LUKAS 18
18
Papinintu kowawine ko wal᷊u dang ko mamamonesi
1Bou e'e I Yesus nuwuke ngu simbau papinintu guna ngu manintiro manga tumatuhu-E tadeau i sire sintinia mukal᷊iomaneng dang ari kahupusang u sipirang. 2I Yesus nangul᷊i, “Su soa simbau pia singkatau mamamonesi ko ta mataku Mawu Ruata, dang l᷊ai ta musumpi si sai-sai. 3Su soa e'e pia l᷊ai singkatau kowawine ko wal᷊u seng pakapira nusumongo su koa i hakim e'e mundo makitatawang u parkarae. ‘Tul᷊ungko ia mupasaruang u rokaku’, angkung i tau wawine ko wal᷊u e'e. 4Pira ngkatempo l᷊iwuenge mamamonesi e'e mandi mutul᷊ung kowawine ko wal᷊u e'e. Kateho panginsuenge mamamonesi e'e nusipiri, ‘Maning ia ta mataku Mawu Ruata dang ta musumpi si sai-sai, 5Kateho ual᷊ingu tau kowawine ko wal᷊u mangkate sintinia managhal᷊i si sia, mapiangwe daku tatawangeng parkarae. Boko ta, ntihang i sie mangkate sintinia sumongo dang mupakasusa ngu ia.’ ”
6Bou e'e Mawu nangul᷊i, “Putuhungko pakapia-pia apang ko niul᷊i u mamamonesi ko ta maadili e'e! 7Ho, apa Mawu Ruata sarung ta mutumatawang parkara ngu umati-E sisane ko mangkate kapundoe si Sie l᷊ou huwi? Apa i sie sarung mupakal᷊iwue ngu tempo guna ngu mutul᷊ung si sire? 8Pangimangte: I Sie sarung maehong mutumatawang parkara ngi sire! Kateho boko Ahusi Taumata ruminta, apa mborong pia kahombangeng taumata ko mangimang si Sie su dunia i'i?”
Papinintu tau Farisi dingang u tau mananuntu balasteng
9I Yesus nuwuke ngu l᷊ai papinintu i'i ko nitarang-E su taumata ko mupakasana u taumata ko wal᷊inge, kateho mangaking u badange sisane ko mapia. 10Angkung I Yesus, “Pia i sire rua nakoa sarang Wal᷊e ngu Mawu guna ngu mukal᷊iomaneng. Singkatau tau Farisi, ko wal᷊inge singkatau mananuntu balasteng. 11Tau Farisi e'e kararisi nutingkahae sisanenge dang nukal᷊iomaneng,#18:11: kararisi nutingkahae sisanenge dang nukal᷊iomaneng: pira mbau wohe horo: nurumarisi dang nukal᷊iomaneng su l᷊al᷊ung u naung. ‘O Mawu Ruata, ia mutarimakase si Kau, watu'u ia wal᷊ingewe kere taumata ko wal᷊inge, ko maanggang, mal᷊inga arako nawuang. Ia mutarimakase watu'u ia wal᷊inge kere mananuntu balasteng e'e. 12Ia mupuasa paka rua singkamisa, dang ia mangonggo sasumbaku si Kau simbahageang mapul᷊o bou kaul᷊ie ko daku nikarea.’ 13Arawe mananuntu balasteng e'e kararisi marau-rau dang katewe lebe ta wahani l᷊umal᷊ingara sarang l᷊angi. Apiru kapanapu rokonge i sie nangul᷊i, ‘O Mawu Ruata, kindaghiteko ia taumata ko bardosa i'i!’ ”
14 #
Mat. 23:12; Luk. 14:11 “Pangimangte”, angkung I Yesus, “Su tempo mapul᷊e sarang wal᷊e, mananuntu balasteng e'e nitarima u Mawu Ruata dang wal᷊inge tau Farisi e'e. Watu'u apang taumata ko mutingkarange u watangenge sarung ipakasana; dang apang taumata ko mutingkasana u watangenge sarung ipakarange.”
I Yesus nangal᷊amati manga rario
(Mat. 19:13-15; Mrk. 10:13-16)
15Pia manga taumata ko numbawa manga ana ko dadio sarang koa I Yesus tadeau i Sie mamilo l᷊ima-Nge l᷊au mangal᷊amati si sire. Su tempo manga tumatuhu I Yesus nakawua e'e, i sire nuwawal᷊uang su manga taumata e'e. 16Kateho I Yesus nukui manga rario e'e bou e'e nangul᷊i su manga tumatuhu-E, “Walate manga rario e'e pasongo su Koa-Ku! Ari we larang i sire, watu'u taumata ko kere i sire i'i makoa tataho u umati Mawu Ruata. 17Tinaungeko! Taumata ko ta mupasaruang u Mawu Ruata kere singkatau ana ko dio, ta mariadi makoa tataho umati Mawu Ruata.”
Hal᷊i u taumata ko kala
(Mat. 19:16-30; Mrk. 10:17-31)
18Singkatau pangaha u tau Yahudi nukina si Yesus, “Tuang Guru ko mapia, apa mambeng daku koateng tadeau ia manarima puwawiahi ko kahingang l᷊au ko kakal?”
19“Nakurawe i kau nangul᷊i Ia ko mapia?” kakina I Yesus si sie. “Takoae ko mapia, su l᷊ikuru Mawu Ruata sisane. 20#Sasu. 20:12-16; Sau. 5:16-20I kau seng matitong apang parenta ngu Mawu Ruata: ‘Kumbahang mawuang, kumbahang mamate, kumbahang manako, kumbahang muhabari l᷊eo, dang pangadati si papangu dingang i si mamangu.’ ”
21“Kaul᷊i u parenta e'e seng daku nituhukang mangki mborong makuda,” sasimbahi tau e'e.
22Nakaringihi e'e, I Yesus nangul᷊i, “Mborong pia hal᷊i simbau ko mambeng koateng u: Wal᷊ue apang rarotongu, onggoe doinge su tau ko susa, dang i kau sarung makahombang kakakala su sorga. Bou e'e maite putuhu si Sia.” 23Arawe suapang tau e'e nakaringihi e'e, i sie nasusa naunge ual᷊ing i sie ko kala kahingang.
24I Yesus matitong tau e'e nasusa naunge, watu'u e'e i Sie nangul᷊i. “Tumaniu mabuha su taumata ko kala makoa tataho u umati u Mawu Ruata! 25Magampangeng simbau onta sumu su l᷊ohang u rarahung, bou singkatau ko kala sumu su dunia ngu Mawu Ruata ko Wuhu.”
26Manga taumata ko nakaringihi si Yesus nangul᷊i kere'e nukina, “Boko kere'e, i saiwe ko botonge masal᷊amati?”
27I Yesus nusumimbahi, “Ko ta mariadi su taumata, mariadi su Mawu Ruata!”
28Bou e'e i Petrus nangul᷊i, “Tuhungete! I kami seng nanintang u kaul᷊i u apang su wal᷊e ngi kami guna ngu mutumuhu si Tuang.”
29“Pangimangte!”, angkung I Yesus. “Taumata ko seng nanintang u wal᷊enge, arako kawinge, arako tamahuaringe, arako i papa mamange arako manga anae ual᷊ingu mutangkiang Mawu Ruata, 30taumata e'e sarung makahombang wawal᷊isi maul᷊i-ul᷊i su tempo i'i, dang su tempo mai i sie sarung onggol᷊ang u puwawiahi ko kahingang l᷊au ko kakal.”
Seng katilunge I Yesus nuhabari papate-Nge
(Mat. 20:17-19; Mrk. 10:32-34)
31I Yesus nangomol᷊i mapul᷊odua tumatuhu-E i sire ha, bou e'e nangul᷊i, “Raringihiko! I kite i'i seng sarang Yerusalem. Pai se'e, kaul᷊ie apang ko niwohe u manga nabi bou hal᷊i u Ahusi Taumata, sarung mariadi. 32I sie sarung isarakang, su manga taumata ko wal᷊inge tau Yahudi, ko sarung manumea, muhinakang, dang manguru si Sie. 33I sire sarung mamahang dang mamate si Sie, kateho su l᷊ou katilunge, i Sie sarung muwangung.”
34Kaul᷊ie e'e ta nikahinganeng u manga tumatuhu I Yesus e'e sarang singkodo. Mangal᷊eng u apang didato e'e nipakawuni bo i sire. I sire wugha i Sie kapuhabari apa.
I Yesus nupakaul᷊e ngu singkatau tahapundo ko wuta
(Mat. 20:29-34; Mrk. 10:46-52)
35Su tempo ngi Yesus masandighi murating u Yerikho, singkatau ko wuta kakangiang kapundoe su wiwihi u l᷊al᷊eng. 36Suapang i sie nakaringihi taumata maul᷊i e'e nusumahe, i sie nukina “Pia apa?”
37“I Yesus tau Nazaret e'e, kasahenge,” nihabari sire si sie.
38Kuteu tau ko wuta e'e nukumiha, “Yesus, ahusi Daud! Kindaghite ko ia!”
39Apang taumata ko su saruang, nuwawal᷊uang si sie dang nangoro si sie pakarumasi. Kateho i sie sau nukumiha lebe mauha “Ahusi Daud! Kindaghite ko ia!”
40I Yesus nangiro dang nangoro taumata pumbawa tau ko wuta e'e sarang koa I Sie. Suapang i sie nurating, I Yesus nukina, 41“Apa kao u daku koateng si kau?”
“Tuang” nisimbahi tau ko wuta e'e, “Ia mo makawua.”
42Bou e'e I Yesus nangul᷊i, “Boko kere'e, putuhungte! Ual᷊ing i kau mangimang si sia, i kau maul᷊e.”
43Su tempo e'e l᷊ai i sie nakawua, mbuhue i sie nutumuhu si Yesus apiru kaputarimakase su Mawu Ruata. Suapang taumata maul᷊i e'e nakawua hal᷊i e'e, i sire kaul᷊ie nundalo Mawu Ruata.
