SENESI 19
19
Maumaui o Sotoma mo Komola
1Nee kaku leva te u aselo e toko lua ki Sotoma i te afiafi; kae nee lala leva ia Lote i te matapa o Sotoma. I te sio a Lote kia naua, nee tuu ake leva ia ia o alu o fakafelavei kia naua, pea nee punou ia ia o kaku ki te kele. 2Pea nee ina ui: E au kole atu kia kolua ke koulua fakalelei o feulufi mai ki toku fale, o koulua nonofo ai i te po aeni. E koulua fufulu ai anai okolua vae, pea hoki koulua tutuu ake leva i te uhu o hoko atu tokolua fagona. Kae nee na tali leva kia ia: Kailoa! E ma nonofo pe i te po nei i te lapalasi fakafenua o te kolo. 3Kae nee fakamalohi age leva ia Lote kia naua, o na olo ai leva ki tona fale, pea nee na feulufi leva ki tona fale. Nee fai leva e Lote he meakai kia naua, o ina tao leva ni pane hala fakatupu. Pea nee na kakai leva.
4Nee heeki na momoe kae kua fetanaki age te hahai o te kolo o Sotoma o takatakai te fale. Mai te tamaliki tupulaga o kaku ki te kau matua, nee natou fakatahi fuli ki ai, mai te u potu kehekehe o te kolo. 5Nee natou kalaga leva kia Lote: Kofea te u tagata ae nee feulufi ki tou fale i te po aeni? Ke ke aumai naua ki fafo, pea ke matou iloi naua. 6Nee ulu leva ia Lote ki fafo kia natou i tona mua fale, kae nee ina mapunui leva te matapa i ona muli. 7Pea nee ina ui leva: Nai oku tehina, e au kole atu kia koutou ke aua naa kotou fai te mea ae e kovi! 8Koeni, e i ai oku ofafine e toko lua ae e heeki na iloi ni tagata; e au aumai anai naua ki fafo nei, pea e koutou fai anai kia naua te mea ae e kotou loto ki ai. Kae ke aua naa koutou fai he mea ki te u tagata aeni koteuhi kua na omai o fakamalumalu i toku fale. 9Nee natou ui leva: Hoho kehe! Pea nee natou toe ui leva: Ko ia aeni nee hau o hage ko he matapule, pea kua loto ia ia ke tuifakamaau kia tatou! E lelei, e matou fai anai kia koe ke toe lelesili kovi age ia naua aena! Pea nee natou leei fakamalohi ia Lote kae natou fakaovi age ki te matapa ke natou maumaui ia ia. 10Kae nee falo leva e te toko lua tagata ona nima o fakaulu age ia Lote ki fale, kae na mapunui te matapa. 11Pea nee na fakakivi leva te u mata o te hahai ae nee tutuu i te mua matapa o te fale, mai te tupulaga o kaku ki te kau matua, o natou kinakina leva i te kumi o te matapa.
12Nee ui leva e te u tagata kia Lote: Ko ai ma i tou famili kei puli i heni? Ko ou fugao mo ou foha mo ou ofafine, pea mo te u mea fuli ae e ke mau i te kolo aeni, ke ke fakamavae natou i te kogamea aeni. 13Koteuhi ka ma maumaui anai te kogamea aeni, o tupu kua lahi osi te tagi ki tana hahai ia mua o te Eteleno. Nee fekaui mai maua e te Eteleno ke ma omai o maumaui. 14Nee ulu leva ia Lote o palalau ki ona fugao ae nee ohoana mo ona ofafine. Nee ina ui leva kia natou: Ke koutou tutuu ki oluga, pea ke koutou mavae i te kogamea aeni, koteuhi ka maumaui anai te kolo e te Eteleno. Kae nee hage ia kia natou ko he tahi ae e palalau fakahuahua.
15I te mafoa ake o te aho, nee palalau fakamalohi leva te u aselo kia Lote ke olo la. Nee na ui leva: Tuu ki oluga, too tou ohoana mo ou ofafine e toko lua, ae e nonofo i heni, koteuhi ke aua naa ke mate i te maumaui o te kolo. 16Kae nee fakatuatuai aipe ia Lote, koia nee too ai leva e te u aselo tona nima, o ia Lote, mo tona ohoana, pea mo ona ofafine e toko lua, koteuhi nee loto te Eteleno ke fakamauli ia ia. Nee na ave leva ia ia o tuku ki te tua kolo.
