Zuwã 13
13
Zezusi hã, isiré 're inomro mono norĩ te te i'apara upsõzé
1Tawamhã misi bâdâ oto i'awẽzéb u hã, Pascoa na dato nhisi ihâimanazéb da hã. Tawamhã Zezusihi ma waihu'u pese uptabi di, bâdâ tãma iwisi na hã, za oto ti'ai hawi imorĩzé hã apâ, Timama u. Tite norĩ hã ma tô te te 're azawi pese, ti'ai ãma dawazari 're ihâimana za'ra mono hã. Ti'ai ãma tihâimanazé te te i'rãsutuzéb u, ma tô te te 're azawi pese.
2Tawamhã Zezusi hã duré isiré re inomro mono norĩ me ma tô barana tisa hã siré tihu. Wa'uburé hã Zudasi, Simau Iscarioti 'ra ma hã duréi, ma tô rosa'rada i'rãi 're tãma tisẽ, Zezusi hã te te dama hâiba nhomri da hã. 3Tawamhã Zezusi hã te te waihu'u pese di, Imama hã te te ipisutu na, uburé marĩ ma, pire na 're hâimana mono da. Te te duré waihu'u pese di, 'Re ihâimana u'âsi mono hawi we imorĩ na hã, duré apâ za itẽme imorĩ na hã. 4Tawamhã saihuri ré, ma tô wahudu, Zezusi hã. Ti'uza ihâpa hã ma tô waze. Dasi'u'õzé hã ma tô duré 'mai'â. Taha na ma tô si'awasisi. 5Taha parimhã, â ma tô aza'wa, piza'a 're nho'a wa. Tawamhã isiré 're inomro mono norĩ te te oto i'apara upsõ na ma tô sãna'rata. Taha pari dasi'u'õzém na ma tô nasi apara u'õ. 6Tawamhã Simau Pedruhu u oto wisi wamhã, ta hã ma tô ãne sina sadanha:
— Wanhib'apito, e te za ĩpara upsõ.
7Tahawa Zezusi hã ma sada'â, ãne:
— Ãhã na hã sadaihu'u õ di aima hã, te i'manharĩzé hã. Zahadu wap si te za iwaihu.
8Tawamhã Pedru hã te duré tãma nharĩ na sahu, ãne:
— Mare di. Niwamhã ĩpara upsõi õ di za.
Ãne wa, ma tô Zezusi hã tãma tinha, ãne:
— Te aipara upsõi õ wamhã, ĩnhib'a'uwẽ õ di za, a hã.
9Tawamhã Simau Pedru te duré tãma tinha, ãne:
— Wanhib'apito, tane wamhã, ĩpara si upsõi õ di za. Ĩnhib'rata zama te za i'upsõ, duré ĩ'rã zama.
10Tahawa, te Zezusi hã duré tãma tinha, ãne:
— Mare di. Ni'wa hã si'upte wamhã, uburé te za ihâiba hã rã na tihâiba. Tahawa sina simnhasi, apâ sipara upsõ da si. A norĩ wa'wa hã aihâiba rã za'ra wa'aba di oto. Tane nherẽ, misi ni'wa hã hâiba rã na hâimana õ di.
11Zezusi hã te te waihu'u pese di, za ni'wa te te dama ihâiba nhomri da hã. Tahawa ma tô ãne tinha: “Tane nherẽ, misi ni'wa hã hâiba wẽ na hâimana õ di.”
12Tawamhã Zezusi hã isiré 're inomro mono norĩ te te apara upsõi parimhã, ma tô ti'uza ihâpa hã apâ sima tisẽ. Apâ ma tô duré nhamra isi'ubumrozéb u, sa da, meza ãma. Tahawa te ãne sadanharĩ za'ra:
— E ma tô isadaihu'u za'ra wa'wa, te aima i'manharĩ za'ra wa'aba zé hã. 13“Rowahutu'wa” na te asiwi 're ĩnhisi aba mo, duré “Wanhib'apito” na. Tô isarina, wa hã tô. 14Wa hã Asib'apito wa'aba nherẽ, duré ate za'ra wa'wa Rowahutu'wa nherẽ, te aipara upsõ za'ra wa'aba wamhã, tane te za duré 're asipara upsõ za'ra wa'aba mo. 15Wa ãma aima asanho za'ra wa'wa, ĩsine 're 'manharĩ za'ra wa'aba mono da. 16Tô sena wa za aima waihu'u za'ra wa'wa, ãne: Wada'uri zarina titede'wai ma romhuri'wa hã pire na hâimana waihu'u õ di, tinhib'ihâ'a nhipai u hã. Tane duré romreme 'wapéi'wa hã pire na hâimana waihu'u õ di, tizatõrĩ'wa nhipai u hã. 17Ã hã ĩnhimiroti hã oto aima waihu'u pese za'ra wa'aba wa, aima 're rowẽ uptabi za'ra wa'aba mono di za, ãma 're aihâimana za'ra wa'aba mono wa, 're 'manharĩ za'ra wa'aba mono wamhã.
18— Uburé te ai'ãma nharĩ za'ra wa'aba õ di. Te ĩsima ipisutu za'ra norĩ hã ĩma waihu'u pese di. Ãne hã ma tô tiromhâiba, Ibaihâ Iwazé pese na rob'ui'éré ãne inomro hã te te sina uwaimrami da: “Ni'wa hã ĩ'uiwada 're sai u'âsi mono nherẽ, te oto ĩzada tihâiba.” 19Romhâimana wana ré, wa ãne aima waihu'u siromo za'ra wa'wa, romhâimana wamhã, ĩzaze za'ra wa'aba da, “Wa hã Tô Wa hã” na hã. 20Tô sena wa za duré ãne hã aima waihu'u za'ra wa'wa: Ni'wa hã za te datẽme 're i'azatõrĩ mono zô 're tob'uzui mono wamhã, ta norĩ u'âbâ te za ĩzô 're tob'uzu. Duré ni'wa hã ĩzô tob'uzui wamhã, ĩ'u'âbâ te za we ĩzatõrĩ'wa zô titob'uzu.
Zezusi hã, tihâiba za'réi'wa da hã te te iwasu'uzé
Mateus 26.17-25; Marcus 14.17-21; Lucas 22.7-13,21-23
21Tawamhã Zezusi hã ãne na te te nharĩ parimhã, ipẽ'ẽzé hã ma tô azâ, sa'ẽtẽ uptabi na. Tahawa, ma tô sõ'awi tinha, isiré 're inomro mono norĩ ma, ãne:
— Tô sena, wa za ãne hã aima waihu'u za'ra wa'wa: Ni'wa hã misi, asiré za'ra wa'aba hã te za dama ĩhâiba nho.
22Tahawa isiré 're inomro mono norĩ hã ma tô si'madâ'â za'ra, te te waihu'u za'ra õ wa, ni'wai ãma te te inharĩzé hã. 23Tawamhã isiré 're inomro mono norĩ siré hã, Zezusi te te 're isawi pese mono hã te isababa nhamra. 24Ta hã ma tô Simau Pedru hã Zezusihi ãma wada'u, te te sadanharĩ da, ãne:
— Ma'ãpé sadanharĩ. E 'wai ãma ma tô tinha, za te te dama ihâiba nhomri na hã.
25Tahawa ta hã isiré 're imorĩ hã ma tô Zezusihi u sina rotété pese. Ãne ma tô sadanha:
— Wanhib'apito, e 'wa hã te za dama aihâiba nho.
26Tawamhã Zezusi hã ma sada'â, ãne:
— I'u'ẽtẽ wapu idi'izém na pratu wa, za te tãma idi, te tãma sõmri da hã.
Tawamhã i'u'ẽtẽ wapu hã ma tô di'i. Taha pari ma tô tisõ, Zudasihi ma, Simau Iscariotihi 'ra ma. 27Zudasi hã i'u'ẽtẽ wapu te te âri wi, ma tô Satanasi hã iwab ãzé. Tahawa Zezusi hã ma tô Zudasihi ma tinha, ãne:
— Marĩ hã i'manharĩ da hã, 'manharĩ su'u pé!
28Tane nherẽ, saihuri da, isiré isi'ubumro norĩ, ni'wa hã te te sadaihu'u õ di, e marĩ wa, ma tô Zezusi hã ãne tãma tinha. 29Zudasi hã, rob'uiprazé 'madâ'â'wa na te 're hâimana. Tahawa, ma tô nima norĩ hã ãma rosa'rata za'ra, Zezusi hã te te tãma 'ru newa, marĩ te te 'mai'uipra da, dato za ihâimana u da hã, niwamhã marĩ hã isibrob'õ norĩ ma, za te te sõmri da newa.
30Tawamhã Zudasi hã i'u'ẽtẽ wapu te te âri pari, ma tô rob u hã watobro. Barana oto.
Zezusihi nhimiroti ité
31Tawamhã Zudasi hã rob u watobro za'u hã, ma tô Zezusi hã ãne sina tinha:
— Ãhã na hã Ti'ai ãma Dasiré Ipodo hã wẽ uptabi na 're ihâimana mono zé hã te za oto Imama hã hâi'ré. Taha ãma te za duré sihâi'ré, 'Re ihâimana u'âsi mono hã wẽ uptabi na 're ihâimana mono zé hã. 32Taha ãma, 'Re ihâimana u'âsi mono, wẽ uptabi na 're ihâimana mono zém na sihâi'ré wamhã, tawamhã 'Re ihâimana u'âsi mono hã te za duré sihawimhã Ti'ai ãma Dasiré Ipodo hã wẽ uptabi na 're ihâimana mono zé hã dama hâi'ré. Tawamhã 'Re ihâimana u'âsi mono hã romhutu na te za tô wẽ uptabi na 're ihâimana mono zé hã hâi'ré. 33Ĩno norĩ, suru na wa za oto ai'rata ĩnhamra 'wa. Tawamhã te za ĩzô asõpré wa'wa za. Tahawa, wa za ãne aima nharĩ za'ra wa'wa, Zudeu norĩ ma, te inharĩ ne, ãne: Nimomo ĩmorĩzéb u hã ãma ai'aba'réi waihu'u aba õ di za a'â. 34Ĩnhimiroti itém na, wa za oto aima roti za'ra wa'wa, ãne: 'Re asisawi pese za'ra wa'aba mono. Te 're i'asawi pese za'ra wa'aba mono ne, aihâiba mono bâ te za 're asisawi pese za'ra wa'aba mo. 35Ãne hã 're asisawi pese za'ra wa'aba mono wamhã, te za da te 're aiwaihu'u za'ra wa'wa, ĩsiré 're i'anomro aba mono na hã.
Zezusi hã Pedru te te ipo're pu'uzé, za te te i'udâzém na hã
Mateus 26.31-35; Marcus 14.27-31; Lucas 22.31-34
36Tawamhã Simau Pedru hã ma tô Zezusi sadanha, ãne:
— Wanhib'apito, e momo te za aimo.
Zezusi hã ma asa sada'â, ãne:
— Ĩmorĩzéb u hã ãma aimorĩ waihu'u õ di za a'â. Nimahã na si te za ãma aimo ĩzarina.
37Tawamhã Pedru te duré apâ sina sadanharĩ zahu, ãne:
— Wanhib'apito, e niha bâ ãhã na hã asarina ãma ĩmorĩ waihu'u õ di. Ai'u'âbâ ĩdâ'â da wamhã, wa za ĩsisõ.
38Tahawa Zezusi hã ma tô ãne tãma tinha:
— E te za tô asisõ, ĩzawi te, atâ'â da hã. Tô sena wa za ãne hã aima waihu'u: Si'a hã hârâ wana ré, si'ubdatõ te za dawi ĩ'udâ, aima ĩwaihu'u õ na hã.
ទើបបានជ្រើសរើសហើយ៖
Zuwã 13: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.