LUCAS 15
15
Chingashca llamaguhuan chimbapurashpami parlashca
(Mat. 18:10-14)
1Impuestota japishpa causajcunapash, juchayu gentecunapash, Jesús villajujta uyangapajmi, tucuicuna quimirimunajurca. 2Chaita ricushpami, fariseocunapash, mandashca shimita yachachijcunapash, Jesusta fiñashpa nalicachishpa cashna parlanajurca:
—Cai runaca, juchayu gentecunahuan cumba tucushpami, chaicunahuan micushpa tiajun— ninajurcami.
3Shina ninajujpimi Jesusca, cashna chimbapurashpa yachachijurca:
4—Canguna puramanda maijambash, patsaj llamaguta charijpi, shuj llamagu chingajpica, ¿nacha iscun chunga iscun llamacunataca, jichushca pambapillata saquishpa, chai chingashca llamagutara taringacaman mascangapaj ringuichiman? 5Ña tarishpaca, ninanda cushijushpami, rigrapi churanguichiman. 6Ña huasiman chayashpaca cumbacunatapash, ladolla causajcunatapash: ‘Shamupaichi cushijungapaj. Chingashca llamagutaca ñami tariparcani’ nishpami tandachinguichiman. 7Cangunataca cashnami nini: Diospajman shuj juchayu gente tigrarijpica, jahua pachapi causajcunami ninanda cushijunga. Imatapash cashcatapacha rurashpa causaj, Diospajman na tigrarinata na minishtij, iscun chunga iscunmandapash yalitami cushijunga.
Chingashca culquihuan chimbapurashpami parlashca
8Dracma nishca culquita chungata charijushpami, shuj huarmica shujguta chingachinman. Shina chingachishpaca, ¿nacha michata japichishpa taringacaman, ucutapash fichashpa ninanda mascanman? 9Ña tarishpaca cumbacunatapash, ladolla causajcunatapash: ‘Shamupaichi cushijungapaj. Chingashca dracma culquigutaca, ñami tariparcani’ nishpami tandachinman. 10Cangunataca cashnami nini: Ninanda llaquirishpa Diospajman shuj juchayu tigrarijpica, Taita Diospaj angelcunaca, ninanda cushijun— nijurcami.
Chingashca churihuan chimbapurashpami parlashca
11Jesusca cashnatapashmi nijurca:
—Shuj runagumi, ishcai churita charirca. 12Jipa churimi, taitataca cashna nirca: ‘Taiticu, ñucaman caranataca, cunanda carahuailla’ nircami. Shina nijpimi taitaca, imata charishcatapash chaupishpa cararca. 13Asha punlla jipami, taita imata carashcatapash, jipa churica tucuilla tandachishpa, caru llactaman rirca. Chaipimi, tucui nalicunata rurashpa, pai ima charishcataca, yanga yanga tucuchijurca. 14Pai charishcata yanga tucuchishca jipaca, chai llactapica ninan yarjaimi shamurca. Chaipimi, paica imagupash illajpi na pactai callarirca. 15Shinamandami, chai llactapi causajuj shuj runapajpi imatallapash rurangapaj yaicurca. Chai runaca, paipaj jazindapimi cuchicunata michishpa causachun cacharca. 16Ña yarjachishpaca, cuchicuna micunajuj micunatami micungapaj ninanda munarca. Ashtahuangarin chaitallapash, pipash na cararcachu. 17Shina purijushpami, paillata paipaj shungupi cashna yajurca: ‘Ñuca taitapaj huasipi mashna trabajaj runacunapash, micunataca ashtacatapachami charin. Paicunaca, micunatapash na munangacamanmi micunajun. ¡Ñucaca caipica, yarjaimandamari huañugrini! 18Cunanga jatarishpa, ñuca taitapajman tigrashpami, cashna nigrisha: Taiticu, ñucaca jahua pacha Diostapash, candapashmari fiñachipashcani. 19Shinamandami, ñuca churigumi cangui ni tucunataca, napacha charini. Cunanga, cambajta ruraj runashna causachunlla chasquihuayari nishami’ yajurcami. 20Shina yajushpa jatarishpami, taitapaj huasiman tigrajurca.
Paipaj churigu caruta shamujujta taita ricushpaca, ninandami llaquirca. Shina llaquishpaca, calpashpa tuparishpami, ugllarishpa mucharca. 21Shina chasquijpimi churiguca, cashna nirca: ‘Taiticu, ñucaca jahua pacha Diostapash, candapashmari fiñachipashcani. Shinamandami, ñuca churigumi cangui ni tucunataca, napacha charini’ nircami. 22Ashtahuangarin taitaca, paipaj servijcunataca, cashnami nirca: ‘Ashtahuan juyailla ali churajunaguta llujchimushpa churachipaichi. Maquipipash surtijasguta churachipaichi, chaquipi churajunatapash churachipaichi. 23Juyailla racu shicuta apamushpa, huañuchipaichi. Cunanga, fiestata rurashpa micushpa cushijupashunchi. 24Cai ñuca churiguca, huañushcami carca. Cunanga cutin causarimushcami. Chingashcami carca, cutin taririmushcami’ nishpami, ninanda cushijushpa micui callarirca.
25Punda churica, pambapi imatapash tucuita rurashpami purijurca. Ña huasiman shamujushpa chayamushpaca, ninanda tocanajujta, danzanajujtami uyarca. 26Shina uyashpami, chaipi tiaj puramanda servij runata cayashpaca: ‘Huasipica, ¿imatata ruranajun?’ nishpa tapurca. 27Shina tapujpica, cashnami nirca: ‘Cambaj huauquimi muyumushca. Na imapash tucushpa, ali shamushca cajpimi, cambaj taitaca chai juyailla racu shicuta huañuchigrichun mandarca’ nircami. 28Shina nijpica, ninanda fiñarishpami huasiman yaicungapaca, na munarca. Shina shayajujpimi, taita llujshishpaca ucuman yaicuchun, ninanda mañajurca. 29Ashtahuangarin chai churica, taitataca cashnami nirca: ‘Taiticu, ñucacarin tauca huatacunatami, candalla servishpa causajuni. Can imata mandajpipash, upallamanda rurajunillami. Shina rurajujpipash, ñuca cumbacunahuan cushijushpa micuchunga, shuj chivotallapash na carahuashcanguichu. 30Cai cambaj churica, culquimanda huainayaj huarmicunahuan purishpami, can imata charishcatapash tucuchishca. Chashna rurashpa muyumujpipash, canga chai juyailla racu shicutami huañuchigrichun mandashcangui’ nircami. 31Shina nijpimi taitaca, cashna nirca: ‘Ñuca churigu, can ñucahuan tiajushcamandaca, ñuca imata charishcapash cambajllami. 32Ashtahuangarin cai cambaj huauquiguca huañushcami carca, cunanga cutin causarimushcami. Chingashcami carca, cutin taririmushcami. Shina shamushca cajpimi, ninanda cushijushpa fiestataca ruranapacha tucurcanchi’ nircami” nishpami yachachijurca.
Quichua Imbabura Bible © United Bible Societies, 1994.