Matayo 6
6
Ɨmbataa àfa fèjʉ aluu yɨ́ vɨɨ
1“Àmɨ ovʉ́ mule be, lè àmɨ ꞌó eꞌyo drɨ́á Orɨ nɨ lèle vɨɨ ɨnɨ òꞌbɨ mulia àmɨ ɨ̀ꞌdajʉ ɨnɨ mulia kʉ. Àmɨ tè ꞌo ra, àmɨ nga mu òya isú ngajʉ Ata ꞌbùa vɨɨ bʉ kʉ.
2“Ànɨ àmɨ tè àfa fèe ́ꞌbarʉʉ àloo àlúú drʉ vɨɨ yɨ́, àmɨ oyʉ́ eꞌyoa kɨ̀le ꞌba lókìrí be vɨɨ ɨnɨ nɨ rɨle ꞌole sinagogi alɨa rú kùzà isújʉ́ vɨɨ ɨnɨ lé kʉ. Ma àmɨ bílé lɨɨ nóni, ꞌba ndee isú ꞌyowa òya de drɨ́á ꞌdà ɨ. 3Te àmɨ tè àfa fèe ꞌba àloo àzàkoma lèe vɨ́ɨvɨɨ yɨ́, lè àmɨ fé ꞌba àloo ɨ̀rɨ nì drìa eꞌyo kʉ, 4ànɨ fètaa àmɨ ꞌyowa vɨɨ ɨ̀rɨ ovʉ cɨ́rɨ́cɨ̀rɨ̀ drʉ benì. Ace ànɨ Ata àmɨ ꞌyowa eꞌyo àmɨ nɨ ꞌole cɨ́rɨ́cɨ̀rɨ̀ drʉ vɨɨ ndrèe vɨɨ, nɨ ngaa àmɨ yɨ́ òyaa òfèe ra.
Ɨmbataa Orɨ nɨ zizà drìa vɨɨ
5“Àmɨ nɨ Orɨ nɨ zirɨa, lè àmɨ ovʉ́ kɨ̀le ꞌba lókìrí be vɨɨ ɨnɨ lé kʉ, àrɨ̀yɨ̀kʉ ɨ le Orɨ nɨ zi sinagogi ɨnɨ alɨa díká ɨ́ ka so àngʉ̀ ꞌbanɨ ꞌba ndrèjʉ ndɨrɨ vɨɨ alɨa ànɨ ꞌba drɨ́á ɨnɨ ndré ànɨ benì. Ma lè ꞌyo àmɨ yɨ́ tàándí, ꞌba ꞌdɨ̀vɨɨ isú ꞌyowa òya de drɨ́á ꞌdà ɨ. 6Te àmɨ nɨ Orɨ nɨ zirɨa, lè àmɨ fɨ́ àmɨ awo jóá, àmɨ òpí jótile cɨ, àmɨ nga eꞌyo zi Ata àmɨ ꞌyowa ndrèle kʉ vɨɨ tia ndò. Ànɨ Ata eꞌyo àmɨ nɨ ꞌole cɨ́rɨ́cɨ̀rɨ̀ drʉ vɨɨ ɨnɨ ndrèle drɨ́á vɨɨ nɨ nga àmɨ yɨ́ òyaa fèe ra. 7Àmɨ nɨ Orɨ nɨ zirɨa, àmɨ àyʉ́ ti ɨkɨ́kó vɨ́ɨvɨɨ ɨnɨ kɨ̀le ꞌba Orɨ nɨ àꞌɨ̀le kʉ vɨɨ ɨnɨ nɨ ꞌole vɨɨ lé kʉ, àrɨ̀yɨ̀kʉ ɨ́ ɨga orɨa ꞌyowa vɨɨ ɨ rɨ ànɨ ti ɨrɨ ànɨ nɨ ɨ̀rɨ zile ɨ̀zʉʉ vɨɨ yɨ̀. 8Àmɨ ovʉ́ ɨnɨ lé kʉ, àrɨ̀yɨ̀kʉ Ata àmɨ ꞌyowa vɨɨ nì eꞌyo àmɨ nɨ lèle zile ɨ̀rɨ tia vɨɨ ɨnɨ drɨ́á rá dèèngà àmɨ zi ɨ̀rɨ kʉ.
9“Ànɨ, acete àmɨ zí Orɨ nɨ nóni:
‘Àta àma ꞌyowa ꞌbùa vɨɨ,
mɨ rú ɨ̀rɨ ovʉ ìnzìzà drʉ,
10Kárí mɨ awo vɨɨ ɨ̀rɨ ca,
eꞌyo mɨnɨ lèle vɨɨ ɨ̀rɨ ꞌonɨ
nyawúá kɨ̀le ꞌbùa vɨɨ lé.
11Mɨ fè àma yɨ́ tà oꞌdú àlʉ àlʉ bʉ yɨ̀.
12Mɨ trʉ̀ eꞌyo onzɨ àmanɨ ꞌole vɨɨ ɨnɨ drɨ́á,
kɨ̀le àmanɨ ꞌba eꞌyo onzɨ ꞌole àma bʉ vɨɨ ɨnɨ trʉ̀le vɨ́nɨ.
13Dɨ́ká mɨ ji àma obetaa alɨa kʉ,
te mɨ òpa àma ònzɨ alɨa.#6:13 Nòsɨ̀kʉ ònzɨ alɨa; Búkù oꞌdɨ́à alóò mùndʉ ti yɨ̀ vɨɨ sɨ́ kɨ́nɨ̀ ònzɨ yɨ̀, àrɨ̀yɨ̀kʉ kárí nɨ, òkpo nɨ díká dìzà be ɨnɨ ovʉ́ nánináni Amena.’
14“Àmɨ tè ꞌba alóo ɨ̀zatà ꞌole àmɨ bʉ vɨɨ ɨnɨ trʉ̀ʉ ra, Ata àmɨ ꞌyowa ꞌbùa vɨɨ nɨ nga pàbaa àmɨ trʉ̀ʉ ra. 15Te àmɨ tè ꞌba ɨ̀zatà ꞌole àmɨ bʉ vɨɨ ɨ nɨ trʉ̀ʉ kʉ, Ata àmɨ ꞌyowa vɨɨ nga mu àmɨ àmɨ ꞌyowa ɨ̀zatà trʉ kʉ ɨ̀ndɨ̀.
Ɨmbataa àbírí ꞌdàzà drìa vɨɨ
16“Àmɨ nɨ àbírí ꞌdàrɨa, àmɨ ꞌbá àmɨ andreti càndɨ drʉ kɨ̀le ꞌba lókìrí be vɨɨ ɨnɨ nɨ ꞌole vɨɨ lé kʉ, àrɨ̀yɨ̀kʉ ɨ́ ànɨ andreti ꞌba càndɨ drʉ ànɨ ꞌba drɨ́á ɨnɨ ní kɨ́nɨ̀ ànɨ àbírí ꞌdàa vɨɨ benì. Ma lè ꞌyo àmɨ yɨ́ tàándí drʉ, ꞌba ndee isú ꞌyowa òya de drɨ́á ꞌdà ɨ. 17Te Àmɨ nɨ àbírí ꞌdàrɨa, àmɨ òjɨ́ àmɨ andreti ra díká àmɨ ɨfɨ́ àmɨ drì òdʉ yɨ̀. 18Azílé ànɨ ɨ̀rɨ fè ꞌba alóo ɨnɨ ní àmɨ àbírí ꞌdàa vɨɨ kʉ benì, pè lʉ́ kírí Ata àmɨ ꞌyowa ꞌbanɨ ndrèle kʉ vɨɨ ɨ̀rɨ ndrè kírí nɨ̀; díká Àta eꞌyo ꞌbanɨ ꞌole cɨ́rɨ́cɨ̀rɨ̀ drʉ vɨɨ ɨnɨ ndrèle vɨɨ nɨ nga àmɨ́ yɨ́ òyaa fèe ra.
Lonyɨ tà mbazà bùa vɨɨ
19“Àmɨ mbá lonyɨ àmɨ ꞌyowa vɨɨ tàa àmɨ yɨ́ drʉ nyawúa vɨ̀a kara ògùù nɨ ɨcojʉ mbejʉ ra àloo ɨnɨ nɨ ɨcojʉ oríjʉ́ ra díká ogi nɨ ɨcojʉ tilia ŋòjʉ ògìjʉ ra vɨɨ alɨa kʉ. 20Te àmɨ mbá lonyɨ àmɨ ꞌyowa vɨɨ tàa ꞌbùa, kara ònyɨ̀ be ògùù nɨ ɨcojʉ òmvajʉ kʉ díká ɨnɨ nɨ ɨcojʉ oríjʉ́ kʉ, àloo ogi nɨ ɨcojʉ tia ŋòjʉ ogìjʉ kʉ vɨɨ alɨa. 21Àrɨ̀yɨ̀kʉ àmɨ así nɨ ngaa rɨɨ ovʉ kara àmɨ ꞌyowa lonyɨ nɨ ovʉjʉ vɨɨ alɨa.
Dìzà rúá awo vɨɨ
22“Mule ꞌonɨ tálà lé rúá yɨ́. Àrɨ̀yɨ̀kʉ mɨ mule tè àngʉ̀ ndrèe ònyɨ̀be, ɨ fe mɨ ovʉ dìzà alɨa. 23Te mɨ mule tè àngʉ̀ ndrèe ònyɨ̀be kʉ, mɨ nga ovʉʉ dúmú ɨ̀wa drʉ vɨ́ɨvɨɨ alɨa. Acete àfa mɨ rúá yɨ́ dìzà fèle vɨɨ tè ovʉ dúmú drʉ, dèè naa dúmú mɨ nɨ ovʉle alɨa vɨɨ nɨ ngaa ovʉ ngòpɨ yà!
24“ꞌBa àloo ɨcoo azí ngaa àtɨꞌboo drʉ ꞌba ꞌwàrà ìrì kalɨa kʉ. Tè ɨco nɨ ꞌo ra ɨ̀rɨ ngaa mu ɨnɨ ɨ̀sɨle àlʉa lèe tʉ̀ te àloo vɨɨ ngùu onzɨ, nòsɨ̀kʉ ɨ̀rɨ ngaa mu nɨ òwɨ̀ɨ àlʉa yɨ́ tʉ̀ ɨ̀gàtɨ àloo vɨɨ ra. Àmɨ ɨco àzí nga Orɨ yɨ́ àloo lonyɨ yɨ́ àtɨꞌboo drʉ kʉ.
Mɨ de mɨ ale kʉ
25“Ànɨ ma le ꞌyo àmɨ yɨ́; àmɨ dé àmɨ ale àmɨ ɨdrɨ yɨ̀ kʉ, díká àfa nyazà yɨ̀ kʉ àloo àfa mbuzà yɨ̀ kʉ nòsɨ̀kʉ àfa sùzà ɨdrɨa mɨnɨ lèle vɨɨ ɨnɨ yɨ̀ kʉ. Ɨdrɨ ɨ̀gàtɨ tà kʉ yà? Rúá ɨ̀gàtɨ bòngo kʉ yà? 26Àmɨ ndré ngà àrɨ́á òlɨ́ alɨa vɨɨ ɨnɨ; ꞌbáá òrɨ kʉ díká òkʉ́ʉ́ òrɨ ti ꞌyowa ɨ̀ró alɨa kʉ, te Ata ꞌbùa vɨɨ ɨ tà fe ɨnɨ yɨ́ ra. Àmɨ ɨ̀gàtɨ àrɨ́á ꞌdɨ̀vɨɨ ɨnɨ ra kʉ ya? 27Àmɨ ɨsɨlɨa ꞌba àloo ɨcole nɨ awo oꞌdú ovʉjʉ ɨdrɨ drʉ nyawúá vɨɨ ɨ̀mèꞌdɨle ale dezà yɨ̀ vɨ́ɨvɨɨ cɨ yà?
28“Díká àmɨ rɨ́ àmɨ ale de àfa sùzà eꞌyo yɨ̀ àrɨ yɨ̀ yà? Àmɨ ndré màwʉ́à ngale asé téléá vɨɨ ɨnɨ, ngáá àzí kʉ, díká ɨdéé káꞌdí ànɨ yɨ́ àfa sùzà kʉ. 29Te ma lè ꞌyo àmɨ yɨ́ káꞌdí opɨ Sulumani nɨ ovʉjʉ ndráá lonyɨ be angɨrɨ ra kpé, àfa ɨ̀rɨ nɨ sùle vɨɨ ndéé ndrɨ̀taa yɨ̀ màwʉ́à ꞌdɨ̀vɨɨ ɨnɨ àloo kʉ. 30ꞌDɨ̀vɨɨ tè léti Orɨ nɨ asé ɨnɨ òsùjʉ vɨɨ ɨ, isú vɨɨ dèè butia drù ꞌba ngaa ɨnɨ ɨvee àcɨyɨ̀ ra. Àmɨ àꞌɨ̀taa wereá drʉ, àmɨ nɨ ɨgale yɨ̀ Orɨ ɨco àmɨ òsu ɨ̀gàtɨ ꞌyowa naa ra kʉ yà? 31Ànɨ lè àmɨ dé àmɨ ale ꞌyojʉ kɨ́nɨ̀, ‘Àndrʉ̀ àma àrɨ nyaa yà?’ nòsɨ̀kʉ ‘Àma àrɨ mbuu yà?’ nòsɨ̀kʉ ‘Àma àrɨ sùu yà?’ vɨ́ɨvɨɨ tʉ́á kʉ. 32Àrɨ̀yɨ̀kʉ ꞌdɨ̀vɨɨ ɨnɨ eꞌyo ꞌba Orɨ nɨ àꞌɨ̀le kʉ vɨɨ ɨnɨ nɨ ndrùle vɨɨ ɨ. Te Ata ꞌbù nɨ vɨɨ nì àmɨ lè àfa ꞌdɨ̀vɨɨ ɨnɨ ɨ vɨɨ ra. 33Te lè àmɨ ndrú ngà kárí Orɨ awo vɨɨ òkò díká àmɨ ꞌó eꞌyo drɨ́á Orɨ nɨ lèle vɨɨ ɨnɨ ɨ. Ànɨ ɨ̀rɨ ngaa àfa àmɨ nɨ lèle vɨɨ ɨnɨ fèe àmɨ yɨ́ drɨ́á rá. 34Eꞌyo ꞌdɨ̀vɨɨ yɨ̀, lè àmɨ dé àmɨ ale oꞌdú drù vɨɨ drìa kʉ, àrɨ̀yɨ̀kʉ oꞌdú drù vɨɨ nɨ ngaa ca nɨ awo eꞌyo be cenɨ̀. Ànɨ sìità àmɨ nɨ càndɨ òꞌbàjʉ càndɨ oꞌdú àlʉàlʉ awo vɨɨ drìa kʉ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 6: MADI-URL
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved