Yona 3
3
Yona nɨ Yehova ti ɨrɨjʉ vɨɨ
1Acete Yehova kàdrì Yona bʉ díká ꞌyo ɨ̀rɨ yɨ́ kɨ́nɨ̀, 2“Mɨ mu àkú ìmgbélé Nineve drʉ vɨɨ alɨa eꞌyo ndráánɨ́ manɨ azílé mɨ́ yɨ́ vɨɨ ikú.”
3Ànɨ Yona àtì eꞌyo Yehova tia vɨɨ ra, kodrì mu Ninevea kɨ̀le Yehova nɨ azílé ndráánɨ́ ɨ̀rɨ yɨ́ vɨɨ lé. ꞌDɨ̀vɨɨ isú dèè Nineve nɨ àkú àloo ìmgbélé wàlà vɨ́ɨvɨɨ ɨ, ànɨyɨ̀ acíjʉ alɨa yɨ̀ ɨco oꞌdú ꞌdʉ pɨpɨ na. 4Oꞌdú òkò Yona nɨ ɨꞌdojʉ acíjʉ́ vɨɨ yɨ̀, rɨ ji eꞌyo òyʉ pàyɨ̀ ꞌba àngʉ̀ ndee alɨa vɨɨ ɨnɨ yɨ́ kɨ́nɨ̀, “Orɨ nɨ ngaa Nineve drì jàa àfa alɨa vɨɨ ɨbe oꞌdú kàlísu vɨɨ alɨa ra.” 5ꞌBa Nineve nɨ vɨɨ àꞌɨ́ àálé Orɨ àwo vɨɨ ra. Ace ꞌba ndee azí kɨ́nɨ̀ ꞌba drɨ́á mgbimgbi àngʉ̀ ndee alɨa vɨɨ ɨnɨ ꞌdá àbírí díká ɨnɨ òsú àfa sùzà ɨ̀mbòò òꞌbàjʉ vɨɨ ɨnɨ trʉ̀taa àꞌíjʉ Yehova bʉ benì, ꞌdɨ̀vɨɨ ɨ̀rɨ ɨꞌdojʉ ꞌba àfabe díká àfako vɨɨ ɨnɨ be drɨ́á.
6Opɨ Ninevea vɨɨ nɨ eꞌyo Yona nɨ rɨle ꞌyole vɨɨ ɨrɨjʉ ꞌba, nga òpɨ̀ komɨ drìa vɨɨ yɨ̀ oru, òtrʉ̀ nɨ rúá àfasùzà òpɨ̀ nɨ vɨɨ ɨnɨ ra, òsù ace àfasùzà ɨ̀mbòò òꞌbàjʉ vɨɨ nɨ rúá, ɨ̀pò nɨ opʉ́tá yɨ̀ càndɨ òꞌbàjʉ. 7Acete opɨ fè àyotaa eꞌyo ꞌdɨ̀vɨɨ ɨrejʉ Nineve ale yɨ̀ kɨ́nɨ̀,
Àyotaa opɨ ɨnɨ nɨ ꞌbàle ꞌba ꞌwàrà ɨ̀rɨ awo vɨɨ ɨnɨ be vɨɨ kɨ̀nɨ̀, “ꞌBa drɨ́á ɨnɨ nyá àfa àloo kʉ díká ɨnɨ mbú àfa àloo kʉ, ànyàfa ꞌyowa vɨɨ ɨnɨ be drɨ́á. 8Te ráaka ꞌba drɨ́á ɨnɨ òsú àfa sùzà ɨ̀mbòò òꞌbàjʉ vɨɨ ɨnɨ ànɨ rúá díká ànyàfa ꞌyowa vɨɨ ɨnɨ rúá ɨ̀ndɨ̀. ꞌBa àlʉàlʉ ɨ̀rɨ zi eꞌyo Orɨ tia así drɨ́á yɨ̀. Lè ɨnɨ kʉ́ eꞌyo ònzɨ díká ngɨ̀rɨ̀ngɨ̀rɨ̀ ꞌyowa vɨɨ ɨnɨ ra. 9Àma nìi ngà kʉ alóo Orɨ ɨco nɨ así trʉ àma drìjàjʉ kʉ ra.”
10Orɨ nɨ ndrèjʉ ꞌba ꞌdɨ̀vɨɨ kʉ́ eꞌyo onzɨ ꞌyowa vɨɨ ɨnɨ ꞌbaá, trʉ̀ nɨ así rá, awɨɨ ace ꞌba ndee ɨnɨ drì ja kʉ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yona 3: MADI-URL
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved