Luka 17
17
1Hakuyila atumbanji twindi nindi, nsaŋu yakudimbwisha antu hijikutwesha kubula kwinzaku, chiŋa jinza hohu; hakwila owu wukujileta, o yihuŋu yakamonayi! 2Muntu wukudimbwisha mwana wanyanya wumu iwu, chikuwaha kumukasa ilola deneni dakuhala kunshiŋu yindi, hikumunatila mukaluŋalwiji. 3Babalenu enu aweni. Neyi mana kweyi nakuvulumuni, muhosholi; neyi nabalumuki mumuchima, mwanakeni. 4Neyi ifuku dimu wukukuvulumuna mapampa katanu nakayedi, afunta kudeyi mapampa katanu nakayedi nawa nakwila nindi, Nalembi; kamwanakeni.
5Apostolu hiyakumwila Mwanta nawu, Tuvulishili kukuhwelela kwetu. 6Mwanta nindi, Neyi mukwi kala nakukuhwelela kwanti kwakweseka nakalubutu kamostadi kamu, mwadi kuwila iwu chilembalemba nenu, Bwitikaku, wuditumbi mukaluŋalwiji; wadi kuyovwahila.
7Hadi mwinenwinyi wukweti ŋamba yindi wadimaŋa, indi kwiji wadiishaŋa nyikoku, chakufumayi kwiha amwili nindi, inzaŋa swayi wushakami nakudya? 8Abuli kumwila nindi, Loŋeshaku yakudya nidyi, vwalaku chachiwahi wuŋimeni, nidyi, ninwi. Neyi wunakumishi dehi, nineyi aweni wakadyi wakanwi? 9Chakwilayi yuma yakumulejawu, wukumusakilila owu ŋamba, tahindi? 10Dimu mukwila ninenu nawa, neyi muneli yuma yayilejawu yejima, mukuhosha nenu, Tuyaloŋamba amukunkulwayi; tunakumini dakwila kwanyidimu yetu hohu.
11Cheliluwu adi munjila yawu yakuya kuYerusalema, yena wadiŋi nakuhita kuSamariya iku, Ŋaliliya iku, yena mukachi. 12Chayiliyi mumukala wumu, hikukumubulakana amayala ikumi akweti musoŋu wambumba, hiyakwimana hahalehi; 13hiyakubideka naŋovu nawu, Yesu, Mwanta, tutiyili luwi. 14Chanayimoniyi, hakuyila nindi, Yenu mwakadimwekeshi kudi atupristu. Chadiŋi nakuyawu, musoŋu wawu wutooka nikutooka. 15Wumu, chanamoniyi nakoli dehi, hakufunta nakulemesha Nzambi nezu daŊovu. 16Hakudinata chamesu heseki kunyendu yaYesu nakumusakilila; yenowu muntu wadiŋi kaSamariya. 17Yesu hakumwihula nindi, Hiyanatookeshi ikumuku? Indi awa atanu nawana adi kudihi? 18Kwosi nafunti nakumulemesha Nzambi, chiŋa yoyeniwu mwenyi wamwituŋa dacheŋi hohu? 19Hakumwila nindi, Nyamukaku, yaloŋa kweyi; kukuhwelela kweyi kunakukoleshi dehi.
20Chamwihwiluwu kudi aFwarisi hamba kenza wanta waNzambi, hakuyakula nindi, Wanta waNzambi hiwukwinza nakuwutala namesuku, 21hela nakuhosha nawu, Iwu! hela, Owu! Talenu, wanta waNzambi wudi mukachi kenu.
22Hakuyila atumbanji nindi, Mafuku akenza imwakakeŋa kumona ifuku daMwana kamuntu dimu, himwakadimonaku. 23Chakahoshawu nawu, Owu! hela, Iwu! bayi mwakafumahu hela kuyilondelaku. 24Hefuku daMwana kamuntu, yena wakela neyi nvula yikukena kumutamba wumu wewulu, kutooka nikumutamba wukwawu. 25Ilaŋa chiŋa yosambila kukaba yuma yayivulu, amuhela kudi antu achisakichi. 26Cheliluwu hamafuku aNowa, dichi chakelawu nihamafuku aMwana kamuntu. 27Adiilaŋa, anwinaŋa, asumbwilaŋa, asumbwishilaŋa, ndo nikwifuku depililiyi Nowa muwatu; dibaji dinza nikwinza, diyijilumuna niwejima wawu. 28Cheliluwu hamafuku aLoti, adiilaŋa, anwinaŋa, alandilaŋa, alandishilaŋa, adiminaŋa, atuŋilaŋa; 29ilaŋa hefuku dafuminiyi Loti muSodoma, kwanokeli kesi, ni kesi kaNzambi kwiwulu, kayijilumwini wejima wawu. 30Mwomumu nawa dimu mwakelawu ifuku dakamwekana Mwana kamuntu. 31Ifuku odu muntu wakekala hewulu detala, yuma yindi yidi mwitala, bayi asuluka nakuyitwala kwacheŋuku. Chochimu nimuntu wakekala mwiha, bayi afunta cheŋuku. 32Anukenu iŋodaLoti. 33Muntu wukukeŋa kumona wumi windi wakawujimbesha; muntu wukujimbesha wumi windi wakawumona wawuwenyi. 34Nukuyileja nami, hawufuku wenowu amayala ayedi akekala hakadidi kamu; wumu akamutwala, mukwawu wakashala. 35Ambanda ayedi akekala nakutwa hamu; wumu akamutwala, mukwawu wakashala. 36Amayala ayedi akekala mwiha; wumu akamutwala, mukwawu wakashala. 37Hiyakumwihula nawu, Kudihi Mwanta? Yena hakuyila nindi, Kunafwili kanyama, diku kukupompela makubi.
The Bible in Lunda: Ndembu (Lunda of Kalunda) © B. F. B. S. 1962.