Matayo 5
5
Yesu nɨ ꞌba ɨmbajʉ ꞌbee drìa vɨɨ
1Yesu nɨ òꞌbɨ mʉ̀mʉrà ꞌdɨ̀vɨɨ ɨnɨ ndrèjʉ ꞌba, tu ace ꞌbee drìa uru díká rɨ nyáá nàa. ꞌBa ɨ̀rɨ nɨ ɨmbale vɨɨ trá ànɨ ɨ̀rɨ àgapíá, 2díká ɨꞌdo ɨnɨ ɨmba kɨ́nɨ̀:
3“ꞌBa drìleba be vɨɨ ɨnɨ, ꞌba àꞌìle ra kɨ́nɨ̀ ànɨ ꞌyowa àꞌɨ̀taa caa kʉ vɨɨ ɨnɨ ɨ,
àrɨ̀yɨ̀kʉ ɨnɨ ngaa fɨɨ Kárí ꞌBùnɨ vɨɨ alɨa nɨ̀.”
4ꞌBa drìleba be vɨɨ ɨnɨ, ꞌba càndɨ drʉ wʉle àndrʉ̀ vɨɨ ɨnɨ ɨ,
àrɨ̀yɨ̀kʉ Orɨ nɨ mu ɨnɨ así òmɨ̀ɨ ra.
5ꞌBa drìleba be vɨɨ ɨnɨ, ꞌba así èꞌyere vɨɨ ɨnɨ ɨ,
ɨnɨ ngaa kòlònzɨ̀ Orɨ nɨ fèle ꞌba nyawúa vɨɨ ɨnɨ yɨ́ vɨɨ ꞌduu nɨ̀.
6ꞌBa drìleba be vɨɨ ɨnɨ, ꞌba eꞌyo drɨ́á Orɨ nɨ lèle vɨɨ ꞌole vɨɨ ɨnɨ ɨ,
Orɨ nɨ ngaa fèe tràa ɨnɨ yɨ́ ra.
7ꞌBa drìleba be vɨɨ ɨnɨ, ꞌba asíánzú be vɨɨ ɨnɨ ɨ.
Orɨ nɨ mu ovʉʉ ɨnɨ be asíánzú yɨ̀.
8ꞌBa drìleba be vɨɨ ɨnɨ, ꞌba asíá eꞌyo ada be vɨɨ ɨnɨ ɨ,
ɨnɨ ngaa Orɨ nɨ ndrèe ra.
9ꞌBa drìleba be vɨɨ ɨnɨ, ꞌba asíánzú jile ꞌba ɨ̀sɨlɨa vɨɨ ɨnɨ ɨ,
Orɨ nɨ ngaa ɨnɨ omvee anzɨ nɨ awo nɨ.
10ꞌBa drìleba be vɨɨ ɨnɨ, ꞌba ꞌbanɨ ɨnzale eꞌyo ònyɨ̀be Orɨ awo vɨɨ ꞌole vɨɨ yɨ̀ vɨɨ ɨnɨ ɨ,
Kárí ꞌBùnɨ vɨɨ ꞌyowa nɨ.
11“Àmɨ drìleba drʉ ꞌba té àmɨ ɨꞌdaa, ɨnzaa díká eꞌyo lii àmɨ drìa ma àꞌɨ̀le vɨɨ yɨ̀.” 12Àmɨ ꞌó àyɨ̀kò díká àmɨ ovʉ́ àfʉ́ yɨ̀, àrɨ̀yɨ̀kʉ òya ìmgbélé vɨ́ɨvɨɨ nɨ àmɨ tèe ꞌbùa, pàbaa ꞌba ɨnzá ndráánɨ́ Nàbíà òkò vɨɨ ɨnɨ kòꞌbò ꞌdɨ̀vɨɨ lé.
Àꞌí ɨnɨ dìzà be
13“Àmɨ ꞌo àmɨ àꞌítɨ̀pa lé ꞌba nyawú drìa vɨɨ ɨnɨ yɨ́, Te àꞌítɨ̀pa sí tè pʉ̀ʉ ꞌba, ꞌbá ɨco síá drìa ɨ̀ka ngóningóni yà? Ɨ̀ce kɨ́nɨ̀ ca òròdríkó drʉ, sìtà ra ꞌbanɨ ɨ̀rɨ àdàjʉ ra díká ꞌba ndépi ɨnɨ acɨ́jʉ drìa yɨ̀.”
14“Àmɨ ꞌo àmɨ dìzà lé wúdrìkúrù yɨ́. Àkú ìmgbélé sile ꞌbee drìa vɨɨ ɨco nɨ zi kʉ.” 15ꞌBa àloo ɨcoo tálà ti ɨ díká tia òpi ꞌòtaa yɨ̀ cɨ kʉ. Ráaka ɨ̀ndɨ̀a ɨ ꞌdʉ ꞌba oru ànɨ ɨ̀rɨ àzà àngʉ̀ jó alɨa ndulu ꞌba drɨ́á yɨ́ benì. 16Kòꞌbò ꞌdɨ̀vɨɨ lé, lè àmɨ ovʉ́ dìzà drʉ ꞌba drɨ́á mulia, ànɨ ɨnɨ ngaa eꞌyo ònyɨ̀ be àmɨ nɨ ꞌole vɨɨ ɨnɨ ndrèe díká ɨnɨ ngaa mu Ata àmɨ ꞌyowa ꞌbùa vɨɨ ìnzìi benì.
Yesu awo ɨmbataa àzítáá drìa vɨɨ
17“Àmɨ ɨgá kɨ̀nɨ̀ ma ca mu àzítáá ndráá Musa awo vɨɨ ɨnɨ àsʉ nòsɨ̀kʉ ɨmbataa ꞌba eꞌyo ondrílé vɨɨ ꞌyowa vɨɨ òŋo kʉ. Ma caa ɨnɨ àsʉ ɨ kʉ te ma ca fe eꞌyo ndee ɨnɨ nɨ ɨmbale vɨɨ ɨnɨ ó ànɨ kòꞌbò benì.” 18Ma lè ꞌyo àmɨ yɨ́ tàándí, kpere nyawú ɨnɨ ꞌbù be ngarɨa àvɨ̀rɨa, àzítáá ꞌdɨ̀vɨɨ vɨɨ àloo ngaa nɨ oja kʉ káꞌdí nʉkʉtà àlʉa ngaa nɨ inyí kʉ kpere àsìzà eꞌyo drɨ́á nɨ vɨɨ nɨ carɨa. 19ꞌBa àloo àzítáá ꞌdɨ̀vɨɨ ɨ̀sɨle wereá vɨ́ɨvɨɨ àloo ŋòle ra díká ꞌba alóo ɨnɨ ɨmbale ꞌojʉ kòꞌbò vɨ́nɨ vɨɨ ꞌba ngaa mu ɨ̀rɨ omve ꞌbarʉʉ wereá tʉ̀ Kárí ꞌbù nɨ vɨɨ alɨa vɨɨ ɨ. Te ́ꞌbarʉʉ àzítáá ꞌdɨ̀vɨɨ ɨnɨ buti òbɨ̀le kílílí díká ɨmbale ꞌba àloo ɨnɨ yɨ́ ra vɨɨ, ꞌba ngaa ɨ̀rɨ omvee Kárí ꞌBùnɨ vɨɨ alɨa ́ꞌbarʉʉ ìmgbélé nɨ. 20Ma lè ꞌyo àmɨ yɨ́, àmɨ ngaa fɨ Kárí ꞌBùnɨ vɨɨ alɨa kʉ ráaka àmɨ ꞌyowa àꞌɨ̀taa vɨɨ tè ꞌba Farasayi drʉ vɨɨ ꞌyowa ꞌba àzítáá ɨmbale vɨɨ ɨbe vɨɨ ɨ̀gàtɨ ráká.
