SENESI 35
35
Liliu a Sakopo ki Petele
1Nee ui leva e te Atua kia Sakopo: Tuu ki oluga, o hake ki Petele, pea ke nofo i ai. E ke fakatuu anai i ai he aletale ki te Atua, ae nee ha kia koe i tau hola mai tou tehina ko Esau.
2Pea nee ui leva e Sakopo ki tona famili, mo natou fuli ae nee nonofo mo ia: Koutou too maia koutou te u atua matapule fuli ae e mau ia koutou, pea koutou fakamaa mo fetogi okotou kofu. 3E tou tuu anai ki oluga, pea e tou hake anai ki Petele. E au fakatuu anai i ai he aletale ki te Atua, ae nee ina tali taku kole i te aho o toku mamahi, pea nee nofo mo au i te ala ae nee au fagona ai.
4Nee natou tuku leva kia Sakopo te u atua matapule fuli ae nee mau ia natou, mo te u hau ae nee pipiki i onatou taliga. Pea nee tanu leva e Sakopo te u mea aia i lalo o te fuu akau lahi ae e ovi ki Siseme. 5Pea nee natou olo leva. Nee mafola leva te mataku ki te Atua i te u kolo fuli ae nee ovi kia natou, pea nee mole tuli leva e he tahi te u foha o Sakopo. 6Nee kaku leva ia Sakopo mo natou fuli ae nee olo mo ia ki Lusi, ae ko Petele, i te fenua o Kanaane. 7Pea nee ina fakatuu leva i ai he aletale, pea nee ina tuku leva te higoa ko Ele-Petele, ki te kogamea aia; koteuhi ko te kogamea aia nee ha ai te Atua kia ia i tana hola mai tona tehina.
8Nee mate leva ia Tepola, te fafine tauhi o Lepeka, pea nee tanu leva ia ia o ovi ki Petele, i lalo o te sene, ae nee foaki leva ki ai te higoa ko te sene o te u tagi.
9Nee toe ha leva te Atua kia Sakopo, i tana liliu mai Patane-Alane, pea nee tapuaki leva ia ia kia ia. 10Pea nee ui leva e te Atua kia ia: Ko tou higoa ko Sakopo. E mole ke toe higoa anai ko Sakopo, kae e ke higoa anai ko Iselaele. Pea nee foaki leva e te Atua kia ia te higoa ko Iselaele. 11Pea nee ui leva e te Atua kia ia: Ko au ko te Atua Mafimafi. Ke ke fanaunau, mo liuliuga. E tupu anai maia koe he puleaga, mo ni puleaga lalahi osi, pea e ulu mai anai ni hau mai ou ifiifi. 12E au foaki anai kia koe te fenua ae nee au foaki kia Apalahamo mo Isaake, pea e au foaki anai te fenua aeni ki tou hakoga ki amuli.
13Nee malaga leva te Atua o hake ki te lagi i te kogamea aia nee palalau ai ia ia kia Sakopo. 14Pea nee fakatuu leva e Sakopo he maka fakamooni i te kogamea aia nee palalau ai te Atua kia ia. Pea nee ina liligi leva ki te fuga maka he vino mo he lolo, o fakatapui ai te maka. 15Nee foaki leva e Sakopo te higoa ko Petele, fale o te Atua, ki te kogamea aia nee palalau ai te Atua kia ia.
Tupu o Pesamino; mate o Lasele
16Nee natou mavae leva i Petele; pea nee natou kaku leva ki he kogamea nee ovi ki Efalata, pea nee mamahi fanau leva ia Lasele. Nee faigataa te fanau a Lasele. 17I te lolotoga o tana mamahi fanau, nee ui age leva e te fafine faifanau kia ia: Ke aua naa ke mataku, koteuhi kua ke toe mau he tahi tama. 18I te oviovi mavae o tona laumalie, koteuhi kua lolotoga mate ia ia, nee ina foaki leva te higoa ki tana tama ko Pene-Oni. (ko tona uhiga: foha o te mamahi); kae nee foaki leva e te tamai ki te fanau te higoa ko Pesamino, (ko tona uhiga: foha o toku nima matau). 19Nee mate leva ia Lasele, pea nee tanu leva ia ia i te ala o Efalata, ae ko Petelehemi. 20Nee fakatuu leva e Sakopo he maka i tona tanuma; ko te maka fakamanatu aia o te tanuma o Lasele, ae kei tuu pe i te aho nei.
Agahala a Lupeni
21Nee mavae leva Iselaele mai ai; pea nee ina fakatuu leva tona falela i te fahai mouga ko Miketale-Etele. 22I te nofo a Iselaele i te fenua aia, nee alu leva ia Lupeni o momoe mo Pila, ko te ohoana o tana tamai. Pea nee iloi leva e Iselaele te mea aia, pea nee mamahi osi tona loto. Ko te u foha o Sakopo nee toko hogofulu ma lua.
23Ko te u foha ia Lea: ko te uluaki o Sakopo ko Lupeni, mo Simeone, mo Levi, mo Suta, mo Isakale, mo Sapulone. 24Ko te u foha ia Lasele: ko Sosefo mo Pesamino. 25Ko te u foha ia Pila; ko te fafine faifekau a Lasele: ko Tane mo Nefetali. 26Ko te u foha ia Silipa, ko te fafine faifekau a Lea: ko Kate mo Asele. Ko te u foha aia o Sakopo, ae nee tupu kia ia i Patane-Alame.
Mate o Isaake
27Nee kaku leva ia Sakopo ki tana tamai ko Isaake i Mamele, ovi ki Kiliate-Alepa, ae kua higoa i te temi nei ko Hepelone, te kogamea ae nee nofo ai foki ia Apalahamo mo Isaake.
28Ko te lahi o te u tau o Isaake ko te tau e teau valugofulu. 29Nee tuku leva e Isaake tona laumalie, pea nee mate leva ia ia, pea nee fakatahii leva ia ia mo tona hahai, kua matua osi pea kua makona i ona aho. Nee tanu leva ia ia e ona foha ko Esau mo Sakopo.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland