Amezruy n talsa 1
1
Tazwara
(1-11)
Illu yexleq ddunit akked talsa
1Di tazwara Illu yexleq igenwan d lqaɛa. 2Lqaɛa tella texla d tilemt ; tillas ɣumment maylellif, Ṛṛuḥ n Yillu itezzi sufella n waman.
3Illu yenna : Ad tili tafat ! Dɣa tella-d tafat. 4Iwala Yillu tafat telha, dɣa yefṛeq tafat d tillas. 5Illu isemma i tafat : Ass, isemma i tillas : Iḍ. Tella-d tmeddit, tella-d tafrara : D ass amezwaru.
6Illu yenna : Ad yili littseɛ gar waman, ad yefṛeq gar waman d waman. 7Ihi yexdem Yillu littseɛ-agi, yefṛeq gar waman yellan ddaw littseɛ-nni d waman yellan nnig-s. Akka i teḍra. 8Illu isemma i littseɛ-nni : Igenni. Tella-d tmeddit, tella-d tafrara : D ass wis sin. 9Illu yenna : Ad nnejmaɛen waman yellan ddaw n igenni ɣer yiwen wemkan, ad d-ibin wayen yekkawen. Akka i teḍra. 10Illu isemma i wayen yekkawen lqaɛa, ma d igillem n waman isemma-yas : Ilel ; iwala Yillu ayenni yelha. 11Imiren yenna Yillu : Ad tessu lqaɛa s tizegzewt, s leḥcic yesɛan zzerriɛa, s ttjuṛ n lfakya i d-ittaken yal ta ṣṣenf-is n lfakya di lqaɛa, yal lfakya s zzerriɛa-ines. Akka i teḍra. 12Tefka-d lqaɛa tizegzewt, leḥcic yesɛa zzerriɛa yal yiwet s ṣṣenf-is, ttjuṛ fkant-d lfakya yal ṣṣenf s zzerriɛa-ines. Illu iwala ayenni yelha. 13Tella-d tmeddit, tella-d tafrara : D ass wis tlata.
14Illu yenna : Ad ilint teftilin di littseɛ n igenni, i wakken ad bḍunt gar wass d yiḍ, ad ilint d licaṛat s wacu ara ttwaɛqalen lewqat, ussan akked iseggasen. 15Ad ilint d tiftilin di littseɛ n igenni, ara yefken tafat i lqaɛa ; akka i teḍra. 16Ixdem-d Yillu snat n teftilin timeqqranin, tameqqrant akken ad teḥkem ɣef wass, tameẓyant akken ad teḥkem ɣef yiḍ, yerna-d itran. 17Issers-iten Yillu di littseɛ n igenni ad fken tafat i lqaɛa, 18Ad ḥekmen ɣef wass d yiḍ, yernu ad bḍun gar tafat d tillas. Illu iwala ayenni yelha. 19Tella-d tmeddit, tella-d tafrara, d ass wis ṛebɛa.
20Illu yenna : Ad ttgemgumen waman s umrured n iɣersiwen yeddren, ad ttferfiren yegḍaḍ di littseɛ n igenni, sennig lqaɛa. 21Ixleq Yillu yal ccetla n lewḥuc imeqqranen n yilel d wayen akk yeddren yettɛummun, s wayes ttgemgumen waman ; akked yal agḍiḍ bu wafriwen yal wa s ccetla-s. Illu iwala ayenni yelha, 22iburek-iten yenna : Arwet, ftit teččaṛem aman n ilellen ; ad ftin daɣen yigḍaḍ di lqaɛa. 23Tella-d tmeddit, tella-d tafrara : D ass wis xemsa.
24Illu yenna : Ad d-tefk lqaɛa iɣersiwen yeddren yal yiwen s ccetla-s, wid ileḥḥun ɣef uɛebbuḍ, lmal, iɣersiwen n lexla, yal wa s ccetla-s. Akka i teḍra. 25Illu yefka-d iɣersiwen n lqaɛa yal wa s ccetla-s, lmal yal wa s ccetla-s, d wayen akk ileḥḥun ɣef uɛebbuḍ yal wa s ccetla-s. Illu iwala ayenni yelha.
26Illu yenna : Ad d-nexleq amdan ɣer ṣṣifa-nneɣ, ɣer ccbiha-nneɣ, ad iḥkem ɣef iselman n yilel, ɣef yigḍaḍ n igenni, ɣef lmal, ɣef lqaɛa meṛṛa, d wayen akk ileḥḥun ɣef uɛebbuḍ di lqaɛa.
27Ixleq Yillu amdan ɣer ṣṣifa-ines :
Ixleq-it ɣer ṣṣifa n Yillu,
ixleq-iten d argaz d tameṭṭut.
28Iburek-iten Yillu yenna-yasen : Sɛut dderya, ftit, ččaṛet lqaɛa tḥekmem-tt, ḥekmet ɣef iselman n yilel, ɣef igḍaḍ n igenni d yal aɣersiw ittemruruden ɣef lqaɛa. 29Illu yenna : Atah fkiɣ-awen mkul leḥcic yesɛan zzerriɛa ɣef wudem n lqaɛa meṛṛa, d yal ttejṛa i d-yettaken lfakya s zzerriɛa-s : Ad wen-yili d lqut-nwen. 30Ad fkeɣ yal leḥcic azegzaw d lqut i yal aɣersiw n lqaɛa, i yal agḍiḍ n igenni, i kra n wayen ittemruruden ɣef lqaɛa yesɛan nnefs n tudert. Akka i teḍra. 31Illu iwala d akken ayen akk i yexdem yelha nezzeh. Tella-d tmeddit, tella-d tafrara : D ass wis setta.
ទើបបានជ្រើសរើសហើយ៖
Amezruy n talsa 1: TiIq
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.