ဟမန်းဒေဝါယင် ဇာခရိပိုဟေကရပ် အမာနာ တဗျင်းအစက်ကို ရမို(လ်)ကလင်ဂါဟေ။ 13အိမ်မာကရပ် ဟမန်းဒေဝါစာ အမင် "အစက်ယေ့ ဇာခရိ။ အဇာရိကိုအငါ့နဲ့ နင်ဂါး ဆုစိန်ဂါးရက်အင် ဘုရားရှင်တတ်ဟေ။ နင်ဂါ အအီးတာဧလိရှဗက်နာ နင်ဂါးအတွက်အဆာဟူးဝါကေအီးလင်ကား။ နင်စာ အမင် ယောဟန်ငါ့ဂို အမိန်းအီးပိုဂါ။ 14အမာကေဟေကအချိန်ငါ နနိန်းရက် တဗျင်းပျော်ကဒေလေ အယောက်ကလူးရက်အ(လ်) ဝမ်းမြောက်ပျော်ရွှင်လင်ပေါ်ဂါ။ 15အဇာရိကိုအငါ့နဲ့ အမာနာ ဘုရားရှင်ဂါရှေ့ယာ ကြီးကျယ်မြင့်မြတ်ဟေကလူဖြစ်လင်ကား။ အမှာနာ ဟက်တာယဲ့ ဝိုင်အိမ်အရက်အင် အအူလင်ပိုပါ(လ်)ကား။ အမာနာက အနူ(ဖ်)ကအပြိစ်တာဟုန်းငါဘင်း အမာနာ ဉာဏ်အလင်းတော်က ဦးဆောင်ထိန်းချူပ်မူအာငါ့လင်ကား။ 16အမာနာ အစ္စရေးလူမျိူးရက်အင် အပြစ်ဒုစရိုက်အာဘင်း နောင်တသံဝေဂလူးဇိစ်ဂို အမှာရက်က အရှင်သခင်ဖြစ်ဟေကား ဘုရားရှင်ကဟိုက်နီးယာ ပြန်လှည့်ဇိစ်လင်ကား။ 17အမာနာ ပရောဖက်ဧလိယတလေ#1:17 ပရောဖက်ငါ့ဟေကနာ ဘုရားရှင်ငါ့ဒက်ကတူးရက်အင် တစ်ဆင့်ခံငါ့ဆနပ်ကလူးဖြစ်ဟေ။ ဉာဏ်အလင်းတော်အိမ် တန်ခိုးငါကို ကိုယ်တော်ယေရူက ရှေ့တော်ပြေးဖြစ်လင်ကား။ အမာနာ အနှု(လ်)ဗား(ဖ်)အိမ် အဆာနားရက်အင် စည်းလုံးဇိစ်ကို့ ဘုရားရှင်ငင် လက်ခံဟေကအငါကလူးရက်အင် ဖြောင့်မတ်ဟေကားလူးရက်က လမ်းစဉ်ရက်အင် လိုက်နာကဇိစ် ဆနိန်အီလင်ကား။ မှအကြောင့် လူရက်အ(လ်) ကိုယ်တော် ပြန်ကို့ကြွယောဝန်ကအချိန်ငါ အဆင်သင့်ဖြစ်တုန်းလင်ကားငါ့ဂို" င့ါလင်ကဟေ။ 18ကျီးကအိမ် ဇာခရိယေ့ ဟမန်းဒေဝါယင် နင်ငါ့ဟေကဒေလေအမှန်တကယ်ဖြစ်ယိုဝန်ဂါငါဟေကား ငါအဆမီရှေးကယာ။ ငါ့ရက်မောင်နှင်းနိမ့်ဟူးစလုံးနာ တဗျင်းအဆက်ပြာတုန်းနန်း"ငါးဂို ပြန်ငှားလင်ဟေ။ 19ဟမန်းဒေဝါယေ့ ဇာခရိအင် "ငါနာ ဘုရားရှင်ကရှေ့ယာ ခစားပိုကား ဂါဗြေလဖြစ်ဟေ။ ဘုရားရှင်နာ ငင် မှသတင်းကောင်းငင် နင်ထနဲ့ဗန်ကို့ငါ့ဆနပ်ကဇိစ် ဖြောက်နက်အန်ကားဖြစ်ဟေ။ 20မှအကြောင့် အချိန်တန်နဲ့ဖြစ်အန်ကား ငါကတူးယင် နင်အကျုံးကအကြောင်းအိမ် အိမ်မှအဖြစ်ပျက်ရက် အဖြစ်ပျက်နိမ့်ကအချိန်ထိ နင်နာတူးအပြိန်လှုထမ်း ဘူဘာဆာဖြစ်တုန်းလင်ကား"ငါ့ကို ငါ့လင်ကဟေ။ 21အိမ်မှဒေလေ ဇာခရိအိမ် ဟမန်းဒေဝါရက်နာ ဗိမာန်တော်အထဲယာ တူးပြိစ်တုန်းကရပ် အပြင်ဖက်အာငါဟေကား လူထုပရိသတ်ရက်စာ ဇာခရိအင် စောင့်ဂိုငှားလင်ကဟေ။ အမှာရက်နာ ဗိမ္မာန်တော်အတောင်ဟုန်းငါ ဇာခရိ အဇာရိကို့ အချိန်ကြာတုန်းဂါးယားငါ့ကို အံ့ဩတုန်းလင်ကဟေ။ 22ဇာခရိ အပြင်းငါပြူယိုးဝန်ဂါအချိန်ငါ တူးအပြိစ်လှုနန်းကတောင်း ဗိမာန်တော်#1:22 ဗိမာန်တော် ဗိမာန်တော်ငါ့ဟေကနာ ဂျေရုဆလင်မြို့ဝါငါဟေကား ဆူးဝါတည်းကား အဆောက်အဦး၊ ဂျူးလူမျိုးရက် ဆုစိန်ဟေကနေရာဖြစ်ဟေ။အတောင်ဟုန်းငါတုန်းကရပ် ဇာခရိစာ နိမိတ်လက္ခဏာဆူးဝါပါဆာယင် ပိုဒက်ဟေငါ့ကို လူထုပရိသတ်ရက်နာ နားလည်လင်ကဟေ။ အမာစာ ဘူးဘားဆာဖြစ်ကန်းနန်းကတောင်း လူးရက်အင် ခြေဟန်လက်ဟန်အိမ် ဆက်ကို အမူအရာရက်ဆနပ်တုန်းလင်ကဟေ။ 23ကျီးကအိမ် ဇာခရိနာ ဗိမာန်တော်ဝါ ပုရောဟိတ်ရက်လိစ်ပိုကား အလိစ်ရက်အင် ဆောင်ရွတ်ကျီးဟေကအခါ အမာဂါကိန်းငါ ပြန့်ငန်လင်ကဟေ။ 24အချိန်စိဆာကြားယိုးဝန်ဂါးအချိန်ငါ ဇာခရိကအအီးတား ဧလိရှဗက်နာ ကိုယ်ဝန်ငါယိုဝန်ကို့ အိမ်မှတဆာလောင်နာ အချိန်ငါးလကြားဇရိုးမှား ကိန်းငါဘင်းအပြင်း အပြူထန်း တုန်းလင်ကဟေ။ 25ဧလိရှဗက်နာ "ဘုရားရှင်စာ ငါဇီစ် ကိုယ်ဝန်ဆောင်လှုကား အခွင့်ငင်အီဒက်နန်း။ ဘုရားရှင်ကအလိုတော်အိမ် ငါက အရှက်ကွဲသိမ်ငယ်ပိုကနာ လူးရက်ကကြားယာ ပပျောက်တက်နန်း" ငါ့ကို အမာကအမာငါ့လင်ကဟေ။
ကိုယ်တော်ယေရှု ကေကားအကြောင်းငင် မာရိဇိစ် ဟမန်းဒေဝါငါ့ဆနပ်ဟေကား
