ရှင်လုကာ 4
4
အခန်း (၄)
ကိုယ်တော်ယေရှု မာရ်နောတ်စငေါလ် ဖြားယောင်းအခံခေါမ်
(ရှင်မဿဲ ၄:၁-၁၁။ ရှင်မာကု ၁:၁၂-၁၃)
1အင်မ်ပါလ်နောလ် ကိုယ်တော်ယေရှုခေါမ် ဂျော်ဒန်ဂူဝေါလ်ကိ အလူးဘွာလ်ဟိုဝေါလ် ဉာဏ်အလင်းတော်ခေါမ် ကိုယ်တော်ဓေါလ်ဟှတောလ် အမယ်။ ဉာဏ်အလင်းတော်နား လာမ်းဓေါင်ခန်းနောလ် ကိုယ်တော်ယေရှုခေါမ် ခေါင်မယ်နောက်ယဒိုင်ဒုလ့်ကာလ် အဈာတ်။ 2အင်မ်ဓိလ်နောလ် မာရ်နောတ်နား ဖြားယောင်းခေါမ် ခူနှိုပ် ဖီးကိပ်ဓီဝေ့ အခံဟိလ့်။ အင်မ်ခုနှိုပ်လှီ့အောလ် ကိုယ်တော်ယေရှုနား အီခါအအေယခန်းနောလ် အင်မ်ခုနှိုပ်လှီ့အဘွတ်ဟိုဝေါလ် ဘုနားအဒီဝေလူ။
3မာရ်နောတ်နား ကိုယ်တော်ယေရှုအောလ် “နာင်နောက်ခေါမ် ဖုလော်ရှင်နားအစိုး မှန်ဟိုဝေါလ်စေး နီလုံးခေါမ် ပေါင်မုန့်ကာလ်ထောလ်ဟနောလ် အမိန့်ပေးယား” တိရို အဟောင်။
4အင်မ်ဟိုဝေါလ် ကိုယ်တော်ယေရှုနားခါ “ကျမ်းစော်ဝေါလ် ခေါင်လှီ့နောက်ခေါမ် အေအော့တ် အူဟှတ်တွက်ကာလ် ဆောက်င်ဟင်ခေါမ် ဆီးယော် တိရို အရော့ကယ်” တိရို အဟောင်။
5အင်မ်ပါလ်နောလ် မာရ်နောတ်နား ကိုယ်တော်ယေရှုခေါမ် ကုန်းတိန်ဟြှလ်နောလ် ဈိပူနိုးထေ့နား ဆုမ်သပ့်ခုံငေါလ်ကိ ဘီလှီ့ကိမ်ကိမ် တနိုစောဝေါလ် အဓေါင်။ 6မာရ်နောတ်နား ကိုယ်တော်ဝေါလ် “ကေးရိုးပက်ခေါမ် ဘုန်းတန်ခိုးအာဏာကိမ်ကိမ်လား စည်းစိမ်လှီ့ ကေပက်ဟိုင်ကေလီခေါင်ငေါလ် ကေပက်ခွတ်ခန်းနောလ် နာင်ငေါလ် ကေပက်တိုက်။ 7အင်မ်ခန်းနောလ် ကေး ကုလုကယ်နားနာခခ်ဘွတ်ကုံးငေါလ် နီလှီ့ကိမ်ကိမ် နာင်ငေါလ် ကေပက်တိုက်” တိရို အဟောင်။
8အင်မ်ဘော်နားခါ ကိုယ်တော်ယေရှုနား “ကျမ်းစော်ဝေါလ် နာင် အရှင်ငေါလ်ထောလ်တိ ဖုလော်ရှင်ပါးဟှတ်ယောင် နာခခ်လောဒ့်အိုက်။ အင်မ်ဖုလော်ရှင် အမှုတော်ယောင် နာထမ်းဆောင်လောဒ့်အိုက် တိရို အရော့ကယ်” တိရို မာရ်နောတ်တောလ် အဟောင်ဘွာလ်။
9အထာကွန်ဟှတ် မာရ်နောတ်နား ကိုယ်တော်ခေါမ် ဂျေရုဆလင်လုအောလ်ကိ ဗိမာန်တော် အလှိန်နောက်ဓိလ်နောလ် ဈိပူနိုးထေ့နား “နာင်နောက်ခေါမ် ဖုလော်ရှင်နားအစိုး မှန်ဟိုဝေါလ်စေး နီဓိလ်ကိဆိုလ်စမား။ 10ဟိဘော်ဟိုင်ရိုး နောက်ဟိုဝေါလ်စေး
ဖုလော်ရှင်နား နာင် ကာကွယ်ဟိုင်
နောတ်ဒေဝါလှီ့အောလ် အဆိန်ဟိလ့်တိရို ကျမ်းစော်ဝေါလ် အရော့ကယ်ခန်းနောလ် နိအယ်ဟိုင် ဆီးယော်တိ။
11နာခူလှီ့ လုံးလှီ့အောလ် လမ်ယဟနောလ်
နောတ်ဒေဝါလှီ့နား အာမ်ကွတ်တောလ် အာမ်မင်နိုက်” တိရို အဟောင်။
12အင်မ်ဟိုဝေါလ် ကိုယ်တော်နားခါ “ကျမ်းစော်ဒုလ့်ကာလ်ခါ နာင်အရှင်ငေါလ်ထောလ်တိ ဖုလော်ရှင်ခေါမ် စမ်းသပ်လောဒ့်ယော်တိရို အရော့ကယ်” တိရို အဟောင်ဘွာလ်။
13မာရ်နောတ်နားခါ ကိုယ်တော်ယေရှု အယီယီဝေါလ် အဖြားယောင်းပါလ်နောလ် အင်မ်စငေါလ်ကိ ဈာတ်ဘွာလ်ထေ့နား အထာအခွင့်ပွန်လှီ့ အစောင်။
ကိုယ်တော်ယေရှု ဂါလိလဲဘီရိုး စအယ်နားအမှုတော်ဆောင်ခေါမ်
(ရှင်မဿဲ ၄:၁၂-၁၇။ ရှင်မာကု ၁:၁၄-၁၅)
14အင်မ်ပါလ်နောလ် ကိုယ်တော်ယေရှုခေါမ် ဉာဏ်အလင်းတော်ဓေါလ်ဟှတောလ် ဂါလိလဲဘီရိုး အဈာတ်ဘွာလ်။ အင်မ်ဆီးတင်ခေါမ် ဓိလ်တိုင်ငေါလ် အပျံနှံ့ရော့ခ်။ 15ကိုယ်တော်နား ဓမ္မာရုံငေါလ်ကိ#4:15 ဓမ္မာရုံ= ဆုတောင်ခေါမ်၊ စော်ဖတ်ခေါမ်၊ အင်မ်လှီ့ယုမ်ကြည်မှုလှီ့ ဆောင်ပက်ခေါမ်လား ဖုလော်ရှင် ဝတ်ပြုခေါမ်လှီ့စိုင်းဟိုင်တွက် ဂျူးခေါင်ယှီလှီ့ စုအယ်နောက်ဓိလ်။ ခေါင်လှီ့ကိမ်ကိမ်ငေါလ် ဖုလော်ရှင်အကြောင်း အဆောင်အပက်ဟိုဝေါလ် ခေါင်လှီ့ကိမ်ကိမ်နား အင်မ် အာမ်ချီးမွမ်း။
နာဇရက်လုဆော်လှီ့နား ကိုယ်တော်အာမ်ငြင်းခေါမ်
(ရှင်မဿဲ ၁၃:၅၃-၅၈။ ရှင်မာကု ၆:၁-၆)
16အင်မ်ပါလ်နောလ် ကိုယ်တော်ခေါမ် အပုန်းဟို့လန်နောက် နာဇရက်လုအောလ် အလူးဘွာလ်။ ဥပုသ်နှိုပ်ပါလ် ကိုယ်တော်ခေါမ် ဓမ္မာရုံငေါလ် အဈာတ်ဆော်ဘော် ဈာတ်ထေ့နား အင်မ်ဓိလ်နောလ် ကျမ်းစော်ဖတ်ဟိုင်ရိုး အတုလ်။ 17ပွလ်ဟှတ်ဟှတ်နား ကိုယ်တော်ဝေါလ် ပရောဖက်ဟေရှာယ ကျမ်းစော်လိပ် အပက်ခန်းနောလ် အဖွင့်ဟိုဝေါလ် အင်မ်ကျမ်းပိုဒ်ရိုးအရော့ကယ်ခေါမ် အမှူးခန်းနောလ် အဖတ်။
18အင်မ်ကျမ်းစော်လိပ်ကာလ် ရော့ကယ်တိစေး “ဖုလော်ရှင်ဉာဏ်အလင်းတော်ခေါမ် ကေးဓေါလ်ဟှတ်တောလ်အမယ်။
ဟိဘော်ဟိုင်ရိုးနောက်ဟိုဝေါလ်စေး စါက်ကယ်တိလှီ့ ကယ်တင်ဟိုင် ဆီးတင်ပွန်လှီ့ဟောဟိုင်ရိုး ကေးခေါမ် ဖုလော်ရှင်နား အရွေးကောက်။ ထောင်ကိုးတိခေါင်လှီ့ လွှတ်ခွင့်လောဒ့်ဘွာလ်ဟိုင်၊ မိတ်မှူးယတိလှီ့ အဝြာလောဒ့်ဟိုင်လား ဆိတ်ခံလောဒ့်တိခေါင်လှီ့ လွှတ်ဘွာလ်ဟိုင်အကြောင်း ဟောဟိုင်တွက်ကာလ် ဖုလော်ရှင်နား ကေး အတိလူး။
19နီအချိန်နောက်ခေါမ် ဖုလော်ရှင်နား အပုန်းဟို့ မာနယ်လန်ခေါမ်
အဓေါင်နောက်ခေါမ် အဟောခေါမ်အချိန်ငေါလ် အထောလ်”
တိရို အထောလ်။
20အင်မ်ပါလ်နောလ် ကိုယ်တော်ယေရှုနား အင်မ်ကျမ်းစော်လိပ် လိပ်ထေ့နား ဓမ္မာရုံစောင်တိအောလ် ပေးဘွာလ်ထေ့နား အငွာဟိုဝေါလ် ခေါင်လှီ့နား ကိုယ်တော်ခေါမ် ဓေါ့်ကုံးငေါလ်အာမ်ဓေါ့်ဝေ။ 21အင်မ်ပါလ်နောလ် ကိုယ်တော်နား အင်မ်လှီ့အောလ် “နာင်မီး ယှောက်လောဒ့်ခေါမ် ကျမ်းပိုဒ်လှီ့ တုနှိုပ်ပါလ် အမှန်ကုံးငေါလ် အထောလ်လူးပါလ်” တိရို အမိန့်။ 22အင်မ်ဓိလ်နောလ်မယ်တိလှီ့ခေါင်လှီ့နား ကိုယ်တော် ချီးကျူးထေ့နား ကိုယ်တော် မိန့်ခေါမ်ခေခေါလှီ့ စါစ်နိုးဗာန် “နီခေါင်စေး ယောသပ်စိုး ဆီးယော်ဝြာ” တိရို ပွလ်ဟှတ်လားပွတ်ဟှတ် အာမ်ခေဝေတောင်။
23ကိုယ်တော်ယေရှုနားခါ အင်မ်လှီ့အောလ် “ဓူဆလော် နောက်ခေါမ် အပုန်ဟို့နားအပုန်းဟို့ အရင်ငေါလ် ဓူဝေယား တိရို ဟောင်ခေါမ် ခေခေါဘော် ကပေရနောင်လုအောလ် နာစိုင်းဟိလ့်ခေါမ်လှီ့တက ကေးမီးနား ကာမ်ရောက်လောဒ့်ဘော် နာင်ဇာတိလုအောလ်ထောလ်တိ နီရိုးခါ စိုင်းယား တိရို ကေးရိုး နာမ်ဟောင်ဝိုက်။ 24အင်မ်ဘော်နားခါ နာင်မီးရိုး ကေးနား အမှန်ဟောင်ဟိုင်ကေလီခေါမ်စေး အီဘောင် ပရောဖက်ခါဆီးဆက် ပုန်းဟို့ မွေးရပ်ဇာတိအောလ်ကိ ခေါင်လှီ့နား လက်ခံယော်ဟ။ 25အထာခါအမှန်တိ ကေးနား ကေဟောင်လောဒ့်အိုက်နောက်ဟိုဝေါလ်စေး ပရောဖက် ဧလိယခေတ်ရိုး အစ္စရေးဘီရိုး မှလ်နူးလှီ့ ပူနူးအာမ်မယ်။ အင်မ်ချိန်ငေါလ် ကုမ်ထုမ်ဆလာခွဲဘောင် ခူအကောင်ခန်းနောလ် မိဟာတ့်ခေါမ်လှီ့ ဘီရိုးကိဓိလ်တိုင်ငေါလ် အာမ်ခံဟိလ့်လောဒ့်။ 26အင်မ်ဘော်နားခါ ဖုလော်ရှင်နား ပရောဖက်ဧလိယခေါမ် အစ္စရေးဘီရိုးကိ မှလ်နူးလှီ့စငေါလ် ကူညီဟိုင် တိယကော် ဇိဒုန်ဘီရိုးကိ ဇရတ္တလုအောလ်မယ်တိ ဂျူးခေါင်ယှီဆီးယတိ မှလ်နူးပွလ်ဟှတ် ကူညီဟိုင် အတိ။ 27အင်မ်အပြင် ပရောဖက်ဧလိရှဲခေတ်ရိုး အစ္စရေးဘီရိုး အနာကြီးရောဂါမို့လှီ့ ပူနူးအာမ်မယ်။ အင်မ်ဘော်နားခါ အင်မ်လှီ့ဒုလ့်ကာလ် ဂျူးခေါင်ယှီဆီးယတိ ဆီးရီးယားဘီဆော် နေမန်ရိုးကိ လွဲထေ့နား ပွလ်ဟှတ်ခါ ဓူဓူဝေခေါမ်ခံလောဒ့်ယော်ဟ” တိရို အမိန့်။
28အင်မ်ဟိုဝေါလ် ဓမ္မာရုံဒုလ့်ကာလ်ကိ ခေါင်ထုလှီ့ကိမ်ကိမ်နား ကိုယ်တော်ယေရှု ဟောင်ခေါမ်ခေခေါ အာမ်ယောက်ဟိုဝေါလ် တပြင်းကုံးအာမ်လုန် ဆဆုခန်းနောလ် 29ထော့ထေ့နား ကိုယ်တော် လုပြင်ငေါလ် ဆှုတ်လုတ်ထေ့နား လော်ရိုးပုဟိုင်ရိုး လုတီနောက်ကုန်းဟြှလ်နောလ် အာမ်ဈိပူနောက်။ 30အင်မ်ဘော်နားခါ ကိုယ်တော်ယေရှုခေါမ် ခေါင်လှီ့တူဝေါလ်ကိ ဈာတ်ဗာန် အကြွဘွာလ်။
နောတ်ဆီး ဆှုတ်ခေါမ်
(ရှင်မာကု ၁:၂၁-၂၈)
