SENESI 33
33
Fakatokatoka a Sakopo mo Esau
1Nee hiki ake leva e Sakopo ona mata, o sio: koeni, kua kaku age ia Esau, mo te u tagata e toko fageau. Nee ina vaevae leva te u fanau ia Lea, mo Lasele, mo te u fafine faifekau e toko lua. 2Nee ina tuku leva ke tuu ki mua te u fafine faifekau mo ana fanau, pea hoa atu ki ai ia Lea mo ana fanau, pea muli atu leva ia Lasele mo Sosefo. 3Nee alu leva ia ia totonu i onatou mua, pea nee punou ia ia ki te kele o tua fitu ia mua o tana kaku ki tona tehina. 4Nee lele leva ia Esau o fakafelavei kia ia; pea nee ina folahi leva ona nima kia Sakopo, o faufua ki tona kia mo uma kia ia. Pea nee na fetagihi leva.
5Pea nee hiki ake leva e Esau ona mata, o sio ki te u fafine mo te u fanau, pea nee ina ui leva: Ko ai ma natou aeni? Nee tali leva e Sakopo: Ko te u fanau aeni nee foaki mai e te Atua ki tau tagata faifekau. 6Nee fehohofi age leva te u fafine faifekau mo ana fanau, o punou ki te kele. 7Pea nee toe fehohofi age leva ia Lea mo ana fanau o punou ki te kele. Pea nee fehohofi age leva ia Sosefo mo Lasele o punou ki te kele. 8Pea nee ui leva e Esau: Kotea te uhiga o te faga manu ae nee felavei mo au i te ala? Pea nee tali leva e Sakopo: Ke au mau i ai tou manavaofa. 9Pea nee ui leva e Esau: Oi sioku tehina, e au nofo nei i te mau koloa; taupau au mea. 10Pea nee tali leva e Sakopo: Kailoa, e au kole atu kia koe, kapau kua ke ofa kia au, tali te molaga kua au fai atu kia koe. Koteuhi kua au sio ki ou mata o hage ko taku sio kia mata o te Atua, koteuhi kua ke tali au i te loto lelei. 11Koia tali taku molaga kua fai atu kia koe, koteuhi kua fakafonu au e te Atua aki ona kalasia, pea e mole pe he mea kei puli kia au. I te kole fakamalohi e Sakopo kia Esau, nee tali leva e Esau tana kole. 12Pea nee ui leva e Esau: Ta olo, pea ta kauga fagona; pea e au muamua anai ia koe.
13Kae nee tali leva e Sakopo kia ia: E iloi e toku Aliki e gaegae te u fanau, pea e tonu ke fakaeteete ki te u ovi fafine mo te u pipi fafine ae e nonofo mo te u uhi; kapau e fakamalohii natou ke natou haele i he aho katoa, pea e mamate anai te faga manu katoa. 14Ke muamua toku aliki i tana tagata faifekau; pea ko au, e au haele mamalie anai i muli, o mulimuli ki te haele a te faga manu ae e haele i oku mua, pea mo te haele a te u fanau, o kaku ki te lakaga ae e au kaku atu ai anai ki toku aliki i Seili. 15Pea nee ui leva e Esau: E au loto leva ke tuku atu kia koe he tahi vaega o taku hahai. Pea nee tali leva e Sakopo: Kotea tona tupuaga? Kua lahi osi te ofa o toku aliki kia au, i tau tali au i te loto ofa. 16I te aho pe aia, nee toe liliu leva ia Esau ki Seili.
Kaku o Sakopo ki Kanaane
17Nee alu leva ia Sakopo ki Sukoti. Pea nee ina fakatuu leva i te kogamea aia he fale kia ia, mo ni falepola ki ana faga manu. Koia ae nee ina foaki ai leva te higoa ko Sukoti ki te kogamea aena.
18I tana liliu mai Patane-Alame, nee tau manuia leva ia Sakopo ki te kolo ko Siseme, i te fenua o Kanaane, pea nee ina fakatuu leva tona falela o ovi ki te kolo. 19Nee ina totogi leva te kii moi kele ae nee tuu ai tona falela, mai te u foha o Amole, ko te tamai a Siseme, aki ni foi kesita* e teau. 20Pea nee ina fakatuu leva i ai he aletale, ae nee ina foaki leva ki ai te higoa ko Ele-Eloe-Iselaele (Atua, ko te Atua o Iselaele).
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland