Lucuotuv 3
3
Peter Ta A Phyi Cabiepapaa A Patluo Sa
1Ningkha ca zuoluo siymaluo pathung, thlaa chuo cuo lie kha Piter hne Johan ca thlaa chuo riypata Biena-ing luo ama cakuo. 2A puv baataata a phyi cabiepa pakha kha amaa vya puvle. Biena-ing chung luo a ngiepa tie kha tuokaa a hie khu naaseyi tapata Thlake Puvthe tapa biena-ing thlake lie kha ningting ta ama chi taw. 3Piter hne Johan kha biena-ing luo amaa ngie'a nangpa a hmung tiy yi ta aa hie yi. 4Ama kha taapuo pata mang yite, “Malie mang tie,” ama ta. 5Suokhakha ca ina pi thlu'a yi tapa a nguopuona hneta iema kha ming vy li pata a mang yi. 6Cuorasala Piter ta, “Kama ca ngu cuose, siyy cuose hnyi va ang, cuorasala i hnyipa na ica pi; Nazareth Zingsuv ming ta thu la cakuo tie,” a ta. 7A cacuo luo kuv ta patuv te a padaa ca a phyi hrahning hne a cakhawruv zaw ca sungkha ta a thaa vya ruv te, a daa te luo a cakuo. 8Cakuole, a cathlule te Khazing a pathuosapuo pata iema hne cata biena-ing chung luo kha aa ngie. 9Khazing pathuosa te a cakuopa kha cawsaa bangkhuo ta ama hmung. 10Biena-ing Thlake Puvthe lieta a tu te a hie tawpa kha ama pachang nakawta a cunglie hmang a tlungpa kawlie kha ama kharue haa te ama nang dyi a uo.
Solomon Hmiechue Lie Piter Bieripa
11Cawsaapapaa ca Solomon hmiechue tapa lie kha Piter hne Johan'a lieta a awpa kha ama hmung tiyta cawsaazaapuv ca kharuehaasa pata iema'a luo kha ama vaa. 12Piter ta iema kha a hmung tiy yi ta, “I phangkha cawsaa Israel ming,#3:12 Gk Cawsaa zaw, Israel ming “Khaapanakawtama hingpa hmang kawlie hing nama kharue haa te kiema tlaku kiema cahrana hne phana ta a cakuo sa khupa haata ming vy li pata malie nama mang? 13Abraham, Isak hne Jakob Khazing, ima mingchingmingvuo tie Khazing ta ama rungnaana ca a changtaapa#3:13 Or Saata Zingsuv'a lieta a pi tli. Ama ca Pilat kuv luo pi ung cate ama ta pathlie riypata bie a chi raalaa pata Pilat hmielie hrahring kha nama thaw ngiethie. 14Niema ta a pathepa hne aa dangpa kha thaw ung cate lie a nawpa tuv kha aca pathliepa riypa yita namaa hie. 15Cakhutaata hringna luo cawsaa a chiytuvpa ca nama thie. Cuorasala Khazing ta ama kha thiyna taata pathu pakhaa te kiema hing capa kaw ca a pachangkhyituv ta ma cuo. 16Cahaa cata a ming kha a zang nakawta, a ming mamaapa khata nama hmungpa hne nama pachangpa hingpapaa hing cahrana a pi. Capa Zingsuv zangnapa cata ama kha niema hmiekunglie hrahring ta tluopasingna a pi.
17“Uv zaw nu zaw,#3:17 Gk Viesaa zaw ata zaw hing, niema hne nama uvtuv tie ta nama tuepa hing nama pachang li nakawtana a cuo tapa i pachang. 18Messiah#3:18 Or Khrih ca a te a ang aa tapata profet tie'a taata a za rilupa bie kha Khazing ta hingpa haahingta a patling sa. 19Cacuonakawta nama suenapa ca pathesapa nama cuo riypata a ngiepachiy ungla Khazing'a luo kha a pali tie ung. 20Cakhutaata Abyipa ta thaazuo thaa lana cuo kha ca pi'a yite niema cuota a tlaw ciepa Messiah, Zingsuv kha niema'a luo aca pi'a yi. 21Ama ca Khazing ta hluoning baataata a profet tie zaw cung taata a za ripa, hmangting bangkhuo sapathiyna cuo a tlung hluo li vuoruo lieta a aw aa. 22Moses ta, ‘Abyipa nama Khazing ta niema mingphang#3:22 Gk Uvnu zaw chung taahingta kama haapa profet pakha kha pathlie'a te, aca changpa bangkhuo yi kha naa nama thlie aa. 23Capa profet bie naa a thlie lipa bangkhuo ca mingphang chung taata thawpa ta ama cuo aa. 24Profet Samuel hne ama hnang taata a vawpa profet zaw bangkhuo ta hingpa ning hne cuo kaw hing ama ri diypa ta a cuo. 25Niema ca profet tie samingsahlaa cuo ung cate, Khazing ta nama mingchingmingvuo zaw a pipa yi biekuona a hraw rapa tana nama cuo. 26Abraham kha, ‘Nama samingsahlaa chung taahingtana chuelyi ming bangkhuo hing thluechiy i pi'a yi,’ a ta. Cacuonakawta niema ahung nama cuo zaw, nama phalina taata vya kaa pata thluechiy pi thepa nama cuo riypata Khazing ca a saacapaapa kha pathu sa pakhaa te niema'a luo hmietaace ta a vya pathlie,” a ta.
New Testament in Chin Lautu © Bible Society of Myanmar, 2015.