26မှနောက်အာ ဧလိရှဗက်ကိုယ်ဝန် ခြောက်လနီးပါးကြားဟေကားအချိန်ငါ ဘုရားရှင်စာ ဟမန်းဒေဝါ ဂါဗြေလယင် ဂါလိလဲပြည်ယာဂါး နာဇရက်မြို့ဝါ ဖြောက်လင်ကဟေ။ 27ဟမန်းဒေဝါနာ မာရိငါးဂိုအော်ဟေက နင်းဆီဆာဟူးဝါထနဲ့ လင်ဂိုး သတင်းတူးရက်အင် ပြိစ်ဇိစ်လင်ကဟေ။ မာရိစာ ဘုရင်ဒါဝိဒ်က မျိူးရိုးယာဘင်း ဆင်းသက်ဗန်(ဖ်)ကလူးဖြစ်ဟေကား ယောသပ်အိမ် စေ့စပ်ပီကလူးဖြစ်ဟေ။ 28ဟမန်းဒေဝါနာ မာရိထနဲ့ဗန်(ဖ်)ကို့ နူတ်ဆက်ကျီးကရပ် " ဝမ်းမြေက်ဝမ်းသာဖြစ်အင့် မာရိ။ ဘုရားရှင်နာ နင်အိမ်မက်တာငါဂိုး အမာက မေတ္တာတရားယင် တစ်ခြားတာဆာလောင်ရက်တောင်မာဒင့် နင်ကအပေါ်ဝါ ဆနပ်အင်နန်း"ငါ့ကို ငါ့လင်ကဟေ။ 29ညီးငါ့ဒင့်ယေ မာရိစာ အိမ်မာတူးယင် တတ်ကရပ် တဗျင်းစိတ်ရူပ်ကလင်ကို အမန်းဒေဝါကတူးစာ အဇာဆိုလိုဟေကယားငါ့ကို့ စဉ်းစားတုန်းလင်ကဟေ။ 30အိမ်မားကရပ် ဟမန်းဒေဝါနာ မှတာဆာလောင်ယင် "အစက်ယေ့၊ မာရိ။ ဘုရားရှင်နာ နင်ငင် မျက်နာသာအီယင်နန်း။ 31နင်နာ ကိုယ်ဝန်ငါးဂို အဆာဟူးဝါးကေလင်ကား။ နင်နာ အမှာဂါအမိန်းယင် ယေရှုငါးဂိုအမိန်းအီပေါ်ကား။ 32အမှာနာ ပြောင်ဟေကားလူဟူးဝါဖြစ်ယိုးဂို့ အမြင့်မြတ်ဆုံးက ဘုရားရှင်ဂါးအဆာငါးဂို အော်ဟေကား ဟင်းလင်ပေါ်ကား။ အမာက ဘိုးဘေးဖြစ်ဟေကား ဘုရင်ဒါဝိဒ်တလေ အမာကလူမျိူးရက်အင် အုပ်စိုးလှုကအခွင့်ယင် ဘုရားရှင်နာ အမာဇိစ်အီလင်ကား။ 33အမှာနာ ယာကုပ်ကအမျိူးအနွယ်ရက်အင်#1:33 ယာကုပ်ကအမျိူးအနွယ်ငါ့ဟေကနာ ယာကုပ်ကမျိူးရိုးယာဘင်း ဆင်းသက်ဗန်ကား လူးစုတ်ရက်အင် ငါ့ဟေကဖြစ်ဟေ။ ယာကုပ်ကတစ်ခြားအမိန်းနာ အစ္စရေးဖြစ်ဟေ။ လူးရက်နာ အစ္စရေးလူမျိူးယင် ယာကုပ်ကမျိူးနွယ်ငါ့ကို အော်ဟေ။ ဘုရင်အဖြစ်ထာဝရအုပ်စိုးဂို အမှာဂါးနန်းဆက်အ(လ်) ဟက်တာယဲ့ အစီးလင်ကားအရိ(လ်)ပါ(လ်)"ငါ့ကို င့ါလင်ကဟေ။ 34အိမ်မကရပ် မာရိနာ " ငါနာ နင်းဆီဟူးဝါးဖြစ်ဟေကတောင်း မှအူဇာနာ အဆာမီဖြစ်လှုကားယား"ငါ့ကို ဟမန်းဒေဝါယင် ငါ့လင်ကဟေ။ 35ဟမန်းဒေဝါယေ့ အမင် "ဉာဏ်အလင်းတော်နာ နင်ထနဲထုန်ဗာ(ဖ်)ကို ဘုရားရှင်ကတန်ခိုးယဲ့ နင်ကာအဖုံးယာ လွမ်းခြုံလင်ကား။ မှအကြောင့် ကေယန်ကားမန်ဆာယေ မြင့်မြတ်ကတောင်း အမင် ဘုရားရှင်ကအဆာငါ့ကို အော်လင်ကား။ 36နင်ငင် ဆူးဝါပါဆာငါ့ဆနပ်အန်ကား နင်အိမ်ဆွေမျိုးတော်ပီဟေကား ဧလိရှဗက်နာ အဆက်ပြာတုန်းကဒင့်ယေ့ အဆာတာပြိုင်းဆာလူးဝန်ကဟေ။ လူးရက်နာ အမင် မန်းဆာအလှုနိုင်းဂါငါ့တုန်းကယေ့ အတတ်အမာကိုယ်ဝန်ဆောင်တုန်းကနာ ခြောက်လနီးပါး ငါတုန်းနိူင်းဖြစ်ဟေ။ 37အကြောင့်က(လ်) "ဘုရားရှင်က အလိစ်လှုကား အူဇာဆူးယေ့အငါကားအကြောင်းဖြစ်ဟေ"ငါ့ကို င့ါလင်ကဟေ။ 38အိမ်မာကရပ် မာရိနာ "ငါနာ ဘုရားရှင်က အစေခံဟူးဝါဖြစ်နက်ဟေ။ နင်ငှားဟေကတူးအတိုင်း ငါကအပေါ်ဝါ ဘုရားရှင်ဂါး အလိုငါဟေကအတိုင်း ဖြစ်နက်ပိုဇီစ်"ငါးဂို့ ငါလင်ကဟေ။ ကျီးကအိမ် ဟမန်းဒေဝါနာ မာရိကကိန်းငါဘင်း ပြန့်လင်ကဟေ။
ဧလိရှဗက်ထနဲ့ မာရိလင်ဟေကား
39နာရာရိကအိမ်း မာရိနာ အဆင်သင့်လိစ်ဂို့ ဇာခရိတုန်းကနေရာ ယုဒပြည်ယာက တောင်ပေါ်မြို့တစ်မြို့ဝါ အမြန်ဆုံးလင်ကဟေ။ 40အိမ်မာနေရာထုန်ကရပ် မာရိနာ ဇာခရိကကိန်းအတောင်ဟုန်းငင်ဆင်ဂို့ ဇာခရိအအီးတာဖြစ်က ဧလိရှဗက်အင် နှုတ်ဆက်နက်ကဟေ။ 41မာရိကားနှုတ်ဆက်ဟေကတူးဝင် ဧလိရှဗက်တတ်ဟေကရပ် အမှာဂါအပိအတောင်ဟုန်းငါဂါးမန်းဆာနာ ခုန်တုန်းလင်ကဟေ။ မှနောက်အာ ဧလိရှဗက်အ(လ်) ဉာဏ်အလင်းတော်က ဉီးဆောင်ထိန်းချုပ်မူအာငါလင်ကဟေ။ 42ဧလိရှဗက်နာ မာရိယင် "ဘုရားရှင်နာ တခြားတဆာလောင်ရက်တောင်မှာဒင့် နင်ငင်ပိုဂို့ မင်္ဂလာငါ့ဇိစ်ဂို့ နင်ဂါကေယိုဝိုင်းဂါမန်ဆာယေ့ မင်္ဂလာငါဟေ။ 43အတတ်ကဒေလေ ငါကအရှင်ကအနှုး(လ်)နာ ငါထနဲ့ကြွဗန်(ဖ်)ဟေကကျေးဇူးယင် အဇာရိကို့ ငါခံစားပေါ်ကယား။ 44အဇာရိကို့အငါနဲ့ နင်ဂါးနှုတ်ဆက်ဟေကအကြင်တပ်ဟေကရပ် ငါဂါ အပိအတောင်ဟုန်းကမန်ဆာနာ ပျော်ရွှင်ဝမ်းမြောက်ဂို့ ခုန်တုန်းဟေ။ 45ဘုရားရှင်းဂါးသတင်းတူးနာ အမှန်တကယ်ဖြစ်ယိုးဝန်ကငါ့ဂို့ နင်ယုံကြည်ဟေကအကြောင့်အိမ် နင်စာ မင်္ဂလာငါဟေ"ငါ့ဂို ဟော်ဂိုင့ါလင်ကဟေ။
မာရိကချီးမွမ်းဟေကား
46မှနောက်အာ မာရိယဲ့ ငါက စိတ်နှလုံးနာ
"ဘုရားရှင်က ဂုဏ်ကျေးဇူးယင် ချီးမွမ်းနက်ဟေ။
47ငင် ကယ်တင်ဟေက ဘုရားရှင်ကအကြောင့် ငါကစိတ်နှလုံးယေ တဗျင်းဝမ်းမြောက်ဝမ်းသာဖြစ်နက်ဟေ။
48အဇာရိကို့အငါ့နဲ့ ငါနာ ဘုရားရှင်က နိမ့်ကျဟေကားအစေခံဖြစ်ကယဲ့ အမာနာ
ငင် မှတ်ကိုအပီးပါ(လ်)။
အတတ်ကအချိန်ငါဘင်းစဂို့ နောင်လာနောင်သားရက်အ(လ်)
ငင်ယင် ကောင်းချီးမင်္ဂလာအီးဂါးဟင်ပိုဂါးလူး" ငါးဂို့ ငါ့လင်ကား။
49အဇာရိကို့အငါ့နဲ့ ဘုန်းတန်ခိုးတော်ပြောင်ဟေကာ ဘုရားရှင်စာ ငါဇိစ်
မြင့်မြတ်ကအူဇာရက်အင် လိစ်ကို့အီယင်နန်း။
အမာက အမိန်းယေ မြင့်မြတ်ဟေ။
50ခေတ်ဆက်ဆက်အာ ဘုရားရှင်စာ အမင် ကြည်ညိုကိုးကွယ်ဟေကား လူးရက်အင်
ရက်ပိုက် ကရုဏာတရားပီဟေ။
51ဘုရားရှင်နာ စိတ်ဓာတ်မာန်မနာထောင်လွှားဟေက လူးရက်အင် အမာကတန်ခိုးအိမ် ကွဲ့လွင့်ဇိစ်လင်ကဟေ။
52ဘုရားရှင်နာ အာဏာပြောင်ဟေကားခေါင်းဆောင်ရက်အင် အမာရက်ကရာထူယာဘင်းအဟြတ်ကို့
နှိမ့်ချဟေကား လူးရက်အင်က(လ်) အရေးပါဟေကားလူးရက် ဖြစ်ဇိစ်လင်ကဟေ။
53ဘုရားရှင်နာ ပုတ်ရုန်တုန်းဟေက လူးရက်အင် မှီးဟေကားအစာအာဟာရအီးဂို့
သူဌေးရက်အင်က(လ်) လက်ဗလာအိမ်ဖြောက်ဟေ။
54-55ဘုရားရှင်နာ ငါရက်က ဘိုးဘေးဖြစ်ဟေကား အာဗြဟံအိမ်အမာက မျိူးရိုးစဉ်ဆက်ရက်အင်
ရက်ပိုက် ကရုဏာတရားပီယန်ကားငါ့ကို့ ကတိအီဒက်ဟေ။
အတတ်ကအချိန်ငါ ဘုရားရှင်နာ ကတိတော်ယင် သတိလှုကို့တုန်းငင်နန်း။
မှအကြောင့် အမာနာ ငါရက်အိမ် အမာကအမူတော်ယင် ထမ်းဆောင်ဟေကလူး အစ္စရေးလူမျိုးရက်အင် ကူညီမစယင်နန်း"