Ɨmbataa Yesu awo òmbà drìa vɨɨ
21“Àmɨ ɨbú ɨrɨ ꞌba azí ndráá ꞌba drɨ̀ò vɨɨ ɨnɨ yɨ́ ra kɨ́nɨ̀, ‘Àmɨ òkí ꞌba kʉ#Ipuza 20:13díká ꞌbarʉʉ ꞌba kile ra vɨɨ ꞌba ngaa ɨ̀rɨ drìa eꞌyo lii ra.’ 22Te ma le ꞌyo àmɨ yɨ́ ꞌbarʉʉ adripi be ovʉle àdrà yɨ̀#5:22 Búkù àloo sɨ kɨ́nɨ̀, eꞌyo àlowa kóko vɨɨ. vɨɨ ꞌba ngaa ɨ̀rɨ drìa eꞌyo lii ra. Díká, ́ꞌbarʉʉ àloo tè ꞌyoo adripi yɨ́ kɨ́nɨ̀, ‘Mɨ òròdrí yʉ,’#5:22 Ti àjíkó yɨ̀ nòsɨ̀kʉ àꞌda yɨ̀. ꞌba ngaa ɨ̀rɨ ji ꞌba eꞌyo liꞌba vɨɨ ɨnɨ drìlia. Te mɨ te adrìì nɨ omvee kɨ́nɨ̀, ‘Mɨ ꞌbarʉʉ azazà nɨ,’ mɨ ngaa mu vee àcɨ iwúlé iwúlé vɨɨ alɨa.”
23“Ànɨyɨ̀ mɨnɨ mɨ awo fètaa Orɨ yɨ́ vɨɨ fèrɨa kara Orɨ ɨtejʉ vɨɨ alɨa, eꞌyo àloo tè gaa mɨ drìa ꞌbèè adrìì alɨa eꞌyo àloo mɨ be cɨ, 24mɨ kʉ mɨ awo fètaa vɨɨ kara ɨtetaa ɨtejʉ vɨɨ alɨa nàa.” Àmɨ ká drì ngà trʉ̀taa àꞌí adrìì bʉ ráká díká mɨ ngaa drì ka mu fètaa mɨ awo vɨɨ fe ndò.
25“Àmɨ ɨrɨ́ àmɨ ꞌbarʉʉ mɨ tòle kótìa vɨɨ be dèè ngà mɨ caa àzítáá drìlia kʉ. Àmɨ tè ngaa caa àzítáá drìlia ꞌba, ꞌbarʉʉ ndee ɨco mɨ ji adro agú eꞌyo lii vɨɨ drìlia ra díká agú ndee ɨco mɨ fe àsɨ̀kárɨ̀ gíá mɨ jijʉ màbúsùa ra. 26Ma lè ꞌyo àmɨ yɨ́ tàándí, mɨ ngaa pʉ kʉ kpere mɨnɨ àje lile mɨ drìa vɨɨ òfèrɨa derɨa drɨ́á.#5:26 Séndè ɨkɨ́kɨ́ wereá.
Ɨmbataa àlɨ ꞌbàzà drìa vɨɨ
27“Àmɨ ɨbú ɨrɨ ꞌba azí ndráá kɨ́nɨ̀, ‘Lè mɨ ꞌbà àlɨ kʉ.’#Ipuza 20:14 28Te ma le ꞌyo àmɨ yɨ́ ꞌba àloo tè izí àloo ndrèe asísílé lèjʉ àlɨ ꞌbàjʉ ɨ̀rɨ be, dènaa ꞌbà àlɨ izí ndee yɨ̀ nɨ asíá ꞌba. 29Mɨ mule gí ndépia vɨɨ tè fèe mɨ́ yɨ́ ɨ̀zatà ꞌoo, mɨ nze ɨ̀rɨ ꞌbe ra. Ɨ̀rɨ ꞌyée mɨnɨ mɨ rúá wokò àloo àvɨ̀jʉ ɨ ɨ̀gàtɨ ꞌbanɨ mɨ ngʉlʉpɨ ꞌbejʉ pɨɨ àcɨ iwúlé iwúlé vɨɨ alɨa vɨɨ ra. 30Díká mɨ gí ndépi tè fèe mɨ́ yɨ́ ɨ̀zatà ꞌoo nɨ̀, mɨ li ɨ̀rɨ ꞌbe nyawúá. Ɨ̀rɨ ꞌyée mɨnɨ mɨ rúá wokò àloo àvɨ̀jʉ ɨ ɨ̀gàtɨ ꞌbanɨ mɨ ngʉlʉpɨ ꞌbejʉ pɨɨ àcɨ iwúlé iwúlé vɨɨ alɨa vɨɨ ra.
Àrú àsʉzà
31“Kɨ̀le eꞌyo ꞌbanɨ sɨ̀le vɨɨ nɨ ꞌyole vɨɨ lé kɨ́nɨ̀, ‘ꞌBarʉ àloo tè izípi nɨ gàa sɨ̀, lè ɨ̀rɨ sɨ̀ ɨ̀rɨ gíá waragà ɨ̀cejʉ gà ɨ̀rɨ sɨ̀ vɨɨ cɨ.’#Azita Amviza 24:1 32Te ma lè ꞌyo àmɨ yɨ́ agú àloo tè nɨ awo izí gàa eꞌyo àloo ɨ̀rɨ nɨ lèle kʉ vɨ́ɨvɨɨ eꞌyoa yɨ̀, dèè ovʉʉ ꞌbà àlɨ nɨ kʉ, izí ndee te ngaa mu àlɨ ꞌbàa dèè naa agú ndee fe ɨ̀rɨ yɨ́ àlɨ ꞌbà nɨ̀, díká agú izí ꞌbanɨ gàle sɨ̀ vɨ́ɨvɨɨ rule vɨɨ ꞌbà dèè naa àlɨ nɨ.
Ɨmbataa òyò sòzà drìa vɨɨ
33“Pàbaa, àmɨ ɨrɨ ndráá ꞌba ꞌyó ꞌba drɨ̀ò vɨɨ ɨnɨ yɨ́ kɨ́nɨ̀, ‘Mɨ oja eꞌyo mɨnɨ òyòa sòle Opɨ drìlia ꞌba vɨɨ kʉ, te lè mɨ mba òyò mɨnɨ sòle vɨɨ tàa ra.’ 34Te ma lè ꞌyo àmɨ yɨ́, lè mɨ sò òyò ꞌbù rú yɨ̀ àrɨ̀yɨ̀kʉ ꞌbù nɨ kara Orɨ awo Àlátárá òpɨ̀ nɨ vɨɨ ɨ; 35nòsɨ̀kʉ mɨ sò òyò rú nyawú nɨ yɨ̀ kʉ, àrɨ̀yɨ̀kʉ nyawú nɨ kara Orɨ ka nɨ ava lɨjʉ vɨɨ ɨ; nòsɨ̀kʉ Yerusalemu rú yɨ̀ kʉ àrɨ̀yɨ̀kʉ Yerusalemu nɨ akú ìmgbélé opɨ ose vɨɨ awo vɨɨ ɨ. 36Pàbaa lè mɨ sò òyò mɨ yɨ̀ kʉ, àrɨ̀yɨ̀kʉ mɨ ɨco káꞌdí mɨ drìbí wúrá oja mɨ ngʉlʉpɨ yɨ̀ ini drʉ nòsìkʉ ɨmve drʉ kʉ. 37Ànɨ lè eꞌyo mɨnɨ àtìle ra ‘Èè’ vɨɨ ɨ̀rɨ ovʉʉ ‘Èè,’ díká ‘Yʉ’ vɨɨ ɨ̀rɨ ovʉʉ ‘Yʉ.’ Àrɨ̀yɨ̀kʉ eꞌyo ꞌdɨ̀vɨɨ drìlia vɨɨ setani ɨ fe nɨ̀.
Ɨmbataa àrooti òmvɨzà drìa vɨɨ
38“Àmɨ ɨbú ɨrɨ ꞌba azí ndráá kɨ́nɨ̀, ‘ꞌBarʉ tè mɨ mule àloo kii, lè pàbaa ɨ kí ɨ̀rɨ mule àloo ra, díká ꞌbarʉʉ tè fèe mɨ sí ɨ̀rɨ zò ra, lè ɨ̀ fé ɨ̀rɨ sí ɨ̀rɨ zò pàbaa ra.’ 39Te ma le ꞌyo àmɨ yɨ́ oꞌdɨ́ꞌdò, àmɨ òmvɨ́ eꞌyo ònzɨ àrooti kʉ. ꞌBarʉʉ àloo tè mɨ bílé gí ndépia vɨɨ àsaa, lè mɨ fè ɨ̀rɨ àsa mɨ bílé gí ìjíá vɨɨ ɨ̀ndɨ̀. 40Pàbaa ́ꞌbarʉʉ àloo tè lèe mɨ tòo kótìa, mɨ rúá sátɨ̀ vɨɨ ꞌdujʉ nɨ yɨ́ drʉ, mɨ trʉ̀ ɨ̀rɨ yɨ́ mɨ rúá kótì vɨɨ fe ɨ̀ndɨ̀. 41ꞌBa àꞌdí nɨ vɨɨ àloo tè mɨ yɨ́ fèe térí nɨ awo vɨɨ ji mayìlò àlʉ òkpo alɨa, mɨ ji ɨ̀rɨ yɨ́ mayìlò ìrì. 42Mɨ fè àfa ́ꞌbarʉʉ àfa àꞌílé mɨ bʉ vɨɨ yɨ́, díká ꞌba àloo tè lèe àfa àꞌí mɨ bʉ, mɨ fè ɨ̀rɨ yɨ́ rá.
Ɨmbataa àrɨꞌboo lèjʉ vɨɨ
43“Àmɨ ɨbú ɨrɨ ra ndráá ꞌbà sɨ́ kɨ́nɨ̀, ‘Mɨ lè mɨ awo jó ɨ̀jèle nɨ lè#Levi 19:18 díká mɨ ngù arɨꞌboo mɨ awo vɨɨ ɨnɨ ònzɨ.’ 44Te oꞌdɨ́ꞌdò ma le ꞌyo àmɨ yɨ́: Lè àmɨ lé arɨꞌboo àmɨ ꞌyowa vɨɨ ɨnɨ lèlè díká àmɨ zí Orɨ nɨ ꞌba àmɨ ɨnzale vɨɨ ɨnɨ yɨ́, 45ànɨ àmɨ ngaa ovʉʉ anzɨ Ata àmɨ ꞌyowa ovʉle ꞌbùa vɨɨ awo drʉ benì. Àrɨ̀yɨ̀kʉ ɨ fe ìtú ɨ drɨ ꞌba onzɨ vɨɨ ɨnɨ drìa ꞌba ꞌyée vɨɨ ɨ be drɨ́á, díká ɨ ozoo fe ꞌba eꞌyo onzɨ ꞌole vɨɨ ɨnɨ yɨ́ ꞌba eꞌyo ònyɨ̀be ꞌole vɨɨ ɨbe drɨ́á. 46Mɨ tè kíríá ꞌba mɨ lèle ra vɨɨ ɨnɨ lèe ɨ, Orɨ nɨ acete mu mɨ òfè àrɨ eꞌyo yɨ̀ yà? Mɨnɨ ɨgale yɨ̀ ꞌba mʉ̀sorò traꞌba vɨɨ rɨ́ ꞌo ꞌdɨ̀vɨɨ lé kʉ yà? 47Pàbaa mɨ tè rɨɨ kíríá ɨ̀tàa mɨ arípíònyɨ be nɨ, mɨnɨ ɨgale yɨ̀ eꞌyo àloo mɨnɨ ꞌole ꞌba alóo vɨɨ ɨnɨ ɨ̀gàtɨle raa cɨ yà? Mɨnɨ ɨgale yɨ̀ ꞌba eꞌyo Orɨ awo vɨɨ àꞌɨ̀le kʉ vɨɨ rɨ́ɨ́ eꞌyo ꞌdɨ̀vɨɨ ɨnɨ ꞌo kʉ yà? 48Tèvɨ́nɨ lè mɨ ovʉ àlátárá drʉ, kɨ̀le kòꞌbò Ata mɨ awo ꞌbùa vɨɨ nɨ ovʉle vɨɨ lé.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 5: MADI-URL
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved