Yohan 1
1
Yĕsu dä kheu la sawk
1Achah täh känäng Kheu mäi chän hüt, awlaw Kheu che Hnadaga ängtu mäi hüt, awlaw Kheu che Hnadaga mäi hüt. 2Achah täh känäng Kheu che Hnadaga ängtu mäi hüt. 3Ani ängtu Hnadaga la ükütni ibi hüt. Awlaw bi hmuei saw khäl kheni Ani kaw iha bi hmueyah. 4Äi kheu äng awsawk mäi hüt awlaw äi sawk la luhchaw khäl khäka awa lo hüt. 5Äi awa che uhiyung äng choi bala mäi, awlaw awa khrung äng u hiyung che ong hnängah.
6Hnadaga la khrawng hngata teh, ani ming che Yohan. 7Ani lo saw che khrawng khäl khäka awa krong äng sawksi thoka. Äihi awa kheu yaw ula khrawng khälla awa a yumei hmawna. 8Yohan äi awa mäi hütah, äini ani olo hüt saw che äi awa krong äng sawksi thoka. 9Äi awa dä ihisaw awa. Äi awa la hang hang khrawnga awa pekai. Ni awa luhdül äng olo tun. 10Ani luhdül äng ämäi hüt, Hnadaga la Ani ängtu luhdül bi hüt thän khrawng khälla Ani a hmawt hüt u. 11Ani upum khrawng khäl khäka lo, äini upum khrawng khälla Ani a lawei u. 12Äini äi khäl dukäng käh ula bang Ani a ini lawkei äm awlaw Ani ming ini yumei äm, anih kheni la Hnadaga chaw chuhnu ini thäneyeih saw ini pängei. 13Ni khrawng khäl luhdül äng ini lo saw äng Hnadaga chaw chuhnu ini thänei saw hiyah. Äini anih la ini yumei saw koong dä, Hnadaga kädäng dä anih Paw thänei saw.
14Äi Kheu khrawnga thänei, äidä nangkei ängtu mäi. Äi Khrawng ihisaw la khetjen äng luih. Paw Hnadaga käh hngat pätpät Chaw thänei bala, i a wachang bang mäi äm, äi wachang keinih kini hmuh.
15Yohan la Ani krong äng athak hek bala sawksi thok, “Nidä äi khrawng, u käh kheu kei kawhawu hüt saw äm. Ani kei pänäng lo aih saw, äini Ani kei thawka elen khäh. Iyaäm kei khawngah Ani sawkbrat mäi hüt.”
16Iyaäm Ani khetjen äng luih hüt, äidä äi khetjen känäng Ani la nangkei a hngat pänäng hngat ajap jap pisih khrawng pek. 17Hnadaga la Mosi a sumei bala nangkei käh nuchen pawsawk khäla thung pek hüt. Äini khetjen la ihisaw che Yĕsu Krito känäng dä lo saw. 18Hnadaga a hngat la ha krängak ha hmu u. Ani ängtu mäitih hngat pätpät chaw, Ani kädäng Hnadaga, Ani la dä nangkei a Hnadaga a khrawng dawn saw.
Tuilüh pektih Yohan la Yĕsu krong äng sawksi thok
Mathi 3:1-12; Mak 1:1-8; Luk 3:1-18
19Yĕlusalema käh Yudi lenchaw khälla Yohan khäka pujawtih khäl awlaw Lebi khäla ini teh. Anih la ini hi, “Nang u äm?” 20Yohan la iha thuh eiyah pak prongh brongh atak, “Kei Mesaya hi nga.” 21Äidä anih la ini hi, “Bahi nang u äm? Nang Elija ei?” Yohan la krawn bala takal, “Ä häh, kei hinga.” Anih la awlaw ini hi, “Bahi nang äi Hnadaga sidawng hiyawktih ei?” Ani la krawn bala takal, “Ä häh.” 22Äi khaw a anih la ani a ini tak, “Bahi nang u äm? Keinih a nang khäka khrawng te tih khäla i kana takalaih saw äm? Nang nupuma khrawng khäl khäka iba ting natakei äm?” 23Yohan la anih a tak, “Kei dä äi khrawng, u käh kheu Hnadaga sidawng hiyawktih Aijaya la awhawu hüt saw äm.”
“Ala honga asam hngat la hek bala awhawu tun,
nangnih Boi käh lawm phrongh khäl.”
24Ayang teh hmuei hüt däktih pujawtih la Lebi khäla Pherasai#1:24 Pheresai khäl che Yudi yapsaw äng käh hngat awsawng. Anih la phüh ha düna phüh ak la achang ini thänei saw Hnadaga käh thung khäl mama ini täm. Awlaw Yudi khälla ini mongkhok äng ini sumei saw thung khäl ha mama ini täm. Anih la düsaw känäng ini thoual saw ini yum. khälla Yohan a hi ya ini teh hüt. 25Anih la ini hi, “Nang dä Krito hiti hi, Elija ha hiti hi awlaw äi Hnadaga sidawng hiyawktih ha hiti hi, iya nang khrawnga tuilüh nepek saw äm?” 26Yohan la krawn bala atakal, “Kei tui äng khrawng khäla tuilüh kepek tun, äini nangnih dukäng pochongak mäi khäh, Ani a nangnih hmawt chu. 27Ani kei pänäng olo tun, kei Ani käh thanap jäi kusuh aih saw bang tawn nga.” 28Ni khäl Betani nama thänei hüt, äi Betani nam che Yawldan hlong chupawt kawma mäi hüt. Ni Yawldan hlong a Yohan la tuilüh chi epek hüt.
Yĕsu che Hnadaga käh Samphomah chaw
29Hnüpak pänäng Yohan la ani pawta Yĕsu olo tun saw hmu bala tak, “Luhdül äng käh ngulai kheni awhlawm hlaw a chiyalaih tih Hnadaga käh Samphomah chaw#1:29 Hnadaga käh samphomah chaw Yudi khälla kiyawtal saw päi äng samphomah ini hlusaw huih Yohan la nia Yĕsu a ha Hnadaga käh Samphomah chaw a poh. (1 Corinth 5:7) awlaw thung phem Boih äng samphomah a che jelkhiyamsa hlu ting ini sumei chi. (Lev. 3:1-9, 23:19). che ni. 30Ni hnäh äi khrawng, u käh kheu kei pänäng olo tun ting kawhawu hütäm. Ani kei thawka elen khäh. Iyaäm kei luhdül äng lo khawngah bang Ani che sawkbrat mäi chän. 31Ani u äm Kei hmawt hüt nga, äini kei khrawng khäla tuilüh kepek saw Isawlael yapsaw khälla Ani u äm äi hmawt hmawna.”
32Awlaw Yohan sawksi thok, “Kei Hnadaga käh Asanh chang Khraw a Hawn pre känäng khongkho huih Ani ludäma olo saw la üdüm saw kuhmuh. 33Awlaw kei Ani a hmawt hüt nga, äini Hnadaga la kei a tuilüh peka eteh khaw a, Hnadaga la kei a atak, ‘U khrung äng Asanh chang Khraw kom bala olo saw la üdümsaw nini hmuh äm, Ani dä äi khrawng, Ani la khrawng khäla Asanh chang Khraw äng tuilüh epekai.’ 34Kei äi kuhmuh awlaw sawksi kothok, Ani dä Hnadaga Chaw.”
Yĕsu la täkchah tebeih a panei
35Awlaw hnüpak pänäng Yohan ani tebeih pochong hnih äng äiya ja bala mäi. 36Äi khaw a Yĕsu a chonei tun saw hmu bala che Yohan la tak, “So hnih, nidä hngat, Hnadaga käh Samphomah Chaw huih.” 37Äi tebeih pochong hnih la Yohan käh kheu yaw häih la Yĕsu hnung äng i hni chet. 38Yĕsu u hnung pawta hlĕyei bala a hnih i hni lo tun saw hmuh ni ihi, “Nang hnih i nihni sui saw äm?” A hnih la krawn häih la i hni tak, “Rabi” (ni kheu naw krawnal hi “Choktih.”) “Nang mawnga nämäi saw äm?” 39Ani la tak, “Lo hnih tila aso hnih.” Ani mäi chi saw la sota i hni chet khaw a, ümülawm pai hli meng. A hnih la Ani käh la i hni hmuh, äi hnüpak Ani ängtu i hni mäiyal cha hnäh. 40Yohan käh kheu yaw häih la Yĕsu hnung äng chet hüttih äng käh pochongak ming che Endu. Ani che Simon Pitol nawu. 41Endu la awnawu Simon a suiyal hiyawng bala tak, “Kei hnih Mesaya a kihni khom.” (Mesaya naw krawnal hi, Krito ting thänei) 42Äi khaw a Endu la Simon a Yĕsu khäka olo. Äi khaw a Yĕsu la Simon pawta so ei bala tak, “Nang Yohan chaw Simon, khrawng khälla nanga Koipha ting anang paneyei.” Äi ming naw krawnal khaw Pitol ting thänei. (Pitol naw krawnal hi, lung).
Philip la Nathaniel a Yĕsu la panei
43Äi ngo kawthawiya Yĕsu Galila chetaih koong po ei bala mäi. Ani la Philip a sui bala bün ni tak, “Kei ängtu lo.” 44Philip Betsida mräh a käh khrawng mäi hüt, Endu la Pitol ha äi mräh a käh khrawng ihni mäi hüt. 45Philip la Nathaniel ting mingei nawtih khrawng hngata sui bala bün. Äiche ani a tak, “U kheu Mosi la thung boih hiyol äng oyok hütäm awlaw u kheu Hnadaga sidawng hiyawktih khälla ini yok hütäm, Ani äng keinih kini khomei. Ani Yosep chaw Yĕsu, Nazareta käh khrawng.” 46Nathaniel la tak, “Nazaret känäng iha awpawi olo hnäng ei?” Philip la krawn bala takal, “Lotila aso e.”
47Nathaniel a Ani pawh a olo tun saw Yĕsu la hmuh ni tak, “Ninu ekejet Isawlael chaw. Ani che hngat achang khrawng.” 48Nathaniel la Yĕsu a ihi, “Nang iba kei a ini hmawt äm?” Yĕsu la krawn bala takal, “Philip la nanga ini panei khawngah khĕu thing kawla nämäi hüt khaw a, Kei nanga kini hmuh hüt.” 49Nathaniel la krawn bala Ani a takal, “Rabi,#1:49 ‘Rabi’ ni kheu naw krawnal hi ‘Choktih’ nang dä Hnadaga Chaw. Nang dä Isawlael khäl käh mawng!” 50Yĕsu la ani a tak, “Kei nanga khĕu thing kawla kini hmuh ting kini tak koong nang Kei a ini yumei saw ei? Nang ni thawka thasa lentih bi nu hmuh ai.” 51Yĕsu la tak, “Kei nangnih a lälä kanang tak, nangnih hawn pre hongeyeih saw nini hmuh ai, Luhchaw chaw#1:51 Luhchaw chaw Luhchaw chaw ting Yĕsu la ani kädäng la Kiyam äng hawuvei. Ani la ni huih hawuvei saw iyaäm ani che khrawng chaw awlaw Hnadaga Chaw. che luhdül la hawn sakei dün hlawk. Hnadaga käh hawn natchaw khäl Luhchaw chaw khrung äng ini kom kawyei.”#Jinisis 28:12
ទើបបានជ្រើសរើសហើយ៖
Yohan 1: CSH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh