LUKAS 19
19
I Yesus dingang i Zakheus
1Su tempo ngi Yesus nurating u Yerikho, i Sie nul᷊umal᷊eng nuhupusi soa e'e. 2Su soa e'e pia singkatau tumbonang u mananuntu balasteng ko kala. Arenge i Zakheus. 3I sie mo mutuhung ko i sai I Yesus e'e, kateho ual᷊ingu taumata tumaniu maul᷊i dang i sie sisane masana, kuteu i sie ta nakawua si Yesus. 4Inau, i sie nutumal᷊ang nangihoro apang taumata, mbuhue naawi su kau, tadeau makawua si Yesus ko singkodo l᷊ai sarung sumahe su se'e. 5Suapang I Yesus nurating u pung u kau e'e, I Sie nutuhung sintarai bou e'e nangul᷊i, “Zakheus, kaehongte lintu! Watu'u Ia mambeng makoa sarang wal᷊engu silou i'i.”
6I Zakheus dingang maehong nul᷊umintu dang nanomahi si Yesus dingang kal᷊al᷊uasi. 7Kaul᷊i u apang taumata ko nakawua hal᷊i e'e nanita nukarubu. I sire nangul᷊i, “Sih! I sie tamai nukisake su wal᷊e ngu taumata ko dal᷊ai!”
8Bou e'e su wal᷊enge, i Zakheus nurumarisi dang nangul᷊i si Yesus, “Mawu simbahageang bou rarotongku sarung daku ionggo su tau ko susa, dang i sai-sai ko l᷊inau bou daku niakal᷊eng, sarung sau daku waehang si sie paka pa su sul᷊enge!”
9Bou e'e I Yesus nangul᷊i, “Su silou i'i i kau dingang u kaul᷊i u tataho u wal᷊engu nipakasal᷊amati Mawu Ruata dang nionggol᷊ang u puwawiahi ko wuhu, watu'u i kau l᷊ai hintou ngi Abraham. 10#Mat. 18:11Ahusi Taumata sumongo guna ngu mundea l᷊au manal᷊amati taumata ko napal᷊iri.”
Papinintu doi wul᷊aeng
(Mat. 25:14-30)
11 #
Mat. 25:14-30
Su tempo ngu taumata mborong kapundaringihi si Yesus kapudidatonge, I Sie nuwuke ngu simbau papinintu. Watu'u, su tempo e'e i sie seng masandighi u Yerusalem, dang taumata manika Mawu Ruata seng maehong mamarenta kere Ratu su dunia. 12I Yesus nangul᷊i, “Pia singkatau papung ko nul᷊umal᷊eng sarang wanua ko marau guna ngu hengketang makoa ratu, bou e'e napul᷊e. 13Suhoro u nuwua, i sie nukui mapul᷊o ngkatau paparentange, bou e'e nangonggo si sire singkatau-singkatau pusimbau doi wul᷊aeng. ‘Pudagangte dingang u doi i'i tintal᷊a ia l᷊umal᷊eng’. I sie nangul᷊i si sire. 14Kateho tataho u soa e'e nubinsi si sie. Inau, suapang i sie nuwua, i sire nundoi taumata puhabari, ‘I kami mandi taumata i'i makoa ratu ngi kami.’
15Kateho papung e'e nihengke nakoa ratu, mbuhue nusul᷊e sarang soae. I sie dingang nukui apang paparentange pasongo, guna ngu pakinateng minsang pira kauntungang ko seng nikarea i sire. 16Paparentang kahimotongange nusumandighi dang nangul᷊i, ‘Tuang, doi wul᷊aeng simbau ko nionggo i Tuang e'e, seng daku nikoa mapul᷊o.’ 17‘Masidada’, angkung i tuang e'e, ‘i kau paparentang ko mapia! Ual᷊ingu su hal᷊i ko dio, i kau ikapangumbang, i kau sarung daku koateng mangangawasa soa mapul᷊o.’ 18Paparentang karuange himaung dingang nangul᷊i ‘Tuang, doi wul᷊aeng simbau ko nionggo i Tuang e'e, seng daku nikoa l᷊ima.’ 19Su paparentang e'e ratu e'e nangul᷊i, ‘I kau daku koateng mangangawasa su soa l᷊ima.’ 20Paparentang ko wal᷊inge himaung dang nangul᷊i, ‘Tuang i'i doi ngi Tuang; daku nireso nipikung u l᷊enso. 21Ia mataku i Tuang, watu'u i Tuang singkatau ko mahasa. I Tuang mangal᷊a apang ko wal᷊inge koa i Tuang, dang i Tuang mangal᷊a l᷊uange su tampa ko ta nisuangeng i Tuang.’ 22Ratu e'e nangul᷊i si sie, ‘I kau paparentang ko dal᷊ai! Nuhino kere su didatongu sisane ia sarung muhukung i kau. I kau matitong ia ko singkatau ko mahasa; ia mangal᷊a apang ko wal᷊inge koaku dang mangal᷊a hasili su tampa ko ta daku nisuangeng. 23Boko kere'e nakurawe doiku e'e ta nipasu su bank tadeau su tempo ngu ia musul᷊e ia makatarima doi e'e dingang u rentenge?’ 24Bou e'e ratu e'e nangul᷊i suapang taumata ko kararisi su se'e, ‘Al᷊a doi e'e bo i sie dang onggoe su paparentang ko pia doi wul᷊aeng mapul᷊o e'e.’ 25Arawe manga taumata e'e nangul᷊i, ‘Tuang, i sie seng pia mapul᷊o.’ 26#Mat. 13:12; Mrk. 4:25; Luk. 8:18Ratu e'e nusumimbahi, ‘Putinaung: taumata ko seng pia, si sie sarung onggol᷊ang l᷊ai lebe maul᷊i. Arawe taumata ko takoae, apang ko pia si sie sarung al᷊akeng l᷊ai bo i sie. 27Dang su orasi i'i wawate mai manga rokaku e'e ko mandi ia makoa ratu ngi sire. Patete i sire kaul᷊ie su saruangku!’ ”
I Yesus nusumu su Yerusalem dingang u kawawantughi
(Mat. 21:1-11; Mrk. 11:1-11; Yoh. 12:12-19)
28Suapang I Yesus mbuae nangul᷊i kaul᷊ie e'e I Sie nul᷊umal᷊eng suhoro i sire sarang Yerusalem. 29Su tempo masandighi u Betfage l᷊au Betania su Wukiri u Zaitung, I Sie nangoro dua ngkatau tumatuhu-E pal᷊al᷊eng horo. 30“Dakoe tamai sarang kampong su saruang pai e'e,” nihabari Yesus si sire, “Boko i kumu sumu pai se'e, i kumu sarung makawua ana u keledai simbau mal᷊aiki. Keledai e'e mborong ta nisakenang u taumata. Piloe keledai e'e dang wawa mai. 31Boko taumata makina si kumu, ‘Nakurawe i kumu mamilo keledai e'e?’ Puhabari ‘Mawu#19:31: Mawu: arako tataghuange. muparlu.’ ”
32Tumatuhu I Yesus darua e'e natamai, dang nakarea kaul᷊ie mang nuhino kere ko nihabari-E. 33Tintal᷊a i sire rua kapamukange ana u keledai e'e, tataghuange nangul᷊i si sire rua, “Nakura keledai e'e ipilo i rua?”
34I sire nusumimbahi, “Mawu mupake.” 35Bou e'e i sire rua numbawa ana u keledai e'e sarang koa I Yesus. Bou e'e i sire nangumpahi juba ngi sire su wawo u keledai e'e dang nutul᷊ung nupaawi I Yesus su wawoe. 36Tintal᷊a I Sie nusumahe sake-sake su keledai e'e, manga taumata namila juba ngi sire su l᷊al᷊eng.
37Su tempo I Yesus seng masandighi u Yerusalem, su l᷊al᷊eng karusunge su Wukiri u Zaitung, kaul᷊ie apang tumatuhu-E i sire maul᷊i nanita nukumiha nundalo su Mawu Ruata dang nutarimakase si Sie ual᷊ing i sire seng nakawua kaul᷊i u tatia ko makal᷊aherang. 38#Mzm. 118:26I sire nangul᷊i, “Al᷊amati su Ratu ko ruminta su areng u Mawu! Purarame su sorga, dang dalo su Mawu Ruata!”
39Pira ngkatau taumata ngu Farisi bou tal᷊oara u taumata maul᷊i e'e nangul᷊i si Yesus, “Tuang Guru, roiko pakarumasi manga tumatuhu I Tuang e'e.”
40I Yesus nusumimbahi, “Pangimangte! Boko i sire i'i marumasi, manga watu i'i sarung kumiha.”
I Yesus nusumangi u Yerusalem
41Su tempo ngi Yesus seng masandighi u Yerusalem, dang nakawua soa e'e, I Sie nusumangi. 42Angkung-E, “Pirua, wal᷊inge gampang kapiange kiko silou i'i i kau matitong apa ko makasongo purarame! Kateho i'i i kau ta makawua e'e. 43I kau sarung musombang u simbau tempo, su apang rokau makoa manga sasahaghe ipul᷊iku si kau; i sire sarung mul᷊iwung si kau dang manise si kau bou apang tampa. 44I sire sarung mupakal᷊ul᷊e ngi kau dingang u kaul᷊i u ana u kawanua ngu; dang takoae watu sarang simbau sarung iwala ngi sire matana masasusung su tampae, watu'u i kau ta nusumpi u tempo su tempo ngu Mawu Ruata nusumongo mupakasal᷊amati kau!”
I Yesus nusumu su Wal᷊e ngu Mawu
(Mat. 21:12-17; Mrk. 11:15-19; Yoh. 2:13-22)
45I Yesus nusumu su Wal᷊e ngu Mawu dang nanita nanguseri apang mudadagang su se'e. 46#Yes. 56:7; Yer. 7:11“Su l᷊al᷊ung u Buki Susi,” angkung-E, “Mawawohe kiri'i: Mawu Ruata nangul᷊i, ‘Wal᷊e-Ku sarung makoa wal᷊e tampa pukakal᷊iomanengang.’ Kateho nikoa i kumu sal᷊ehi tahahampasi!”
47 #
Luk. 21:37
Sintinia l᷊ou I Yesus manintiro su l᷊al᷊ung u Wal᷊e ngu Mawu. Manga tumbonang u imam, dang manga meteri agama, dingang u manga pangaha u tau Yahudi mo mamate si Sie, 48kateho ta nakarea l᷊al᷊eng guna ngu mukoa hal᷊i e'e, ual᷊ingu kaul᷊i u taumata mangkate turusi kitang kapundaringihi si Sie, dang mo u apang didato-Nge
