लुका 20
20
येसुको अधिकारको बारेहाङ प्रस्न
(मति २१:२३-२७; मर्कुस ११:२७-३३)
1यात दिन परमेस्वरको मन्दिरहाङ येसुइ मान्तालमकाय स्यान्सास्याउधय खेतो, र ओउमयकाय परमेस्वरको पेओ खबर प्रचार जाह्ङ्सास्याउधय खेतो। मुख्य पुजारिलम, धर्मगुरुलम र अरु पाको अगुवालम येसुकहाङ वाङाकाय। 2अनि ओउमयइ येसुकाय ह्वताकानि, “निकाय तोताङि, नाङइ गाहाङसय अधिकार दोःति इ जुदा कामलम जाह्ङ्तेनउ? अथबा इ अधिकार नाङकाय सुइ बइतेआ?”
3येसुइ ओउमयकाय जवाफ बइसास्यावा, “ङाइमा निङकाय यातज्यो कुरा ह्वत्नेनाङ्स, ङाकाय जवाफ बइनाङ्स, 4बप्तिस्मा बयो युहन्नाइ बप्तिस्मा बइसा अधिकार लाङकासय दोःआ या मान्ताकसय?”
5ओउमय लयमय नोकाइसा फाःङाकानि, “द्याह निइ दोह तोनि? यदि निइ ‘लाङकासय’ त तोयाकाय, ‘निङइ धइति युहन्नाकाय बिस्वास जाह्ङ्तेनिलि?’ त दाह्य्ति येसुइ तोनातहि। 6तर यदि निइ ‘मान्ताकसय’ त तोयाकाय, इ जुदा मान्तालमइ निकाय बाङइ आप्नातहि, धइतिदाह्य्सा युहन्ना अगमबक्ता खेना त दाह्य्ति ओउमयइ बिस्वास जाह्ङ्नानि।” 7ओउतझ्यान्ते ओउमयइ येसुकाय तोआकानि, “युहन्नाइ ओउ बप्तिस्मा बइसा अधिकार गाहाङसय दोःआ निइ चिःङसुलु।”
8अनि येसुइ ओउमयकाय तोसास्यावा, “ओउतखेया ङाइ गाहाङसय अधिकार दोःति इ जुदा काम जाह्ङ्धय मुनाङ, ङाइमा निङकाय तोनेङसल।”
धाक्सिराङ मेःनो मोहिलमको ल्हाकराय
(मति २१:३३-४६; मर्कुस १२:१-१२)
9अनि येसुइ इ ल्हाकराय तोसास्यावा— “कुनय यातचाक मान्ताइ लयको राङहाङ धाक्सिको बोतलम सुकाकान र केहि मोहिलमकाय राङ मेःन्सा जिम्मा बयाकान। अनि ओउ लयखे नाःतो दिनको लागि परदेस आला।#यस ५:१ 10जब धाक्सिको साय मिनो समय दाहा, ओउइ यातचाक नोकरकाय लयको भाक लेःलाङ ल्होकाकान। तर ओउ मोहिलमइ ओउकाय घानाकानि र दोहमा बइमात द्याःन्ति ल्होकाकानि। 11ओउतझ्यान्ते ओउइ अर्को नोकरकाय ल्होकाकान, तर मोहिलमइ ओउकायमा घानाकानि र रास्सितो जाह्ङ्ति दोहमा बइमात द्याःन्ति ल्होकाकानि। 12अनि ओउ मान्ताइ सुमम् खेपहाङ अर्को यातचाक नोकरकाय ल्होकाकान। ओउ नोकरकायमा मोहिलमइ चा स्याउतो घानाक्तिको धाक्सिराङ बाहिर तातिवायाकानि। 13अनि धाक्सिराङको मालिक दाह्या, ‘द्याह ङाइ दोह हाइचाङ? ङाइ लयको राप्तो चोःकाय ल्होक्नाङ। ओउमयइ पक्कामा ङाको चोःकायपाय मान जाह्ङ्चानि!’ 14तर जब धाक्सिराङको मालिकको चोःकाय मोहिलमइ च्यवाकानि, ओउमय लयमय नोःकायाकाय, ‘ओउपाय धाक्सिराङको मालिकको चोः खेना। निइ ओउकाय सात्नि र ओउको सम्पति निको स्याउलेना!’ 15ओउतझ्यान्ते ओउमयइ धाक्सिराङको मालिकको चोःकाय धाक्सिराङसय बाहिर आःल्ति साताकानि।”
येसुइ ह्वत्सास्यावा, “द्याह ओउ धाक्सिराङको मालिकइ ओउ मोहिलमकाय दोह हाइचउ त? 16ङाइ निङकाय तोनेनाङ्स, मालिक वाङ्ति ओउ मोहिलमकाय सात्नउ र लयको राङ अरु मोहिलमकाय मेःन्सा बइनउ।”
जब येसुको कुरा साइतिमुओ मान्तालमइ ओउ कुरा सायाकानि, ओउमय एत दाह्याकाय, “ओउतपाय गलमा स्याउजेलाम।”
17तर येसुइ ओउमयकाय योति तोसास्यावा, “ओउतखेया धर्मसास्त्रहाङ लेखओ इ कुराको माने दोह खेना त?
‘दकर्मिलमइ काम लागल त दाह्य्ति इन्कार जाह्ङो बाङले,
किम जाह्ङ्धार्ना कुनाको मुख्य बाङ स्याउलाङ वाङा।’ #
भजन ११८:२२
18 ओउ बाङहाङ ग्लेओलम जुदाले पात्याहार्या त स्याउनय, अनि सुखेकहाङ ओउ बाङ ग्लेना, ओउखे बाङइ दाह्न्ति धाह्न् स्याउतो न्यालेना।” #
मति २१:४४
19धर्मगुरु र मुख्य पुजारिलमइ इ ल्हाकराय लयमयको बिरोतहाङ तोओ त चिःति ओउबेलाहाङले येसुकाय चुम्सा बिचार जाह्ङाकानि, तर ओउमय मान्तालमकाय रयाकाय।
तिरो बयो बारेहाङ प्रस्न
(मति २२:१५-२२; मर्कुस १२:१३-१७)
20ओउतझ्यान्ते ओउमयइ येसुकाय पेतोकुस चिवाइति योधयमुओ खेइतो। ओउमयइ केहि सुराकि मान्तालमकाय येसुकहाङ पेओ मःन्ति दोङ प्रस्न ह्वत्लाङ ल्होकाकानि। येसुइ केहि कुरा पेमातो नोयाकाय सुराकिलमइ दुक्तो जाह्ङ्नाथय त ओउमय म्हरितो। ओउतस्याउधार्ना ओउमयइ येसुकाय रोमि ताह्ङो हाकिमिको जिःङ र अधिकारहाङ सुम्पति बइचानि खेतो। 21ओउतझ्यान्ते ओउ सुराकि मान्तालमइ येसुकाय ह्वताकानि, “अ गुरु, निइ चिःनाङ्सु, नाङ सत्य नोःसास्याउना र पेतो स्यान्सास्याउना। निइ चिःनाङ्सु, नाङइ जुदा मान्तालमकाय यातय खालको बेबहार जाह्ङ्सास्याउना र नाङइ मान्तालम गतहाइति याको परमेस्वर चाहसास्याउना त दाह्यो सत्य कुरा स्यान्सास्याउना। 22ओउतझ्यान्ते दाह्य्सास्याउपा, दोह निको नेम-कानुन अनुसार रोम देसको माहाराजाकाय तिरो बइसा पेतो स्याउना या, स्याउल या?”
23तर येसुइ ओउमयको ल्हुङतुकको दुस्त कुरा चिःति तोसास्यावा, 24“ङाकाय रोमि चान्दिको यातज्यो ध्याक छ्यान्नाङ्स। इहाङ सुको अङ्सि र मय्ङ मुना?”
ओउमय त्याङाकाय, “रोम देसको माहाराजाको।”
25अनि येसुइ ओउमयकाय तोसास्यावा, “ओउतखेया, दोह रोम देसको माहाराजाको खेना, ओउ रोम देसको माहाराजाकाय बइनु, र दोह परमेस्वरको खेना, ओउ परमेस्वरकायले बइनु।”
26ओउ सुराकिलमइ मान्तालमको ङ्हा येसुइ तोसास्यावो कुरालमहाङ येसुकाय फसाउसा खाइनिलि, र येसुको जवाफहाङ ग्याह्ङ्ति ङइमात मुआकाय।
सिओसय उह्ति च्योकोको बारेहाङ प्रस्न
(मति २२:२३-३३; मर्कुस १२:१८-२७)
27ओहाङसयको केहि सदुकिलम येसुकहाङ वाङाकाय। (सदुकि त तोओ धार्मिक समुहको मान्तालमइखे मान्ता सिआपछि फेरि उह्ति च्योक्ना त दाह्यो कुराहाङ बिस्वास जाह्ङाक्निलि खेतो।) 28ओउमयइ येसुकाय ह्वताकानि, “गुरु, मोसाइ निकाय लेखतिबयो नेम-कानुन अनुसार, ‘यदि यातचाक गोय्चो मान्ताइ बिह्या जाह्ङ्नउ, तर चोः नाःमातले सिना त खेया, ओउ पुःको लागि सन्तान स्याउपा त दाह्य्ति ओउको हउइ ओउ राङ्गि पुः कमाकुस बिह्या जाह्ङ्साले परना।’#बेब २५:५-६ 29यात समय यातज्यो माचरहाङ सात पुःचोङ खेइतो। जेथाइ बिह्या जाह्ङाकान, तर ओउ चोः चोःद्याङ नाःमाखाले सिआ। 30ओउतले माइला हउइ ओउ राङ्गि पुः कमाकुस बिह्या जाह्ङाकान, तर ओउमा सन्तान नाःमाखाले सिआ। 31अनि साइला हउइमा ओउ राङ्गि पुः कमाकुस बिह्या जाह्ङाकान, ओउकायमा ओउतले स्यावा। र ओउतले सात पुःचोङइमा पालोकुसिले ओउ मोम्चोकुस बिह्या जाह्ङाकानि, तर जुदाले सन्तान नाःमाखाले सिआकाय। 32अनि जुदासय लोन्हे ओउ मोम्चोमा सिआ। 33जब परमेस्वरइ मान्तालमकाय सिओसय उह्ति च्योक्ताक्सास्याउना, ओउबेलाहाङ ओउ मोम्चोखे सुको माचा स्याउना? धइतिदाह्य्सा ओउ मोम्चोकुसपाय सात पुःचोङइले बिह्या जाह्ङो खेइतो।”
34येसुइ ओउमयकाय जवाफ बइसास्यावा, “इ ल्हाउदयबाङहाङ मुओ मान्तालमइ बिह्या जाह्ङ्नानि र जाह्ङ्ति बइनानि। 35तर सिओसय उह्ति लाङका पाह्य्साको लागि ज्योओ मान्तालमइखे न बिह्या जाह्ङ्नानि, न बिह्या जाह्ङ्ति बइनानि। 36अनि ओउमय फेरि गलमा सिइलि, धइतिदाह्य्सा ओउमय लाङकादुतलम लेखा स्याउलेनय। ओउमय परमेस्वरको सन्तान खेनय, धइतिदाह्य्सा ओउमय सिओसय उह्ति च्योकाकाय। 37तर ल्युङ्तिमुओ झ्युरको बारेहाङ लेखधार्ना, मान्तालम सिओसय उह्ति च्योक्लेनय त दाह्य्ति मोसाइ पेतोकुसि प्रमान बयो मुना। धइतिदाह्य्सा मोसाइ प्रभु परमेस्वरकाय ‘अब्राहामको परमेस्वर, इसाकको परमेस्वर, र याकुबको परमेस्वर’#प्रस ३:६ त दाह्य्ति तोआकान। 38परमेस्वरपाय सिओ मान्तालमको खेल, तर जिउदो मान्तालमको परमेस्वर खेसास्याउना। धइतिदाह्य्सा जुदा मान्तालम परमेस्वरको लागिले स्याक्ति मुनय।”
39अनि केहि धर्मगुरुलमइ येसुकाय तोआकानि, “गुरु, नाङइ पेओ जवाफ बइसास्यावा।” 40ओहाङसयको ओउमयइ येसुकाय अरु नाःतो प्रस्न ह्वत्सा आतनिलि।
ख्रिस्तको बारेहाङ प्रस्न
(मति २२:४१-४६; मर्कुस १२:३५-३७क)
41अनि येसुइ ओउमयकाय ह्वत्सास्यावा, “मान्तालमइ मुक्ति बइसास्यावो ख्रिस्तकाय गतहाइति राजा दाउदको सन्तान त तोसा खाइनानि? 42धइतिदाह्य्सा भजनसङ्ग्रहको कितापहाङ राजा दाउद लयइले ख्रिस्तको बारेहाङ एतदाह्य्ति लेखआकान,
‘प्रभु परमेस्वरइ ङाको प्रभुकाय तोसास्यावा—
“ङाको ङोइसय # २०:४२ ङोइसय यहुदि रितिथिति अनुसार राजाको ङोइसयको थाउखे लोन्हेको राजा स्याउसाको लागि ज्योओ मान्ताकाय ताह्ङ्तो मान-सम्मान र अधिकारकुसि मुसाकाय गमो थाउ खेना (मति २२:४४; मर्कुस १२:३६; खबरदुत २:३४)। च्युःङ,
43 जबसम्म ङाइ नाङको बइरिलमकाय नाङको दोमपाकताले गम्ङल।”’ #
भजन ११०:१
44 राजा दाउद लयइले ख्रिस्तकाय ‘प्रभु’ त तोनउ त खेया, ख्रिस्त गतहाइति राजा दाउदको सन्तान स्याउसा खाइनउ?”
येसुइ लयको चेलालमकाय धर्मगुरुलमको बारेहाङ दर्कसास्यावो
(मति २३:१-३६; मर्कुस १२:३७ख-४०; लुका ११:३७-५४)
45अनि जुदा मान्तालमइ साइति मुतोकहाङ येसुइ लयको चेलालमकाय तोसास्यावा, 46“धर्मगुरुलमकसय होसियार स्याउति मुन। ओउमयपाय ब्रावो नाय लावति मान्तालमको वरिपरि घुमसा झाक्नय, र बजारको चोकलमहाङ मान्तालमइ लयकाय मान जाह्ङ्ति सेवपाताङ त म्हर्नय। अनि ओउमय सभाकिमलम र भोसलमको सम्मानित र मुख्य थाउहाङ च्युःङ्सा झाक्नय। 47ओउमयइ राङ्गि मोम्चोलमको किमलम लाति आःल्नानि, तर लयकाय धार्मिक मान्ता त दाह्य्ति छ्यान्साको लागि ज्याःङ्तो प्राथना जाह्ङ्नानि। इ कारनइ जाह्ङ्धार्ना परमेस्वरइ अरु मान्तालमकाय भन्दा ओउमयकाय माहा पेमातो दन्द बइसास्याउना।”
© 2024 (Active), Mother Tongue Translators Society and Wycliffe Bible Translators, Inc. All rights reserved.