Mataio 6
6
Ḡahugoꞌi
1Ḡianoꞌi, zaꞌe vazeꞌa ḡianoga veize vaze zamao haḡai manoḡa ago haḡaoꞌi, mazaḡa zae Moze adureo naeḡa mene ziniꞌuma. 2Eꞌanoꞌo ḡau ꞌahoga zahara vazeḡa haune, zama guhi azaḡa teige ago hirihiroꞌi. Zama guhi azaḡaꞌe vazeꞌa niguzoga veize nuꞌonuꞌo neḡano zu ibio haḡae fureneꞌohe. E hube hune ziꞌohe, zeꞌe naeze niduꞌa mae hauḡeha. 3Ḡau ꞌahoga zahara vazeḡa haune, zae nabudi uhiḡa vazeḡa zu ago ihonoꞌi.#6.3 Girikio, edae evoreḡoꞌa haḡaeꞌetaꞌaꞌe kauri evoreḡoꞌe aḡuꞌa teige, hanoꞌi. 4Vaze ꞌahoganiꞌa mene ederoga veize sifu kaḡuso hanoꞌi. ꞌOugine, Mozeꞌa zaꞌa sifu haḡateꞌe haḡaiḡa horonadu naeḡa ziniꞌuma.
Zuhiꞌa Boro Kuru
(Luke 11:2-4)
5Zaꞌe kuranoꞌidene, zama guhi azaḡa teige ago kuranoꞌi. Mazaḡa zeꞌe vazeꞌa horozoga veize nuꞌonuꞌo neḡano zu ibi boro ḡenaḡano edauꞌenaꞌa, kuranoga urateꞌohe. E hube hune ziꞌohe, ze naeḡa niduꞌa mae hauḡiro. 6Zaꞌe kuranoꞌidene, bazuni habaꞌa diuḡadu ibiheta haranadu Moze, zaꞌa horonoga mene idaḡa raꞌetaꞌaꞌe, mazao kuranoꞌi. ꞌOugine, zaꞌa sifu haḡateꞌe haḡaiḡa Mozeꞌa horonadu naeḡa ziniꞌuma. 7Ebu za kuranoꞌidene, Badiꞌa aḡuꞌa azaḡa teige, huga oꞌoꞌa ḡoeꞌa hina ago barebare kuranoꞌi. Mazaḡa zeꞌe ḡoere ḡehaḡa hina kuraune, Badiꞌaꞌa igiꞌuma rae zamareꞌohe. 8Ze ago hegotoꞌi, mazaḡa Mozeꞌe zaeꞌa izima umidogano nagini urateꞌetaꞌaꞌe edeḡa.
9Eꞌanoꞌo ꞌahige kuranoꞌi:
Emeḡe Mama adureo,
eme umiꞌeꞌohe, vazeꞌa ḡae gubaꞌeꞌenaꞌa ḡa niḡoꞌe zaḡoḡa reꞌuma,
10ebu ḡaꞌa vaze niduꞌa ibitoziꞌuma,
ebu adureo ḡae uraꞌa hudauꞌeteꞌe teige, raha adao zuni hudaꞌuma.
11Izidi ogomuḡa rifeꞌenoꞌi,
12ebu emeḡeꞌa eme sausaufeꞌeteꞌe azaḡa zeḡe sauꞌa rae modeꞌeteꞌe teige, emeḡe sauꞌa zu rae modofoꞌi.
13Emeḡeꞌa haḡai sauꞌa haḡaihi rae reine, sauꞌano ago tutufoꞌi,
ebu Sataniꞌonoꞌo mae vaḡifoꞌi.#6.13 Fare mirihiroteꞌe nuꞌe raenaꞌa, 'Ḡaꞌa ibitoziniꞌeteꞌe ebu ḡae gigiꞌa zu agaḡaꞌe mada tuḡutuḡu onameꞌohe. Amen.'
14Zaeꞌa vaze sauꞌa rae modine, zae Moze, adureo radiuꞌeteꞌeꞌa, zae sauꞌa zuni rae modiꞌuma. 15Rehano zaeꞌa vaze sauꞌa mene rae modine, zae Mozeꞌa zuni zae sauꞌa mene rae modiꞌuma.
Zaḡozaḡeꞌeteꞌe Moneo
16Zaeꞌa zaḡozaḡoꞌidene, zama guhi azaḡa teige, ago vetuḡarau radoꞌi. Zeꞌe, vazeꞌa horozadu zeḡeꞌa zaḡozaḡeꞌeteꞌe ederoga veize, mene vireꞌohe zu iguze mene siꞌeꞌohe. E hube hune ziꞌohe, zeꞌe naeḡa niduꞌa mae hauḡiro. 17Rehano zaeꞌa zaḡozaḡoꞌidene, viradu iguze siꞌoꞌi. 18ꞌOugine, vazeꞌa zaꞌe zaḡozaḡeꞌeteꞌe mene ederiꞌuma. U zaꞌa horonoga mene idaḡa raꞌetaꞌaꞌe, Moze daꞌo ederiꞌuma. Ebu Mozeꞌa zaꞌa sifu haḡaateꞌe haḡaiḡa horonadu naeḡa ziniꞌuma.
Ḡauze Adureo Mae Nuꞌone Toꞌi
(Luke 11:34-36, 12:22-34, 16:13)
19Zae veize raha ꞌadao ḡau manomano ago nuꞌone toꞌi. Deꞌeaꞌe zuhiꞌa sausauneꞌohe zu atenarauꞌohe ebu ḡonoreꞌa varade diuḡadu ḡonotuꞌohe. 20Rehano zae veize ḡauze manomanoꞌe adureo nuꞌone toꞌi. Deꞌeaꞌ zuhiꞌa mene sausauneꞌohe zu mene atenarauꞌohe ebu ḡonoreꞌa varade diuḡadu mene ḡonotuꞌohe. 21Mazaḡa zaꞌa ḡauze manomano nouma tine, zamaroneze zu deꞌea tiꞌuma.
22Zae ubumaꞌe ahirize ihureḡa heuḡa. Ubumaze manoḡa reine, zae ahiri niduꞌaꞌe agaḡaniꞌa irivaꞌiꞌuma. 23Rehano zae ubumaꞌe sautaune, zae ahiri niduꞌaꞌe uzaboꞌa irivaꞌiꞌuma. Eꞌanoꞌo zae ahiri zamaḡano agaḡaꞌe uzaboraune, ahirize niduꞌaꞌe uzabo gigiꞌa reꞌuma!
24Vazeꞌe zuhiꞌa ꞌaheu veize gauoga mene idaḡa. ꞌOugine ani ꞌahogaꞌe zamariꞌuma, u ꞌahogaꞌe heꞌeheꞌeniꞌuma. Ebu ꞌahoga veize faine gauiꞌuma, u ꞌahogaꞌe turuniꞌuma. Eꞌe teige, zaꞌe Badiꞌa ebu moni, ꞌaheu veize gauoga mene idaḡa.
Ago Zamare Adudanoꞌi
(Luka 12:22-31)
25Eꞌanoꞌo e ziꞌohe. Zae ḡabone veize nagi ogomu aꞌuma ga nagini gagiꞌuma ebu ahirize veize nagi dabua vidiꞌuma rae ago zamare adudanoꞌi. Mazaḡa ḡabone zu ahiriꞌe ogomu zu dabua vitinoga. 26Hitanao rafiuꞌeteꞌe niniḡa ḡianoꞌi. Ze ezone mene ḡorauꞌohe, mene hiriveꞌohe, zu ogomuze godogo neḡano mene nuꞌone tiꞌohe. Rehano zae Moze, adureo radiuꞌeteꞌeꞌa, ḡubuzeꞌohe. Zaꞌe nini vitize huneꞌohe. 27Zae boꞌaḡano iniuꞌe zamare adudaune, ḡaboneꞌa tahiḡa nu faraꞌumahe? Mene.
28Za nougaꞌahi dabua uꞌano zamare aduduꞌohe? Butu kakaḡaꞌe nougenouge ḡuhureꞌeteꞌe ḡianoꞌi. Ze mene gaueꞌohe zu dabuaze mene turineꞌohe. 29Rehano e ziꞌohe, butu kakaḡa ꞌahogaꞌe maꞌora vazeḡa kini Solomonaꞌa haḡairoteꞌe dabuaḡa manomano vitinoga. 30Butu veḡaꞌe izidi ḡaboga, hena ohoḡoreꞌe vazeꞌa masinadu ireo hufi hauniꞌuma, rehano Badiꞌaꞌa faifaine manohuniꞌohe. Zaꞌe ve vitinoga ꞌahine, Badiꞌaꞌa hube hune dabua vidauziniꞌuma. Rehano zaꞌe Badiꞌa mazao fieꞌetaꞌaꞌe komeꞌa.
31Eꞌanoꞌo ago zamare adudanoꞌi, raenaꞌa, 'Nagini aꞌuma?', 'Nagini gagiꞌuma?' ga 'Nagi dabua vidaꞌuma?' 32Badiꞌa aḡuꞌa azaḡaniꞌa ꞌahiguḡa niduꞌa vaḡeꞌohe. Zae Moze, adureo radiuꞌetaꞌaꞌe, zaꞌa eꞌe ḡauḡa urateꞌetaꞌaꞌe edeḡa. 33Badiꞌaꞌa ibitoziniꞌeteꞌe zu urateꞌeteꞌe daꞌo gezo vaḡoꞌi. ꞌOugine eꞌe ḡauga niduꞌa zuni ziniꞌuma. 34Eꞌanoꞌo za ohoḡore veize ago zamare adudanoꞌi. Mazaḡa ohoḡore gauḡaꞌe ohoḡoruꞌu zamariꞌuma. Izidiꞌe izidi aduga daꞌo zamariꞌuma.
Currently Selected:
Mataio 6: KSJ
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Wycliffe Bible Translators, INC.