Gene 3
3
ewDa
1w eθkan telefse exbeθ Haje yexleqt rebbi. tenceδ temeTTuwθ: «endre mbelHeq yenneyawem rebbi eθečemc elγelleθ seg Hette eccejreθ gejjenneθ.» 2ter felles temeTTuwθ: «enged eneč seg elγelleθ n eccjer n ejjenneθ, 3kan deccejretdiyn elli gwemmes n ejjenneθ, yenneyane rebbi eθečemc essis wetlemsemc bac e tjefemc.» 4tennes telefse: «etjefemc, 5emme rebbi yessen elli max eθečem essis emiyrneθ tiTTewinennum, usinc eθeδewlem m nette, tessenem elxiyr deccer.» 6yaxi tezr temeTTuwθ elli elγelleθ n eccejreθ teHle utebhe w ettuč elHekmaθ y elli eyeč essis, tekkes essis θeč tuwc y weryazes yeč zade. 7yaxi mirneθ tiTTewinensen, faqen s imenensen δiεeryanen, inyen jmiyε tifray n temečiyθ irDen imenensen.
8g tisemsiyn eslen elHes n rebbi g ejjenneθ, eεglen seg rebbi δeffer eccejer. 9inabe rebbi adem yennes: «meniy cex?» 10yer felles: «sliyγex (tegguwreδ) g ejjenneθ, ukδe eεgle, εlexaTer kane δeεeryan.» 11yenceδt rebbi: «δ wiyn ixyenne elli cex δeεeryan? endre θečiyδ seg elγelleθ n eccejreθ elli n ebbehγex eθečec essis.» 12yennes adem: «temeTTuwθ elli tHuTTet dahen iyδi, tucayiyδ essis eče.» 13yenceδ rebbi temeTTuwθ: «imette iθegiδ wahen.» tennes: «tluzziyδ telefse, eče.» 14yennes rebbi y telefse: «εlexaTer θegiyδ wahen, δemεeqbe: δtemelεuwnt cem menduwm elhwayec delhuwc elkul, f teδisθem δeθeδewleδ tmerδeδ, uδeθεeddiyδ g ecal leHyeθem elkul. 15δemedje cem ettmeTTuwθ timeθεarxin diyme, Hette δidreriynnum zade, nette eyfeccex ixfem ucem etteldγeδ seg elεerqubes.»
16yennes y temeTTuwθ: «δemerniyye etεeb delεδab max eθebδiyδ δtemeεδurθ delwjayeε n warew. δeθebδiyδ ettesθeHaceδ g weryazem, unette yHekkem δiym.» 17yen y adem: «εlexaTer tesliyδ edwi n liwecex θečeδ seg eccejreθ elli enniyγex eθečec essis, δetemmelεen elqeεεeθ, teθεeddiyδ elHyeθex elkul txedmeδ δiys bac e xθuc mette δeθečeδ. 18δeθessuwfeγ eccuwk delHsek, cex δeθečeδ elHec n ijiyman. 19s tiδiyx δeθečeδ teneεnuyθex elδeθerjεeδ y ecal, seg ecal exleqγex uyecal δeθerjεeδ.» 20ysemme adem liweces Hewwe εlexaTer δyemmes n kul iyjen yedder. 21yeg rebbi edbac seg weylim y adem dliweces y irDesenten.
22yen rebbi: «tay elεebδ yeδwel yessen elxiyr deccer emiyjen essiyne, ture mayelzemc eyeweD eccejreθ n weddar usiyn eyeč essis umeεεač eyjaf belkul.» 23yessufeγθen rebbi seg ejjenneθ n εeden, bac e xeδmen elqeεεeθ elli emmexlqen essis. 24beεεeδ igelleb adem, iHuT elmleyxaθ n keruwbiym g eccerq n ejjenneθ n εeden, dessiyf iceεεel yettenneD bac e yεus f eccejreθ n weddar.
ទើបបានជ្រើសរើសហើយ៖
Gene 3: IGSJ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).