Jòvánì 17
17
Jézù ꞌdeke tí wó ji Mbíṛì tacó tí ndâ mbe tala có mì wó
1Jézù mâ giì cee ta bà ꞌdè ndâ có tí nò ji ndâ mbe tala có mì wó gî, yí giì zekeꞌo gí gbíṛì, bìndi yí giì ꞌdeke tí wó ji Mbíṛì, máa,
«O tí nò gì gî, Bu ye.
À má énò, tùbà tí ꞌViì mì lo tí mbe wotí ji ndâ ꞌduù,
tacó wàa, ꞌViì mì lo ꞌví tù ta bà tí lo tí mbe wotí ji ndâ ꞌduù.
2Wò kaa ndâ ꞌduù muu to tí nó ꞌdáá gî mí ꞌbì wó gî.
À má énò, si yí ꞌví je ꞌválá ŋìnó mbe cee lá nó
ji ndâ ꞌduù tí nò náa wò kaa ndú mí ꞌbì wó nò.
3Káa ṛè i mbe je ꞌválá tí nò mbe cee lá nò
a bà ŋò wò ni tí gbèe Mbíṛì dú,
giì je bà ŋò Jézù tí Bìndi lo tí Mbíṛì náa wò tuu yí nó ni .
4Ye tùbà wotí mì lo ji ndâ ꞌduù muu to tí nó
ta bà bàkà nèté tí nó náa wò táánò je ji ye nó, cee gî.
5Nògí, te duù Mítí ye kpónó, Bu ye.
Te duù mítí ye ta bà si ye ꞌví ki tí ye dèngècè ṛègbà tí lo
á go ŋìnó táánò mì ndà á kùṛo o bà suu to tí nó nô.
6Ye tùbà tí lo á ji ndâ ꞌduù tí nó náa wò ṛuka ndú ji ye
á ꞌdo gbí òkò tí ndâ ꞌduù á muu to tí nó nó gî.
Ndú táánò a ndâ ꞌduù mì lo,
bìndi wò giì kaa ndú ji ye,
káa ndú giì ꞌdi có mì lo gî.
7Ndú kpónó ŋò ni gî máa,
ndâ có tí nó ꞌdáá náa wò ꞌdè ji ye nó a ndâ có mì lo.
8Tacó ye ꞌdè ndi ndâ có tí nó náa
wò táánò ꞌdè ji ye nó ji ndú gî.
Ndú delè giì ùnje gî, máa,
à dú nò a ndâ có mbe co ꞌdo gbí nje lo.
Ndú delè giì ùnje gî, máa,
ye táánò gì dú ꞌdo ká mì lo.
Ndú delè kákáꞌi giì ùnje gî, máa,
à dú káa wò táánò ká tuu ye.
9Ye kpónó kû ꞌdeke tí ye ji wò nó a i tacó tí ndú.
Ye kû ꞌdeke tí ye ji wò me tacó tí ndâ ꞌduù muu to tí nó ꞌdáá gî lá.
Ye kû ꞌdeke tí ye ji wò a i tacó tí ndâ ꞌduù tí nó
náa wò táánò kaa ndú ji ye nô.
Tacó ndú a ndâ ꞌduù mì lo.
10Ndâ ꞌduù mì ye ꞌdáá gî a ndâ ꞌduù mì lo.
Ndâ ꞌduù mì lo ꞌdáá gî delè a ndâ ꞌduù mì ye.
Ye kû tùbà tí ye ji ndú a i ta ṛè lo.
11Tacó a ndú ká bà dù á muu to tí nô.
Ye kpónó kèjì gí mì lo.
Ye kpòò me ꞌduù ta ṛè muu to tí nó lá.
À má énò, kpolo tí ndâ ꞌduù mì lo
náa wò ṛuka ndú ji ye nó, ta ṛè mì lo,
tacó wàa, có mì ndú gbí òkò tí ndú ꞌví dù ká gbaànjé,
á go có mì ndà gbí òkò tí ndà, tó Bu ye.
12Ye táánò kpolo tí ndú si ze ta ndú bà gbèe to nó a i ta ṛè lo,
tí ꞌdóó ṛè lo tí nó náa wò táánò gbì mí muu ye nô.
Ye táánò kpolo tí ndú ꞌdáá gî tí kpoò.
ꞌDuù tí nó gbaànjé gbí òkò tí ndú mbe giṛiꞌo ꞌdo tí kèjì mì lo nó
giṛiꞌo ꞌdo ká gbí ꞌdóó vò muu mì wó,
á go có tí nó gbí wáràgà mì lo tí Mbíṛì nô.
