LUKAS 16
16
Mul᷊ahal᷊i doi ko pande
1I Yesus nangul᷊i su manga tumatuhu-E, “Pia singkatau ko kala. I sie pia singkatau mul᷊ahal᷊i su urusang u doi ko mangangatori kakakalae. Tau ko kala e'e nakarea habari uare mul᷊ahal᷊i doinge e'e kapunggoloe doinge. 2Inau i sie nukui mul᷊ahal᷊i urusang u doinge e'e dang nangul᷊i, ‘Apa i'i daku nikaringihi bou hal᷊i u? Su tempo i'i, mai sarakang si sia apang laporang hal᷊i u kakakalaku. I kau seng ta wotonge makoa mul᷊ahal᷊i urusang u doiku.’ 3Kuteu mul᷊ahal᷊i urusang u doi e'e nusipiri, ‘Apa mambeng daku ikoa su tempo i'i? I Tuangku seng nul᷊ohosi si sia. Mamacoli, ia ko l᷊ome; makoa mundando, ia mamea. 4Ia pia akal᷊i: boko ia seng il᷊ohosi, ia mambeng pia ghawe maul᷊i ko mo manarima si sia matana su koa i sire!’ 5Inau mul᷊ahal᷊i urusang u doi e'e nukui apang taumata ko pia utang si tuange. Su kahimotongange i sie nangul᷊i, ‘Pira utangu si tuangku?’ 6Tau e'e nusumimbahi, ‘Mahasu su bunsari l᷊ana zaitung’. Mul᷊ahal᷊i e'e nangul᷊i si sie, ‘I'i surati u utangu. Kangiangte dang pakaehong wohe: l᷊imampul᷊o.’
7Bou e'e i sie nangul᷊i su tau karuange, ‘Dang ana u simbau, pira utangu?’ Tau e'e nusumimbahi, ‘Gandung sihiwu su karonge.’ Tau mul᷊ahal᷊i e'e nangul᷊i si sie, ‘I'i surati u utangu. Wohe'e: wal᷊uhasu.’
8Kuteu i tuangu mul᷊ahal᷊i urusang u doi ko ta majujuri e'e nundalo su mul᷊ahal᷊i e'e ual᷊ingu kapandenge; watu'u manga taumata ngu dunia i'i lebe pande mangatori urusang i sire bou apang taumata ko muwiahi su l᷊al᷊ung u kasasua.”
9Bou e'e I Yesus sau nuhabari, angkung-E, “Raringihiko! Pake'e kakakala u dunia i'i guna ngu mundea ghawe, tadeau boko kakakala u dunia i'i seng takoae harigange, i kumu sarung itarima su tampa katanakeng ko kakal. 10Taumata ko botonge ipangimaneng su manga hal᷊i ko dio, botonge ipangimaneng l᷊ai su manga hal᷊i ko l᷊abo. Arawe taumata ko ta ipangimaneng su manga hal᷊i ko dio, ta ipangimaneng l᷊ai su manga hal᷊i ko l᷊abo. 11Inau, boko hal᷊i kakakala u dunia i'i i kumu seng ta kapangimaneng, i sai mo munggile kakakala u naung si kumu? 12Dang boko su hal᷊i u rarotong u taumata ko wal᷊inge, ikatitonang i kumu ta kapangimaneng, i sai mo mangonggo si kumu apa ko makoa koau?
13 #
Mat. 6:24
Takoae sarang singkatau ko makapuhal᷊i guna ngu mawunge darua; watu'u i sie sarung lebe kumindaghi u singkatau bou ko wal᷊inge, arako i sie sarung lebe masatia su mawunge simbau bou ko wal᷊inge. Kere'e l᷊ai dingang i kumu. I kumu ta makapuhal᷊i guna ngu Mawu Ruata dang l᷊ai guna ngu kakakala.”
Manga didato ngi Yesus
(Mat. 11:12-13, 5:31-32; Mrk. 10:11-12)
14Manga tau Farisi nakaringihi kaul᷊ie ko niul᷊i I Yesus. Bou e'e i sire nahul᷊ighei ngi Sie, ual᷊ing i sire ko mo u doi. 15Arawe I Yesus nangul᷊i si sire, “I kumu taumata ko su tingo ngu taumata ko wal᷊inge tuhungang ko nuhino, kateho Mawu Ruata matitong l᷊al᷊ung u naungu. Watu'u apa ko i sul᷊ung u taumata ko marange, arawe su mata ngu Mawu Ruata ko masana.
16 #
Mat. 11:12-13
Atorang ko nionggo i Musa l᷊au tintiro ngu manga nabi, tatapi mapake sarang tempo ngi Yohanes Mananahani. Bou tempo e'e Habari Mapia bou hal᷊i u kirapa Mawu Ruata mamarenta kere Ratu mangkate turusi kahihabari. Dang taumata mutawakal᷊i ngu badange tadeau mariadi tataho umati u Mawu Ruata. 17#Mat. 5:18Kateho lebe gampang l᷊angi l᷊au dunia mailang, bou hurupi simbau su l᷊al᷊ung u Tita ngu Mawu Ruata mawala.
18 #
Mat. 5:32; 1Kor. 7:10-11 I sai manindo kawinge bou e'e mukawing dingang kowawine ko wal᷊inge, taumata e'e nawuang. Dang taumata ko mukawing u tau kowawine ko seng nisindonge, i sie l᷊ai mawuang.”
Tau ko kala dingang i Lazarus
19“Pia singkatau ko kala. Pakeange mal᷊al᷊ighari, dang wiahi mangkate matemang l᷊ou-l᷊ou. 20Su tingo ngu tukari u wal᷊enge nipilo singkatau ko susa arenge i Lazarus. Badange napene u hene'e. 21I Sie mo kumang dingang u manga l᷊umbei ngu wiahi ko manawo bou meda panganengang u tau ko kala e'e. Katewe kapuna sintinia musumongo mul᷊ewa hene'e.
22Tau ko susa e'e ta nal᷊iwue bou e'e nate, bou e'e niwawa u malaikati sarang tampa ko mawantughi su sindihang i Abraham su sorga. Tau ko kala e'e nate l᷊ai dang nil᷊uwing. 23Su dunia ngu taumata ko nate i sie masingsara kahingang. Dang su tempo ngi sie nutumingara, i sie nakawua si Abraham dasi su tampa ko marange-range dingang i Lazarus su sindihange. 24‘Tuang Abraham!’ nikuiang u tau ko kala e'e. ‘Kindaghite ko ia. Roiko si Lazarus putaho tal᷊imboronge su ake bou e'e naeko punanta lilaku. Ia masingsara kahingang su l᷊al᷊ung u putung i'i!’
25Arawe i Abraham nusumimbahi, ‘Putinaung ko i kau anaku: Su kanandu u puwawiahiu i kau seng nakarea kaul᷊ie ko kapiange, arawe i Lazarus nakarea apang ko dal᷊ai. I'i i sie seng sanang su si'i. Dang i kau masingsara. 26Su l᷊ikuru e'e, su tal᷊oara i kau dingang i kami seng nikoa simbau towae ko l᷊abo, tadeau taumata bou i'i, ta makakoa sarang pai e'e dang taumata bou pai e'e ta makakoa sarang i'i!’ 27‘Boko kere'e, Tuang’, angkung tau ko kala e'e, ‘ia mundo singapang botonge i Tuang pundoiko si Lazarus sarang wal᷊e ngi papaku. 28Pia i sire l᷊ima sintamahuaringku pai se'e. Roiko i Lazarus pangonggo ingati si sire, tadeau ari sarang i sire l᷊ai mataho su tampa ko masingsara i'i.’
29I Abraham nusumimbahi, ‘I sire seng pia manga buki i Musa dang buki u manga nabi! Walate i sire putuhu apang ko kawawohe su l᷊al᷊ung u manga buki e'e!’ 30Kateho tau ko kala e'e nusumimbahi, ‘E'e mborong ta natimu, Tuang Abraham. Arawe boko pia taumata ko nate sau muwiahi dingang ruminta sarang koa i sire, i sire sarung mutobati bou apang dosa ngi sire.’ 31Kateho i Abraham nangul᷊i, ‘Boko i sire ta musumpi parenta ngi Musa l᷊au manga nabi, nal᷊ahe i sire l᷊ai mang ta mangimang, maning l᷊ai pia taumata ko nate sau muwiahi.’ ”
