LUKAS 14
14
I Yesus nupakaul᷊e singkatau ko masaki
1Pia su silou ngu Sabati I Yesus tamai nukumang su Wal᷊e ngu singkatau tumbonang u tau Farisi. Su se'e apang taumata kaputuhunge si Yesus. 2Kuteu pia ko nusumongo sarang koa I Yesus singkatau ko pia sakie sol᷊o, l᷊aeri l᷊au l᷊imange nusumahunu. 3Bou e'e I Yesus nukina su manga meteri agama l᷊au manga tau Farisi ko ene su se'e, “Tumuhu atorang u agama ngi kite, apa botonge mupakaul᷊e ngu taumata ko masaki su l᷊ou ngu Sabati arako ta?”
4Manga meteri agama l᷊au apang tau Farisi mangkate ko marumasi. Bou e'e I Yesus nukui tau e'e dingang nupakaul᷊e ngi sie, mbuhue nangoro si sie pakapul᷊e. 5#Mat. 12:11Bou e'e I Yesus nangul᷊i su apang taumata, “Andenge singkatau bo i kumu pia singkatau ana arako sapie simbau nanawo su l᷊al᷊ung u pahighi su l᷊ou ngu Sabati, apa i sie ta muhiuri pakaehong anae arako sapie e'e su l᷊ou e'e l᷊ai?”
6Kateho takoae sarang singkatau nakasimbahi si Yesus su hal᷊i e'e.
Naung masana l᷊au mal᷊ondo
7I Yesus nakawua pia manga sake kapamilenge manga tampa ko kapiange. Ual᷊ingu e'e I Sie nangonggo tintiro i'i si sire kaul᷊ie. 8#Sas. 25:6-7“Boko i kumu inoti sarang sal᷊iwang u kawing, ari tamai kangiang su kadera ko kapiange. Watu'u singkawua pia singkatau ko wal᷊inge ko lebe mapia bo i kau ninoti l᷊ai, 9hakiu tataghuang u wal᷊e ko nunoti si kumu rua e'e, humaung si kau dang muhabari, Mundo ampung, tampa i'i seng nisadia guna ngu sake e'e. Kuteu dingang pundang u mea i kau mambeng sumoho kumangiang su l᷊ikuri. 10Ual᷊ingu e'e, boko i kumu inoti, pamilete tampa ko lebe su l᷊ikuri, tadeau tataghuang u wal᷊e sumongo sarung muhabari si kau, ‘Ghawe, maite kangiang su tampa ko lebe mapia.’ Dingang kere'e i kumu niadateng su tingo ngu kaul᷊i u sake ko wal᷊inge. 11#Mat. 23:12; Luk. 18:14Watu'u apang taumata ko mutingkarange u badange sarung ipakasana, arawe ko mutingkasana u badange sarung ipakarange.”
12Bou e'e I Yesus nangul᷊i su tataghuang u wal᷊e, “Boko i kau munoti taumata musal᷊iwang kumang l᷊ou arako huwi, ari punoti ghawe arako sintamahuaring, arako ana u singkatau, arako l᷊ai l᷊ampungu ko kala. Watu'u i sire l᷊ai sarung munoti si kau, dang dingang kere'e i kau manarima wawal᷊isi bou kakanoau. 13Inau, boko i kau mukoa sal᷊iwang, punotite taumata ko susa, taumata ko pia kurange badange, taumata ko pepa, l᷊au taumata ko wuta. 14I kau sarung al᷊amating, watu'u manga taumata e'e sarung ta makawal᷊isi kapapiangu. Kapapiangu sarung wal᷊isang u Mawu Ruata su tempo apang taumata ko mapia sau ipuwangung bou papate.”
Papinintu sal᷊iwang ko l᷊abo
(Mat. 22:1-10)
15Su tempo singkatau ko kakange singkahindo su se'e nakaringihi didato Ngi Yesus, i sie nangul᷊i, “Kal᷊auntung su taumata ko sarung kumang singkakang dingang u Mawu Ruata boko I Sie sumongo kere Ratu!”
