Ugiti 1
1
Uya'in wa aduniyan
1A ayin a̱ ugiti, Ka̱shile ka ya'an ta̱ gaɗi n iɗika. 2Ana u ya'in iɗika, ta i ɗa yi nannai babu ili, ka̱yimbi ka'a ka palai mala dem. Ɗa Ayinviki a̱ Ka̱shile a̱ ka̱na̱i kuka̱ra̱'a̱sa̱ punu a gaɗi vu mini va.
3Ɗa Ka̱shile ka danai, <<Ya'an ubuta̱ dem wa akana.>> Ɗa ta na ubuta̱ wa akanai. 4Ana Ka̱shile ke enei kutashi ku ga'an ta̱, ɗa u pecei ka̱yimbi n kutashi. 5Ɗa Ka̱shile ke ɗekei kutashi ka Kanna, ka̱yimbi kpamu Kayin. U ya'an ta̱ ili i nampa ya a kanna ka iyain. Kulivi ki ta̱ lo, usana wi ta̱ lo, ele dem kanna ke te ka'a.
6Ɗa Ka̱shile ka danai, <<N zuwa ta̱ ka̱ba̱nga̱ ke pece mini ugboku u re, mini ma gaɗi m mini ma ɗaka.>> 7Ɗa ta na ili yo okpoi nannai. Ka̱shile ka ya'in nannai adama a na u pecuku mini ma na mi gaɗi m mini ma na mi ɗaka. 8Ɗa Ka̱shile ke ɗekei ka̱ba̱nga̱ ka, <<Gaɗi.>> U ya'an ta̱ ili i nampa ya a kanna ke ire. Kulivi ki ta̱ lo, usana wi ta̱ lo: ele dem kanna ke ire ka'a.
9Ɗa Ka̱shile ka danai, <<Ka̱sukpa̱ mini ma na mi ɗaka mo ɓolongu a̱ ubuta̱ u te, adama a na iɗika i ɗekpu yu uta̱ kau.>> Ɗa ta na ili yo okpoi nannai. 10Ɗa Ka̱shile ke ɗekei ubuta̱ u ɗekpu wa, <<Iɗika,>> ubuta̱ u mini kpamu, <<Mala.>> Ɗa Ka̱shile ke enei ili i na u ya'in va yi ta̱ n uga'in.
11Ɗaɗa Ka̱shile ka danai, <<Ya'an iɗika dem yu uta̱ka̱ n yutishi, mi ta̱ ma na ma kumatsa icu'u i le, ilya i matsa ilya, nɗanga kpamu mu uta̱ka̱ n icu'u i na i kumatsa otoku e le nɗanga.>> Ɗa ta na ili yo okpoi nannai. 12Ɗa iɗika dem i ka̱na̱i kuta̱ka̱ n ica̱'a̱shi kakau. Icu'u i ka̱na̱i kumatsasa icu'u uteku ci le kakau. Ɗa ta na Ka̱shile ke enei ili i na u ya'in va i ga'an ta̱. 13Kulivi ki ta̱ lo, usana wi ta̱ lo: ele dem kanna ka tatsu ka'a.
14Ɗa Ka̱shile ka danai, <<Ya'an kutashi kakau gaɗi ka akana, adama a na u pece kanna n kayin. A zuwa le ta̱ o okpo urotu u na u kupece ayin, ayin a̱ lyushi, n ayin a irana, n a̱ya̱. 15Ka̱sukpa̱ kutashi kakau gaɗi kpamu ka akana a̱ ubuta̱ dem.>> Ɗa ta na ili yo okpoi nannai dem. 16Ka̱shile ka ya'an ta̱ kutashi ku gbagba'in ku re. Kutashi ku gbayin ku ɗaɗa. Kanna ka lya'a tsugono n kanna, wotoi kpamu n kayin. Ɗa u doku u ya'in azangata kpamu. 17Ka̱shile ka zuwa ta̱ ili i kutashi ya i yongo gaɗi, adama a na a akana a iɗika, 18ciya̱ a lya'a tsugono n kanna n kayin e pece kpamu kutashi n ka̱yimbi. Ɗa Ka̱shile ke enei ili i nanlo ya i ga'an ta̱. 19Kulivi ki ta̱ lo, usana wi ta̱ lo: na lo dem a kanna ka̱ na̱shi ka'a.
