Jòvánì 16
16
1«Ye ꞌdè ndâ có tí nò ꞌdáá gî ji yo tacó wàa, njembí yo wúnò ꞌví mù tí gítí ndâ i yê ṛo tí nò
náa ndâ ꞌduù kèjì gí bà bàkà mítí yo nò lá.
2Ndâ ꞌduù bà giì mòkò yo ꞌdo gbí òkò tí ndâ ꞌduù
ta ndi tí ndâ bàndò bà kili ndâ Jùdéyà gí bà ùlù Mbíṛì gî.
Káa yo ꞌví te mí gbí muu yo me káa ŋìnò cuki lá.
Yo te mí gbí muu yo delè énó máa,
ꞌbí o wúnò ká kèjì náa ndâ mbe kû ziki yo ta o tí nò bà koṛo có énó máa,
ndâ yì kû bàkà a nèté mì ndâ yì kùṛo Mbíṛì.
3Ndú bà bàkà ŋa i tí nò,
tacó ndú jé ŋò ꞌbí ꞌduù gbaànjé ꞌdo gbí òkò tí ze ta Bu ye ni lá.
4À má énò, ye kpónó kû kpo nó a gbí-tà-tù yo,
tacó wàa, o bà mèèkèꞌi tí yo nò má gì wúnò,
mbí yo ꞌví ꞌva tí énó máa,
ye táánò ci yo gítí sàà kùṛo gî.
O bà gì Bèṛi-mì-Mbíṛì wúnò
«Ye táánò ꞌdè ndâ có tí nò ji yo sàà lá,
tacó ndoo kû dù ta ndoo bà gbèe to.
5Káa ye kpónó kû giì ya gí mì ꞌduù tí nó táánò mbe tuu ye nô.
Ta ndâ ŋa ŋìnò ꞌdáá gî,
ꞌbí ꞌduù gbaànjé ꞌdo gbí òkò tí yo mbe ꞌvee ye kpónó énó máa,
‹Wò kû ya gí kòtí ꞌdi wè?› nò wálá.
6Káa njembí yo kpónó wálá ta sé có tí nò náa ye ꞌdè ji yo nò.
7Káa ye bà ngùù yúcó ꞌdo tí yo wálá:
ye kû ya nó tí nò kpolo ma a i tacó tí yo,
tacó ye má ya lá,
mbe kpo-gbí-tà-tù yo tí nò bà gì wálá.
Káa ye má ya gî,
ye bà tuu yí gì tí ji yo.
8Yí má gì gî,
a yí ká bà ꞌdè có ŋìnó mbe ya gí gbí muu ndâ ꞌduù
gítí ndâ vò i,
ta ꞌduù ŋìnó mbe ya jáá nó,
ta bà waa có mì Mbíṛì.
9Yí kèjì gí bà ꞌdè có ŋìnó mbe ya gí gbí muu ndâ ꞌduù gítí vò i,
máa, bà biya bà ùnje gítí ye mì ndú a vò i.
10Yí kèjì gí bà ꞌdè có ŋìnó mbe ya gí gbí muu ndâ ꞌduù
gítí ꞌduù ŋìnó mbe ya jáá nó delè
a i mítí bà ya ye gí mì Bu ye,
bìndi yo bà ŋò ndi ye wálá.
11Yí kèjì gí bà ꞌdè có ŋìnó mbe ya gí gbí muu ndâ ꞌduù
gítí bà waa có mì Mbíṛì,
tacó Mbíṛì waa có mítí Gba-to-tí-nó.
12Ndâ có gbí muu ye tacó bà ꞌdè ji yo tanga tí lá,
káa wotí tí yo bà dù gítí bà ꞌdi gbí ndú kpónó wálá.
13À má énò, Bèṛi-mì-Mbíṛì,
tí mbe kû co tí kpokèjì mì yúcó má gì gî,
a yí ká bà tè kùṛo yo co tí kpokèjì mì yúcó.
Tacó yí bà gì gí bà ꞌdè me ꞌdóó có mì wó gbí muu wó lá.
Yí bà gì gí bà ꞌdè ji yo káa ndâ có ŋìnó náa yí ꞌdi nô.
Yí bà gì gí bà ma có ndâ i ŋìnó kèjì nô.
14Yí kèjì gí bà wu gbí ye ji yo,
tacó yí bà gì gí bà ꞌdè ji yo ꞌdáá káa ndâ có ŋìnó
náa yí ꞌdi ꞌdo mì ye nô.
15Ndâ có gbí muu Bu ye ꞌdáá gî káa ndâ có tí nò gbí muu ye nô.
Ŋìnò a gbí ndeṛè có tí nò náa ye ꞌdè tí ta có ji yo énó máa,
yí bà gì gí bà ꞌdè ji yo ꞌdáá káa ndâ có mì ye nó ká nò.
16Tacó yo gàà énó kèjì gí bà ŋò ye wálá,
yo má giì dù á bìndi bà ya ye ꞌdo tí yo nò ndì-ndì-ndì énó,
yo bà giì ŋò ndi ye kákáꞌi.»
17Ndâ ꞌbí mbe tala có mì Jézù mâ giì ꞌdi có tí nò náa yí ꞌdè ji ndú nò, ndú giì ꞌbìtà bà ꞌvee ꞌvé gbí òkò tí ndú máa, «Gbí ŋa có mì wó náa yí ꞌdè énó máa, ndoo gàà énó kèjì gí bà ŋò yì wálá, má njíꞌdí kózò gî, ndoo bà giì ŋò ndi yì nò, máa yè? Gbí có tí nò mì wó, máa, yì kû ya gí mì Bu yì nò, máa yè? 18O tí nò mì wó ‹gàà› nò a o yè? Ndoo ꞌdi gbí o tí nò mì wó ‹gàà› nò lá.»
19Káa Jézù giì ŋò ni gî máa, à tí ndú a go bà ꞌvee yì, tacó énò, yí giì cu kùṛo bà ꞌvee yí mì ndú ta bà ꞌvee ndú máa, «Yo kû ꞌvee ꞌvé gbí òkò tí yo nò a i gítí gbí có tí nó náa ye ꞌdè énó máa, ‹Yo gàà énó bà giì ŋò ye wálá, yo mâ giì dù ndì-ndì-ndì énó gî, yo bà giì ŋò ndi ye kákáꞌi nó?›
20Ye kû ꞌdè có ji yo ta yúcó máa,
yo bà giì wa ku ta ngo-ṛo yo,
káa ndâ ꞌbí ꞌduù ta líkíꞌo tí ndú.
Nje yo bà giì zuu ,
káa bà zuu nje yo nò bá ꞌvìsì tí tí líkíꞌo.
21Niì kû tu nje wó ta o bà mi ꞌviì,
tacó yí gbí séꞌi,
káa ꞌviì mâ giì tè gî,
bà mbí niì tí nò giì ò tí sé gó-káyì gî ta líkíꞌo máa,
yì jò ꞌduù mí muu to gî.
22Nògí, yo kpónó kû zuu nje yo á go bà zuu nje mbe gó-káyì.
Káa tàkòcò yo bà giì peteke gî,
tacó ndoo bà ꞌde tí ndoo ta ndoo kákáꞌi gî.
ꞌBí ꞌduù mbe volo gbí líkíꞌo tí nò náa ye bà je ji yo nò, bà dù wálá.
23O tí nò má gì gî,
yo bà ꞌvee ye gítí ꞌbí i gbaànjé wálá.
Ye kû ꞌdè có ji yo ta yúcó máa,
Bu ye ta o tí nò bà je ŋa i ŋìnó
náa yo bà yù ꞌdo tí wó ta ṛè ye nó ji yo gî.
24Yo yee tí kpónó jé yù i ꞌdo mì Bu ye ta ṛè ye lá.
Má énò, yo ꞌbìtà bà yù i ta ṛè ye á ꞌdo tí kpónó,
wàa yí bà je ji yo gî.
Tacó wàa yo ꞌví dù ta líkíꞌo tí yo ta ꞌbí i mbe gboo ꞌdo mì yo wálá.
25Ye yee tí kpónó kû ꞌdè có tí nò ji yo ká ta ndâ kpùṛù có.
Káa o tí nò náa ye kákáꞌi bà ꞌdè ndâ kpùṛù có ji yo wálá nò, ká kèjì.
Ye ta o tí nò bà ꞌdè có gítí Bu ye ngbáṛángàꞌi énó ji yo.
26Ta o tí nò, yo bà giì yù ndâ i ꞌdo mì Bu ye ta ṛè ye.
À kákáꞌi me ye ká bà ꞌdeke tí ye ji Bu ye tacó tí yo lá,
27tacó Bu ye zè yo nìkì ta ṛè ye ma.
Bu ye zè yo nìkì maa nò,
tacó yo zè ye nìkì maa.
Yo delè giì ùnje gî máa,
ye táánò gì ꞌdo mì wó tí Bu ye.
28Ye táánò gì gí muu to tí nó ꞌdo mì Bu ye.
Káa ye kpónó kû dele ndi ye ya gí mì Bu ye.»
29Ndâ mbe tala có mì Jézù bà-i-nò giì ꞌvìsì có ji yí máa, «Ìyo le! Wò kpónó kû ꞌdè gbí có ji ze ngbáṛángàꞌi. Wò kû ꞌdè me kpùṛù có lá. 30Ze kpónó ŋò ni ngbáṛángàꞌi gî, máa, wò ŋò ndâ i ꞌdáá gî ni gî. À má énò, gbí ndeṛè bà ꞌvee wò mì ꞌbí ꞌduù gbí òkò tí ze máa, wò gì ꞌdo kòtí ꞌdi wè nò wálá. Tacó ze kpónó ùnje ta njembí ze gî, máa, wò gì ꞌdo mì Mbíṛì.»
31Káa Jézù giì ꞌvee ndú máa,
«Yo ùnje ta njembí yo gítí ye gî?
32Yo ꞌdi có tí nó náa ye kû ꞌdè ji yo nô:
O bà nje gbí yo vóró-voro gî ká kèjì.
O bà ꞌvaaka yo ꞌdo tí ye gbaànjé-gbaànjé
ya gítí ndâ ꞌdóó bàndò mì yo si ye ta kpéétí ye, gì sàà gî.
Káa à kpêtí ká énò,
ye bà dù me ta kpéétí ye lá.
Ze bà dù ta Bu ye.
33Ye ꞌdè ndâ có tí nò ji yo
tacó wàa, yo ꞌví dù nìkì maa ta ṛè ye.
Ndâ vò i bà ꞌde yo muu to tí nó me gbolò,
káa yo ꞌví zèè njembí yo,
tacó ye kpò muu ndâ vò i muu to tí nó gî.»
Currently Selected:
Jòvánì 16: ndz
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2001, Wycliffe Bible Translators, Inc. All rights reserved.