13Ye kpónó kèjì gí mì lo,
à má énò, ye kû ꞌdè ndâ có tí nò ji ndâ ꞌduù tí nó
náa wò táánò ṛuka ndú ji ye muu to tí nó nó,
tacó wàa ŋa líkíꞌo tí nó tí ye nó ꞌví dù tí ndú delè.
14Ye ꞌdòkò có mì lo táánò náa wò ꞌdè ji ye nó ji ndú gî.
Tacó énò, ndâ ꞌduù muu to tí nó kpónó kû sogo ndú,
tacó ze ta ndú me ndâ ꞌduù mì ndâ ꞌduù muu to tí nó lá.
15Ye kû ꞌdeke tí ye ji wò me énó máa,
wò ꞌví kaa ndú ꞌdo muu to tí nó gî nò lá.
Gbí ndeṛè bà ꞌdeke tí ye ji wò énó máa,
wò ꞌví kpolo tí ndú ꞌdo tí Vò-ꞌduù-tí-nò
tí mbe kû eendi ndâ ꞌduù gítí vò i nô.
16Tacó ze kpónó ta ndú kákáꞌi me ndâ ꞌduù
mì ndâ ꞌduù muu to tí nó lá.
17Kaa ndú mò gítí kpokèjì mì yúcó,
tacó có mì lo a yúcó.
18Ye kû tuu ndú ta ndi muu to,
á go bà tuu ye mì lo á gí muu to tí nô.
19Ye kaa tí ye ji wò á tacó tí ndú,
tacó wàa ndú delè ꞌví kaa ta tí ndú ji wò
ta bà co tí kpokèjì mì yúcó.
20Káa ye kû ꞌdeke tí ye me ká tacó tí ndú cuki lá.
Ye kû ꞌdeke tí ye delè tacó tí ndâ ꞌduù ŋìnó
bà giì kaa tí ndú ji ye ꞌdo gbí có mì ndú nô.
21Ye kû ꞌdeke tí ye, máa,
có mì ndú ꞌví dù ka gbaànjé
á go có mì ndà, Bu ye;
có gbí njembí lo ká go có gbí njembí ye,
bìndi có gbí njembí ye ká go có gbí njembí lo.
Si có mì ndú ꞌví dù ká gbaànjé,
tacó wàa, ndâ ꞌduù muu to tí nó ꞌví ŋò tí ni énó máa,
a wò táánò ká tuu ye.
22Ye le bèṛè tí nó náa wò le ji ye nó ji ndú gî,
Ye le ji ndú tacó wàa,
njembí ndú ꞌví dù ká gbaànjé.
23Ye le ji ndú tacó wàa,
njembí ndoo ꞌví dù ká gbaànjé ta ndú.
Tacó wàa, ndâ ꞌduù ꞌví ŋò tí ni énó máa,
a wò táánò ká tuu ye;
ndâ ꞌduù delè ꞌví ŋò tí ni énó máa,
wò zè ndú nìkì ká go bà zè ye nìkì mì lo.
24Có gbí njembí ye énó máa,
wò ꞌví je bàndò ji ndâ ꞌduù tí nó náa wò ṛuka ndú ji ye nó
á mí ṛègbà tí ye,
tacó wàa, ndú ꞌví ŋò ta bà te duù tí ye mì lo,
tacó wò ꞌbìtà bà zè ye nìkì maa si ndà suu to tí nó kálásê, Bu ye.
25Wò a ꞌduù jáá, Bu ye!
Sè ndâ ꞌduù muu to tí nó ŋò wò ni lá,
káa ye ŋò wò ni gî.
Ndâ ꞌduù tí nó náa wò kaa ndú ji ye nó delè ŋò ni gî máa,
a wò táánò ká tuu ye.
26Ye tùbà tí lo ngbáṛángàꞌi énó ji ndú gî, Bu ye!
Ye delè kpónó kpòò kû tùbà tí lo ngbáṛángàꞌi énó ji ndú,
tacó wàa, ndú ꞌví zè tí ndú gbí òkò tí ndú nìkì maa,
á go bà zè ye mì lo nìkì maa;
delè tacó wàa có tí ye ꞌví dù gbí njembí ndú.»
Currently Selected:
Jòvánì 17: ndz
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2001, Wycliffe Bible Translators, Inc. All rights reserved.