Johan 21
21
Ziytuv Pasariy Tie'a Lie Zingsuv Aa Luo
1Cakhutaacata Zingsuv ca Tiberias Riyliy kielie kha a ziytuv tie'a lie aa luo pakhaa. Aa luo zya ca hinghaahingta a cuo. 2Simon Piter, Mingphie#21:2 Gk Didymus ama tapa Thomas, Galilee pe Kaanaa khy ming Nathanael, Zebedi saacapaa tie hne a hrangpa ziytuv pahning ca suvkha ta ama aw. 3Simon Piter ta, “Ngaa na i va vaa aa,” a ta yi. Iema ta, “Ma ca vya ziy aa,” ta yite sawkawpalaw chung luo kha ama kie, cuorasala capa zuo ca sakha hmuo patuv vayi.
4Khy a vuo patahne, Zingsuv ca ngiekuo lie kha aa tu, cuorasala ziytuv tie ta Zingsuv a cuopa kha pachang vayi. 5Zingsuv ta, “Satlie zaw ngaa sakha hmuo patuv va ung cama?” a ta yi. Iema ta, “Patuv va puv,” ama ta. 6Ama ta, “Sawkawpalaw cacuo luo kuo khata vaa ungla nama pa-uo buo aa,” a ta yi. Ama vaa ca ngaa a hluvsa aa uo nakawta amaa sue hmuo a da khu li pata ama aw. 7Zingsuv ta a duepa ziytuvpa khata Piter kyihuo kha, “Abyipa na a cuo!” a ta. Simon Piter ta Abyipa na a cuo tapa kha a thyi ca, a cahri pata a aw nakawta, caw kha a hryi te tiy chung luo kha a zu. 8Cuorasala ziytuv hrangpa tie ca sawkawpalaw luo kha kie yite ngaa pangkha a uopa asue ca daw zahning hraw dyi aa hlapa ngiekuo luo kha amaa dale.
9Ngiekuo luo ama chiy ca myi cunglie ngaa a zaa epa hne viechuo kha ama hmung. 10Zingsuv ta, “Nama patuvpa ngaa chekha kha vya cyi tie ung,” a ta yi. 11Cacuonakawta Simon Piter ca sawkawpalaw luo kha kie te ngaa lesapa zakha sawngaa sathung a uopa asue kha ngiekuo luo a vya dale. Ngaa a hluvsa raalaa pata asue kha tlaa vyi. 12Zingsuv ta, “A vaw ungla mawsa kha ning tie ung,” a ta yi. Abyipa a cuopa kha ama pachang thluo nakawta ahungtahmuo, “Ahung cama?” tapata hiehriy nguo vayi. 13Zingsuv ca a vaw te, viechuo kha la te a pi yi, cahaa cata ngaa zaw kha a pi yi.
14Hingpa hing thiyna taata a thupakhaa khu taata a ziytuv tie'a lie a yi thungnapa a luonapa tana a cuo.
Zingsuv Hne Piter
15Mawsa ama ning khu pahne ta Zingsuv ta Piter kha, “Johan saacapaa Simon, iema laa hingta ina due vie cama?” a ta. Ama ta, “A cuo, Abyipa; Ica duepa ca na pachang,” a ta. Zingsuv ta, “I tuvtaata zaw kha ala pi tie,” a ta. 16A yihningnapa ta, “Johan saacapaa Simon, ina due cama?” a ta pakhaa. Ama ta, “A cuo, Abyipa; ica duepa kha na pachang,” a ta. Zingsuv ta, “I tuv kha khie tie,” a ta. 17A yi thungnapa ta, “Johan saacapaa Simon, ina due cama?” a ta. Yi thung nanaa, “Ina due cama?” a ta nakawta Piter ca a ngie chi te, “Abyipa, nama ca hmangting a pachangtuv tana na cuo; ica duepa kha na pachang,” a ta. Zingsuv ta, “I tuv kha sa pi tie,” a ta. 18Biehmisi tana ica chang: Na kung panu ning hing ca namata tah na tesaw kha a saw cate na khingna luo bangkhuo kha na cakuo. Cuorasala na macuo thue ca na kuv kha pazuu'a cate, pakhakha ta tesaw kha ca pasaw'a te, na khing lina luo kha aca cakuokhyi aa,” a ta. 19(Hinghaahingta a tapa hing tuokhaapa thiyna tama Piter ta Khazing rungnaana kha a paluo sa aa tapa khana a ri khing.) Cakhutaacata, ama kha “Na ziy tie,” a ta.
Zingsuv Hne A Duepa Ziytuv
20Piter ca a pali te Zingsuv ta a duepa ziytuv ta a vya paziylepa yi kha a hmung. Ama ca zuosa ama ning ningta Zingsuv kha vaa pha te, “Abyipa, ahung hingma caa lyi riypata a cuo a tapa khata a cuo.” 21Piter ta ama kha a hmung tiyta Zingsuv kha, “Abyipa, hingpapaa hinghaw tuokhaatama a cuo aa?” a ta. 22Zingsuv ta, “I vaw pakhaana te a hring riypata khing ang sala na cuota khaama a pyinapa a aw? Na ziy tie!” a ta. 23Cacuonakawta hing ziytuvpapaa hing thiy'a va tli tapata iema hrawlie kha bie aa ze. Zingsuv ta thiy'a vyi tapata a ripa cuo vyi, cuorasala, “I vaw pakhaana te a hring riypata khing ang sala na cuota khaama a pyinapa a aw?” a tapatana a cuo.
24Hingpapaa ca a ziytuv cuote hingpa kaw hing tehte a khuotuv hne a capetuv ta a cuo, a tehtekhuopa ca a hmuo tapa zaw kha ma pachang. 25Cuorasala Zingsuv ta a tuepa hmanghrangpa a hluv hringhruo a aw. Capa bangkhuo ca ma cape kieca, capepa caa-uv ca chuelyi hingta a tlaw the'a vyi tapatana i rue.
New Testament in Chin Lautu © Bible Society of Myanmar, 2015.