JOHN 3
3
Jesu Nai Nicodemus
1Jehudi maigu jupao khat pazanniu Nicodemus chiu kubo, Pharisee mai khat bamme. 2Naikhat nchun paniu Jesu khuga wanglujiu din-e, “Rabbi yo, nangra Tingwang niu langwangbo katipao khatle chiubo aliuniu si-e; palamra Tingwang niu patu maluang khaibi maksai nangniu kamkhaibo tasibodung hai kamlu lakge.”
3Jesu niu paokakge, “Iniu nakhuga pachang paling dinbo-e, mai khatniu mana kasan#3.3: mana kasan lanbo: mana kasan lanbo chiubo hai Greek ladga kaku lamsu manabo tu-e. lanlu maksai Tingwang gu Chawangdihga ngutlu lakge.”
4Nicodemus niu maniu-e, “Dechiujiu katingmai khatniu mana kasan lanlu ralo? Paniu wadao khatdi papui wonlungga ngutlan silakge, sichiujiu mana lonnia lulakge.”
5Jesu niu paokakge, “Iniu nakhuga pachang paling dinbo-e, mai khatniu tadui nai Hiupuina gasu mana kasanlu maksai, Tingwang gu Chawangdihga ngutsi lakge. 6Chamai gasu manabose chamai-e, chiudi hiupuina gasu manabose Hiupuina-e. 7Nang mana kasanlan rabo-e chiujiu Iniu dinboga nasuang hami mane. 8Tingkai#3.8: Greek ladga Tingkai nai Hiupuina hai nchamme. siniu hunkhai nibo lam hunkhai-e, sise nangniu pakhuan ronna chiu-e, chiudi sise delam suniu, delam hunkhai bamlo chiubo nang simakge. Hiupuina gasu mana lumai hinadi sikumbo-e.”
9Nicodemus niu maniu-e, “Haise dechiujiu padngam ralo?”
10Jesu niu paokakge, “Nangra Israel maigu katipao kadibo khatle, chiudi haise nang simak jiuma? 11Iniu nakhuga pachang paling dinbo-e: Aliura kasibo dinbo-e, khatdi ngao lubose dinbo-e. Chiudi aliugu champao haitu naliuniu lukhaini makge. 12Haibo kadihgu lamga Iniu dinboga naliuniu atu malum maksai, Iniu tinggen lamga dinsai dechiujiu naliuniu malumlu ralo? 13Khatdi tinggen lamsu kiubo Nahpiuse makjiu mai khatdi tinggen lam khang makge.”
14 #
Par 21.9. Mose niu ramjingga tanaaginiu kambo kaniutu jumaseng khai mibo kumjiu Chamai Nahpiu tudi jumaseng surabo-e. 15Sichiujiu patu malummai hina tingtheng ringbo ngao lune. 16Palamra Tingwang niu kadihpiri haitu haijiukha kungbo donniu panah pumlibo situ pikhai bide, sichiujiu patu malum lumai hina shaimakjiu tingtheng karingbo daolura leng-e. 17Palamra Tingwang niu Nahpiu situ kadihpiri haitu ladjan thiura langkhaibo makge, chiudi haisitu rankhai raleng-e.
18Mai khatniu Nahpiu situ malum lusai patu ladjan thiu lakge, chiudi mai khatniu patu malum maksai ladjan thiuloi mibo-e, palamra paniu Tingwang Nahpiu pumlibo situ malum makbo donniu-e. 19Haichiujiu ladjan thiu rabo-e. sisera kabenbo siniu kadihpiriga wang-e chiudi maidung siniu kabenbotu suang tamiubo situ masenne, palamra paliu tienkamse kasabo donniu-e. 20Mai khatniu kasabo tien kamsai paniu kabenbo situ mareng mibo-e, palamra pagu tienkam kasabose madu padni makge. 21Chiudi kamajibo kam maidung siniu kabenboga wang-e, sichiujiu kabenbo siniu pagu tienkamse Tingwang kadin piubo-e chiubo madulen raleng-e.
Jesu Nai John
22Haibo sai, Jesu niu pakhommaidungtu puilujiu Judaea ramlungga tadde, siga paniu paliutu maluang bam khaide, khatdi tadui nphum khaide. 23John di Salim gasu diumakbo Aenon kubo bamga tadui nphum khaijiu bamme, palamra siga tadui kengbamme. Maidung siniu pakhuga wang karenjiu bamme, sichiujiu paniu paliutu tadui nphum khai-e. 24#Mt 14.3; Mk 6.17; Lk 3.19,20.(Haise John tu kavangkyga khai makhabo suang-e).
25Jehudimai khangsianiu John gu pakhommaidung khuga tacheng saisuijiu kam masanbo lamga arijiu bamme. 26Sijengniu paliuniu John khuga tadlujiu haichiu din-e, “Katipao yo, nangdi maningtao bamdi sui-e, chiubora Jordan gu tingbanglam nangniu dinkhai mibo piuse, tuhoira padi tadui nphum khaijiu bamme, sichiujiu mai hina pasai sui mide!”
27John niu paokakge, “Tingwang niu patu pikhaibi maksai mai khatniudi kam ngam lakge. 28#Jn 1.20.Naliu pumsiakniu agu jengdin thiu bambo-e, chiubora ‘Ira Messiah se makge chiudi pamasuangga atu langkhaibo-e.’ 29Naopaopuise naopaopiu leng-e chiudi naopaopiu kahmaidung pamungga chap bammai siniu, naopaopiu khuan chiuboga paliu chun wi-e. Haichiujiu agu chunwibo hai wiphu lubui-e. 30Ira nkhin kiubi-bi mine,chiudi para nkiukhangbi-bi rabo-e.”
Tinggen Lamsu Wangbo
31Tinggen lamsu wangbo piuse mathiu suang di-nkiu-e, kadihpiriga lungmai hinase kadih gu-e, khatdi kadihpiri lamga dinbo-e; chiudi tinggen lamsu wangbo para mathiu suang nkiubo-e. 32Para ngaolubo nai chiulubose dinbo-e, chiudi pachamse mai khatniudi lukhai makge. 33Sichiudi pacham lukhai mai hinaniu Tingwang ra majibo-e chiujiu lukhaibo-e. 34Tingwang niu langkhaibo paniu Tingwang ladkengse dinbo-e, palamra Tingwang niu pagu Hiupuina kaphuibose paleng pikhai-e. 35#Mt 11.27; Lk 10.22.Papiuniu Nahpiu situ lungsabo jengniu pumtan hinase paleng pikhai bibo-e. 36Mai khatniu Nahpiutu malum lusai tingtheng karingbo daolune; mai khatniu Nahpiutu malum maksai tingtheng karingbose daolakge, chiudi Tingwang gu sajai hangga bamme.
Currently Selected:
JOHN 3: LIANBSI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.