Genèse 1
1
1Nè dome mo mè, Nzapa déè nè li‐zane o dè nou. 2Kè nou o̱ nè ola; kè nè toum hè houlou ngo ba doukou ko̱, kè l’Esprit kè Nzapa fo t’è nè ngo li o hi. 3Nè Nzapa to oui̱ne, ègui̱: Mi koa mossa tèno! Kè mossa ma. 4Nè Nzapa joko kè mossa dièouinè; nè Nzapa kèkosan mossa dè toum o. 5Nè Nzapa sa yini mossa nè ouichi, n’a sa yini bè toum o nè zè. Kè mbolo déè pome, dè toutouli pome: kè nè akouti jou ouichi pome‐iè.
6Nè Nzapa to oui̱ne, ègui̱: Mi koa ba oloyara nè bo̱bo̱ li, hè kè nè kosan li dè li o. 7Nzapa déè ba oloyara, kè nè kosan li o nè o̱ do̱ ba oloyara dè li o nè o̱ ngo̱ne ba oloyara hi. N’è dè hèmo higo. 8Nè Nzapa sa yini ba oloyar’a hi nè li‐zane. Kè mbolo déè pome, dè toutouli pome: kè nè ouichi litou.
9Nè Nzapa to oui̱ne, ègui̱: Mi koa li o nè oli nè o̱ do̱ li‐zane hi o to a‐jou‐ma oloyara pome‐iè, nè koulou‐mo ho zane. N’è dè hèmo higo. 10Nè Nzapa sa yini koulou‐mo nè nou, n’a sa yini li o nè touo di‐jou‐ma o hi nè nana. Nè Nzapa joko kè dièouinè. 11Kè ol’a hi nè Nzapa to oui̱ne, ègui̱: Mi koa jo bara, nè jo nè palè è hè sènè, dè ti‐ouara‐ti o nè ouara ouara‐ti ènè, ènè, nè bara o hè sènè hi di sènè nou h‐è. N’è dè hèmo higo. 12Nè jo bara ngo nou, dè jo nè palè è hè sènè ènè, ènè, dè ti‐ouara‐ti o nè ouara ouara‐ti ènè, ènè, nè bara o hè sènè hi. Nè Nzapa joko kè dièouinè. 13Kè mbolo déè pome, dè toutouli pome: kè nè ouichi tara.
14Nè Nzapa to oui̱ne, ègui̱: Mi koa sanra‐mo o ma nè mo doungou ba oloyara li‐zane mè, oui̱ne kèkosan ouichi dè zè; kè nè mo oui̱ne oussou ji ènè, ènè o, dè ouichi o, dè pè o; 15ko ouo̱‐o dè nè mo‐sanra o nè ba oloyara li‐zane mè, oui̱ne ha mossa di sènè nou nè. N’è dè hèmo higo. 16Nè Nzapa dè di̱ngguè sanra‐mo litou, ma di̱nggu’a nè mo‐yanra nè ouichi, nè ma solobiè nè mo‐toko nè zè; n’a dè solo o bo. 17Nè Nzapa é ouo̱‐o nè mo doungou ba oloyara li‐zane mè, dè mo‐toko di sènè nou nè, nè ouichi dè zè, 18nè mo kèkosan mossa dè toum o. Nè Nzapa joko kè dièouinè. 19Kè mbolo déè pome, dè toutouli pome: kè nè ouichi nara.
20Nè Nzapa to oui̱ne, ègui̱: Mi koa li o é sadi̱ monotouni o ouinè, dè noi̱ o nè boulou nè ngo̱ne nè ba oloyara li‐zane mè hi. 21Nè Nzapa dè ba di̱ngguè zolo o, do sadi̱ do̱ li o nè fo to lo‐o fouo hi, ndo ba doko ino‐o ndo li o iè hi, ènè, ènè; n’a dè noi̱ o nè boum‐baka ouo̱‐o sènè hi, ènè, ènè bo. Nè Nzapa joko kè dièouinè. 22Nè Nzapa é démo jou ouo̱‐o, a to oui̱ne ho ouo̱‐o, ègui̱: Ènè ko, ènè dèlè ènè dounou o ba di̱ngguè nana li o nè oli; noi̱ o bo ko doko o di sènè nou h‐è. 23Kè mbolo déè pome, dè toutouli pome: kè nè ouichi mo̱ro.
24Nè Nzapa to oui̱ne, ègui̱: Mi koa nou é sadi̱ monotouni o ènè, ènè, do daïli o, do ino‐o nè nèno nè zan lo‐o hi, do sadi̱ do̱ko jo o ènè, ènè. N’è dè hèmo higo. 25Nzapa déè sadi̱ o ènè, ènè di sènè nou h‐è, a déè daïli o ènè, ènè, do ino‐o nè nèno nè zan lo‐o hi ènè, ènè. Nè Nzapa joko kè dièouinè. 26Kè olo mo hi nè Nzapa to oui̱ne, ègui̱: Alè dè oui‐ouili nè zizi’lè, hè oui ma dè’lè, h’a dè ouane jou zolo o do̱ di̱ngguè nana li nè oli, do noi̱ li‐zane mè o nè oli, do daïli o, dè nou nè oli, do ino‐o né nèno nè zan lo‐o hi di ngo nou h‐è nè oli. 27Nè Nzapa dè oui‐ouili nè zizi‐ng‐è, a dé’a nè zizi Nzapa, a déè nè oui‐ouili dè ouiko. 28Nè Nzapa é démo jou ouo̱‐o, Nzapa to oui̱ne ho ouo̱‐o, ègui̱: Ènè ko, ènè dèlè, ènè houlou ngo nou h‐è nè oli, ènè dè ouane jou a; ènè dè ouane jou zolo do̱ nana o, do noi̱ nè boulou li‐zane mè o hi, do sadi̱ o nè fo to lo‐o di ngo nou h‐è fouo nè oli. 29Nè Nzapa to oui̱ne, ègui̱: Joko, mi ha jo nè palè è hè sènè di ngo nou h‐è nè oli h’ènè‐o, do ti‐ouara‐ti o nè ouara ouara‐ti nè bara o hè sènè hi: kè nè mo‐yongo k’ènè‐o. 30Mi ha toro jo ho sadi̱ o nè oli sènè nou‐h‐è, do noi̱ o nè oli li‐zane mè, do ma mo nè fo to lo‐o di sènè nou h‐è fouo, nè omo‐omi‐omo hi, nè mo‐yongo ho ouo̱‐o. N’è dè hèmo higo. 31Nè Nzapa joko mo no‐o nè oli n’è déè hi; joko, kè diè goudou ki̱ne. Kè mbolo déè pome, dè toutouli pome: kè nè ouichi dongpo.
ទើបបានជ្រើសរើសហើយ៖
Genèse 1: GBANU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society 1932-1939