Kulawa 8
8
Hukumu ya piri: wamarambi
1Nakisa Mola kamwambira Musa, kaamba: “Úka ka Firyauna ukamwambire: ‘Mola kâamba javi: Wase wanu wangu woke, ipate wakanábudu. 2Fala ukiwakatáza kuka, ona, omi níwapereka wamarambi, níhukumu inti yako piya. 3Mmuto wa Nilu-mu wálawa wamarambi wengi wawenye, wákwera ngulu wakwingira nnyumba mwako, kukati kwako, pakinanda pako, pamoja na mmanyumba mwa watumisi wako na mwa wanu wako, mpaka forunu zako na gamela zako zakukandira ufu. 4Wamarambi-wo wákukwera uwe-po na wanu wako pamoja na watumisi wako piya.’ ” 5Ikisa tena, Mola kamwámbira Musa javi: “Mwambire Aruna kuwa ngombo yake olosere upande wa kumyuto, mifereji na matanda, ipate wamarambi walawire kunja kuno inti ya Miswiri.”
6Aruna ngombo yake ire akoloséra kila upande uwere maji Miswiri, mmaji mure wakilawa wamarambi, wakitánti inti ire piya. 7Fala wasawi kwa mitigadi yawo watenda novire, wawalavya wamarambi muinti ya Miswiri ire.
8Basi, Firyauna akiweta Musa na Aruna, akiwambira akamba: “Nlebeleni Mola awalavye wamarambi-wa kumaso kwangu pamoja na wanu wangu, nomi níwasa wanu waIziraeli wakuka kuntendera kafara Mola.” 9Musa akinjibu Firyauna: “Tafadali nambire, rini pausaka nukulebelele duwa uwe, watumisi wako pamoja na wanu wako, ipate wakulawe wamarambi uwe na walawe mmanyumba mwako nfululu, wabaki mmuto wa Nilu basi?” 10Firyauna akamba: “Makeso!”
Musa akimwambira: “Iwe novyo kamba vyawamba-vyo, ipate wijiwe kuwa aapo tena mwengine wakumpunda Mola, Nlungu wetu. 11Wamarambi-wo wákulawa uwe na mmanyumba mwako, wáwalawa watumisi wako pamoja na wanu wako. Wábaki mmuto wa Nilu tu basi.” 12Ikisa Musa na Aruna wakilawa nnyumba mwa Firyauna, na Musa akinlalamikíra Mola kuhusu wamarambi, kamba vyawasikizane na Firyauna. 13Mola katenda kamba vyaanlebele Musa. Wamarambi wákiwa mmanyumba, mmaluwani pamoja na mmamasamba ware wakífwa. 14Wanu wakiwakusánya visungu-visungu, muinti mure piya mukinúwa kituti pé.
15Fala Firyauna, paariwónire kunusurika, kazidi ubishi, aatendire caambíriwe na Musa pamoja na Aruna, kamba Mola vyaâsemire.
Hukumu ya tatu: bwilimwiti
16Tena, Mola wetu kamwambira Musa: “Mwambire Aruna kuwa ngombo yake-yo olosere, ebiye pansi pú, ipate vunvu-ro ritaduke bwilimwiti inti piya ya Miswiri.” 17Ewo watenda novire. Aruna akolosa nkono wake na ngombo ire, akibíya nsanga ure pú, zikílawa sawa zikánza kuwaluma wanu na manyama. Vunvu piya ra inti piya ya Miswiri ire rikitenda sawa. 18Wasawi kwa mitigadi yawo, newo novyo wakenékeza kulavya sawa zire, fala awakidirire. Sawa zire zikizídi kuwaluma wanu pamoja na manyama. 19Basi, wasawi ware wamwambira Firyauna: “Eyi kudura ya Nlungu!” Fala Firyauna ndi paakizidi kuwa mbishi, aawasikirize kamba vyaâsemire Mola.
Hukumu ya ane: membe
20Nakisa, Mola kamwambira Musa, kaamba: “Pwesera subuu namapema úke ka Firyauna, wakati wóoka kumuto, umwambire kuwa Mola kakutúma umwambire: ‘Wase wanu wangu walawe ipate wanabudu. 21Ukitówa kuwasa, núkuhukumu na membe za sumu, zukwandibu uwe, watumisi wako, wanu wako, pamoja na mmanyumba mwako piya. Manyumba a waMiswiri zikuja membe za sumu kamba mawingu, na pansi piya pawekala zikwijala tapa-tapa. 22Fala noyo suku-yo níkengera inti ya Gosheni kawainshi wanu wangu. Eko aziwepo membe za sumu. Javyo ndi pausaka kwijiwa kuwa omi ndi Mola nínang'ániza ezi inti-zi piya. 23Nitula kusiyana kati ya wanu wangu na wanu wako. Noyo balayi-yo íkuna makeso.’ ” 24Kweli, Mola akitenda novire. Wingu rikulu ra membe za sumu rikingíra nnyumba mwa Firyauna, mmanyumba mwa watumisi wake. Inti ya Miswiri piya ikidangúka na makundi a membe za sumu zire.
25Basi nopo, Firyauna akimwíta Musa na Aruna, akiwambíra: “Úkani mukantendere kafara Nlungu wenu, fala musilawe muinti-mu.” 26Akilawa Musa akijibu: “Avitájibu kutenda javyo, konta kafara ya nyama yatisaka kuntendera Mola Mwenyezimungu wetu, waMiswiri íwakima. Ikíwa tíntendera Mola kafara iwakíma ewo kumaso kwawo, awaja kutuulaya na mawe? 27Tijuzi tuke kulanga rakuwa tikwenenda muda wa suku natu, ipate tikantendere kafara Mola Mwenyezimungu wetu kamba vyaâtamurire.” 28Basi Firyauna akámba: “Núkwasani mukuka kulanga mukantendere kafara Mola Mwenyezimungu wenu. Fala musuke baidi pakulu. Nomi novyo mukanilebélele.” 29Musa akijibu: “Ona, nikiláwa epa, nínlebela Mola kuwa makeso makundi a membe za sumu-zi zukutánuke uwe, watumisi wako pamoja na wanu wako. Falakini uwe usikenékeze kutitenvya, ipate usitase ofwe kulawa kuka kuntendera kafara Mola.” 30Kwa javyo, Musa akilawa nnyumba mwa Firyauna, akinlebela Mola. 31Na Mola akitenda kamba vyaalebeliwe na Musa. Membe za sumu zikintanuka Firyauna, watumisi wake pamoja na wanu wake, aâbakire membe anta mmoja. 32Fala mara nyengine tena, Firyauna akizídi kuwa mbishi, aawasíre waIziraeli kulawa.
Currently Selected:
Kulawa 8: wmwBI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.