MRK - NUMANA 2
2
Yesɔ nena ine lɔ amkpuk
1Fena ndi muɔ bɛr ne te, fe Yesɔ akama kɔmɔ ne Kafanahum, ankyak aneshir ne yik tedi ne ka kama nyak kɔb. 2Ndi amɛ aneshir tetɛk akɔ tuŋ abiŋ te iki kɛ baŋ ba bɔbɔk ba yime ba, te ben abɛ klɛ ne abɛm ne anɔkɔŋ, fe Yesɔ adu lɛ didik kɛ Arik. 3Aner anuŋ ne Gli ine lɔ waŋ ndi ŋa kpa maa ne ku aner anas ahruu. 4Ndi bane yik amkpa ane gliu yire ba ne idu aneshir, akɔ baŋu te yuŋ tu adǝdak ayi miŋ kime te rus kɛ te baŋu ne ririk abiŋ ne ki kur maa asu azhɔk anenen ne amkpa awaŋ ndi Yesɔ ayime. 5Ndi Yesɔ ne yik itanyɛme men, akɔdi ne lɔmɔ, <<Vǝvǝn, ne zu gu zhɔk ne lalɛ mi.>>
6Fena anuŋ abɛ tsar nkanlɛ yi cɛr Musa akɔsɔŋ ne amkpama, alɛ ne akpa mɛn te di, 7<<Anii duŋ ineshir waŋa alɛ mei? Alalɛ kɛ yiŋ Arik! Ai ŋɔwa ne amla ne zuk ilalɛ zhɔk mba Arik wa kiki maa ka?>>
8Andanda Yesɔ akɔ zhi ne susun maa te waŋa ayi iki duŋ ba alɛ ne asusun amene, ankyak Yesɔ akɔ diba, <<Izhin lǝlɛ kɛ anii ne iki yiŋɛ? 9Itayi naŋ: te abɛdi ine lɔ ku ŋa kpa, <Ne zuk ilalɛ mi, kɔ abɛ di, <Lu, baŋ ki kur mi te tsǝn? 10Neme te izhin bɛ zhi te Izu Neshir ayi ne mgbyamgbyaŋ ne gɔŋmimi kɛ zuk ilalɛ zhɔk.>> Yesɔ adi ne lɔ ŋa kpama, 11<<Mdiu, lu, baŋ ki kur mi te kɔmɔ.>> 12Akɔ lu, abaŋ ki kur maa te agar aru ne ayi amen bɔbɔk. Iyiŋɛ ne duŋ aneshir asak aŋɔk nenu te gbar Arik asak, tedi, <<Bata ne zen yik ikinuŋ ndi iyiŋɛ ba!>>
Yesɔ ne zhɔ Lawi
13Yesɔ nena ru akɔmɔ ne kɔtɔŋ lelɔ nek. Idu aneshir ne zeu agar, akɔ vuŋ tsar ba. 14Ndi ne duŋ ba teyi kiki maa, ayik Lawi izu Alfa akɔsɔŋ ne vǝn iki kɛ ta gendu. Yesɔ akɔ diu, <<Lu zǝm,>> fe Lawi akɔ lu te zeu.
15Ndi Yesɔ ne zen li ikili ne kɔb kɛ Lawi, aneshir abɛ na ndum ta gendu ben <<abɛ lalɛ>> azǝn li kili bene bɔu ndɔ ben abɛ tsǝn amaa ben aneshir tetɛk abɛ zen zeu. 16Abɛ tsar cɛr iyi Musa abaŋ ndi ntsan Ferisawa anuŋ ayik Yesɔ azǝn li kili ben <<abɛ lalɛ>> ben abɛ ta gendu, arib abɛ zeu tsǝn amaa: <<Anii duŋu zhiin li kili ben abɛ ta gendu te vuŋ abɛ la lɛ?>> 17Inak wɔ iyiŋɛ, Yesɔ akɔ diba, <<Bai ner ne mgbyamgbyaŋ wa awɔb ner ne nek kǝka ba, ayi waŋ ndi alɔ. Bam ne nyɛ zhɔ abɛ tsetser ba, ama abɛ lalɛ.>>
Ne rib Yesɔ lɛ kɛ kpa anu
18Fena abɛ zǝ Yɔɔna tsǝn ben Ferisawa ne kpa anu. Aner anuŋ ne nyɛ te rib Yesɔ, <<Anii iyi duŋ abɛ zǝ Yɔɔna tsǝn ben Ferisawa akpa anu, ama amie ba akpa anu kai?>> 19Yesɔ adi ba, <<Aner abaŋ ndi igyaŋ iyi ne kɔmen ai na kikin te kpa anu ndi ne ta iwa ma ayi bene bai? Bai te ba, ire mkpaŋ keŋ ndi atei yi bene ba. 20Fena mkpaŋ tei nyɛ ndi atei baŋ ne ta iwa ma agli atibe bene ba, fe ne bǝn atei ka kpa anu.
21<<Ba nuŋ atei gbu anklu ayayas aŋa te hwen kɛ biŋ ben acicɛ anklu ba. Ate na amɛ, ŋa yaya sa itei gbaŋ ciceme gbuŋa, igbuŋa maa itei yi mimin. 22Neme inuŋ batei shur ancen ayayas ne cice gwara ba. Ate shurɔ, acɛ nɛ atei wun teduŋ gwarama alakakna aŋar, fe iyah mǝne atei var ahrie igwara ma iteina gbuŋa. Ashur ama ayayas ne kǝken yayas.>>
Yesɔ ayi Arik ane bɛr yi sɔŋ sik
23Nǝ bɛr yi sɔŋ sik nuŋ Yesɔ agara zǝ ahwaŋ ndi ne tib alikama, abɛ tsin amaa atsǝne zeu, akɔ mlik atɔ nuŋ. 24Ferisawa akɔ diu, <<Tɔ, ayi nii duŋu abɛ zeu tsin ana ki yiŋ ndi iglak ilɛ kɛ cɛr yi Musa ne bɛr yi sɔŋ sik?>>
25Yesɔ asaga, Ba zhin ne wɔ iki yiŋ ndi Doda ane nai ben abɛ tsǝn amaa ikasa ne vuŋ ba te ne wɔb kili ka?
26Nǝ mkpaŋ kɛ Abiyata ŋgɔŋ ne na ndum kɛ Arik, ne yir min akabaŋkɔŋ ayou Arik tǝ ta borodi tena nek abɛ tsǝn amaa, ikeŋ ndi imenyi kɛ abɛ na ndum ne akabaŋkɔŋ ankyak.>> 27Tena diba,<< Nena neshir iber yi sɔŋ sik, ba nena bɛr yi sɔŋ sik netu ayi ineshir ba. 28Fena Izu Neshir ayi Ŋgɔŋ netu ayi bɛr yi sɔŋ sik.>>
ទើបបានជ្រើសរើសហើយ៖
MRK - NUMANA 2: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria