Luka 21
21
1Hakubanduka, hakumona akwakuheta adi nakuumbila nyilambu yawu muchikasha chakuswekela mali. 2Hakumona mumbanda wanfwila kazweŋi wumu, hakúumbilamu tumali twanyanya tuyedi. 3Hakwila nindi, Nukuyileja chalala nami, mumbandiwu wanfwila kazweŋi, nombilumu nabadiki akwawu ejima. 4Muloŋa awa ejima anombilumu nyilambu yakumahetawu amavulu; ilaŋa yeniwu mumbanda nombilumu yawuzweŋi windi, yejima yadiŋi yakudikwasha nachu.
5Antu amakwawu adiŋi nakutena tembeli, chayiwahishiluwu namalola amawahi niyamukunkulu. 6Hakuyila nindi, Yumiyi yimukutala, mafuku amba kenza hiyamba kashiya ilola nidimu dakanaŋamana helola di kwawu, dakabula kunatika hesekuku. 7Hiyakumwihula nawu, Eyi Nkuluŋaŋa, indi yumiyi yamba kashika hamwakanyi? Hakakeŋa kumwekana yumiyi, hamba kekala chinjikijilu chanka? 8Yena hakuyila nindi, Babalenu akenda kayiluwaŋesha muloŋa amavulu akenza mwijina dami nakwila nawu, Diyi ami; nawu, Mwaka wunashiki dehi kwakwihi. Bayi mwakayilondelaku. 9Chimwakatiya nsaŋu jamajita nimapumba, bayi mwakafwa mutentuku; muloŋa yumiyi chiŋa yisambila kumwekana; hakwinza kukumisha kuchidi kanda.
10Henohu hakunuŋaku nindi, Muza wakanyamuka nakulwa namuza wukwawu, wanta nawanta wukwawu. 11Kwakaholoka nyitentanshi yayeni, ninzala, niyipupu kwacheŋi nakwacheŋi. Kwakekala yuma yafwana yakufwisha antu mutentu, niyinjikijilu yamaneni yakufuma kwiwulu. 12Hakela yuma yejimiyi yichidi kanda yishiki, akasambila kuyikwatenu, akayikabisha, akayihana kuyota yawu, akayisha namutuleya, akayikokela kumesu awanyanta ankanu nawanguvulu kukoola ijina dami. 13Chakabalumuka chuma chakuyishimwina nachu antu wunsahu. 14Dichi kuminenu dakuwunda munyichima yenu, muleki kutoŋojokaŋahu dehi mumwakaakula; 15muloŋa ami nakayinka kanwa nima ana, kulonda akwankunyi nenu ejima akakaŋanyi hela kudikaŋilamu, hela kutadikamu. 16Anvwali jenu, hela ana kwenu, hela awusoku wenu, hela amabwambu jenu akayihanahana; enu amakwawu akayijahisha. 17Akayihela kudi antu ejima kukoola ijina dami. 18Kwosi lusuki lwakunyitu yenu nilumu, lwakakisikaku. 19Mukukakela kwenu, dimu mumukumwena wumi wenu.
20Ilaŋa himwakamona Yerusalema anayikuchiki dehi namajita kwi-ndo, henohu kelukenu nenu keŋa ayibalumuni yikali ihembi. 21Henohu adi muYudeya akatemukili kumapidi; adi mukachi kamukala akafumumu; adi mumaha bayi akeŋila cheŋi muŋandaku. 22Muloŋa wenawa diwu mafuku akutenda, kulonda yuma yasonekeluwu yejima yakalumbuluki. 23O yihuŋu yakamonawu akekala namavumu, niakaamwisha hamafuku owu! muloŋa mwituŋa mwakaholoka ihuŋu dasweja hamafuku owu, nikuzuwila nankashi antu ambala awa. 24Akayitapa nampoku yakabali, akayitwala muwukoli munyuza yejima; ŋanda Yerusalema akayidata kudi aJentili, nichamba kamana nyaka yawaJentili.
25Mwitaŋwa mwakekala yinjikijilu, nimukakweji, ninamututumbwa; nyuza yakakaba nankashi hamaseki, hiyakuhayama lushindu lwakaluŋalwiji namankanda. 26Antu akahwidŋela nawoma, nakutalila yuma yidi nakwinza hamatuŋa, muloŋa Ŋovu jamawulu jakakanka. 27Henohu akamona Mwana kamuntu hakwinza mwivu, naŋovu yayeni, nalubanji lwakulema kwasweja. 28Yumiyi chiyakatachika kumwekana, katalenu kwiwulu, kabandulenu nyitu yenu, muloŋa kukuula kwenu hikukushika kwakwihi.
29Hakuyitila chishimu nindi, Talenu iwu mutondu wachikuyu ninyitondu yejima. 30Chiyinasapuki ichi, munachimoni, muneluki enu aweni nenu mayinza adi kwakwihi. 31Chochimu ninenu nawa, chimwakamona yumiyi hiyikumwekana, kelukenunenu wanta waNzambi keŋa wushiki. 32Nukuyileja chalala nami, chisakichi kuhita chiŋa yuma yejima yinamani dehi. 33Iwulu dakahita, niiseki nawa; mazu ami hiyamba kahitaku.
34Ilaŋa babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu. 35Muloŋa dichi chidakashikena antu ejima ashakama heseki dejima. 36Tonenuŋa kwenu hayilaaka yejima nakulembelela, kulonda mwakemiki mushindu, mwakapuluki kuyuma yejimiyi, mwakemani kumesu aMwana kamuntu.
37Hefuku hefuku wadiŋi nakuleja antu mutembeli namwa ana; hawufuku wedikilaŋa nakuya nakukama kumpidi yaOliveta. 38Antu ejima amenekelaŋa budidi kudi yena mutembeli amutiyi.
The Bible in Lunda: Ndembu (Lunda of Kalunda) © B. F. B. S. 1962.