31အင်မ်ပါလ်နောလ် ကိုယ်တော်ခေါမ် ဂါလိလဲဘီရိုးမယ်တိ ကပေရနောင်လုအောလ် ဈာတ်ထေ့နား ဥပုသ်နှိုပ်ပါလ် ဓမ္မာရုံငေါလ်မယ်တိ ခေါင်ထုလှီ့အောလ် ဖုလော်ရှင်နှုတ်ကပတ်တော်လှီ့အဆင်ဟိလ့်။ 32ကိုယ်တော်ယေရှု အခွင့်အာဏာဓေါလ် အဆင်ခန်းနောလ် ခေါင်လှီ့နား တပြင်းကုံးအာမ်စါစ်နောက်။ 33ဓမ္မာရုံဒုလ့်ကာလ် နောတ်ဆီး ပူးကပ်ခေါမ်ခံလောဒ့်တိ ခေါင်ပွလ်ဟှတ်အမယ်။ အင်မ်နား ကိုယ်တော်ဝေါလ်
34“နာဇရက်လုဆော် ယေရှုအား၊ ကေးမီး ဟိဘော်စိုင်းဟိုင်နာလီ။ ကေးမီး ဖျက်ဆီးဟိုင် နာလူးဝြာ။ နာင် ဟအူနောက်ခေါမ် ကေးနား ကေစုတ်င်။ နာင်နောက်ခေါမ် ဖုလော်ရှင်စငေါလ်ကိလူးတိ မြင့်မြတ်တိအောလ်နာထောလ်” တိရို ပါငယ်နား အာမ်ဟောင်။
35အင်မ်ဟိုဝေါလ် ကိုယ်တော်ယေရှုနား နောတ်ဆီးရိုး “တပ်ကာလ်မယ်ထေ့နား အင်မ်ခေါင်စငေါလ်ကိထွက်လူးဝြား” တိရို အမိန့်အပက်။ အင်မ်နောတ်ဆီးနားခါ အင်မ်ခေါင်ခေါမ် ခေါင်လှီ့မော်ဝေါလ် သပ့်ခုံငေါလ်ဟြမ်းဘောင်းဟနောလ် စိုင်းထေ့နား အန္တရာယ်ပေးကော်ဝေါလ် အထွက်ဘွာလ်။
36ဓမ္မာရုံငေါလ်ကိ ခေါင်လှီ့ကိမ်ကိမ်နား စါစ်နိုးထေ့နား “နီစေး ဟိဘောင်ခေခေါလှီ့။ နီနား အတန်ခိုးလားအခွင့်အာဏာဓေါလ် နောတ်ဆီးလှီ့အောလ် အမိန့်အပက်ဟိုဝေါလ် အင်မ်နောတ်ဆီးလှီ့ ခေါင်လှီ့စငေါလ်ကိ အာမ်ထွက်လူး” တိရို ပွလ်ဟှတ်လားပွလ်ဟှတ် အာမ်ဟောင်ဝေတောင်။ 37အင်မ်ပါလ်နောလ် ကိုယ်တော်ဓေါလ် ပတ်သတ်တိဆီးတင်လှီ့ ဓိလ်တိုင်းငေါလ် အပျံနှံ့လှာလ်။
ခေါင်လှီ့ရောဂါ ဓူပက်ခေါမ်
(ရှင်မဿဲ ၈:၁၄-၁၇။ ရှင်မာကု ၁:၂၉-၃၄)
38ကိုယ်တော်ယေရှုခေါမ် ဓမ္မာရုံငေါလ်ကိ ထွက်ထေ့နား ရှိမုန်အိမ်းမာလ် အဈာတ်ဟိုဝေါလ် ရှိမုန်နား အပူစာခေါမ် တပြင်းအကွားခန်းနောလ် ခေါင်လှီ့လား ကိုယ်တော်ဝေါလ် အင်မ်မုတော ဓူပက်ဟိုင် အာမ်တောင်းဆို။ 39အင်မ်ခန်းနောလ် ကိုယ်တော်ခေါမ် အင်မ်မုတောကာဝေါလ် တုလ်ငယ်ထေ့နား အကွားခေါမ်ရောဂါ ခိတ်ဘွာလ်ဟနောလ် အမိန့်ပက်လား အင်မ် စာန်းမားဘွာလ်ခန်းနောလ် ချက်ချင်းထော့ထေ့နား အင်မ်လှီ့ အေအောတ်လှီ့ဓေါလ် အခိန်းနောက်။
40ခူမီလူးဟိုဝေါလ် ခေါင်လှီ့နား ရောဂါအယှီယှီဝေါလ် ထောလ်တိလှီ့ နိမို့လှီ့ ကိုယ်တော်စငေါလ်အာမ်လူပူနောက်။ ကိုယ်တော်သည် အင်မ်ခေါင်လှီ့ပွလ်ဟှတ်စီမာလ် အကွတ်တင်ထေ့နား အဓူပက်။ 41နောတ်ဆီးလှီ့ခါ နိမို့လှီ့စငေါလ်ကိ ထွက်ဘွာလ်ထေ့နား “နာင်နောက်ခေါမ် ဖုလော်ရှင်နားအစိုးယောင်” တိရို အာမ်ပါ။ ကိုယ်တော်ယေရှုခေါမ် မေရှိယနောက်ခေါမ် အာမ်စုတ်င်ခန်းနောလ် ကိုယ်တော်နား အင်မ်လှီ့ အင်မ်ဘော် အာမ်ပါယဟိုင် အမိန့်အပက်။
ဓမ္မာရုံလှီ့အောလ် ကိုယ်တော်နား တရားဟောခေါမ်
(ရှင်မာကု ၁:၃၅-၃၉)
42အထာနှိုပ်ဟှတ် ခူဝြာဟိုဝေါလ် ကိုယ်တော်နောက်ခေါမ် ခေါင်လှီ့ဓေါလ်လှမ်းနောက်ကာလ် အဈာတ်ဘွာလ်။ အင်မ်ဘော်နားခါ ခေါင်ထုလှီ့နား ဆူထေ့နား အမှူးဘွာလ်ဟိုဝေါလ် အာမ်ပုန်းဟို့စငေါလ်ကိ အဈာတ်ဘွာလ်ယဟိုင် အာမ်ခို့အယ်။ 43အင်မ်ဘော်နားခါ ကိုယ်တော်နား “ကေးနောက်ခေါမ် အစွာလုအောလ်ကိ ခေါင်လှီ့အောလ်ခါ ဆီးတင်ပွန်ရိုးထောလ်တိ #4:43 ဖုလော်ရှင်သာသနာတော်= ဖုလော်ရှင်သာသနာတော် နောက်ခေါမ်စေး မေရှိယအောလ်ထောလ်တိ ကိုယ်တော်ယေရှု ယုမ်ခေါမ်ငေါလ်ကထုဆင့်ဟှတ် ဖုလော်ရှင် နာခံခေါမ်၊ ယုမ်ခေါမ်၊ ကိုးကွယ်လူးခေါမ်အကြောင်းငေါလ်ထောလ်။ဖုလော်ရှင်သာသနာတော်အကြောင်းလှီ့ ကေဟောလောဒ့်အိုက်။ အင်မ်ဘော် ဟောဟိုင်တွက်ကာလ် ဖုလော်ရှင်နား အတိလူးယောင်” တိရို အမိန့်။ 44အင်မ်ပါလ်နောလ် ကိုယ်တော်ယေရှုနား ယုဒဘီရိုးကိ ဓမ္မာရုံလှီ့အောလ် ဆက်ကယ်နား တရားအဟော။
ទើបបានជ្រើសរើសហើយ៖
ရှင်လုကာ 4: CSJ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.