16Arawe I Yesus nangul᷊i su tau e'e, “Pia su singkatempo singkatau nukoa sal᷊iwang ko l᷊abo dang nunoti taumata maul᷊i. 17Suapang seng temponge sal᷊iwang manita, tau e'e nundoi paparentange puhabari su kaul᷊i u taumata ko ninoti, ‘Songote, kaul᷊ie seng nasadia!’ 18Kateho i sire kaul᷊ie, singkatau-singkatau nanita nundo ampung. Ko kahorokange nangul᷊i su paparentang e'e, ‘Ia mbuhue nul᷊uang tana simpalang, dang mambeng tarai mutuhung. Ampungewe ia.’ 19Singga nangul᷊i, ‘Ia mbuhue nul᷊uang sapi l᷊ima mpari, dang mborong manuka manga sapi e'e. Ampungewe ia.’ 20Ko wal᷊inge l᷊ai nangul᷊i, ‘Ia mbuhue nukawing, ual᷊ingu e'e ia ta makasongo.’
21Paparentang e'e napul᷊e dang nangul᷊i e'e su tuange. Tuange e'e nuwawal᷊uang kahingang dang nangul᷊i su paparentange, ‘Pakaehongte tamai sarang apang l᷊al᷊eng l᷊au manga lorong su soa. Wawa mai taumata ko susa, taumata ko pia kurange badange, taumata ko wuta, l᷊au taumata ko pepa.’ 22Bou e'e paparentang e'e nangul᷊i, ‘Tuang, parenta ngi Tuang seng mbuae daku nikoa, kateho tampa mborong maul᷊i.’ 23Bou e'e tuang e'e nangul᷊i, ‘Dakote sasae sarang manga l᷊al᷊eng ko l᷊abo dang manga l᷊al᷊eng ko dio su l᷊ikuru soa, dang paringangte ndai apang taumata pasongo, tadeau wal᷊eku mapene. 24Putinaungte! Takoae sarang singkatau bou tal᷊oara u manga taumata ko seng ninoti e'e sarung makanteng kang u sal᷊iwangku i'i!’ ”
Kirapa makoa tumatuhu Mawu
(Mat. 10:37-38)
25Maul᷊i taumata nutumuhu nul᷊umal᷊eng dingang I Yesus. I Yesus nuwihu dang nangul᷊i si sire, 26#Mat. 10:37“Boko taumata sumongo su koa-Ku, kateho lebe mukumindaghi si mamange, si papange, kawinge, manga anae, manga ana u singkataunge, nangilebe badange sisane, i sie ta makoa tumatuhu-Ku. 27#Mat. 10:38, 16:24; Mrk. 8:34; Luk. 9:23Taumata ko mandi mamikul᷊i salipie dang tumuhu si Sia, ta makoa tumatuhu-Ku. 28Boko singkatau bo i kumu mo mukoa manara simbau, tantu i sie kumangiang horo mundekeng wawaehi tadeau matitong minsang doinge makarating pukoa manara e'e arako ta. 29Watu'u boko nal᷊ahe i sie ta makasue e'e, sumbal᷊i meseli seng mbuae nikoa, kuteu kaul᷊i u taumata ko makawua hal᷊i e'e sarung mahul᷊ighei. 30I sire sarung nangul᷊i, ‘He, taumata i'i namangung, kateho ta nakasue!’ 31Boko singkatau ratu pia sordadonge mapul᷊ohiwu su kataunge mo muparang dingang u ratu ko wal᷊inge ko pia sordadonge duampul᷊o su hiwunge su kataunge, tantu ratu e'e sarung kumangiang mutimbang horo minsang i sie matoghasi mundoka rokae e'e. 32Boko i sie makapundang ko l᷊ome, tantu su tempo ngu rokae e'e mborong marau, i sie sarung mundoi raroie guna ngu mundo murame.” 33Panginsuenge I Yesus nangul᷊i, “Kere'e l᷊ai dingang i kumu. Takoae sarang singkatau bo i kumu botonge makoa tumatuhu-Ku, boko i sie ta mangorbang u kaul᷊i u patiku.”
Asing ko malele
(Mat. 5:13; Mrk. 9:50)
34“Asing e'e ko mapia, arawe boko nakoa ko malele, botonge sau ipakapuhari? 35Seng takoae gunange l᷊ai, maning guna ngu anseri l᷊au guna ngu pupuki. Inau, kitang irume. Boko pia tul᷊i, daringihe!”
