Yona 4
4
Yona nɨ cajʉ Yehova be àdrà yɨ̀ vɨɨ
1Te Yona ca òmbà yɨ̀ Orɨ nɨ asíndrɨ̀zà ꞌole ꞌba Ninevea vɨɨ ɨnɨ bʉ vɨɨ yɨ̀. 2Ànɨyɨ̀ zi eꞌyo Yehova tia kɨ́nɨ̀, “Yehova lá, ꞌdɨ̀vɨɨ ovʉʉ eꞌyo ndráánɨ́ manɨ ꞌyole dèè manɨ ovʉrɨa àma ꞌyowa àngʉ̀a vɨɨ ɨ kʉ yà? Ɨ̀ndɨ̀a eꞌyo ꞌdɨ̀vɨɨ fè ma kodrì ndráánɨ́ du Tarasisia àrùàru ꞌdà ɨ. Ma nì ra mɨ Orɨ lètaa drʉ díká asíndrɨ̀zà be vɨɨ ɨ, mɨ ꞌoo àdrà mbèlèmbele kʉ, mɨ oꞌdú drɨ́á alè drʉ díká mɨ jàa ꞌba drì mbàà drʉ kʉ. 3Yehova lá oꞌdɨ́ꞌdò vɨɨ yɨ̀, mɨ fè màá drà ace ra, àrɨ̀yɨ̀kʉ ɨ̀rɨ òròdríkó drʉ manɨ ovʉjʉ ɨdrɨ drʉ àsúú.”
4Te Yehova òmvɨ ɨ̀rɨ́ yɨ́ kɨ́nɨ̀, “Mɨ awo òkpo ovʉjʉ òmbà yɨ̀ vɨ́ɨvɨɨ ngɨ́á cɨ yà?”
5Yona kodrì mu rɨ nyáá àkú ìmgbélé Nineve drʉ vɨɨ ɨ̀gaa ìtú nɨ́ pʉ̀rɨa vɨɨ alɨale drʉ. Nàa, ꞌbe bòrò àloo were vɨ́ɨvɨɨ, rɨ nyáá ɨ̀ndrɨ̀a nàa díká rɨ te ne àrɨ eꞌyo nɨ lèe nɨ ꞌoo àkú ìmgbélé Nineve alɨa nɨ̀ yà vɨɨ? 6Acete Yehova Orɨ fè patí àloo razà ɨ̀ndrɨ̀ be dèrèdèrè kɨ̀le nzú lé vɨ́ɨvɨɨ nga kara ɨ̀rɨ nɨ rɨjʉ naa alɨa díká ra bòrò ndee drìa yɨ̀ kúrù ɨ̀rɨ yɨ́ ɨ̀ndrɨ̀ fèjʉ azílé ɨ̀rɨ ovʉ nàa ònyɨ̀be benì. Eꞌyo ꞌdɨ̀vɨɨ yɨ̀ Yona ovʉ àyɨ̀kò yɨ̀ tʉ̀. 7Te drù vɨ́nɨ àngʉ̀ tràà yɨ̀, Orɨ fè ɨ̀rɨ̀àkà àloo tu patí naa drìa, mbe patí ndee drɨ́á ra fè ànɨ patí ndee onyú rá. 8Tèvɨ́nɨ ìtú nɨ́ ɨꞌdorɨa drɨrɨa ꞌba, Orɨ pè àlúlúà drɨzà òkpo vɨ́ɨvɨɨ tia, be ɨngajʉ ɨ̀ga ìtú nɨ pʉ̀rɨale drʉ, díká ìtú àcɨ drɨle vɨɨ ve Yona nɨ tʉ̀ fè àꞌbaa ìcìmàkòrò ꞌbe ɨ̀rɨ ra. Eꞌyo ꞌdɨ̀vɨɨ yɨ̀ Yona kɨ̀nɨ̀, “Ɨ̀rɨ òròdríkó drʉ manɨ ovʉjʉ ɨdrɨ drʉ àsúú.”
9Te Orɨ zi Yona nɨ kɨ́nɨ̀, “Ngɨ́a mɨ awo òkpo ovʉjʉ òmbà yɨ̀ patí vɨɨ nɨ àngàle vɨɨ yɨ̀ cɨ yà?” Yona òmvɨ kɨ́nɨ̀ “Èè sìta ra manɨ ovʉjʉ òmbà yɨ̀ díká manɨ dràjʉ ra.”
10Te Yehova ꞌyo ɨ̀rɨ yɨ́ kɨ́nɨ̀, “Mɨ ꞌoo òmbà yɨ̀ patí àngàle vɨɨ eꞌyoa yɨ̀ tòó, àlʉ mɨ saa ɨ̀rɨ nɨ̀ kʉ; nga nɨ drì yɨ̀ iní be díká drà kòꞌbò ɨ̀rɨ nɨ ngale vɨɨ lé pàbaa iní be. 11Te ɨ̀rɨ ngíá ònzɨ manɨ asíndrɨ̀za bàjʉ ꞌba Ninevea vɨɨ ɨnɨ drìa yà? Te dèè isú ꞌba àlɨ̀fʉ tʉrʉàlʉ kàlíìrì drìlia àkú ìmgbélé ꞌdɨ̀vɨɨ alɨa vɨɨ cóó ngà eꞌyo ònzɨ ɨnɨ ɨ̀sɨle eꞌyo ꞌyéè be kʉ díká ànyàfa àngʉ̀ ndee alɨa tree.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yona 4: MADI-URL
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved