लुका 16
16
बेइमान नाइक्याको ल्हाकराय
1येसुइ लयको चेलालमकाय तोसास्यावा, “कुनय यातचाक धनि मान्ता खेतो र ओउको काम जाह्ङो यातचाक नाइक्या खेतो। यात दिन ओउ नाइक्याइ सम्पति हिनामिना जाह्ङो कुरा कुनय यातचाकइ ओउ धनि मान्ताकाय छ्यानाथय। 2ओउतझ्यान्ते मालिकइ ओउ नाइक्याकाय गोत्ति तोआथय, ‘नाङको बारेहाङ ङाइ इ दोह साइधय मुनाङ? नाङइ जिम्मा लेःओ हिसाब-कितापलमको खाता ङाकाय बइचि, धइतिदाह्य्सा द्याह ङाइ नाङकाय ङाको सम्पतिको नाइक्या गम्नेङल।’
3 अनि नाइक्याइ लयकाय तोआकास, ‘ङाको मालिकइ ङाकाय नोकरिसय त्याःल्सा बोःङाताङ, द्याह ङाइ दोह हाइचाङ? राङ तह्उति काम जाह्ङ्साकाय ङा बल नाःङल, र थेपो तेसामा ङा रास्लेनाङ। 4द्याह दोह हाइसापरना त दाह्यो कुरा देङे ङाइ चिःआलाङ! ङाइ देङे होयालम जाह्ङ्ति गमालाङ त खेया, ङाको नोकरि वाइयाकायमा लोन्हे ओउमयइ ङाकाय लयको किमहाङ स्वागत जाह्ङ्नाताङ्स।’ 5ओहाङसयको ओउइ लयको मालिकको रिन लागओ जुदा आसामिलमकाय गोताकान। ओउइ ङ्हाकोकाय ह्वताकान, ‘ङाको मालिकको रिन नाङकाय गच्युक मुना?’
6 ‘सुम हजार लितर जयतुनको साति’ त दाह्य्ति ओउ त्याङा।
अनि नाइक्याइ ओउकाय तोआथय, ‘लउ, नाङको तमसुक त्याकु, र च्युःङ्ति रेह्न्तोले पन्रसय मात्र लेखउ।’
7 अनि ओउइ अर्को यातचाककाय ह्वताकान, ‘नाङ गच्युक रिन लागओ मुना?’
ओउ त्याङा, ‘यात हजार बोरा गहुङ।’
नाइक्याइ ओउकाय तोआथय, ‘लउ, नाङको तमसुक त्याकु, र ओहाङ आथसय बोरा लेखउ।’
8 जब नाइक्याइ ओउत जाह्ङो कुरा ओउको मालिकइ चिःआकान, ओउ बेइमान नाइक्याइ जाह्ङो चलाखि कामकाय लुङाकान।”
अनि येसुइ ओउमयकाय तोसास्यावा, “इ ल्हाउदयबाङको मान्तालम लयको होयालमकुस बेबहार जाह्ङ्धार्ना थोङोको सन्तानलमसय नाःतो चलाख स्याउनय। 9ओउतझ्यान्ते ङाइ निङकाय तोनेनाङ्स, लयको लागि होया जाह्ङ्साकाय इ ल्हाउदयबाङको निङको धन-सम्पति गरिबलमकाय बइनु। अनि जब निङ सितेनय र निङको सम्पति निङको लागि दोह काममा लागल, र ओउबेलाहाङ निङकाय परमेस्वरइ अजम्बरि किमहाङ स्वागत जाह्ङ्तेनय। 10सुखे मयो कुराहाङ इमान्दार स्याउना ओउखे ताह्ङो कुराहाङमा इमान्दार स्याउलेना। ओउतले सुखे मयो कुराहाङ बेइमान स्याउना ओउखे ताह्ङो कुराहाङमा बेइमान स्याउलेना। 11ओउतझ्यान्ते यदि ल्हाउदयबाङको धन-सम्पतिहाङ बिस्वास जाह्ङ्सा ज्योतेइलि त खेया, सत्यको धनको लागि गतहाइति बिस्वास जाह्ङ्सा खाइना र? 12र यदि निङ इ ल्हाउदयबाङहाङ मुधार्ना अर्काको धनहाङ इमान्दार स्याउतेइलि त खेया, गतहाइति परमेस्वरइ निङकाय लाङकाहाङ निङइ दोःसापरओ धन बइतेचय र?
13 सु सेवकइमा निसचाक मालिकको सेवा जाह्ङ्सा खाइल। यदि ओउइ ओउत हाइसा बोःङ्नउ त खेया, ओउइ यातज्योकाय हेला जाह्ङ्नउ र अर्कोकाय राप्नउ अथबा ओउइ यातज्योइ तोओ ग्याना र अर्कोइ तोओ ग्यालेल। निङइ परमेस्वर र धन निसज्याङको सेवा जाह्ङ्सा खाइतेनिलि।”
येसुइ तोसास्यावो केहि कुरालम
(मति ११:१२-१३; ५:३१-३२; मर्कुस १०:११-१२)
14जब फरिसिलमइ येसुइ तोसास्यावो कुरा सायाकानि, ओउमयइ येसुकाय थ्याउलाङ फाःङाकानि, धइतिदाह्य्सा ओउमयइ थेपोकाय आन राप्नितो। 15अनि येसुइ ओउमयकाय तोसास्यावा, “निङ मान्तालमको ङ्हा धर्मि मःन्सा बोःङ्तेनानि, तर परमेस्वरइ निङको ल्हुङतुकको कुरा चिःसास्याउना। धइतिदाह्य्सा मान्तालमको माझहाङ ताह्ङ्तो स्यावो थोकलम परमेस्वरको नजरहाङ ओउ मइतो स्याउलेना।
16 बप्तिस्मा बयो युहन्नाको बेलासम्म परमेस्वरइ मोसा दुवारा बइसास्यावो नेम-कानुन र अगमबक्तालमको स्यानराय प्रचार स्यावो खेतो। ओउबेलाहाङसय इताङखे परमेस्वरको राज्यको पेओ खबर प्रचार जाह्ङो मुना, अनि जुदाइ ओहाङ पोक्साकाय बल जाह्ङ्धय मुनय। 17तर परमेस्वरको नेम-कानुनको यातज्यो मयो कुरा अलप्सा भन्दापाय बरु फेलबाङ र ल्हाउदयबाङ अलप्सा सजिलो स्याउना।#मति ५:१८
18 यदि कुनय गोय्चोइ लयको माचाकाय भर्पाय बइनउ र अर्को मोम्चोकुस बिह्या जाह्ङ्नउ त खेया, ओउइ बेभिचारको पाप जाह्ङ्नउ। र यदि कुनय गोय्चोइ ओउ भर्पाय जाह्ङ्ति फेकायो मोम्चोकुस बिह्या जाह्ङ्नउ त खेया, ओउइमा बेभिचारको पाप जाह्ङ्लेनउ।”
धनि मान्ता र गरिब लाजरसको ल्हाकराय
19येसुइ फेरि तोसास्यावा, “यात समय कुनय यातचाक धनि मान्ता खेतो र ओउ गलमा आन पेओ महङ्गो नायलम लावसतो। अनि दिनमले न्युम्तो-न्हिक्तो जेःति मोजमज्जा जाह्ङुतो। 20तर ओउ धनि मान्ताको किमको दह्य्लोहाङ ज्यानभरि चा नाःओ यातचाक लाजरस त मय्ङ्ओ गरिब मान्ताकाय वान्ति गम्नितो। 21धनि मान्ताइ आह्म् जेःधार्ना ओउको तेबुलसय ग्लेओ जुथा आह्म् जेःसा दोःनाङ या त म्हर्ति ओउ योति मुतो। कुःइलम वाङ्ति ओउको चालम लेह्म्नितो।
22 यात दिन ओउ गरिब लाजरस सिआ र लाङकादुतलमइ ओउकाय आःल्ति अब्राहामको छेउहाङ गमाथय। अनि ओउ धनि मान्तामा सिआ र पाह्माथय। 23नरकहाङ आन दुख च्यवोझ्यान्ते ओउ धनि मान्ताइ त्याःउताङ त्याउति योआकान र लोक्तोसयले अब्राहामको छेउहाङ च्युःङ्तिमुओ लाजरसकाय च्यवाकान। 24ओउतझ्यान्ते ओउइ हिह्ति गोःआकान, ‘अब्राहाम आपा, ङाकाय योःन्ति योसास्याउपाना। लाजरसकाय ओउको क्रुतसय यात त्योप तिः खेयामा ङाको म्होतोङहाङ त्योपोकताक्ति बइताक्लाङ ल्होक्सास्याउपा। धइतिदाह्य्सा ङा इ म्हेःको रापहाङ छतपत स्याउति मुनाङ।’
25 तर अब्राहामइ तोआथय, ‘चोः य, ल्हाउदयबाङखा स्याक्ति मुतोकहाङ न्युम्तो-न्हिक्तो जेःति मोजमज्जा जाह्ङो कुरा नाङइ म्हेःलाम अनि लाजरसइखे ओउबेलाहाङ आन नाःतो दुख च्यवो खेतो। तर देङेखे लाजरसइ इहाङ सुखकुस धोमाइतो मुना र नाङखे ओहाङ दुखहाङ मुतेना। 26इ जुदा कुरालमबाहेक, इहाङसय निङकताङ सुमा आल्सा खाइलाम, र ओहाङसय निकताङ सुमा वाङ्सा खाइलाम त दाह्य्ति नाङ र निको माझहाङ आन ज्युह्मो ल्हाङ मुना। ओउतस्याउतोक बेलाहाङ सुइमा इताङ-उताङ वाङ्सा-पाह्य्सा झाक्तिमा खाइल।’
27 अनि ओउ धनि मान्ताइ तोआथय, ‘ओउतखेया, अब्राहाम आपा, ङाइ नाङकाय बिन्ति जाह्ङ्नेनाङ, लाजरसकाय ङाको आपाको किमहाङ ल्होक्सास्याउपा। 28धइतिदाह्य्सा ओहाङ ङाको पोङा पुःचोङ मुनय। ओउइ आल्ति ङाको पोङा पुःचोङलमकाय इहाङ दुख दोःओ जुदाकुरा छ्यान्ति दर्कपउ र ओउमय इ नरकहाङ वाङ्सा परलाम।’
29 तर अब्राहामइ तोआथय, ‘ओउमयकुस मोसा र अगमबक्तालमको कितापलम मुना, नाङको पुःचोङलमइ ओउसयले साइपानि।’
30 अनि धनि मान्ता त्याङा, ‘खेल अब्राहाम आपा, ओउच्युकइ ओउमयकाय दाह्थासल। तर कुनय सिओ मान्ता फेरि उह्ति च्योक्ति ओउमयकहाङ आल्ना त खेया, ओउमयइ ल-लयको पापकाय चिःति फेचानि खेतो।’
31 तर अब्राहामइ ओउकाय जवाफ बयाकान, ‘मोसा र अगमबक्तालमको कुरा साइमालोलमइखे सिओ मान्ता उह्ति च्योक्ति आल्याकायमा बिस्वास जाह्ङ्निलि।’”
© 2024 (Active), Mother Tongue Translators Society and Wycliffe Bible Translators, Inc. All rights reserved.