Luke 3
3
John ebeŋe mme owo Idem Ndikud Jeses
1Ke adaŋa odo Tiberius Caesar ekedide akwa edidem ke ofuri idud ke Rome ke isua efud, Pontius Pilate ekedi ada ibuod-ukara ke Juda. Herod ekedi ɔbɔŋ ke isɔŋ Galilee, ke ini eyen-eka asie, Philip ekedide ada ukara ke mme isɔŋ Iturea ye Trachonitis ndien Lysanias ekedi ada-ukara ke Abilene. 2Ke ini odo, Annas ye Caiaphas ekedi mme ikpɔ oku emi ekesinamde uwa enɔ Abasi, ndien Abasi etiŋ ikɔ ɔnɔ John, eyen Zakaria emi okoduŋde ke edisad ebied emi ibad-ibad owo ekedude. 3Ndien John ama asaŋa ayaŋ isaŋ aka ke mme ofuri nkan-ŋkuk inyaŋ emi ekotde Jordan. John ama ɔdɔhɔ mbio-obio odo ete, “Edieke mbufo eyomde Abasi efen mme idiɔk-ŋkpɔ mbufo, mbufo enyene ndiŋwɔŋɔde ŋkpɔŋ idiɔk ido mbufo, ndien ami nyeduɔk mbufo mmɔŋ.” 4Emi eketibe kpa nte oku Isaiah ekewetde ke ata anyan ini emi ekebede abaŋa John, ete,
“Owo eyefiori ke ɔkpɔsɔŋ uyo ke edisad ebied,
Ɔbɔŋ ke ɔsɔp edi,
ebeŋe idem ndisobo ye Anye.
Enam usuŋ eneghede anye ndisaŋa isaŋ mbe.
5Kpukpri ebedeŋ enyene ndiyɔhɔ,
kpukpri obod ye nkoŋ-nkoŋ-obod
enyene ndikabade una-isɔŋ.
Mme usuŋ emi ekwaŋade
enyene ndidi nnen-nnen,
ndien mme usuŋ emi ediɔkde
enyene edidiɔŋ.
6Ndien kpukpri owo eyekud anye emi Abasi ɔdɔŋde edinyaŋa nnyin.”
John Ɔkwɔrɔ-Ikɔ Ɔnɔ Mme Owo
7Mmɔdo, ediwak owo ema edi ebine John man anye ɔduɔk mmɔ mmɔŋ. Edi anye ɔdɔhɔ mmɔ ete, Mbufo ndiɔi owo emi etiede nte mme ndiɔi bɔisin-udukikɔd, Anie etiŋ enɔ mbufo ete ke emekeme ndibɔhɔ ufen Abasi emi edidide? 8Man mbufo ebɔhɔ ufen Abasi, mbufo enyene ndiŋwɔŋɔde mkpɔŋ mme idiɔk ŋkpɔ mbufo, kpa nte eto emi oŋwumde mfri. Afo unyeneke ndikere ke esid mfo ete ke Abasi idimiaha mbufo ufen kodo mbufo etode ke ubon Abraham, kodo Abasi ekeme ndinam mme itiad emi ekabade eda itie mbufo nte nditɔ Abraham. 9Ke idahaemi, Abasi ebeŋe idem ndimia mmɔ emi miwɔŋɔkede ikpɔŋ idiɔk-ŋkpɔ mmɔ ufen kodo anye etie nte owo emi akamade ekuri asie emi ebeŋede idem ndisibe nduɔk kpukpri eto emi miŋwumke eti mfri onyuŋ otop esin ke ikaŋ ndita mma.
10Ndien mme otu owo ema ebup John ete, “Nso ke nnyin inyene ndinam man ibɔhɔ ufen Abasi?”
11John ɔbɔrɔ, onyuŋ ɔdɔhɔ mmɔ ete, “Owo eke ededi emi enyenede siɔd iba, yak kied nɔ owo emi minyeneke ndomokied; ŋko edieke owo ndomokied enyenede udia, yak anye abuana ye anye mi minyeneke.”
12Mmɔ emi esibɔde utomo enɔ ukara ema enyuŋ etiene edi ebine John, man anye ɔduɔk mmɔ mmɔŋ. Mmɔ ebup anye ete, “Andikpep, nso ke nnyin idinam man otodo ibɔhɔ ufen Abasi?”
13Ndien John ɔbɔro mmɔ ete, “Ekubɔ utomo eto mme owo ewak akan se ukara ɔdɔhɔde mbufo ebɔ.”
14Ndien ndusuk mbon-ekɔŋ emi ekedude do enyuŋ ebup John ete, “Nso ke nnyiŋ ŋko idinam?” Ndien anye ete mmɔ, “Ekuyik mme owo ndinɔ mbufo okuk mmɔ, ekunyuŋ udori mme owo ŋkpɔ emi mbufo ediɔŋɔde ete ke mmɔ ikinamke, utukeodo mbufo enyene ndiyuhɔ ye okuk utom mfo ɔbɔde.”
15Kpukpri owo ke Israel ema ebeŋede idem ebed Christ edisɔp ndi. Ke ntem nte mmɔ ekpaŋde-utɔŋ enɔ John mmɔ etɔŋɔ ndikere ke esid mmɔ mme anye edi Christ odo. 16John ama ɔdiɔŋɔ se mmɔ ekekerede. Ke ntem, anye ɔdɔhɔ mmɔ ete, “Ami nda mmɔŋ nnim mbufo uduɔk-mmɔŋ, edi, owo eŋwen emi okponde akan mi ke edi, emi ami mme ndotke nditad uduk-ikpa-ukod asie nte isuŋ-utom akpanamde. Ke ini andikpon ŋkan odo edinɔde mbufo uduɔk-mmɔŋ, anye edinɔ mbufo ye Edisana Sibirid ye ikaŋ. 17Christ ebeŋe-idem ndibahade mmɔ emi ewɔŋɔdede ekpɔŋ idiɔk ŋkpɔ mmɔ, ye mmɔ odo mikpɔŋke, kpa nte ɔtɔ-iŋwaŋ emi abahadede mme mkpasip ibokpod asie osioŋo ke mme ikpɔk. Anye eyesin ibokpod asie ke ubed unim-ŋkpɔ asie, edi anye eyefɔp ikpɔk odo ke ikaŋ emi midinimeke.” 18Ye mme ikɔ ndɔŋesid emi etiede ntem, John ama ɔkwɔrɔ eti mbuk abaŋa Christ ɔnɔ mme owo.
19Ke ini kied, John ama asua ɔnɔ edidem Herod ke anye ndidɔ Herodias emi ekedide ŋwan eyen eka asie Philip ke ini Philip okosuk odude ke uwem. John ama ɔtɔŋɔ ntak asua ɔnɔ anye ke kpukpri mme idiɔk ŋkpɔ eken emi anye akanamde. 20Ndien Herod ama anam ata ŋdiɔk-ŋkaŋ ŋkpɔ ke anye ndikɔbi John nsin ke ufɔk-ŋkpɔkɔbi.
John ɔduɔk Jeses mmɔŋ
21Nte John ekesuk ɔduɔkde kpukpri mmɔ emi ekedide etiene anye mmɔŋ, Jeses ŋko ama edi, ndien John ama onyuŋ ɔduɔk anye mmɔŋ. Nte Jeses okosuk ɔbɔŋde-akam, ikpa-enyɔŋ ama eberede. 22Ndien Edisana Sibirid ama ɔsuhɔde edi, edidoro Jeses ke mbied ibiom. Ndien Abasi ama osiodo uyo ke heaven, onyuŋ ɔdɔhɔ ete, “Afo edi Eyen Mi emi mmade eti eti, Ami mmenem esid eti-eti ye Afo.”
Mme Ete-ete Jeses
23Jeses ɔkɔtɔŋɔ ndikwɔrɔ ikɔ nnyuŋ ŋkpep mme owo ŋkpɔ ke ini Anye ekekperede isua edip-ye-duop. Kpukpri owo ema etɔŋɔ ndikede nte ke Jeses ekedi eyen
Josef emi ekedide eyen Heli.
24Heli ekedi eyen Matthat,
Matthat ekedi eyen Levi,
Levi ekedi eyen Melche,
Melche ekedi eyen Jannai,
Jannai ekedi eyen Josef,
25Josef ekedi eyen Mattathias,
Mattathias ekedi eyen Amos,
Amos ekedi eyen Nahum,
Nahum ekedi eyen Esli ndien
Esli ekedi eyen Naggai.
26Naggai ekedi eyen Maath,
Maath ekedi eyen Mathias,
Mathias ekedi eyen Semein,
Semein ekedi eyen Josech ndien
Josech ekedi eyen Joda.
27Joda ekedi eyen Joanan,
Joanan ekedi eyen Rhesa,
Rhesa ekedi eyen Zerubbabel,
Zerubbabel ekedi eyen Shealthiel, ndien
Shealthiel ekedi eyen Neri.
28Neri ekedi eyen Melchi,
Melchi ekedi eyen Addi,
Addi ekedi eyen Cosam,
Cosam ekedi eyen Elmadam ndien
Elmadam ekedi eyen Er.
29Er ekedi eyen Joshua,
Joshua ekedi eyen Eliezer,
Eliezer ekedi eyen Jorim,
Jorim ekedi eyen Matthat, ndien
Matthat ekedi eyen Levi.
30Levi ekedi eyen Simeon,
Simeon ekedi eyen Judah,
Judah ekedi eyen Josef,
Josef ekedi eyen Jonam, ndien
Jonam ekedi eyen Eliakim.
31Eliakim ekedi eyen Melea,
Melea ekedi eyen Menna,
Menna ekedi eyen Mattatha,
Mattatha ekedi eyen Nathan, ndien
Nathan ekedi eyen David.
32David ekedi eyen Jesse,
Jesse ekedi eyen Obed
Obed ekedi eyen Boaz,
Boaz ekedi eyen Salmon,
Salmon ekedi eyen Nashon.
33Nashon ekedi eyen Amminadab,
Amminadab ekedi eyen Admin,
Admin ekedi eyen Arni,
Arni ekedi eyen Hezron,
Hezron ekedi eyen Perez, ndien
Perez ekedi eyen Judah.
34Judah ekedi eyen Jacob,
Jacob ekedi eyen Isaac,
Isaac ekedi eyen Abraham,
Abraham ekedi eyen Terah,
Terah ekedi eyen Nahor.
35Nahor ekedi eyen Serug,
Serug ekedi eyen Reu,
Reu ekedi eyen Peleg,
Peleg ekedi eyen Eber, ndien
Eber ekedi eyen Shelah.
36Shelah ekedi eyen Cainan,
Cainan ekedi eyen Arphaxad,
Arphaxad ekedi eyen Shem,
Shem ekedi eyen Noah, ndien
Noah ekedi eyen Lamech.
37Lamech ekedi eyen Methuselah,
Methuselah ekedi eyen Enoch,
Enoch ekedi eyen Jared,
Jared ekedi eyen Mahalalel,
Mahalalel ekedi eyen Cainan.
38Cainan Ekedi eyen Seth,
Seth ekedi eyen Adam. Adam ekedi Eyen Abasi.
ទើបបានជ្រើសរើសហើយ៖
Luke 3: EKI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Eki Bible by Beyond Translation is licensed under Creative Commons Attribution-ShareAlike 4.0 License.