17I te osi o tonatou tuku ki te tua kolo, nee ui leva e he tahi aselo kia Lote: Hola ke ke mauli; ke aua naa ke toe sio ki muli, pea ke aua naa ke toe tuu i te laulelei; kae ke ke hola ki te mouga koteuhi ke aua naa ke mate. 18Nee ui leva e Lote kia naua: Oi! Kailoa, oi Aliki! 19Koeni kua ke ofa kia au, pea kua ke fakaha te lahi o tou manavaofa kia au i tau foaki mai toku mauli. Kae ko au, e mole feala taku hola o kaku ki te mouga, koteuhi e mau anai au e te tuutamaki i mua, pea e au mate anai. 20Koeni, e ovi mai te kolo aeni ke au hola ki ai, pea e veliveli ia. Oi! Ke feala taku hola ki ai… pe e mole veliveli ia ia?… Pea ke au mauli! 21Pea nee ui leva e te aselo kia Lote: Koeni, e au toe tuku atu kia koe te kalasia aena, e mole au maumaui anai te kolo aena e ke palalau ki ai. 22Hola fakavilivili ki ai, koteuhi e mole feala anai ke au fai he mea kae e heeki ke kaku ki ai. Koia ae nee tuku ai te higoa ko Tesoale ki te kolo veliveli aena.
23Nee hopo ake leva te laa i te kele, i te ulu a Lote ki Tesoa. 24I te temi totonu aia, nee fakato leva e te Eteleno mai te lagi ki Sotoma mo Komola he ua maka kakaha mo he afi. 25Nee maumaui leva e te Eteleno te u kolo aia e lua mo ona hahai fuli, pea mo te fenua laulelei katoa aia mo ona ulu akau fuli. 26Nee mafuli leva te ohoana o Lote ki muli, pea nee liliu leva ia ia ko he fakatata masima.
27Nee tuu ake leva ia Apalahamo i te pogipogi uhu o alu ki te kogamea ae nee tuu ai ia ia mo te Eteleno. 28Nee mafuli leva ona mata ki te fahai o Sotoma mo Komola, pea mo te fenua laulelei katoa; pea koeni, nee sio leva ia ia e malaga ake i te kele he kohu o hage ko he kohu o he vela lahi.
29I te aho ae nee maumaui ai leva e te Atua te u kolo o te fenua laulelei aia, nee ina manatui leva ia Apalahamo; pea nee ina fakamauli leva ia Lote mai te tuutamaki ae nee ina tauteai ai te u kolo ae nee fakatuu ai e Lote tona nofoaga.
Hakoga o Lote: Moape mo Amone
30Nee mavae leva ia Lote i Tesoa, o alu o nofo i te mouga mo ona ofafine e toko lua, koteuhi nee mataku leva ia ia i te nofo i Tesoa. Nee nofo leva ia ia i he ana mo ona ofafine. 31Nee ui leva e te taahine uluaki ki te muli: Kua matua tata tamai, pea e mole mau he tagata i te fenua ke hau kia taua, o mulimuli ki te aga mahani o te u fenua fuli. 32Hau ke ta fakainu tata tamai aki he vino, pea e ta momoe anai mo ia i te pouli, o tupu ke mau ai he hologa ki tata tamai. 33Pea nee na fakainu leva he vino ki tana tamai i te po aia; pea nee alu leva te taahine uluaki o momoe mo tana tamai: nee mole pe iloi e Lote te lakaga ae nee alu age ai tona ofafine o momoe mo ia, pea mo te lakaga ae nee tuu ake ai ia ia o alu. 34I te aho ake ae, nee ui leva e te uluaki ki te muli: Koeni nee au momoe mo tata tamai i te po kua hili, ke ta toe fakainu he vino kia ia i te po aeni, pea ke alu leva ia koe o momoe mo ia, o tupu ke mau he hologa ki tata tamai. 35Nee na fakainu leva he vino ki tana tamai i te po aia; pea nee alu leva te muli o momoe mo ia. Nee mole pe iloi e Lote te lakaga ae nee alu age ai tona ofafine o momoe mo ia, pea mo te lakaga ae nee tuu ake ai ia ia o alu. 36Nee faitatama leva te u ofafine o Lote ki tana tamai. 37Nee fanau leva te uluaki ko he tama, pea nee ina fakahigoa leva ko Moape: ko te tamai aia o te kau Moape, o kaku mai ai ki te aho nei. 38Nee fanau leva te muli ko he tama, pea nee ina fakahigoa leva ko Pene-Ami: ko te tamai aia o te kau Amone, o kaku mai ai ki te aho nei.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
SENESI 19
19
Maumaui o Sotoma mo Komola
1Nee kaku leva te u aselo e toko lua ki Sotoma i te afiafi; kae nee lala leva ia Lote i te matapa o Sotoma. I te sio a Lote kia naua, nee tuu ake leva ia ia o alu o fakafelavei kia naua, pea nee punou ia ia o kaku ki te kele. 2Pea nee ina ui: E au kole atu kia kolua ke koulua fakalelei o feulufi mai ki toku fale, o koulua nonofo ai i te po aeni. E koulua fufulu ai anai okolua vae, pea hoki koulua tutuu ake leva i te uhu o hoko atu tokolua fagona. Kae nee na tali leva kia ia: Kailoa! E ma nonofo pe i te po nei i te lapalasi fakafenua o te kolo. 3Kae nee fakamalohi age leva ia Lote kia naua, o na olo ai leva ki tona fale, pea nee na feulufi leva ki tona fale. Nee fai leva e Lote he meakai kia naua, o ina tao leva ni pane hala fakatupu. Pea nee na kakai leva.
4Nee heeki na momoe kae kua fetanaki age te hahai o te kolo o Sotoma o takatakai te fale. Mai te tamaliki tupulaga o kaku ki te kau matua, nee natou fakatahi fuli ki ai, mai te u potu kehekehe o te kolo. 5Nee natou kalaga leva kia Lote: Kofea te u tagata ae nee feulufi ki tou fale i te po aeni? Ke ke aumai naua ki fafo, pea ke matou iloi naua. 6Nee ulu leva ia Lote ki fafo kia natou i tona mua fale, kae nee ina mapunui leva te matapa i ona muli. 7Pea nee ina ui leva: Nai oku tehina, e au kole atu kia koutou ke aua naa kotou fai te mea ae e kovi! 8Koeni, e i ai oku ofafine e toko lua ae e heeki na iloi ni tagata; e au aumai anai naua ki fafo nei, pea e koutou fai anai kia naua te mea ae e kotou loto ki ai. Kae ke aua naa koutou fai he mea ki te u tagata aeni koteuhi kua na omai o fakamalumalu i toku fale. 9Nee natou ui leva: Hoho kehe! Pea nee natou toe ui leva: Ko ia aeni nee hau o hage ko he matapule, pea kua loto ia ia ke tuifakamaau kia tatou! E lelei, e matou fai anai kia koe ke toe lelesili kovi age ia naua aena! Pea nee natou leei fakamalohi ia Lote kae natou fakaovi age ki te matapa ke natou maumaui ia ia. 10Kae nee falo leva e te toko lua tagata ona nima o fakaulu age ia Lote ki fale, kae na mapunui te matapa. 11Pea nee na fakakivi leva te u mata o te hahai ae nee tutuu i te mua matapa o te fale, mai te tupulaga o kaku ki te kau matua, o natou kinakina leva i te kumi o te matapa.
12Nee ui leva e te u tagata kia Lote: Ko ai ma i tou famili kei puli i heni? Ko ou fugao mo ou foha mo ou ofafine, pea mo te u mea fuli ae e ke mau i te kolo aeni, ke ke fakamavae natou i te kogamea aeni. 13Koteuhi ka ma maumaui anai te kogamea aeni, o tupu kua lahi osi te tagi ki tana hahai ia mua o te Eteleno. Nee fekaui mai maua e te Eteleno ke ma omai o maumaui. 14Nee ulu leva ia Lote o palalau ki ona fugao ae nee ohoana mo ona ofafine. Nee ina ui leva kia natou: Ke koutou tutuu ki oluga, pea ke koutou mavae i te kogamea aeni, koteuhi ka maumaui anai te kolo e te Eteleno. Kae nee hage ia kia natou ko he tahi ae e palalau fakahuahua.
15I te mafoa ake o te aho, nee palalau fakamalohi leva te u aselo kia Lote ke olo la. Nee na ui leva: Tuu ki oluga, too tou ohoana mo ou ofafine e toko lua, ae e nonofo i heni, koteuhi ke aua naa ke mate i te maumaui o te kolo. 16Kae nee fakatuatuai aipe ia Lote, koia nee too ai leva e te u aselo tona nima, o ia Lote, mo tona ohoana, pea mo ona ofafine e toko lua, koteuhi nee loto te Eteleno ke fakamauli ia ia. Nee na ave leva ia ia o tuku ki te tua kolo.
17I te osi o tonatou tuku ki te tua kolo, nee ui leva e he tahi aselo kia Lote: Hola ke ke mauli; ke aua naa ke toe sio ki muli, pea ke aua naa ke toe tuu i te laulelei; kae ke ke hola ki te mouga koteuhi ke aua naa ke mate. 18Nee ui leva e Lote kia naua: Oi! Kailoa, oi Aliki! 19Koeni kua ke ofa kia au, pea kua ke fakaha te lahi o tou manavaofa kia au i tau foaki mai toku mauli. Kae ko au, e mole feala taku hola o kaku ki te mouga, koteuhi e mau anai au e te tuutamaki i mua, pea e au mate anai. 20Koeni, e ovi mai te kolo aeni ke au hola ki ai, pea e veliveli ia. Oi! Ke feala taku hola ki ai… pe e mole veliveli ia ia?… Pea ke au mauli! 21Pea nee ui leva e te aselo kia Lote: Koeni, e au toe tuku atu kia koe te kalasia aena, e mole au maumaui anai te kolo aena e ke palalau ki ai. 22Hola fakavilivili ki ai, koteuhi e mole feala anai ke au fai he mea kae e heeki ke kaku ki ai. Koia ae nee tuku ai te higoa ko Tesoale ki te kolo veliveli aena.
23Nee hopo ake leva te laa i te kele, i te ulu a Lote ki Tesoa. 24I te temi totonu aia, nee fakato leva e te Eteleno mai te lagi ki Sotoma mo Komola he ua maka kakaha mo he afi. 25Nee maumaui leva e te Eteleno te u kolo aia e lua mo ona hahai fuli, pea mo te fenua laulelei katoa aia mo ona ulu akau fuli. 26Nee mafuli leva te ohoana o Lote ki muli, pea nee liliu leva ia ia ko he fakatata masima.
27Nee tuu ake leva ia Apalahamo i te pogipogi uhu o alu ki te kogamea ae nee tuu ai ia ia mo te Eteleno. 28Nee mafuli leva ona mata ki te fahai o Sotoma mo Komola, pea mo te fenua laulelei katoa; pea koeni, nee sio leva ia ia e malaga ake i te kele he kohu o hage ko he kohu o he vela lahi.
29I te aho ae nee maumaui ai leva e te Atua te u kolo o te fenua laulelei aia, nee ina manatui leva ia Apalahamo; pea nee ina fakamauli leva ia Lote mai te tuutamaki ae nee ina tauteai ai te u kolo ae nee fakatuu ai e Lote tona nofoaga.
Hakoga o Lote: Moape mo Amone
30Nee mavae leva ia Lote i Tesoa, o alu o nofo i te mouga mo ona ofafine e toko lua, koteuhi nee mataku leva ia ia i te nofo i Tesoa. Nee nofo leva ia ia i he ana mo ona ofafine. 31Nee ui leva e te taahine uluaki ki te muli: Kua matua tata tamai, pea e mole mau he tagata i te fenua ke hau kia taua, o mulimuli ki te aga mahani o te u fenua fuli. 32Hau ke ta fakainu tata tamai aki he vino, pea e ta momoe anai mo ia i te pouli, o tupu ke mau ai he hologa ki tata tamai. 33Pea nee na fakainu leva he vino ki tana tamai i te po aia; pea nee alu leva te taahine uluaki o momoe mo tana tamai: nee mole pe iloi e Lote te lakaga ae nee alu age ai tona ofafine o momoe mo ia, pea mo te lakaga ae nee tuu ake ai ia ia o alu. 34I te aho ake ae, nee ui leva e te uluaki ki te muli: Koeni nee au momoe mo tata tamai i te po kua hili, ke ta toe fakainu he vino kia ia i te po aeni, pea ke alu leva ia koe o momoe mo ia, o tupu ke mau he hologa ki tata tamai. 35Nee na fakainu leva he vino ki tana tamai i te po aia; pea nee alu leva te muli o momoe mo ia. Nee mole pe iloi e Lote te lakaga ae nee alu age ai tona ofafine o momoe mo ia, pea mo te lakaga ae nee tuu ake ai ia ia o alu. 36Nee faitatama leva te u ofafine o Lote ki tana tamai. 37Nee fanau leva te uluaki ko he tama, pea nee ina fakahigoa leva ko Moape: ko te tamai aia o te kau Moape, o kaku mai ai ki te aho nei. 38Nee fanau leva te muli ko he tama, pea nee ina fakahigoa leva ko Pene-Ami: ko te tamai aia o te kau Amone, o kaku mai ai ki te aho nei.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland