Lucuotuv 2
2
Thlaapa Pathe A Za Cung
1Pentekos ning a vya pha tiyta zangtuv bangkhuo ca suvkha lie ama aw. 2Sungkhabala ta vuoruo taata ueryi suokha ca thliysung pu haata za paring te amaa tunapa ing kha a bi diy. 3Aa chepa palyi ca myipalyi haata iema hrawlie kha zaa luo te myipalyi suokha cyicuo ca iema pakha cyicuo cunglie kha aa cang. 4Iema bangkhuo ca Thlaapa Pathe ta bi yite Thlaapa ta a pipa yi cyicuo haakhata ryi hrangpa kha ama cyi.
5Capa ning ca vuoruotyi ruo ting ta a awpa Judah ming kha Jerusalem lie ama aw ningta a cuo. 6Ca ueryi ca ama thyi tiyta cawsaazaapuv kha a vya hmya yite ama kharue a haa hringhruo, tahematapakieca zangtuv tie ama ripa kha a vawpa tie ta iema ryi cyicuo ta ama thyi nakawta a cuo. 7Ama nang ta uosa te, “Ama bangkhuo hingta Galilee ryi a cyipa cuo vayi ma? 8Cacuokie tuokhaatama kiema pakha cyicuo ta ma puvnapa ryi ta ma thyi the? 9Kiema ca Parthia ruo, Media ruo, Elam ruo, Mesopotamia ruo, Judea ruo, Kappadosia ruo, Pontas ruo, Asia ruo, 10Frizia ruo, Pamfilia ruo, Izipt ruo, Libia ruo chung Sairin khy cahriy lie a awpa ma cuo. Rom taata a vawpa khyche, Judah ming hne Judah biena a hrawpa Jentail ming zaw ta ma cuo. 11Karit parala ruo hne Arabia ruo taata a vawpa zaw ta ma cuo, cuorasala Khazing ta a cahrana ta a tuepa hmang rungnaapa kaw kha ama ri tiyta ma ryi cyicuo ta ma thyi kaluo,” ama ta. 12Ama bangkhuo ta nang-uo chungzing pata, “Hingpa hing a siyluo khaapatama a cuo aa,” amaa ta.
13Cuorasala a hrangpa tie ta, esepuo pata, “Mingsuv tiy na ama pariy,” ama ta.
Piter Phung Rina
14Cuorasala Piter ca hlyikha tie hne khata a kya daa te a ryi kha khuosa ta pathlie te, “I phangkha cawsaa Judea ruo ming hne Jerusalem lie a awpa bangkhuo zaw, i ripa hing naathlie ungla pachang tie ung. 15Hingpa tie hing niema nama ruenapa haata pariy vayi, tahematapakieca maw siymaluo pacaky dyi muo a ta baaning ta. 16Hingpa hing ca profet Joel a za ripa kha tana a cuo:
17‘Khazing ta, Ningchuonapa lieca
cawsaa bangkhuo kha
i Thlaapa bya'a yi ang te,
nama sacanung hne saacapaa tie ta
bie ama phu aa,
nama thutlie tie ta muocuo hmung'a yite,
nama macuo tie ta muo ama sa aa.
18Capa ning thue ca i sii canung hne
i sii capaa zaw cunglie kha
i Thlaapa bya'a ang te,
bie ama phu aa.
19Cung luo vuoruo lie khiy
pamangsana hmang paluo'a ang te,
raw luo alyi lie hing
kharuehaa hmang i paluo aa,
thiyse hne myi hne myikhuv
chaapuv ta ama cuo aa.
20A rungnaapa hne a lesyipa
Abyipa ning a vaw hluo ta
Ning khiy zing'a te,
thlaapa khiy thiyse haata a se aa.
21Cakhutaata Abyipa ming a upa bangkhuo ca
khuona ama hmung aa,’ a ta.
22Israel ming,#2:22 Gk Cawsaa zaw, Israel ming i bie hing naathlie tie ung. Nama pachangpa haata Nazareth khypa Zingsuv ca Khazing ta re a changpa na a cuo tapa kha, Khazing ta ama hmuopa ta a tuepa, a cahrana ta a tuepa hmang rungnaapa zaw, kharuehaa hmang zaw, hne pamangsana tie zaw hingta niema'a lie a paluo sa. 23Khazing ta hmungdawna hne ama khuekhuona haata niema'a luo aca pipa yi Zingsuv ca cawsaa pha lipa tie kuv ta vieluo cunglie nama thie. 24Cuorasala Khazing ta ama kha thiyna#2:24 Gk Thiyna hne aa patuvpa te-angna taata a pathu pakhaa, tahematapakieca thiyna ta ama kha patuv pari khu'a vyi. 25Cacuonakawta David ta ama hne aa patuv pata,
‘I hmiekunglie Abyipa kha i hmung pari,
I cacuo luota inaa daapuo nakawta
a cahang'a va ang;
26Cacuonakawta i palung tluo te,
i bie ca thaaphana hneta a bi;
Cadyi cuo vyi, i pangpasaa ca
a nguopuona hnetana a hring aa.
27Tahematapakieca i thlaapa kha
athiykhy lie thuse'a vaciy,
Na mingpathepa hing thluokhue lie
lang riypata ca pase'a vaciy.
28Hringna luopuv kha na pachang sa cate,
Ina aw puo nakaw cata i palung a tluo pari aa,’ a ta.
29Uv zaw nu zaw,#2:29 Gk Cawsaa zaw, Israel ming mingpa David kaw hing a siesa pata ica chang'a yi. Ama ca thiy te ama paby, ata ning tepa ta a thluo zaw kiema'a lie a aw kalie. 30Ama ca profet a za cuopa haata, a saming a sahlaa pakhakha kha ama siepahruo thude lie i patu aa tapata Khazing ta bie a kuopa kha a pachang. 31Ama kha hmungluna hne David ta Messiah#2:31 Or Khrih thupakhaana kaw a ripa ca,
‘Ama ca athiykhy lie thusepa cuo li'a pata,
a pangpasaa ca thluo lie kha lang'a vyi,’ a ta.
32Khazing ta hingpa Zingsuv hing thiyna taata pathu pakhaa te, kiema bangkhuo hing pachangkhyituv ta ma cuo. 33Khazing cacuo luo kuo ta patu sapa cuote, Paa ta bie a kuopa Thlaapa kha a hmung tli. A ta nama hmungpa hne nama thyipa hing kiema cunglie a za byapa ama lasaw tana a cuo. 34David ca vuoruo luo kha kie vyi, cuorasala ama hrahring ta a ripa ca,
‘Abyipa ta i Byipaapa kha,
35“Na carie tie kha na phyipazaa rawlie
tlawpuo pata ama cuo hluo li,
I cacuo luo kuo ta a tu tie, a ta pakha” a ta.’
36Cacuonakawta, “Israel ming bangkhuo, niema ta vieluo lie nama thiepa Zingsuv hing Khazing ta Abyipa hne Messiah ta a tue tapa hing pachang tie ung,” a ta yi.
Aa Thle Taapa Tie
37Capa bie ama thyi tiyta ama palung kha cahrie yite Piter hne lucuotuv hrangpa tie kha, “Uvnu zaw,#2:37 Cawsaa zaw, uvnu zaw khaapama ma tue aa?” ama ta.
38Piter ta, Nama bangkhuo hingta sue a ngiethepa nama cuo riypata nama suena kha a ngiepachiy ungla Zingsuv Khrih ming ta tiy a naw tie ung; cacuokieca Khazing lasaw Thlaapa Pathe kha nama hmung aa. 39Tahematapakieca biekuona ca Abyipa ma Khazing ta ama'a luo a kupa, niema, nama saata tie, hne luohlaa luo a awpa tie nama bangkhuo cuota na a cuo,” a ta yi. 40Cakhutaata a hluvpuv cawpa yite a pasu yi. “Hing chuo pha lipa lie a tlung riypa duotena chung taahingta hyazang riypata a zue ung,” a ta yi. 41Cacuonakawta a bieripa a cuhluopa tie ca tiy naw yite capa ning cata cawsaa thawthung amaa chachiy. 42Iema ca lucuotuv tie pacuvna hne zangtuv tie a viesaana luo kha a pi karue yite, a viesaana sa ningpakhawna hne thlaachuo pakhawna kha ama hnyi pari.
Zangtuv Tie Hring Zya
43Kharuehaa hmang hluvpuv hne pamangsana hluvpuv kha lucuotuv tie ta ama tue nakawta cawsaa bangkhuo kha ama kharue a haasa. 44A zangpa bangkhuo kha aw pakhaw yite chechiy bangkhuo kha amaa hraw; 45ama hnyipa hmang kha zaa yite ama hmungpa tuokaa kha amaa huna cyicuo haakhata amaa re. 46Ning kha hnang ning kha, ama cuo hnyipa hluv vie bangkhuo kha biena-ing lie hmuo yite, ama ing#2:46 Or Ing kha hnang ingkha ta lie kha sa ning a hraw yite pahyana hne palung tluosa pata ama ning. 47Khazing kha pathuosa yite cawsaa bangkhuo hmielie hmiephaa ama hmung. Cahaa cata Abyipa ta khuona a hmungpa tie kha ning kha hnang ning kha ta ama buv luo a chachiy yi.
New Testament in Chin Lautu © Bible Society of Myanmar, 2015.