SENESI 32
32
Teuteu a Sakopo ke felavei mo Esau
1Nee alu leva ia Sakopo i tona ala; pea nee fakafetaulaki leva kia ia ni aselo a te Atua. 2I tana sio kia natou, nee ui leva e Sakopo: Ko te kau tau a te Atua! Pea nee ina foaki leva ki te kogamea aia te higoa ko Mahanaimi.
3Nee fekau leva e Sakopo ni tagata avelogo ke muamua ia ia ki tona tehina ko Esau, i te fenua ko Seili, ae e kau ki Etome. 4Nee ina tuku leva kia natou te fakatotonu aeni: Koeni te mea ae ke koutou fakaha anai ki toku aliki ko Esau: E palalau fenei mai kia koe tau tagata faifekau ko Sakopo: Nee au nofo i te fale o Lapane o kaku mai ki te aho nei; 5kua au mau ni aku faga pipi, mo ni faga asino, mo ni faga ovi, mo ni tagata faifekau, mo ni fafine faifekau; pea e au fekaui atu kia koe ni tagata avelogo ke fakaha ki toku aliki te mea aia, o tupu ke ke tali lelei tau tagata faifekau.
6Nee toe liliu age leva te u tagata avelogo kia Sakopo, o ui: Nee matou olo o fakafelavei ki tou tehina ko Esau; pea koeni kua haele mai ia ia kia koe mo te u tagata e fageau. 7Nee mataku leva ia Sakopo, o mamahi lahi osi. Nee ina vaeluai leva te hahai ae nee nonofo mo ia, mo te u ovi, mo te u pipi, mo te u kamelo, i ni nofoaga e lua. 8Koteuhi nee ina ui leva: Kapau e hau anai ia Esau o tamatei he tahi nofoaga, pea e feala anai ke feholaki he tahi nofoaga.
9Nee faikole leva ia Sakopo, o ui: Atua o taku tamai ko Apalahamo, Atua o taku tamai ko Isaake, Eteleno ae nee ina ui mai kia au: Toe liliu ki tou fenua, pea ki te kogamea ae nee ke tupu ai, pea e au fai anai kia koe te mea ae e lelei. 10Eteleno, e mole au gali mo te u kalasia fuli ae nee ke tuku mai kia au, mo tou agatonu katoa kia au ko tau tagata faifekau; koteuhi nee au fakalaka i te Solotane aeni mo toku tokotoko, pea koeni kua au nofo mo ni nofoaga e lua i te aho nei. 11E au kole atu kia koe, ke ke fakamauli au mai toku tehina ko Esau, koteuhi e au mataku kia ia, pea e au mamahi naa hau o tamatei au, mo te u fafine, mo te u fanau. 12Pea ko koe, nee ke ui mai kia au: E au fai anai kia koe te mea ae e lelei, pea e au fakaliliu anai tou hakoga ke tatau mo te one o te tai, ae e mole feala hona lau.
13Nee nofo leva ia Sakopo i te pouli i te kogamea aia. Nee ina filifili leva i te u mea ae nee ovi age kia ia he molaga ki tona tehina ko Esau: 14Ko te u tao fafine e luageau, mo te u tao tagata e uafulu, mo te u ovi fafine e luageau, mo te u ovi tagata e uafulu, 15mo te u kamelo fafine e tolugofulu pea mo onatou uhi ae kei natou fakahuhu, mo pipi fafine e fagofulu, mo pipi tagata e hogofulu, mo asino fafine e uafulu, mo asino tagata e hogofulu. 16Nee ina tuku leva tana faga manu aia ki ana tagata faifekau, o fakavaevae natou i onatou faahiga, pea nee ina ui leva kia natou: Ke koutou olo i oku mua, pea ke koutou tuku he vaha i ae faga manu mo ae faga manu. 17Pea nee ina tuku leva te fakatotonu aeni ki te tagata faifekau ae nee alu i mua: Ka felavei anai toku tehina ko Esau mo koe, pea ka ina fehui atu anai: Pe ko ai tou pule? Pe e ke alu ki fea? Pea a ai te faga manu aena e haele i ou mua? 18Pea e ke tali anai kia ia: A tau tagata faifekau ko Sakopo; ko he molaga ae nee ina fakamomoli mai ki tona aliki ko Esau. Pea koeni ia ia totonu e hau i omatou muli. 19Nee ina toe tuku leva te fakatotonu aena ki te lua, mo te tolu, pea mo natou fuli ae nee muli i te faga manu: Koena te mea ae e tonu ke koutou fakaha kia Esau moka koutou felavei anai mo ia. 20Pea e koutou toe ui anai: Koeni tau tagata faifekau ko Sakopo e muli mai ia matou. Koteuhi nee ui leva e Sakopo: E au fakafimaliei anai tona loto aki te molaga aena e ave i oku mua. Pea ka au sio anai ki ona mata, e lagi ina tali lelei anai au. 21Pea nee ina fakamuamua leva te molaga; kae nee nofo leva ia i te po aia i te nofoaga.
22Nee tuu ake leva ia ia i te po aia o too ona ohoana e toko lua, mo ana fafine faifekau e toko lua, mo ana fanau e toko hogofulu ma tahi, pea nee ina tuku leva natou ke fakalaka i te liua ko Sapoke. 23Nee ina too leva natou, pea nee ina ui leva ke natou fakalaka i te vaitafe, mo te u mea fuli ae nee ina mau.
Sakopo i Peniele
24Nee nofo toko tahi leva ia Sakopo. Pea nee fagatua leva he tagata mo ia o kaku ki te mafoata. 25I te sio a te tagata nee mole malohi ia ia ia ia, nee ina taai leva ia Sakopo i te hokoga o tona kauaga; pea nee mahui leva te kauaga o Sakopo i tana fagatua mo te tagata aia. 26Pea nee ui leva e te tagata: Tuku mai au ke au alu, koteuhi kua malama mai te mafoata. Nee tali leva e Sakopo: E mole au tuku anai ia koe ke ke alu, kae e heeki ke tapuaki mai kia au. 27Nee ui leva e te tagata kia ia: Ko ai tou higoa? Pea nee ina tali leva: ko Sakopo. 28Pea nee toe ui leva e te tagata: E mole ke toe higoa anai ko Sakopo, kae e ke higoa anai ko Iselaele; koteuhi nee ke fagatua mo te Atua pea mo ni tagata, pea kua ke malo. 29Pea nee fehui leva e Sakopo kia ia: E au kole atu kia koe, fakaha mai kia au tou higoa. Nee tali leva e te tagata: Kotea e ke kumi mai ai toku higoa? Pea nee tapuaki leva ia ia kia Sakopo i te kogamea aia. 30Nee foaki leva e Sakopo te higoa ko Peniele ki te kogamea aia; koteuhi nee ina ui: Kua au sio mata ki te Atua, pea nee ina fakamauli toku mauli. 31Nee hopo ake leva te laa, i te temi ae nee fakalaka ai leva ia Sakopo i Peniele. Nee ketu ia Sakopo o tupu ko tona kauaga. 32Koia ae e mole kai ai e te u fanau o Iselaele o kaku mai ki te aho nei te kanomate o te alaga, ae e pipiki ki te hokoga o te kauaga, koteuhi nee taai e te Atua ia Sakopo i te hokoga o tona kauaga.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland