Yoane 4
4
1Pakwisiŵa lomba ŵaSikulu ati aŵaFalisi ŵaliumfwile ati ŵa Yesu ŵalukuŵaalula ati ŵasambile, nekuŵaŵatisya aŵakucilo'bwinji napaŵakwe Yoane 2(naŋgawe'fyo ŵaYesu aŵene taŵalukuŵatisya, yo, sombi ŵasambile ŵakwe eŵalukuŵatisya), 3ŵalifumine mucalo ca Iudiya, nekukumbulucila liŵili kucalo caGalili. 4Peŋka'po ŵaŋgapita pacalo caSamalya. 5Lomba ŵalificile pamusi umbi waŵaSamalya, isina lyauo niSaika, apepi pali kako-kalo akapele Yakobi kuli Josefi umwana wakwe. 6Kopele uko ekwali nemukalo wakwe Yakobi. Peŋka ŵaYesu, pakuti ŵalikatele kukwenda, ŵaliikele'fyo pamukalo. Lomba akasuŵa kali pakati keulu. 7Peŋka nekwisa umwanakasi umuSamalya mukutapa'menda, Lomba ŵaYesu ŵalilaŵile kuli ye ati: Mpe-po, nwe! 8Pakuti aŵasambile ŵaŵo ŵaliile kumusi mukuula ifyakulya. 9Lomba uyo-mwanakasi umuSamalya alilaŵile kuli ŵo ati: Mbanindo weŵo wemuJuda ulukulombela amenda kuli neŵo, nemuSamalya? (Pakuti aŵaJuda taŵaambala-po neŵaSamalya, ŵaŵa.)
10Sombi ŵaYesu nekumwasuka ati: Weŵo, ŋga uliisiŵile impese yaŵaLesa, nekumwisiŵo'yu ulukulaŵila kuli wewo ati, Mpe-po, nwe; ŋga walomba kuli ye, naye ŋga akupela amenda amweo. 11Naye umwanakasi nekulaŵila kuli ŵo ati: Pakuti Sikulu, tamukwete icakutapula-ko, nemukalo uyu uliile pansi apatali, mbefyo ayo-menda amweo muli nao alifumine kulipi? 12Kani mweŵo mulicilile uŵukulu napali ŵawisifwe Yakobi aŵatupele uyu-mukalo, nekulukunwamo naŵo aŵene, neŵana ŵaŵo, nenama syaŵo? 13Peŋka ŵaYesu ŵalimwasucile ati: Aŵantu ŵonse uwakunwa kumenda aya akaŵa liŵili necilaka; 14sombi ukanwa kumenda ayo aŋkamupela neŵo, taakomfwa-po liŵili icilaka neli panini insiku syonse lukoso; sombi ayomenda aŋkamupela neŵo akaŵa muli ye kantupuntupu akalukunyunya kumweo uwamuyayaya.
15Peŋka umwanakasi alilaŵile kuli ŵo ati: Sikulu, mpeni-po amenda ayo, ati nsikalukumfwa-po liŵili icilaka, neli kwisa nakukuno konse kumenda akuloŵa. 16Naŵo ŵaYesu kaŵamweŵa ati: Koya, ukete umulume woŵe, mubwelele kuno. 17Sombi umwanakasi nekuŵaasuka ati: Nsikwete-mulume neŵo. Naŵo ŵaYesu nekumwasuka ati: Walaŵila bwino ati—Nsikwete-mulume neŵo; 18pakuti weŵo waliupilwe aŵalume ŵasanu, sombi uyo uli nakwe ŵukumo taali mulume woŵe; ico ecacine walaŵila. 19Lomba umwanakasi alilaŵile kuli ŵo ati: Sikulu, pano naisiŵa ati mweŵo muli ŵakusimika.
20Ŵawisifwe aŵakale ŵalukutembela kuli ŵaLesa palupili ulu; sombi mweŵo ati nimujelusalemi emwelelwe ukutembela kuli ŵaLesa. 21Kumfwa ŵaYesu wamwewa ati: Wemwanakasi, uncetekele neŵo ati ilukwisa impindi, iyi tamukatembela kuli ŵaLesa ŵaWisifwe neli nipapano palupili neli nimujelusalemi. 22Mulatembela kuli ŵaŵo aŵa tamwisi mweŵo; sombi fweŵo tulatembela kuli ŵaŵo aŵa twisi; pakuti umwakupulucila mulitulile kuŵaJuda. 23Sombi ilukwisa impindi iyo, eyafika pano, ili aŵakutembela aŵacine ŵakalukutembela kuli ŵaLesa ŵaWisifwe mumupasi namuli ŵucine; pakuti ŵaLesa ŵaWisifwe walukufwaya ati aŵakuŵe'fyo ŵakalukutembela kuli ŵo. 24ŴaLesa eMupasi, lomba aŵo aŵatembela kuli ŵo ŵaŋgelelwa ukutembela mumupasi namuli ŵucine.
25Naye umwanakasi alilaŵile kuli ŵo ati: Ndiisi ati ŵaMasaya ŵakesa, aŵo ŵopele aŵelicilwe ati niŵaKlistu; peŋka pakwisa ŵo, ŵakatufisulwila ifintu fyonse. 26Ŵa Yesu ŵalilaŵile kuli ye ati: Enineŵo, nendukulaŵila kuli weŵo.
27Peŋka'po ŵalificile neŵasambile ŵaŵo; naŵo nekukaŋkamana lukoso ati ŵalukwambala nemwanakasi; sombi naŋgawa nifyefyo, tapali-po uwakwipusya ati: Nindo mulukufwaya? neli ati: Pakuti pando mulukwambawila nakwe?
28Lomba umwanakasi alisile umutondo wakwe, nekuya kumusi, nekuŵaŵula aŵalalume ati: 29Twendeni, mukaŵone-po umuntu uwambule'fyo ifi nalukucita neŵo fyonse: kani niKlistu uyo? 30Naŵo aŵantu aŵo ŵalifumine mumusi nekuyo'ko kuli ŵo.
31Sombi impindi iyo aŵasambile ŵalukuŵakombetela ati: MweŵaLabi, muIye! 32Sombi naŵo nekuŵaasuka ati: Ndi nafyo neŵo ifyakulya ifi tamwisi mweŵo. 33Lomba aŵasambile nekwipusyansyanya ati: Kani umbi aŵaletelapo ifyakulya? 34Sombi ŵaYesu ŵaliŵeŵele ati: Ifyakulya fyanji nififi, ati ncite neŵo ukufwaya kwaŵaŵo aŵantumine, nekwikonsya imilimo yaŵo.
35Tamulukweŵa mweŵo ati yasyalako imyensi ine, eli ikafika impindi yakuteŵula? Ŵoneni, ndukumuŵuleni ati: Inukeni, mutontomeke pamaŵala; kale atuŵa neŋkope isyelelwe ukuteŵula. 36Uwakuteŵula alukupoka ukulambulwa kwakwe, nekuloŋgela iŋkope isyakumweo uwamuyayaya; ati uwakuŵyala nawoyo uwakuloŋgela wakasaŋgalalile pamo. 37Pakuti ico-cisimpi cacine ati—Umbi alaŵyala, sombi niumbi naye euteŵula. 38Nalimutumineni mukufiteŵule'fyo ifi tamwalimine; ŵambi eŵalimine, sombi mweŵo mwainjila mumilimo yaŵo.
39Naŵo aŵaSamalya aŵenji aŵamumusi uyo ŵalicetekele muli ŵaYesu, pakuti pamasiwi amwanakasi uyo uwasimicile ati: Ŵambule'fyo ifi nalukucita neŵo fyonse. 40Lomba pakwisa kuli ŵo aŵaSamalya, ŵaliŵakombetele ati: Mwikale nafweŵo. Naŵo ŵaliikele kopele uko insiku siŵili. 41Kaŵili naŵambi naŵo aŵenji ŵalicetekele pakuti pamasiwi aŵo; 42nekulaŵila kumwanakasi uyo ati: Pano tulukucetekela; sombi tepakuti pakusimika koŵe; pakuti twaŵomfwa nafweŵo fweŵene; peŋka tuliisi ati aŵa icine eŴakupulusya ŵafintunsi fyonse.
43Lomba pakupita insiku isyo syoŵilo ŵalifumine-ko uko nekuya kucalo caGalili; 44pakuti ŵaYesu aŵene ŵalisimicile ati: Uwakusimika taacindikwa mucalo cakwaŵo. 45Sombi pakufika ŵo mucalo caGalili, lomba aŵaGalili ŵaliŵasekelele bwino, pakuti ŵalibwene fyonse'fyo ifi ŵacitile mu Jelusalemi kucitenje, pakuti aŵo naŵo ŵaliile kucitenje.
46Lomba ŵalificile liŵili kuKena ukwakuGalili, uko uku ŵaalwilile amenda nimfaina. Lomba eko yali impemba imbi, iyo umwana waiyo umwalalume ali mulwasi kuKapanaumi. 47Iyo, pakumfwa ati ŵaYesu ŵalifumine mucalo caludiya nekwisa kucalo caGalili, yaliile kuli ŵo, nekuŵakombetela ati: Twendeni, mukambusisye-ko umwana wanji, pakuti imfwa yapalamina'kale kuli ye. 48Eli ŵalaŵile kuli yo ŵaYesu ati: Ŋga tamuŵona utwisiŵilo nefimpelampela, ŋga tamucetekela neli kucetekela konse. 49Sombi impembe' yo yalilaŵile kuli ŵo ati: Sikulu mwise kwanji, ekesa-kufwa umwana wanji.
50Naŵo ŵaYesu nekuyasuka ati: Kamuyeni; umwana wenu alukulaŵa. Peŋka umuntu uyo alicetekele amasiwi ayo walawile ŵaYesu kuli ye, nekukumbuluka. 51Pansila ili alukubwela alikumene neŵapyunjisi ŵakwe; aŵo nekumuŵula ati: Umwana wenu pano alukulaŵa. 52Naye nekuwepusya ati: Isa-mpindi ataticile ukulwaluka? Naŵo ŵalimwasucile ati: Mailo akasuŵa pakati keulu uŵulwele eli bwamulekele. 53Lomba ŵawisi ŵaliisiŵile ati niyeyompindi yopele eyo ŵalaŵile-mo ŵaYesu kuli ye ati: Umwana wenu alukulaŵa. Naŵo nekucetekela, pamo newamuŋanda yaŵo ŵonse. 54Akesiŵilo ako kaŵutuŵili akacitile ŵaYesu, pakufuma mucalo caludiya mukwisa kucalo caGalili.
ទើបបានជ្រើសរើសហើយ៖
Yoane 4: AAL59
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lamba Bible Version © United Bible Societies, 1959.