LUKAS 17
17
Manga hal᷊i ko makakoa taumata mukoa dosa
(Mat. 18:6-7,21-22; Mrk. 9:42)
1I Yesus nangul᷊i su manga tumatuhu-E, “Manga hal᷊i ko makakoa taumata mukoa dosa nal᷊ahe sarung pia. Kateho silaka su taumata ko makakoa sabapie! 2Mapiang boko watu ngu gilingang i'iki su l᷊ehie, bou e'e i sie irume su l᷊auri sul᷊ung u i sie makakoa singkatau bou manga rario i'i mukoa dosa. 3#Mat. 18:15Watu'u e'e, pakal᷊aingati!
Boko ana u simbau'u mukoa dosa, nae atore i sie. Boko i sie musisili, ampunge i sie. 4Boko i sie mukoa dosa si kau pakapitu silou dang sintinia sumongo si kau dang mangul᷊i, ‘Ia mundo ampung,’ ampungewe i sie.”
Hal᷊i u pangangimang
5Manga rasuli nangul᷊i su Mawu Yesus, “Mawu, pakatoghasiko pangangimang i kami.” 6Mawu nusumimbahi, “Boko i kumu pia pangangimang kere kal᷊abo u watu ngu sawi, i kumu makaul᷊i su kau murbei i'i, ‘Kasawue i kau dang kasuangte su l᷊auri,’ Nal᷊ahe kau i'i sarung tumuhu parentau.”
Hinong koateng u singkatau paparentang
7“Andenge singkatau bo i kumu pia paparentang ko namungkala su awuhi arako nangaha domba. Boko paparentang e'e nusul᷊e, apa i sie mangul᷊i si sie, ‘Maite pakaehong kang’? 8Tantu ta! Katewe i sie sarung mangul᷊i si sie, ‘Sadiaiko kangku. Pangahusiko l᷊aku ko bursi dang diagate ia tintal᷊a kakange l᷊au kapanginunge, bou e'e i kau mbuhue kang.’ 9Paparentang e'e manengte ta idalo watu seng nutumuhu parenta ngu mawunge, aru? 10Kere'e l᷊ai i kumu. Boko i kumu seng nukoa kaul᷊i u apang ko niparenta si kumu, puhabarite, ‘I kami kitang paparentang biasa; i kami kitang nukoa ko hinonge koateng i kami.’ ”
I Yesus nupakaul᷊e ngi sire mapul᷊o ngkatau
11Su l᷊al᷊al᷊engang sarang Yerusalem, I Yesus nul᷊umiu pusarang u wanua Samaria dang Galilea. 12Su tempo ngu sumu su kampong simbau, i Sie nisongong i sire mapul᷊o pia saki pisi ko makatataku.#17:12: I Yesus pia pandunge mupakaul᷊e ngi sire watu'u e'e I Sie nangoro si sire patamai sarang koa u manga imam pakiwawuai dang pakipakal᷊ahe ko seng naul᷊e bou saki i sire. I sire ko rarisi bou raunge 13dang kakihae, “Yesus! Tuang! Kindaghiteko i kami!”
14 #
Im. 14:1-32
Su tempo I Yesus nakawua si sire, I Sie nangul᷊i, “Dakote tamai sarang koa u manga imam, pundo si sire pamuriksa badang i kumu.”
Tintal᷊a i sire kal᷊al᷊enge, saki i sire nailang.#17:14: I Yesus pia pandunge mupakaul᷊e ngi sire watu'u e'e I Sie nangoro si sire patamai sarang koa u manga imam pakiwawuai dang pakipakal᷊ahe ko seng naul᷊e bou saki i sire. 15Su tempo ngu singkatau bo i sire natitong himoneu i sie seng naul᷊e, i sie nusul᷊e dingang mal᷊uasi apiru kapundalonge Mawu Ruata. 16Bou e'e su saruang I Yesus, i sie nusuba nutarimakase si Sie. Tau e'e singkatau Samaria. 17Bou e'e I Yesus nangul᷊i, “Wal᷊ingewe pia mapul᷊o ngkatau ko nipakaul᷊e? Su apa we i sire sio e'e? 18Nakurawe kitang tau l᷊iwu i'i ko nusul᷊e nutarimakase su Mawu Ruata?” 19Bou e'e I Yesus nangul᷊i su tau e'e, “Puwangungte, dang dakoe l᷊al᷊eng. Ual᷊ing i kau mangimang si Sia, i kau naul᷊e.”
Tempo ngu Mawu Ruata musumongo mamarenta
(Mat. 24:23-28,37-41)
20Pira ngkatau taumata ngu Farisi nukina si Yesus kangereng Mawu Ruata sumongo mamarenta. I Yesus nusumimbahi, “Pamarentahang u Mawu Ruata ta itita bou manga tatia ko ikawua u taumata, 21hakiu taumata makaul᷊i, ‘Maite putuhung, i'i i sie!’ arako, ‘Pai se'e i sie!’ Watu'u Mawu Ruata seng nanita namarenta su tal᷊oara i kumu.”#17:21: Su tal᷊oara i kumu: arako su pusasara ngi kumu; arako sarung singkawawua mupakal᷊ahe u watangeng su tal᷊oara i kumu.
22Bou e'e I Yesus nangul᷊i su manga tumatuhu-E, “Sarung ruminta temponge i kumu mo makawua silou bou l᷊ou-l᷊ou ngu Ahusi Taumata, kateho i kumu ta makawua e'e. 23Hindo taumata sarung mangul᷊i si kumu, ‘Tuhunge, pai se'e!’ Arako, ‘Tuhunge, su si'i!’ Kateho i kumu ari suwang mundea si sie. 24Kere kila sarung kumerong su l᷊angi dang suminang bou pondol᷊i sarang pondol᷊i, kere'e l᷊ai sarung kakakoa u Ahusi Taumata su l᷊ou-E. 25Kateho suhoro e'e i sie mambeng mutatahang u singsara dang ta itarima u apang taumata tempo i'i. 26#Kar. 6:5-8Su l᷊ou ngu Ahusi Taumata sarung ipakal᷊ahe, kakakoae musul᷊ung kere ko nariadi su tempo ngi Nuh horo 27#Kar. 7:6-24Taumata nukumang, nanginung dang nukawing, kere'e turusi-turusi sarang i Nuh nusumu su l᷊al᷊ung u kapal᷊i dang l᷊uwa ko l᷊abo nusumongo dang nakawinasa apang taumata kaul᷊ie e'e. 28#Kar. 18:20–19:25L᷊ai musul᷊ung su tempo ngi Lot. Taumata nukumang, nanginung, nudagang, nusuang dang kapukoae wal᷊e. 29Kateho su tempo ngi Lot nusumuwang bou Sodom, su l᷊ou e'e putung l᷊au malelang nal᷊intu bou l᷊angi nupakasilaka si sire kaul᷊ie. 30Kere'e sarung kakakoae su tempo ngu Ahusi Taumata ipakal᷊ahe.
31 #
Mat. 24:17-18; Mrk. 13:15-16 Su l᷊ou e'e taumata ko su tahiwuwung u wal᷊enge ari l᷊intu mangal᷊a manga rarotonge su l᷊al᷊ung u wal᷊e. Kere'e l᷊ai taumata ko mborong su awuhi ari pusul᷊e sarang wal᷊enge. 32#Kar. 19:26Putinaungte apa ko seng nariadi su kawing i Lot! 33#Mat. 10:39, 16:25; Mrk. 8:35; Luk. 9:24; Yoh. 12:25Taumata ko mutawakal᷊i mupakasal᷊amati u puwawiahi, sarung kailangeng u puwawiahie. Arawe taumata ko kailangeng u puwawiahie i sie sarung masal᷊amati. 34Pangimangte: su huwi e'e, dua ngkatau katikie su l᷊al᷊okang simbau, singkatau sarung wawaneng, dang singkatau l᷊ai itintang. 35I sire rua kowawine kapunggilinge gandung, singkatau sarung wawaneng, dang singkatau l᷊ai itintang. 36[I sire rua kapuhal᷊ie su awuhi, singkatau sarung wawaneng, dang singkatau l᷊ai itintang.]”
37Manga tumatuhu I Yesus nukina, “Su apa e'e sarung mariadi, Mawu?”
I Yesus nusumimbahi, “Su apa pia bangke, su se'e pia burung tahakang bangke.”
