Matiu 14
14
Lú mala Yohana Mǝbatisǝma
(Markus 6:14-29; Luka 9:7-9)
1Aɓalǝ anonggeo mǝno ka Hirǝdus murǝm mala bu-nzali Galili ok cau amur Yesu. 2Ne amǝte ama, “Mǝnia ka Yohana Mǝbatisǝma na loapi ɓembe ka! Nda gir mana tsǝa sǝ ndanǝ bangŋo mala pakki agir-ndali ka.”
3Hirǝdus angŋǝna dǝmbǝa bwalǝna Yohana kùrni sǝ oasǝni a ndàkurban. Kùrri ace Hirǝdiya mala Filip mǝ'eambǝi yì Hirǝdus.#14:3 Ɓalli gbal aɓa: Luk 3:19,20; Pǝris 18:16; 20:21. 4Nda ace mana Yohana camarǝ banggi wi ɗiɗyal ama: “Ɓoaro wu do wunǝ mɓwame ɗang.” 5Eare male yì Hirǝdus ka nǝ̀ wal lú Yohana, sǝ ɓangciu pakki wi ama aɓwana nǝ̀ loasǝ munǝo, acemǝnana koyan ngga twal Yohana mǝɓangna mala Ɓakuli na.
6A pwari pakiɗire ɓǝlban mala Hirǝdus ka, nsari mala Hirǝdiya tánggwam mǝnana tsǝk Hirǝdus banɓoari wi kǝrkǝr, 7gandǝa kánmbi wi gir ama nǝ̀ pe wi ko mana zǝm ngga. 8Yì muna ka ngge soakite ɓǝ̀ na ama, “Ɓǝa pam ɓamur Yohana Mǝbatisǝma aɓa tasau akani adyan.”
9Murǝm ngga bumi kìɗìkì, sǝ ace kángir andǝ abǝri mana ate aban li ka, gandǝa tsǝa ɓǝa pe muna-ɓwame gir mǝnana zǝm ngga; 10pǝlǝa tur aɓwana à kya kasǝ ɓamur Yohana a ndàkurban. 11À yiu nǝ ɓamur Yohana aɓa tasau, sǝ à pe muna-ɓwame; pǝlǝa twali kya pe ngge. 12Alaggana mala Yohana yiu à yì twal lui à tsǝkbani, sǝ à kutio à kya banggi Yesu.
Yesu linǝ aɓwana á-tongno
(Markus 6:32-44; Luka 9:10-17; Yohana 6:1-14)
13Lang Yesu yi ok mǝnia yì cau ka, pǝlǝa eauwe a waru à samsǝa à o aban mǝnana kǝɓwa pà kàm raka. Aɓwana nǝ̀ yia ok ama Yesu eauna a waru umna ka, à purkio arǝ ala malea à o ate nǝ kusǝia. 14Yesu yi kpashi, nǝ̀ eapi waru ka sǝn ɓwabunda kǝrkǝr aban rambǝa. Mǝsǝswatǝr malea pakki wi pǝlǝa twalia amǝkwano mana aɓalǝia ka ban arǝkwana malea.
15Pwari nǝ̀ yia kpa ka, alaggana male yiu abani à yì ne wi ama, “Ban mǝnia ka ɓabondo na, sǝ pwari kpana, nying ɓwabunda ɓǝa o arǝ amuna-là ɓǝa kya kuri ɓamuria girlina.”
16Yesu nea wia ama, “Ɓǝa ka o anggo ɗang, wu pea wia girlina ɓǝa li.”
17Sǝ à ne wi ama, “Kǝ bǝredi tongno nǝ amǝnji ɓari nda mǝnana sǝm ndanǝi a bu sǝm ngga.”
18Sǝ na ama, “Wu yinǝam nǝia akani.” 19Pǝlǝa tsǝk aɓwana ɓǝa do amur munabondo. Sǝ twal abǝredi mǝnia tongno andǝ anji ɓari ka, loasǝ mǝsǝì a kuli pakki Ɓakuli yàwá, sǝ ɓwanggia, pǝlǝa pe alaggana male, sǝ yia gbal ka à gakia aɓwana. 20Yia kat à li à ɗǝmbǝo. Sǝ alaggana male ramnggi aɓwanggine mana ue ka, à lumsǝ azace lum-nong-ɓari. 21Laki mala aɓwana mana à lili ka, aburana á-tongno na. Amamǝna andǝ amuna ka à ɓallia ɗang.
Yesu gya amur mùr
(Markus 6:45-52; Yohana 6:15-21)
22Tu anzǝm man ngga Yesu ne alaggana male ɓǝa eauwe a waru ɓǝa aki dǝmbǝa aban o a nkaring, sǝ yì ka, ueo ace nea aɓwana ɓǝa o a la. 23Lang Yesu mesǝna ɓwapǝndǝa ka, pǝlǝa eauwe amur nkono nǝmurǝì ace pak hiwi. Ban yi bwalo nda akano nǝmurǝì. 24Anggo ka waru nyingŋǝna kun gwangyi umna ɗār aɓa mur, sǝ nggea gung longŋǝna nǝ̀ nggǝ pea wia tanni.
25Nǝ tadǝmbari mbul-mbul ka Yesu puro kǝ gya amur mùr aban yiu abania. 26Lang alaggana male nǝ̀ sǝni aban gya amur mùr ka, ɓangciu pakkia wia. À mak zwalo, à na ama, “Kukwar na!”
27Anggo ka kara Yesu nea wia cau ama, “Wu cam kàngkàng! Mǝ nda. Wu kǝa ɓang ɗang.”
28Pǝlǝa Bitǝrus ne wi ama, “Mǝtalabangŋo, ɓǝ̀ a nda ka, banggam ɓǝn gya amur mùr ɓǝn kyane abano.”
29Yesu ne wi ama, “Yiu.”
Bitǝrus pǝlǝa sulǝi ɓa waru sǝ gya amur mùr aban ká aban Yesu. 30Lang sǝn eaki-nkono mala mùr ka, ɓangciu pakki wi, kara tita ko a mùr. Mak zwalo ama, “Mǝtalabangŋo, amsǝam!”
31Kara Yesu lǝmndǝ bui bwali sǝ ne wi ama, “We ka, guliarǝu mo kyau fat, palang sǝ a tuti a ɓabumo?”
32Lang à eauna aɓa waru ka kara gung kuro. 33Aɓwana mǝnana aɓa waru ka à peri abani, à na ama, “Ɓafo, à nda Muna mala Ɓakuli.”
Yesu twali aɓwana pas ban rǝkwana
(Markus 6:53-56)
34À samsǝa à yì kpashi a nkaring mala amǝ Jenasaret. 35Lang amǝ-le nǝ̀ yia sǝlǝ ama Yesu na ka, à turkiban arǝ aɓwana aɓalǝ amuna-là mana aban mǝno ka. Aɓwana yiu nǝ amǝkwano malea kat abani. 36À zǝmbǝi wi ace mǝnana ɓǝ̀ amǝ rǝkwana ɓǝa je kun daura male ka. Sǝ aɓwana mana à je kat ka rǝkwana malea mala.
Currently Selected:
Matiu 14: mbu
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2016