Zuwã 12
12
Maria hã, Betãnia ãma Zezusi te te ipara upsõzé
Mateus 26.6-13; Marcus 14.3-9
1Tawamhã Pascoa na dato nhisi za isãna'ratazéb da hã, imropâ na bâdâ si'utõrĩ wana ré, Zezusi hã ma tô mo Betãnia u, Lazaru apâ te te ihâiwa'udu 're isãmra mono zéb u. 2Tame ma tô barana api za'ra, Zezusihi ma, sada. Marta hã ma tô ĩsa tãma a'â. Lazaru hã ma tô isiré nhamra, wedeza na. 3Tawamhã Maria hã ma tô simhi wedewa'u isadazei ré hã ti'â, iwa'âbâ za'ẽtẽ uptabi hã, Nardu na wedewa'u nhisi hã. Ta hã ma tô Zezusihi para nhisiwi sa'wa. Taha pari ma tô tizéré na para u'ré. Tawamhã dasisadazezé hã ma tô uburé 'ri 're zadaze. 4Tane nherẽ, Zudasi Iscarioti, Zezusihi siré 're imorĩ, za ihâiba za'réi'wa da hã ma tô ãne tinha:
5— Ã hã dasisadazezé wa'â hã 300 na rob'uiprazé isapotore ẽtẽ waipo prã prata 'manharĩ hã. E niha bâ te te dama wede õ di, iwa'â hã isimarĩ'õ norĩ ma, te te sõmri mono da.
6Ãne ma tô Zudasi hã tinha, isimarĩ'õ norĩ na 're hâtâ'â mono wab õ di, tazahã tô, simisaihuri wa. Ta hã ma tô rob'uiprazé nhemezé sa'u hã te te 're 'madâ'â. Tane nherẽ, ta hawimhã ma tô te te sima 're azani, da te iwa 're iséme mono hã.
7Tawamhã Zezusi hã ma tô Zudasihi ma tinha, ãne:
— Tô'ã. Tane hã tãma 'manharĩ tõ. Iwẽ hã, te te aré ĩzada itété da hã a'â, ab're 're, da te ĩnherẽzé bâtâ u. 8Isibrob'õ norĩ hã te za ai'rata 're si'ubumroi u'âsi 'wa. Tanei õ di, wa hã. Ai'rata 're ĩnhamra u'âsi aba mono dai õ di.
Sasedoti ipire norĩ hã, Lazaru te te siwi wĩrĩ da, te te ãma sima irowa'õtõ za'ra zé
9Tawamhã da'ahâ na ma tô waihu'u za'ra ni, Zezusi Betãnia ãma isãmra na hã. Tahawa, ma tô itẽme ai'aba'ré ni. Itẽme si õ di. Lazaru hã da te duré dasiwi 'madâ'â da zama, dâ'â nherẽ, Zezusi apâ te te ihâiwa'udu hã. 10Tahawa sasedoti ipire norĩ hã ma tô duré sima rowa'õtõ za'ra, Lazaruhu zama te te siwi wĩrĩ da. 11E marĩ wa. I'u'âbâ, Zudeu norĩ hã ahâ na te te rẽme za'ra wa, Zezusihi si te te oto saze za'ra da.
Zezusi hã Zeruzalẽ u isébrézé
Mateus 21.1-11; Marcus 11.1-11; Lucas 19.28-40
12Tawamhã awẽm na da'ahâ uptabi na datoi u idasihutu norĩ hã, Zezusihi wasu'u ma tô wapari za'ra ni, Zeruzalẽ u imorĩ na hã. 13Tahawa, wa'a wede su hã ma tô 'wasari ni. Ma tô duré dasina uzusi za'ra ni, ãne dahãsi mono sina:
— 'Re ihâimana u'âsi mono ãma si 're wawata za'ra wa'aba mono!
Uburé Danhib'apito nhisi na we imorĩ hã, 'Re ihâimana u'âsi mono iwẽ hã te te tãma 're ipisutu u'âsi mono da si!
'Re ihâimana u'âsi mono hã iwẽ si te te tãma 're ipisutu u'âsi mono da si, Izaraéu nhihudu norĩ nhib'apito ma hã.
14Tawamhã Zezusi ma tô awaru po'repore iprédupté hã 'manhopẽtẽ. Taha ba nhisi ma tô nhamra, ãma morĩ da, Ibaihâ Iwazé pese na rob'ui'éré inomro zarina, ãne:
15“Siã#12.15 Siã Isisi amo hã Zeruzalẽ. na 'ri wa'õtõ nhisi ãma 're i'aihâimana za'ra wa'aba mono norĩ, aipahi ãna aihâimana za'ra wa'aba!
Õhõta te wei mo, Asib'apito za'ra wa'wa hã, awaru po'repore ipréduptém nhisiwi!”
16Taha bâtâ 'remhã isiré 're inomro mono norĩ hã te te sadaihu'u za'ra õ di, ã hã. Zezusi hã apâ hâiwa'utu wap si, ma tô ãma tipo're pu'u za'ra, ibaihâ na rob'ui'éré hã Õhõ ãma inomro na, duré te te sina i'uwaimrami na hã. 17Zezusi hã, Lazaru ab're hawi watobro da, te te 'mahârâ wamhã, da'ahâ na ma tô 'madâ'â za'ra ni. Tawamhã ta norĩ hã ma tô rowasu'u na ãma ropé za'ra, Zezusi te te i'manharĩzém na hã. 18Tahawa da'ahâ na ma tô dasina uzusi za'ra ni, iwasu'u hã da te wapari za'ra wa, marĩ dama i'manharĩ waihu'u'õ te te i'manharĩzém na hã.
19Tahawa ma tô farizeu norĩ hã sima nharĩ za'ra, ãne:
— Marĩ, wa te 'manharĩ waihu'u za'ra õ di. Ma'ãpé 'madâ'â za'ra wa'aba. Õhõta te nemo isarina dasi'ré.
Nima norĩ gregu norĩ hã, Zezusi te te siwi 'madâ'â da, te te sima iwẽ za'ra zé
20'Re ihâimana u'âsi mono ãma dawata za'ra da, Pascoa na dato nhisi ihâimana ãma, Zeruzalẽ u idasi'aba'ré norĩ siré hã ma tô nima norĩ gregu norĩ hã dame tihâimana za'ra. 21Ta norĩ hã ma tô Filipihi u ai'aba'ré. Ta hã 'ri wa'õno Betisaida ãma 're isãmra mono, Galiléia 'remhã. Ãne ma tô tiwi waptẽrẽ za'ra:
— Wa wasima wẽ za'ra ni, Zezusi hã wa te wasiwi 'madâ'â da.
22Tawamhã Filipi hã ma tô mo Ãdréhé u, te te tãma rowasu'u da. Tahawa ma tô siré tineb zahuré Zezusihi u, te te tãma rowasu'u zahuré da. 23Te te tãma rowasu'u zahuré wamhã, ma tô ãne sada'âbâ zahuré:
— Bâdâ hã ma tô iwa waptãrã, Ti'ai ãma Dasiré Ipodo, iwẽ uptabi na 're ihâimana mono zém na Imama te te ihâi'rézéb da hã. 24Tô sena wa za aima waihu'u za'ra wa'wa, ãne: Amnho trigu 'rãire hã ti'ai 'rowi da te sẽrẽ õ wamhã, duré dâ'â õ wamhã, te za tô misire 're hâimana u'âsi. Dâ'â wap si, te za 'rãi pese na ti'rã. 25Ni'wa hã tihâimanazé te te sima 're sawi pese mono wamhã, niwa dahâimanazé isi'utõrĩ'õ tãma ihâimana da hã, waihu'u õ di. Tanei õ di, ni'wa hã ti'ai ãma tihâimanazé te te sima sawi õ wamhã. Ta hã te za sina uwaimra, dahâimanazé isi'utõrĩ'õ hã. 26Ni'wa hã ĩma romhuri'wai wamhã, sina simnhasi, 're ĩmorĩzém na 're morĩ da. Tawamhã nimame 're ĩhâimana mono zéb ãma te za duré 're hâimana, ĩsiré ĩma romhuri'wa hã. Ĩmama hã te za duré te te 're a'uze, uburé ĩma romhuri'wa norĩ hã.
Zezusi hã, za tidâ'âzém na isiwasu'uzé
27— Ãhã na hã wa oto robzépata za'ẽtẽ, ĩpẽ'ẽ 'remhã. E niha wa za tinha. E ãne wa za tinha: Ĩmama, ĩnho'reptu na, ã hã bâdâ ĩma iwisi wi hã. Mare di, te tiwi waptẽrẽ õ di za. E marĩ wa. Tô ã hã bâdâ ĩma iwisi 're, te ĩsina uwaimrami da, wa tô wei mo. 28Ĩmama, ma'ãpé we hâi'ré na, asisi wẽ uptabi na 're ihâimana mono zé hã.
Tawamhã hâiwa hawi damreme hã#12.28 “damreme hã”, tô 'Re ihâimana u'âsi mono mreme, hâiwa hawimhã. ma tô we tinha, ãne:
— Wa tô te dama 're hâi'ré. Apâ wa za duré ãma hâi'ré.
29Tawamhã da'ahâ uptabi na idahâimana za'ra hã ma tô wapari za'ra ni, hâiwa hawi damreme hã. Tahawa ma tô nharĩ za'ra ni, tãirãrã'ã na. Tane nherẽ, ni'wam norĩ hã ma tô duré nharĩ za'ra, hâiwa hawi romhuri'wa Zezusihi ma, we te te inharĩ na hã.
30Tahawa, ma tô Zezusi hã ãne dama tinha:
— Ã hã damreme hã ĩ'u'âbâi õ di. Ai'u'âbâ za'ra wa'aba si. 31Bâdâ hã ma tô oto wi, ti'ai ãma dahâimanazéb zarina da'ãma rowairébézéb da hã. Tahawa, ti'ai ãma danhib'apito dawada'uri wasété 'wa hã te za oto sa'ré, isimiroti nhiptetezém hawi. 32Tawamhã ti'ai hawi da te dasiwi ĩwahutu wamhã#12.32 ti'ai hawi da te dasiwi ĩwahutu wamhã Ã hã damreme hã Zezusi, wedepo'o nhonhi'rãmi na za da te dasiwi isasõmrizé, te wasu'u, wa za te 're 'manharĩ, uburé ĩsitẽme te 're ida'awaibui mono da hã.
33Ãne hã ma tô sina tinha, niha na za te te irobzépatazéb da hã da te waihu'u siromo za'ra da.
34Tawamhã da'ahâ uptabi na idahâimana za'ra hã ma tô ãne dasiwi sadanharĩ ni:
— Roti zahi wama ihâimana za'ra na hã, Cristu hã te za u, 're hâimana u'âsi. E niha te tane nherẽ, wama iwasu'u za'ra, Ti'ai ãma Dasiré Ipodo hã za da te dasiwi isasõmri na hã. E 'wa hã tawamhã, Ti'ai ãma Dasiré Ipodo.
35Tawamhã Zezusi hã te duré tãma siwasu'u za'ra, sõ'awib õ nherẽ, ãne:
— Rowa'a hã te za suru na a'â asiré tihâimana za'ra wa'wa. Rowa'a hã aima 're hâimana za'ra wa'aba mono ré, 're anomro aba mono, robra hã te te aiwaibui wa'aba tõ da. E marĩ wa. Ni'wa hã robra na 're morĩ wamhã, nimomo imorĩzé hã te te waihu'u õ di. 36Rowa'a hã ai'rata 're sãmra aba mono ré hã, ma'ãpé rowa'a na saze za'ra wa'aba, ãma 're aihâimana za'ra wa'aba mono da.
Zudeu norĩ hã, Zezusi te te siwi iwẽ'õzé
Ãne na te te sina nharĩ parimhã, Zezusi hã ma tô dahawi mo. Ma tô mo, ni'wa za te te isõpẽtẽ õ zéb u. 37Tawamhã Zezusi hã uburé marĩ dama i'manharĩ waihu'u'õ te te 're i'a'manharĩ mono hã te te 'madâ'â za'ra nherẽ, te te saze za'ra õ di. 38Ãne hã ma tô tiromhâiba, te te sina uwaimrami da, 'Re ihâimana u'âsi mono zadawa 'mahârâ'wa Izaias te te ãma irob'ui'érézé hã, ãne:
“Uburé Danhib'apito, e 'wa hã te te wazaze za'ra bâ, wanhimirowasu'u na. E 'wa hã te te duré ai'madâ'â waihu'u bâ, a hã marĩ 're i'ab'manharĩ mono na hã.”
39Ãne wa, da te saze za'ra õ di, Izaias hã te te duré rob'ui'éré wa, ãne:
40“'Re ihâimana u'âsi mono hã ma tô tob'a za'ra.
Ma tô duré 'rãnhitob za'ra, te te 'madâ'â waihu'u za'ra tõ da, duré te te sadaihu'u za'ra tõ da hã, apâ itẽme sipizari za'ra tõ da, te te pese za'ra da hã.”
41Izaias hã ma tô ãne rob'ui'éré, Zezusi hã wẽ uptabi na 're ihâimana mono zém na isihâi'rézé hã te te 'madâ'â wa. Tahawa ma tô ãma rob'ui'éré.
42Ãne hã romhâimana nherẽ, Zudeu norĩ ma roti'wa norĩ hã ma tô ahâ na saze za'ra. Tane nherẽ, farizeu norĩ hã rowahutuzém hawi te te sani za'ra õ'umnhasite, sõ'awi hã siwasu'u za'ra õ di. 43E marĩ wa. Ta norĩ hã te te sima 're wẽ za'ra mono wa, ti'ai ãma 're idahâimana za'ra mono si te te 're wẽsãmri za'ra mono da hã, 'Re ihâimana u'âsi mono si te te 're awẽsãmri mono da, te te sima 're iwẽ za'ra mono zém nhipai u.
Zezusihi nhimiroti hã dahâimanazéb zarina da'ãma rowairébé'wa
44Tawamhã Zezusi hã ma tô mreme 'rãihâ na sina tinha, ãne:
— Ni'wa hã te te ĩzazei wamhã, ĩwétési te te ĩzazei õ di. Ĩ'u'âbâ, ma duré saze, we ĩzatõrĩ'wa hã. 45Duré ni'wa hã te te ĩ'madâ'â wamhã, ĩ'u'âbâ ma duré 'madâ, we ĩzatõrĩ'wa hã. 46Dama rowa'a'wa na wa tô we datẽme mo ti'ai u hã, ni'wam norĩ hã te te 're ĩzaze za'ra mono wamhã, robra na 're hâimana za'ra mono tõ da. 47Ni'wa hã ĩnhimiroti te te wapari nherẽ, te te 're a'madâ'â pese õ wamhã, ihâimanazéb zarina te ãma rowairébé õ di za. E marĩ wa. Dahâimanazéb zarina, te da'ãma 're arowairébé mono da, we ĩmorĩ õ wa. Te 're da'anho'reptui mono da si, wa tô wei mo. 48Ni'wa hã te te ĩwẽ'õ wamhã, duré ĩnhimiroti zô tob'uzui õ wamhã, tawamhã te oto sada tihâimana siro, ihâimanazéb zarina ãma rowairébé'wa da hã. Ĩnhimiroti si te za ni'wa da hã tihâiba, te te ãma irowairébé da hã ihâimanazéb zarina, rob'rãsutu ãma hã.
49— Ĩsihawi te 're rowasu'u mono õ di. Ĩmama we ĩzatõrĩ'wa si, ma tô ĩma ti'ru, te 're irowasu'u mono zéb da hã, dama. 50Ĩma waihu'u pese di, isimiroti hã dahâimanazé isi'utõrĩ'õ nhomri'wa na hã. Tahawa, Ĩmama te te ĩma i'ruzéb zarina, wa tô te 're rowasu'u.
ទើបបានជ្រើសរើសហើយ៖
Zuwã 12: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.