KAOBAK 1
1
Kaopakbü Ngühli
1 #
Jn 1.1-2 Khangla Mühghaüei müh si kaodak yaükei. 2Hobaje kaodak kho ai ayeienko kongkong kiteikei, hoba nakthühbü kho yungnyu thüka kikei hoba Mühghaü soushou deitaka shongeiko kikei. 3#2 Kor 4.6 Hobaje Mühghaüei laukei, “Ngesakbü kiashi” hoba ngesakbü kikei. 4Mühghaüei ngesakbü maia dogo chühenkei, hoba nakthüh ka ngesakbü janyinkei. 5Hobaje Mühghaüei ngesakbü to “Chalou” hoba nakthühbü to “Nangnak” dogo ngakei. Hobaje kho chasem si ngeyang kho shaangbounyet kikei. 6Hobaje Mühghaüei laukei, “Dei kho chela dangshuoktiashi hoba kho ka dei ka dei janyintiashi.” 7Hobaje Mühghaüei dangshuokbü kho küman thükkabou ka phangkabou kho bangnyintikei. 8Hobaje Mühghaüei mühkom khoto “Müh” dogo ngakei hoba chasem si ngeyang kikei. Hobaje kho nyibounyet kikei.
9 #
2 Pet 3.15 Kheijinei Mühghaüei laukei, “Müh phanga kibü dei pendou kaoen chenei takshattiashi, hoba kaolin longtiashi,” hoba kho tegü kikei. 10Hobaje Mühghaüei kaolin kho to “Kaodak” dogo laukei hoba dei takshatbü kho to “Yungnyu” dogo laukei, hoba Mühghaüei kho maia dogo chühenkei. 11Hobaje Mühghaüei laukei, “Kaoei langshangbü buhekdeihek, busidei hoba sang phang penko longtiashi” hoba kho tegü kikei. 12Hobaje kaoei buhekdeihek luluei lulu phang langshangko hekbü buhekdeihek, busidei hoba sang den lulu yemtikukei, hoba Mühghaüei kho maia dogo chühenkei. 13Hobaje nangnak si chasem kho sembounyet chalou kikei.
14Hobaje Mühghaüei laukei, “Müha mühkom khünei nangnak ka chalou bangnyinla shanga ngesakbü shuong kitiashi; hoba habü shangshen shanga, poanghongjih shanga hoba chalou hoba po shanga, 15hoba kaodak ngesakla shanga mühkoma ngesakbü kiashi,” hoba kho tegü kikei. 16Mühghaüei ngesak yaangbü penyi kümbei, yaangshangbou kho chanyu, kho chaloua songdakla, hoba hanshangbou ngesakbü kho litnyu, kho nangnak songdakla shanga; haoei tokei khanshoulitshou shuongkei kümbei. 17Mühghaüei kaodak ngesakla shanga, 18hoba chalou si nangnak songdakla shanga hoba nakthüh ka ngesakbü janyinla mühkoma khübü kho küman phokei, hoba Mühghaüei maian hapbei. 19Hobaje chasem si ngeyang ham kho chalou leiboubü kikei.
20Hobaje Mühghaüei laukei, “Dei lang kibü yangsikok den pendouei shentiashi, hoba aushuong mühkoma sengeitiashi.” 21Hobaje Mühghaüei yungmang kabü molo dei yangsikok hoba deikabü yangsikok hoba kaakyembü au phang phang pakentikei; hoba Mühghaüei kho maiakei dogo chühenkei. 22Hobaje Mühghaüei haoen haükuko laukei, “Lang hekko haayaangashi hoba deiei yungnyu shentiashi, hoba kaodaka aushuong haashi.” 23Hobaje nangnak si ngeyang kho chalou ngaobounyet kikei.
24Hobaje Mühghaüei laukei, “Kaodaka meisiau haoen lulu phang, samkeisamuk phang lulu hoba kaoa shanbü hoba haoen phang phang lulu longtiashi,” hoba kho tegü kikei. 25Hobaje Mühghaüei meisiau phang lulu lulu hoba samkeisamuk shatsinam hoba kaoa shanbü yangsikok haoen lulu phang ajanjan pendou kümbei, hoba Mühghaüei kho maiakei dogo chühenkei.
26Hobaje Mühghaüei laukei, “Senei müt sen tegü, sen phatbüa kümbho; hoba yungnyua ngau thüka hoba mühkabü aushuong thüka hoba samkeisamuk thüka hoba kaodak pendou thüka hoba kaoa paibü pendou thüka haoen bunyu yingshi.” 27#Mt 19.14 Hibü Mühghaüei hao tegü müt yaükei; Mühghaü phatbüa haoei haosi yaükei. Haoei haoen bousu hoba yaksa yaükei. 28Hobaje Mühghaüei haosi haükukei; hoba Mühghaüei haosi to laukei, “Bukko haako hauashi, hoba juong haashi, hoba kaodak shentiashi hoba thepetashi. Hobaje yungnyu kabü ngau thüka hoba mühkabü aushuong thüka hoba kaodaka lang kibü ajanjan pendou thüka bunyu yingshi.” 29Hobaje Mühghaüei laukei, “Chühashi, kaodaka kibü lilabü hekbü langshangbü buhekdeihek pendou hoba bunyu pendou laoboua hek hekbü ki ngei kan la kuda, kan shanga kho shausiyung kilabü. 30Hobaje kaodaka meisiau pendou la hoba mühkabü au pendou la hoba kaoa shanbü pendou la buhekdeihek sangtüngbü shausiyung shanga kuda,” hoba kho tegü kikei. 31Hobaje Mühghaüei haoei kümbü pendou hapbei hoba ho aeibou maian kikei. Hobaje chasem si ngeyang kho chalou lakbounyet kikei.
ទើបបានជ្រើសរើសហើយ៖
KAOBAK 1: CHANGBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.