Lucuotuv 1
1
1Duepa Theofilas,
I caa-uv a suokhanapa lie kha Zingsuv ta aa tlawpa lucuotuv tie kha Thlaapa Pathe cahrana ta a pacuv khu taayita, 2re hrie hruo aa thu baataata vuoruo luo a kiena te ta a pacuvnapa hne a rehriena kaw kha i cape. 3A thiy khu taata ning sawliy chung iema'a lie kha yi hluvpuv a luo te a hring pakhaa tapa kha i khu li riypata yi hluvpuv a paluo sa khu taata Khazing pena kaw kha a ri. 4Iema'a lie a aw#1:4 Or Ning ning khata iema kha, Jerusalem pya se li pata Paa biekuona kha ama huo riypata bie a pi yi. Ama ta, “Kama'a taata nama thyipa bie ca hinghaahingtana a cuo; 5Johan ca tiy tana tiynawna aca pi yi, cuorasala niema ca ata ning taahingta a ru li pata Thlaapa Pathe ta tiynawpa nama cuo aa,” a ta yi.
Zingsuv Vuoruo Luo Kiena
6Cacuonakaw Zingsuv hne lucuotuv tie ca amaa hmya pakhaw tiyta, “Abyipa, ata hing Israel ming'a luo pena na pi pakhaa na cuo ta a cuo ma? tapata ama hiehriy.
7Zingsuv ta, “I Paa ta ama ri ta a tuepa ning hne cuo kha niema nama pachang a hu vyi. 8Cuorasala Thlaapa Pathe nama cung luo aa zuv tiyta cahrana hmung'a ung cate, Jerusalem khypuv, Judea, Samaria hne chuelyi dena te ta i pachangkhyituv nama cuo aa,” a ta yi. 9Capa bie a ri khu pahne ama ming hmung pata lathawpa cuote amyi ta vya pakhuo te hmung khu va tli yi.
10Cahaa cata a kielepa kha avuo luo angchiy yite ama mang nguoluo pata caw ruopa a tuepa avuoming pahning amaa thaa lie sungkha ta amaa vya daa. 11Iema ta, “Galilee cawsaa zaw, khaapama namaa daa luota vuoruo luo ca nama mang nguoluo? Niema'a taata vuoruo luo lathawpa Zingsuv ca nama hmungpa dadang haakhata aa vaw pakhaa aa,” a ta yi.
Judas A Thletuvpa Matthias
(Mat 27:3-10)
12Cakhutaata lucuotuv tie ca Jerusalem taata kilometer suokha dyi aa hlapa, Oliv tluo taata Jerusalem luo kha ama vya kaa. 13Khypuv chung luo ama vya pha tiyta ama aw tawnapa a cung khuo luo kha amaa ngie. Piter, hne Johan, Jeim hne Andru, Filip hne Thomas, Bartholomew hne Matthai, Alfeas saacapaapa Jeim, Phangcuokhyituv Simon hne Jeim saacapaapa Judas ta ama cuo. 14Ama bangkhuo ta thlaa chuo riypata a taana ata tah a taw yite capa lieca canung tie, Zingsuv nung Mary hne Zingsuv nuta zaw kha ama aw ra.
15Capa ning ca zangtuv tie#1:15 Gk Uvnu zaw (ama bangkhuo ta zakha pakiy hraw) hrawlie kha Piter a daa te, 16“Uvta nuta zaw,#1:16 Gk Cawsaa zaw, viesaa zaw Zingsuv a patuvpa tie luochiytuv ta a cuopa Judas kaw hne a patuv pata David hmuo pata Thlaapa Pathe ta a za rilupa Caapathepa bie ca a tling riypa a cuo. 17Ama ca hing Khazing re lie hing hrievu pipa a cuo nakawta kiema hrawlie pasuvpuo pata a cuo.
18(Ama ta hmangpha lipa a tuena taata a hmungpa tuokaa khata lu suokha calyi te; capa lu lieca a bungkali pata tla te a riy a ke nakawta a chungriy bangkhuo ta a pya diy. 19Capa kaw ca Jerusalem lie a awpa bangkhuo ta pachang yite iema ryi ta capa lu ca Akeldama ta yite, a siyluo ca, ‘Thiyse Lu,’ tana ta a cuo.)
20‘Salm caa-uv chunglie ta,
A ing ca hri sala;
a chunglie a aw riypa caking yi se’;
Cakhutaa,
‘A re kha cawsaa hrangpa ta a thle se,’
tapata aa cape.
21Cacuonakawta Johan tiynawna taata ima Byipaapa Zingsuv kiema'a taata lapa a cuona te, kiema'a lie a ngie te pya te a aw chung bangkhuo, 22kiema'a lie a aw rapa pakha ca kiema hneta Zingsuv thupakhaana pachangkhyituv a cuo ra hrahring na a hu,” a ta. 23Cacuonakawta, cawsaa pahning Barsabbas ama tapa Josef, Justas zaw ama tapuopa hne Matthias ming kha ama chiykhyi. 24Thlaa chuo yite, “Abyipa, nama ca cawsaa pathiypalung bangkhuo na pachang. 25Judas ta a cu riypa hmang luo a sisepa, hingpa Khazing re hrie riypa hne lucuotuv cuo riypa hing iema pahning lie hingta ahungma naa tlaw tapa kha za paluo sa tie,” ama ta. 26Cakhutaata vyisung amaa da ca Matthias ta a hmung nakawta ama ca lucuotuv hlyikha lie kha pasuvpuo pata a cuo.
New Testament in Chin Lautu © Bible Society of Myanmar, 2015.