Kulawa 9
9
Hukumu ya tanu: kufwa mifuwo
1Nakisa, Mola kamwambira Musa: “Úka ukamwambire Firyauna javi: ‘Mola, Nlungu wa Waebraniya kaamba javi: Wase wanu wangu woke, ipate wakanábudu. 2Ukitówa kuwasa kuka, ukizídi kuwakataza, 3ona, hukumu yangu omi Mola ígwirira kumifuwo yenu piya. Wakufwa makavalu, maburu, ngamiya, ng'ombe, mbuzi, pamoja na makondoo. 4Fala Mola akuja kutula kusiyana kati ya mifuwo ya waIziraeli na mifuwo ya waMiswiri, ipate asifwe anta nyama mmoja wa waIziraeli.’ ” 5Mola akitúla muda, akámba: “Makeso, omi Mola nítimiza kauli yangu kuhusu eyi inti-yi.”
6Pakucere, Mola akitenda novire. Mifuwo piya ya waMiswiri ikífwa, fala aafwire anta nyama mmoja wa waIziraeli. 7Firyauna akitumiza kudairi mifuwo ya waIziraeli, akambiríwa kuwa aafwire anta nyama mmoja. We! Fala novyo-sivyo akizídi ubishi na aawasire waIziraeli kulawa.
Hukumu ya sita: vijaraa vya mapote
8Nakisa, Mola kamwambira Musa na Aruna: “Asone rivu ra nforunu mojawapo, ikisa atware Musa atawanyire julu, kumaso ka Firyauna. 9Rivu-ro rítaduka vunvu repepe, rikwenera piya inti ya Miswiri, na ríwalavizira vijaraa vya mapote piya wanu pamoja na manyama wa Miswiri.”
10Kwa javyo, wakisona rivu ra nforunu rire, wakúka ka Firyauna. Nokurekure, Musa akitawanyíra julu rivu rire. Basi, wanu piya pamoja na manyama vikiwalawa vijaraa vya mapote mmwiri. 11Wasawi awajire ka Musa, konta ewo pamoja na waMiswiri piya vîwalawa vijaraa. 12Fala Mola akintenda Firyauna kuzidi ubishi, aawasikirize, kamba Musa vyaambiriwe na Mola.
Hukumu ya saba: nvula ya mawe
13Nakisa, Mola kamwambira Musa: “Pwesera subuu namapema, uke ukamwambire Firyauna: ‘Mola, Nlungu wa Maebraniya kaamba javi: Wase wanu wangu woke, ipate wakanabudu. 14Eyi mara-yi, núkuhukumu uwe-po mwanyewe, watumisi wako pamoja na wanu wako, ipate wijiwe kuwa mulumwengu-mu aapo mwengine wakunipunda omi mwanyewe. 15Kamana nanga nukolosera nkono wangu, kukuhukumu na maradi uwe-po na wanu wako, wakati-wu samupo mulumwengu-mu. 16Fala nukwasa kuinshi ipate nukolotere uwezo wangu, zina rangu risifiwe ulumwengu-wu piya. 17Fala uwe kwankuzidi kuridãi kubishana na wanu wangu, auwasa kulawa. 18Ona! Makeso nowu wakati-wu, nípereka nvula ulu ya mawe, sainalawirira tangu inti ya Miswiri-yi. 19Ndi ntamana tumiza kulavya mifuwo yako na piya cauri nawo conse masamba-ko, konta nvula isáka kunya-yo iwolaya wanu sawari mmanyumba onse na mifuwo sairi nvitundu ikufwa.’ ”
20Watumisi wa Firyauna wopire usemi wa Mola ure, wawatwala watwana wawo na mifuwo yawo wawatula nnyumba. 21Fala wengine sauwayerire usemi wa Mola ure, watwana wawo pamoja na mifuwo yawo wawasa mmasamba nomure. 22Ikisa Mola kamwambira Musa javi: “Lamusa nkono wako-wo julu, ipate inti ya Miswiri inye nvula ya mawe, iwanyere wanu na manyama mpaka miti ya mamasamba inti ya Miswiri.” 23Musa akilamusa julu ngombo wake, na Mola akipereka kudidima na kumesa, na moto ukigwíra pansi. Mola akinyésa nvula ya mawe inti ya Miswiri. 24Basi, ikínya nvula nyingi ya mawe na kúkimesa nfululu-moja me-me-me. Na inti ya Miswiri ire piya awerepo wa kwereza kuwa mwanaínya nvula ya mawe kamba ire. 25Nvula ya mawe ire idangúla inti ya Miswiri, piya cíkiwa mmasamba conse: wanu, manyama, kila miti, pamoja na mbeyu íkivunjika-vunjikanga. 26Ila inti ya Gosheni, kawákikalanga waIziraeli, ainyere nvula ya mawe.
27Basi, Firyauna akitumíza kuweta Musa na Aruna, akiwambíra: “Eyi mara-yi nikola dambi. Mola ndi wa kweli. Omi na wanu wangu ndi tiri na makosa. 28Nlebeleni Mola! Konta kudidima nokuno-kuno basi na nvula ya mawe kali-yi initósha! Omi nukwasani kulawa, kuno amwikala tena.” 29Musa akijibu: “Nikilawa nkaya-mu, nílamusa makono angu nínlebela Mola. Kudidima-ku kunyamala, na ainya tena nvula ya mawe, ipate wijiwe kuwa ulumwengu-wu wa Mola. 30Fala kuhusu uwe na watumisi wako, nukwijiwa kuwa amunamba kumopa Mola Mwenyezimungu.” 31(Linyu na sevada piya vyaaribika, konta sevada yânza futi faida, na linyu yânza maluwa. 32Fala tirigu na ntama avyaribike anta aba, konta víkiwa savinakomala.) 33Basi, Musa akilawa nkaya mure akimwasa Firyauna, akilamusa makono akilebela duwa ka Mola. Kwa mpunde noure, kudidima na nvula ya mawe ire vikinyamala ndũ. Nvula ainyere tena pansi. 34Fala Firyauna paawonire nvula, nvula ya mawe, pamoja na kudidima kure kunyamala, iye pamoja na watumisi wake akanza tena kukola dambi na kuwa mbishi. 35Basi Firyauna, julu ya ugumu wa moyo wake, akizídi ubishi. Aawasire waIziraeli kulawa, kamba Mola vyaâmwambire Musa.
Currently Selected:
Kulawa 9: wmwBI
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.