ငါ့ကိုဘုရားရှင်ကဂုဏ်တော်ငင် ချီးမွမ်းလင်ကဟေ။ 56ကျီးကအိမ် မာရိနာ ဧလိရှဗက်အိမ်မက်တာ သုံးလခန့် ဆက်ကို့တုန်းကျီးကရပ် နာဇရက်မြို့ဝါငါ့ဟေကား အမာကိန်းငါပြန့်ငန်လင်ကဟေ။
ယောဟန်ယင် ကေကအိမ် အမိန်းအီဟေကား
57ကျီးကအိမ် ဧလိရှဗက်စာ ကေကဇိစ် အချိန်ထုန်ဗာ(ဖ်)ကရပ် အဆာတာဆဗြိုင်းဟူးဝါယင် ကေလင်ကဟေ။ 58ဧလိရှဗက်ကကိန်းတောင်ဘင်ရက်အိမ် ဆွေမျိုးရက်နာ ဧလိရှဗက်ကအပေါ်ဝါ ဘုရားရှင်နာ ကြီးမြတ်ကကရုဏာတော် ဆနပ်ဟေကအကြောင်းငင် တတ်ဂို့နာချေးပီးကတောင်း ဧလိရှဗက်အိမ်မက်တာ ဝမ်းမြောက်ပျော်ရွှင်လင်ကဟေ။ 59ကျီးကအိမ် မန်းဆာကေကျီးဂို့ ရှစ်ရက်မြောက်ဟေကားရယက်အာ အရေဖျားလှီး#1:59 မောရှေပညတ်ကျမ်းအရ တာဆာပြိုင်းဆာရက်က အင်္ဂါထိပ်အလက်အင် ဟန်ဟေကား မင်္ဂလာဒေကားလိစ်ပိုက ဝတ်တ္တရားရက်အင်လိစ်ကဇီစ် လူးရက်ထုန်ဗာ(ဖ်)ဟေကရပ် အမာရက်နာ မာန်ဆာဂါအမိန်းငင် အဗာ(ဖ်)ဖြစ်ဟေကား ဇာခရိကအမိန်းငင်လာဂိုး ဇာခရိငါ့ကို အမိန်းအီကက်ကဟေ။ 60ညီးငါ့ဒင့်ယေ မာန်ဆာကားအနူးနာ "အရိပါ(လ်)၊ အမင် ယောဟန်ငါ့ကို အမိန်းအီပိုကား" ငါးဂို ငှားလင်ကဟေ။ 61အိမ်မှအခါ လူးရက်အ(လ်) ဧလိရှဗက်ယင် " ညီငါ့ဒင့်ယေ့ နင်ကမျိုးရိုးထဲယာ အတတ်ကဒေလေက အမိန်းအငါပါ(လ်)"ငါ့ကို င့ါလင်ကဟေ။ 62မှနောက်အာ အမှာရက်နာ မန်းဆာဂါးအဗာ(ဖ်)ဖြစ်ဟေကလူး ဇာခရိအင် တာဟူးအိမ်ဆနပ်ဂို အဆာမီကအမိန်းငင် အီကက်ဟေယားငါ့ကို ကတာလင်ကဟေ။ 63အိမ်မကရပ် ဇာခရိနာ သင်းပုန်းတစ်ချပ်အင် စိန်လားဂို အမှာဂါအဆာကအမိန်းနာ ယောဟန်ဖြစ်ဟေငါးဂို ရေးဆနပ်လင်ကရပ် ပိုဟေကလူအပေါင်းရက်အ(လ်) အံ့ဩကလင်ကဟေ။ 64ကျီးကအိမ် ချင်းချင်ဒင့် ဇာခရိနာ ပြန့်ကိုတူး(ဖ်)ပြိစ်လှုယောဝန်ကို့ ဘုရားရှင်းဂါဂုဏ်တော်ဝင် စကို့ချီးမွှမ်းလင်ကဟေ။ 65ကိန်းနားကလူးရက်အိမ် ဆွေမျိုးဆန်းစူရက်နာ အိမ်မှအဖြစ်အပျက်အင်ပိုဟေကရပ် အစက်လင်ကဟေ။ မှတောင်မာဒင့် လူးဆန်းစူရက်နာ အိမ်မှသတင်းငင် ယုဒပြည်တောင်ပေါ်ဒေသက နေရာတိုင်းငါ ငှားတုန်းလင်ကဟေ။ 66အိမ်မားသတင်းရက်အင် တတ်ပေါ်ကားလူးအပေါင်းရက်အ(လ်) "မှမန်ဆာပြာနဲ့က(လ်) အဆာမိကလူးဖြစ်အန်ကယား"ငါ့ကို အမာရက်က စိတ်ထဲယာတွေးကို့ စိတ်ဝင်တစား ငါ့တုန်းလင်ကဟေ။ အကြောင်းငါနာ ဘုရားရှင်ကတန်ခိုးတော်ယဲ့ မန်ဆာအိမ်မက်တာ ငါတုန်းဟေကအကြောင်းဖြစ်ဟေ။
ဘုရားရှင်ကဂုဏ်တော်ယင် ဇာခရိချီးမွမ်းဟေကား
67မှနောက်အာ မန်ဆာကအဗား(ဖ်) ဇာခရိနာ ဉာဏ်အလင်းတော်#1:67 ဉာဏ်အလင်းတော် ဉာဏ်အလင်းတော်ငါ့ဟေကနာ အဗား(ဖ်)ဘုရား၊သားတော်ယေရူ၊ ဉာဏ်အလင်းတော်ငါ့ဟေကား သုံးပါးတစ်ဆူထဲယာက တတိယတစ်ပါးဖြစ်ဟေက ဦးဆောင်မူအိမ် ဘုရားရှင်က သတင်းတူး(ဖ်)ယင် ငါ့ဆနပ်ကနာ
68ဇာခရိနာ "အစ္စရေးလူမျိုးဆန်စူရက်က အရှင်သခင်ဖြစ်ဟေကား ဘုရားရှင်ဂါး ဂုဏ်ကျေးဇူးတော်ဝင် ငါချီးမွမ်းနက်ဟေ။
ကိုယ်တော်နာ အမာကလူမျိူးအပေါင်းရက်အင် လွတ်မြောက်အီကဇိစ် ကြွဗန်(ဖ်)နန်း။
69ဘုရားရှင်နာ အမာကအငှားဆာဘုရင်ဒါဝိဒ်မျိူးရိုးငါဘင်း ဆင်းသက်ဗန်ဟေက တန်ခိုးအာဏာပြောင်ဟေကား
ကယ်တင်ရှင်ယင် ငါရက်ကအတွက် ဖြောက်အန်နန်း။
70မလားကရပ်ပင့် ဘုရားရှင်စာ အမာကမြင့်မြတ်ဟေကား ပရောဖက်ရက်အာဘင်းတစ်ဆင့် ငါ့ပီးဒက်ကအတိုင်း
71မှတန်ခိုးပြောင်ဟေကား ကယ်တင်ရှင်စာ ငါရက်အင် ရန်သူအပေါင်းရက်ကအန္တာရာယ်ယာဘင်း ကယ်တင်ကတောင်မှာဒင့်
အနာလိုကလူးရက်က ဘေးအန္တရာယ်ယာဘင်းယေ့ ကင်းလွတ်ဇိစ်လင်ကဖြစ်ဟေ။
72ဘုရားရှင်နာ အမာကဂရုဏာတရားယင် ငါရက်ကဘိုးဘေးရက်ဇိစ် ဆနပ်အန်ကအကြောင်းအိမ်
အမာကမြင့်မြတ်ဟေကား သဘောတူညီမူရက်အင် ရက်ပိုက်တွက်ကို့လှုလင်ကားငါ့ကို ငါ့ပီးဒက်လင်ကဟေ။
73ဘုရားရှင်နာ ငါ့ရက်ကား ဘိုးဘေးဖြစ်ဟေကား အာဗြဟံယင် ကတိအီပီဟေကအတိုင်း
74-75ငါရက်အင် ဘေးကအန္တရာယ်အီဟေကား ရန်သူရက်ကတာဟူးဝါဘင်း ကယ်တင်အီကို့
ငါရက်အ(လ်) အဆက်ဆိမ်းတုန်းကကာလပတ်လုံး ဘုရားရှင်ကရှေ့ယာ
မြင့်မြတ်ခြင်းအိမ် ဖြောင့်မတ်ခြင်းငါကို
အကြောက်တရားကင်းကင်းအိမ် ဘုရားရှင်ငင် ဝတ်ပြုကိုးကွယ်လင်လှူကား"
ငါ့ကို ဖြစ်ဟေ။
76မှနောက်အာ ဇာခရိစာ အမာကအဆာယင်
" ငါကားအဆာ၊နင်ငင် အမြင့်မြတ်ဆုံးက ဘုရားရှင်ဂါ ပရောဖက်ငါ့ #1:76 ဖစ်ဗားဂါအကြောင်းရက်အင် ဟောဆနစ်ကလူ(ဘုရားကတူးဝါးတစ်ဆင့်ခံငှားဟေကားလူ)ဂို့ အော်လင်ကာဖြစ်ဂို့
ကိုယ်တော်ယေရူကြွဗန်ကလင်းငင် ကြိုတင်ပြင်ဆင်အီးဂါလူးယေ ဖြစ်လင်ကား။
77ကိုယ်တော်ယေရူနာ လူရက်ကအပြစ်ရက်အင် ခွင့်လွတ်ကို့
ကယ်တင်ကအခွင့်ငင် အီကဇိစ်ဗန်တုန်းနန်း ငါဟေကအကြောင်းငင်
နင်စာ လူးရက်ဇိစ် ဟောဆနပ်လင်ပေါ်ကား။
78-79ဘုရားရှင်နာ ငါရက်ကအပေါ်ဝါ ကရုဏာတရားပြောင်ကတောင်း
အမာကလူမျိုးရက်အင် ကယ်တင်လင်ကဖြစ်ဟေ။ အပင်းမတ်စောစောကပြုဟေကစမိတ်နာ
အလင်းရောင်ငင်အီဟေကဒေလေ ဘုရားရှင်ထနဲ့ဘင်းဗန်ဟေကား မေရှိယယေ့
ဘုရားတရားအချေးကလူးရက်အိမ် ဆိန်းပေါ်ကအစက်တုန်းကလူးရက်အင် ကူညီအီကဇိစ်
ကြွဗန်လင်ကား။ အမာနာ ငါရက်ကလူးစုတ်ရက်အင်
ငြိမ်းချမ်းဟေကားလင်းငင် ဦးဆောင်ကိုလင်းဆနပ်အီယန်ကား"ငါ့ကို ငါ့လင်ကဟေ။
80အတတ်ကအခါ ယောဟန်စာ ပြာယောဝန်ကအလိုက် စိတ်ဓာတ်ကြံခိုင်ကလူး ဖြစ်ယောဝန်ကို့ ဘုရားရှင်နာ အမင် အစ္စရေးလူမျိူးရက်ကရှေ့ယာ အမူတော်ယင် စတင်ကိုလိစ်ဇိစ်ကက်ဟေကား ရယက်အထုန်မိ အမာစာ မလိမ်းကန္တာရအထဲယာ တုန်းလင်ကဟေ။
ទើបបានជ្រើសរើសហើយ៖
လုကာ 1: CKH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Thet (သက်) Bible by Beyond Translation is licensed under Creative Commons Attribution-ShareAlike 4.0 License.