20Ɗa Ka̱shile ka danai, <<Ya'an mini ma shana n adan n ili i wuma dem, ka̱ta̱ gaɗi kpamu u shana n icu'u yi nnu kakau.>> 21Ɗa Ka̱shile ka ya'in ili i gbagba'in i mala n icu'u ya adan kakau, nu nnu kakau kpamu nannai. Ɗa Ka̱shile ke enei ili i nanlo dem i ɗa i ga'an ta̱. 22Ɗa Ka̱shile ka zuwakai le una̱singai, u danai, <<Matsai ka̱ta̱ i shatangu mala, nnu kpamu i yimkpa ka̱ta̱ i shatangu iɗika.>> 23Kulivi ki ta̱ lo, usana wi ta̱ lo: na lo dem a kanna ka tawun ka'a.
24Ɗa Ka̱shile ka danai, <<Ya'an iɗika yu uta̱ka̱ n ili i wuma yaba dem n vicu'u vi ni, nnama ra̱ka̱, nu nnama m kpa'a koɓolo n aza a na i o kurono a̱tsuma̱ a iɗika.>> Ɗa ta na ili yo okpoi nannai. 25Ka̱shile ka ya'in icu'u yi nnama m kpa'a nu n kakamba dem, aza a wawa'a n aza a̱ gba̱ra̱-gba̱ra̱ yaba dem a kumatsa icu'u i ni. Ɗa Ka̱shile ke enei ili i nanlo dem i ga'an ta̱.
26Ɗa Ka̱shile ka danai, <<Ya'an ci ya'an vuma n iyotsonoi i tsu, ka̱ta̱ a ya'an kpamu tsu tsu. Ele ɗa aza a na a kulya'aka adan a na i a mala tsugono, nnu n na mi gaɗi, nu nnama m kpa'a nu n kakamba, nu nnama n wawa'a n na mi o kurono a̱tsuma̱ a iɗika dem.>> 27Nannai ɗa Ka̱shile ka ya'in vuma uteku tsu na a̱yi wi, n iyoci i Ka̱shile i ɗa u ya'in ni, u ya'an le ta̱ vuka n vali. 28Ɗa Ka̱shile ka zuwakai le una̱singai, ɗa u danai, <<Yimkpai, ka̱ta̱ i shatangu aduniyan, i ka̱na̱ i ɗa ka̱ta̱ i lya'a tsugono tsa adan a na i a mala, nu nnu n gaɗi koɓolo nu nnama n na mi o kurono a̱tsuma̱ a iɗika dem.>> 29Ɗa Ka̱shile ka danai, <<La̱na̱, n neke ɗa̱ ta̱ mita̱ dem ma na mi a iɗika ma na ma kumatsa icu'u, nu nɗanga dem n umaci u le u na wi n icu'u punu, adama a na o okpo ilikulya wa̱ ɗa̱. 30N neke ta̱ nnama n na mi a iɗika dem, nu nnu, nu nnama n na kpamu mi o kurono a̱tsuma̱ e le a iɗika, n ili i na yi a kuyinvika dem ica̱'a̱shi dem, adama a na yo okpo ilikulya'a i le.>> Ta ta na ili yo okpoi nannai. 31Ɗa Ka̱shile ka̱ la̱na̱i ili i na u ya'in dem, ɗa we enei i ɗa i ga'an ta̱ ka̱u. Kulivi ki ta̱ lo, usana wi ta̱ lo: na lo dem a kanna ka̱ ta̱li ka'a.
ទើបបានជ្រើសរើសហើយ៖
Ugiti 1: ASG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Language Development and Translation Initiative (LDTI)