Maluko 5
5
Yesû wa muhandya muntû wêno minyaga gibê
(Matayo 8.28-34; Luka 8.26-39)
1Yesû no baana ba bûganga bage, baikile kûbwala bûnge bwa siba lya Galilaya, mumwalo gwa Bagelasi.#5.1 gerase 2Kyaba Yesû kyetukile mubwato, muntû gûmo ûbele no minyaga gibê. Uimine kûbilêbû usile mbelê gyage. 3Gûlya muntû wêkene kûbilêbû, no hakûbele muntû ûnyongwene kûmukwêka midjololo. 4Mako gangê ûbele no byuma kûmagûlû no midjololo kû maboko, mone utimwine byuma no midjololo gyonse. Kubulile muntû ûbele no bûkome bwa kumunyonghona. 5Kyaba kyonse bûsigi no djûba, ûbele walelemba lelemba mubilêbû no kûngûlû, mukûbûlûla no kwêkoma koma gee mwine no mabwe.
6Lwamumwene Yesû kûlampee, ûgêle lûbêlo no kumukutamina mbelê gyage, 7no kwangûla djuê likata no kwêsamba: “Yesû Mwana wa Kabesha Mpûngû wimwigûlû! Kwê kibalo kêê abûkata bobe gwe no nene? Nankwêsasa musina lya Kabesha Mpûngû, noka nyembia!” 8Kwakûba Yesû umulombwele: “Munyaga gûbê, muime muntû gûdjo!”
9Nfulo, Yesû umubulishe: “Sina lyobe wini?”
Noge umuêndwêle: “Sina lyane kibûngo kya Basilêkale,#5.9 Legioni kibalo twê bangê!” 10Munyaga gûbê gûmwisasile Yesû kwana, nekegikumbi gilya minyaga gibê andje gya mwalo gûlya.
11No kûko kûlûgûlû kûbele kibûngo kikata, kya ngûlûbê mukûlya. 12Nfulo, minyaga gibê gimwisasile Yesû gisambile: “Wêtûtakêshe mungûlûbe gilya, tûtwele mo.” 13Yesû wigitakêshe, gilya minyaga gibê giimine munda gya muntû gûlya no gitwelile mu ngûlûbe. Mulongo gûkata gwa ngûlûbe giikile elufu libêlê gitukile lûbelo kuima kûlûgûlû no kûtwela mwisiba nogyo gitobele mumadjê.
14Baleli bagilya ngûlûbe batinine lûbêlo kuila musahû mukalya no tubibûndê, no bantû basile kûmona bilya bilongekile. 15Kyaba bantû abamugêlêle Yesû, bamwene gûlya muntû ûbele no minyaga gibe. Mwikane ansê, ûshête bishandê no ngheni gyage gigwane; nobo batudjukile. 16No balya bamwene biitikile bebalombwele baange bilya bilongikile kûgûlya muntû ûbele no minyaga gibe, no kugilya ngûlûbe.
17Babambile kumwisasa Yesû asemuke mu mwalo gwabo.
18Kyaba Yesû abele wabanda mu bwato, gûlya muntû ûbele no minyaga umwisasile, agye amo nage.
19Yesû umubengelele, mone umulombwele kwana: “Gyata kû nsese gyobe, no kumusoo gobe, wêbalombole bikata byene kûlongela Kolo, no mwakûmwenene lûsa.”
20Gûdjo muntû ûgêle lwege, ûbele wagya watûmbya mumwalo gwa bibûndê kumi.#5.20 Dekapoli Byonse Yesû byemulongêle, no bantû bonse bamutegelele begalagenie biiko.
Yesû wahandya mwana mukasi gûmo no washûla nsongwa kasi wa Yahilo
(Matayo 9.18-26; Luka 8.40-56)
21Kyaba Yesû egibwêlêle bwala bwa bûbele bwa siba, kibûngo kya bantû kimwalagele. Gee ûbele mwimane kûnkondo gya siba. 22Onkao asile muntû gûmo mûkûlû wa sense gya milombelo gya Bayuda,#5.22 Sinagogi sina lyage Yailo. Kyaba kwamumwene Yesû, umugwêlêle kûmagûlû gage. 23No umwisasile biiko no kwêsamba: “Mwanane nsongwa kasi wêabûsho kûkya. Nankwêsasa ndjûû umutenteke maboko, kûba ahande no kwêkana!”
24Onkao Yesû ûgêle amo nage no kibûngo kikata kimulondile, balê bamuhininike mugela gonse.
25Mu bûkata bwabo mubele mwana mukasi gûmo ûbele no mutongo gwa sûngwe#5.25 Mudjamba nsûsa mu kyaba kya miaka kumi no gibêle. 26U susukile kû maboko ga batembi bangê. Noge usiminie lûheto lûngê, hamwene lûhandêlo ngikeno gyage gigêlêlêle kûba gibê. 27Kyaba kyategelele musahû gwa Yesû, usile no kûtwela mubûkata bwa kibûngo kya bantû, wêmene nghimba gya Yesû no kukuma nkanso gyage. 28Wêsambile mumutêma gwage: “Ntêê nene kukuma bishandê kyage shampande.”
29Onka alya kûsûswa kwa masi gage gakamine; noge wêtegeleshe kwana wahanda. 30Onkao, Yesû usingûlwêle kwana bûkome bûmo bumuimine. Wêhûgulukile kwê kibûngo wêsambile: “Nani wakuma bishandê byane?”
31Baana babûganga bage bamuêndwêle: “Onokûmona kibûngo byakilê kikwiininike mugela gonse; wêbûbûsha ntêê kwana wakuma nani?”
32Mone Yesû ûlwele mugela gonse kibalo amwne muntû gûlya ûlongile nansho. 33Gûlya mwana mukasi, utudjukile, no kûkwaka kibalo ûmanyine byonse bimuimine, usile kûgwêla kûmagûlû ga Yesû no kumulombola sitêê. 34Mone Yesû umulombwele: “Nsongwa kasi wane, lwêtabêsho lobe lwa kûhandya. Bagala no angalê, mutongo gobe gwahanda mbeela.”
35Kyaba Yesû kyabele walisamba, bantû basile kû nsese gya Yahilo bamulombwele: “Nsongwa kasi obe wawa kûkya, kibalo kyakê wamudjembya mulangi?”
36Mone Yesû halwele mwanda gwêsambilwe umulombwele: “Yahilo no katudjuki gitabêsha yaa.” 37No hatakêshe muntû alondane nage nambo Petelo, Shake#5.37 Yakobo no Yoano mwanabo. 38Lwabaikele kû nsese gya Yahilo, Yesû ûmwene bantû balê mpewa mpewa, mukûlêla no djûê likata. 39Ûtwelile mu nsese wêbalombwele: “Kibalo kyakê mwimpewa mpewa no malelo? Mwana hawakûkya, ûbêdjê!”
40Mone bantû bamwadjile. Onkao Yesû wêbaiminie bonse andje, usigile shage no nyage wa mwana no baana babûganga bage bamusindêkêle, ûtwelile nabo mukyumba kya sense mubele mulale mwana. 41Ûkwatile kûboko kwa mwana umulombwele: “Talita, kumi,” nsitwe gyage, “Nsongwa kasi, nankûlombola byûka!”
42Lwendo lûmo gûlya nsongwa kasi wêmene no kûbamba kûtamba. (Gûdjo nsongwa kasi ûbele no miaka kumi no gibêlê.) No bantû lwabamwene kilya kilongekile, begalagenie. 43Yesû wêbakandile na bakalomboli muntû byagêlêka no wêbalombwele: “Bamuwe nsongwa kasi kya kûlya alye.”
ទើបបានជ្រើសរើសហើយ៖
Maluko 5: HBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល