LUKAS 15
15
Domba ko nailang
(Mat. 18:12-14)
1 #
Luk. 5:29-30
Pia su silou, maul᷊i mananuntu balasteng dang apang taumata ko nirekeng u ana kawanua ko dal᷊ai, nusumongo mundaringihi si Yesus. 2Manga tau Farisi dang manga meteri agama nanita nukarubu. I sire nangul᷊i, “Sih, taumata i'i nanarima manga taumata ko dal᷊ai dang mborong l᷊ai nukumang dingang i sire!” 3Ual᷊ingu e'e I Yesus nuwuke si sire papinintu i'i,
4“Andenge singkatau bo i kumu pia dombae mahasu, bou e'e i sie nikailangeng u simbau – apa sarung koatenge? Nal᷊ahe i sie sarung manintang dombae siompul᷊osio e'e su tampa ko mahumpughi rindulue, dang l᷊umal᷊eng mundea ko nailang e'e sarang ikarea. 5Dang boko domba e'e sau ikareae, i sie mal᷊ua-l᷊uasi hakiu nipasange domba e'e su wumbange, 6bou e'e niwawae napul᷊e. Bou e'e i sie nukui manga ghawe'e l᷊au manga l᷊ampunge, dang nangul᷊i, ‘Maite i kite mahul᷊uasi. Dombaku ko nailang seng sau nikarea!’ 7Ho, kere'e l᷊ai su sorga pia kal᷊al᷊uasi ko lebe l᷊abo su singkatau ko bardosa ko nutobati, bou taumata siompul᷊osio ko mapia ko ta wahal᷊uasi mutobati.”
Doi ko nailang
8“Arako andenge singkatau kowawine pia doi sal᷊aka mapul᷊o, bou e'e nikailangeng u simbau – apa sarung koatenge? I sie sarung mundiko sol᷊o, dang manapu wal᷊enge dingangu, mundea suapang tampa sarang ikareae doi e'e. 9Su tempo i sie nakarea doi e'e, i sie nukui manga ghawe'e dingang u manga l᷊ampunge, bou e'e nangul᷊i, ‘Ia l᷊umiaghi kahingang sau nakarea doiku ko nailang. Maite i kite mahul᷊uasi!’ 10Kere'e l᷊ai malaikati u Mawu Ruata mal᷊uasi boko pia singkatau taumata ko dal᷊ai mutobati bou apang dosange. Pangimangte!”
Ana ko nailang
11I Yesus sau nangul᷊i, “Pia singkatau iyamang ko pia anae ko ese darua. 12Ko tuari nangul᷊i si sie, ‘Papa, onggoko si sia su tempo i'i bahageangku bou kakakala i kite.’ Kuteu i yamange namahia u kakakala e'e su anae darua. 13Pira l᷊ou tuhue ana ko tuari e'e nuwal᷊u bahageange pusakae e'e, bou e'e nul᷊umal᷊eng sarang wanua ko marau. Pai se'e i sie nanginsue doinge dingang nuwiahi kapul᷊ambaehange. 14Suapang doinge nasue kaul᷊ie, nariadi su wanua e'e kal᷊ahutung ko l᷊abo, hakiu i sie nanita nasusa wiahi. 15Bou e'e i sie natamai nuhal᷊i su singkatau ko natana su se'e, ko nuparenta si sie pundiaga wawi su awuhi. 16I sie nahutung kahingang hakiu i sie mo kumang kang u manga wawi e'e. Maneng seng kere'e hutunge, mang takoae sarang singkatau nupakang i sie. 17Kasamuriange i sie nakatinaung dang nangul᷊i, ‘Apang taumata ko kahal᷊ie dingang i papaku kange napene-pene, dang ia su si'i masandighi mate kal᷊unusang. 18Ia tamai makoa sarang koa i papaku, dang muhabari si sie: Papa, ia seng nunsal᷊a su saruang u Mawu Ruata l᷊au su tingo ngi Papa. 19Ta hinonge l᷊ai ia isigho ana i Papa. Rekengte ia singkatau paparentang i Papa.’ 20Kuteu i sie nul᷊umal᷊eng napul᷊e nakoa sarang koa i papange.
Mborong marau bou wal᷊e, i sie seng nikawua ngi papange. Dingang napene u kakindaghie i papange nutumal᷊ang nanginsomahi si sie, bou e'e nul᷊ahuku dang nangimbu si sie, 21‘Papa’, angkung u ana e'e, ‘ia seng nunsal᷊a su saruang u Mawu Ruata l᷊au su tingo ngi Papa. Ta hinonge l᷊ai ia isigho ana i Papa.’ 22Kateho i papange nukui manga paparentange, dang nangul᷊i, ‘Pakaehong! Pangal᷊a l᷊aku ko kasidadakenge, dang l᷊oho si sie. L᷊ohoke sinsing su tal᷊imboronge, dang sapatu su l᷊aeri. 23Bou e'e pangal᷊a ana u sapi ko matawa dang hatate. I kite sarung kumang dang mahul᷊uasi. 24Watu'u anaku i'i seng nate, i'i sau nuwiahi; i sie seng nailang, i'i sau nikarea.’ Mbuhue i sire nanita nusal᷊iwang.
25Tintal᷊a e'e, ana ko iyakang mborong su anseri. Su tempo ngi sie napul᷊e dang masandighi u wal᷊e, i sie nakaringihi tingihi u musik l᷊au musasal᷊ai. 26I sie nukui singkatau bou manga paparentange, bou e'e nukina, ‘Ko pia apa su wal᷊e?’ 27Paparentange e'e nusumimbahi, ‘Tuari ngi Tuang seng nusul᷊e! Dang i papa ngi Tuang nuparenta puhata ana u sapi ko matawa, ual᷊ing i sie seng sau nakarea anae su l᷊al᷊ung u kasasal᷊amati!’
28Ana ko iyakang e'e nuwawal᷊uang kahingang hakiu i sie mandi sumu sarang l᷊al᷊ung u wal᷊e. Bou e'e i papange nusumuwang nul᷊oke si sie pasu. 29Kateho i sie nangul᷊i, ‘Su l᷊al᷊ung u pira taung l᷊iwuenge ia mutimpate muhal᷊i guna ngi Papa. Ta paghisa ia l᷊umawang parenta ngi Papa. Dang apa nionggo i Papa si sia? Sarang kambing simbau i Papa mborong ta paghisa nangonggo si sia pukoa sal᷊iwang dingang u manga ghaweku! 30Ana i Papa e'e seng nanginsue rarotong i Papa su manga kowawine ko dal᷊ai, kateho suapang i sie nusul᷊e, i papa nuhata ana u sapi ko matawa gunange!’ 31‘Aso’, nisimbahi papange, ‘i kau sintinia ene su si'i dingangku. Kaul᷊i u apang koaku, e'e ko koau l᷊ai. 32Kateho i kite tahana mang mambeng musal᷊iwang dang mahul᷊uasi, watu'u tuariu e'e ko seng nate, kateho i'i sau nuwiahi; i sie seng nailang, kateho i'i seng nikarea.’ ”
