Matiu 22
22
Kanicau arǝ Pakiɗire Isǝ mɓwama
(Luka 14:15-24)
1Yesu ne aɓwana cau ɗǝm nǝ akanicau ama:
2 Domurǝm mala Ɓakuli ka à nǝ̀ kànì arǝ pakiɗire mana ɓe murǝm tunǝo ace isǝ mālá muni ka. 3Tur amuna-ɓala male ɓǝa kya ne aɓwana mǝnana à tunǝia ka ɓǝa yiua pakiɗire isǝban. À ginǝ yiu.
4 Nyare tur aɓea amuna-ɓala male ɓǝa kya ne aɓwana mǝnana à tunǝia ka ama, “Ən malǝna pak girlina kat. Ən walǝna ajamnda andǝ alo-nda amǝnyangge mem. Girbunda kat ka à malǝna pe. Wu yiua pakiɗire isǝban!”
5 Amǝnia yì aɓwana à tunǝia ka à tsǝk kiria ɗang, à kutia pakkia agir malea mana ɓoaria wia ka. Ɓe ɓwa ka o a ɓaban male, sǝ ɓeɓwa ka o aban kurkuro male. 6Acilia man ngga à bwal amuna-ɓala male à pakkia wia mǝɓane sǝ à wal-luia.
7 Bum murǝm man lul kǝrkǝr; tasǝ asoje male à yì wal amǝwalkialu man, sǝ à pisǝ la malea.
8 Pǝlǝa tunǝ amuna-ɓala male sǝ nea wia ama, “Girbunda kat mala pakiɗire isǝban ngga à malǝna pe. Sǝ aɓwana mǝnana ǝn tunǝia ka à kārǝa à nǝ̀ yiu aban isǝban ɗang. 9Ado ka wu kyane amur agauwata anjarɓala sǝ wu tunǝ aɓwana kat mǝnana wu kumia a kàm ngga, ɓǝa yiua pakiɗire.” 10Nda amuna-ɓala man puro à o arǝ agauwata anjarɓala sǝ à tunǝki aɓwana kat mǝnana à kum ngga, amǝɓane andǝ amǝɓoarne. À yì lumsǝ ɓala isǝban.
11 Lang murǝm kutio nǝ̀ sǝn abǝri ka mǝsǝì kpa arǝ ɓeɓwa na kam mana tur daura isǝban a rǝì raka. 12Pǝlǝa murǝm ɗi ama, “Ɓiam, a kar lang sǝ a yiu kani daura isǝban pa a rǝo ɗang?” Yì ka, kum cau mǝnana nǝ̀ na ka ɗang.
13 Murǝm ne amuna-ɓala ama, “Wu taka bui andǝ akusǝi, wu turi a nza aɓa pǝndǝa. Akano sǝ nǝ̀ ɓua nǝ̀ nggǝ nǝmnggi munabui.” # 22:13 Ɓalli gbal aɓa:
Mat 8:12; 25:30; Luk 13:28.
14 Ɓakuli tunǝ aɓwana pas sǝ bǝti na à dum nǝ mǝsǝcau ɓǝ̀ Ɓakuli tària ka.
Amǝ Farisi ɗi Yesu amur mbwe boalo-cemi
(Markus 12:13-17; Luka 20:20-26)
15Amǝ Farisi o à kya kur kunarǝia amur njargula mǝnana à nǝ̀ bwali nǝi kam aɓa nacau ka. 16Pǝlǝa à tur amuna-ɓala malea andǝ aɓea ɓwana mala Hirǝdus abani. À na ama, “Malǝm, sǝm sǝlǝna ama we ka a nda ɓwa mǝɓafoe, ɗǝm ngga a kǝ kani tanjar mala Ɓakuli nǝ mǝsǝcau. A kǝ tar ɓwa ɗang, acemǝnana aɓwana kat abano ka à nda mwashat. 17Bangga sǝm, a sǝne mo ka, ɓoaro ɓǝ̀ sǝm pe Kaisar, Murǝm mala amǝ Roma boalo-cemi le ko ɓoar ɗang?”
18Yesu surǝna rǝ ɗenyicau malea mǝɓane kat pǝlǝa ɗia ama, “Wun amǝ'kunɓarina, ace mana sǝ wu kǝ earce tambam? 19Wu lǝmndǝam mǝsǝboalo mana à mbwekina boalo cemi nǝi ka!”
À pǝlǝa à pe wi mǝsǝboale. 20Sǝ ɗia ma, “Lullǝ yana andǝ foto mala yana arǝ mǝsǝboalo mǝnia ka?”
21À eari wi ama, “Mala Kaisar na.”
Pǝlǝa nea wia ama, “Gir mǝnana mala Kaisar na ka wu pe Kaisar, sǝ mǝnana mala Ɓakuli na ka wu pe Ɓakuli.” 22Lang à oe anggo ka, à ndali; kara à ɗeki à bwal njar malea à o.
Amǝ Saduki ɗi Yesu amur loapi ɓembe
(Markus 12:18-27; Luka 20:27-40)
23Àkǝ̀ pwari mǝno ka amǝ Saduki mǝnana à nakiyi ama loapi ɓembe pà kàm raka à yiu aban Yesu à yì ɗi ama,#22:23 Ɓalli gbal aɓa: Aturo 23:8. 24“Malǝm, Musa bangŋa ama ɓǝ̀ ɓwa wu pànǝ muna raka mǝ'eambǝi ɓǝ̀ al mami ɓǝ̀ ɓǝli lú amuna. 25Aban sǝm ɗiɗyal ka aɓea aɓwana tongno-nong-ɓari à nda amǝ'eambǝu. Mǝdǝmbǝa malea al mɓwama sǝ wu ko kum muna andǝi ɗang. Ɓwa mǝnana kpa a nzǝmi ka pǝlǝa twal mɓwame. 26Anggo gbal sǝ kum ɓaria andǝ tāruia, kya bwal bu tongno-nong-ɓaria. 27A nzǝm lú malea kat ka, pǝlǝa mɓwame wu. 28Sǝ ado ka, a pwari loapi ɓembe ka, yana aɓalǝia nda bura mɓwama, yì mana yia kat ka à dumǝna nǝi ka?”
29Yesu pǝlǝa earia wia ama, “Wu ɓwarkio ace ɗwanyi surǝ Malǝmce andǝ rǝcandǝa mala Ɓakuli. 30A pwari loapi ɓembe ka alban pà kàm ɗǝm ɗang. Ko yana le ka nǝ̀ do kǝla amǝturonjar mana a kuli ka. 31Sǝ amur loapi ɓembe ka, wu ɓal cau mana Ɓakuli bangga wun ngga re? Na ama, 32‘Mǝ nda Ɓakuli mala Ibǝrayim, mala Ishaku, andǝ mala Yakupu.’ Ɓakuli ka mala alú na ɗang, mala aɓwana mana nǝ yilǝmu ka nda.”#22:32 Ɓalli gbal aɓa: Pur 3:6.
33Lang aɓwabunda ok mani ka, à ndali nǝ kanigir male.
Nzongcau mana karmur aɓi ka
(Markus 12:28-34; Luka 10:25-28)
34Lang amǝ Farisi ongŋǝna ama Yesu gandǝna amǝ Saduki ka, à ram rǝia à yiu. 35Ɓe ɓwa aɓalǝia mǝnana surǝ Malǝmce mala Musa pepe ka, ɗi ama:
36“Malǝm, ata anzongcau mǝnana aɓa Nggurcau mala Musa ka, mǝ yani na kuti aɓea?” 37Yesu ne wi ama:
“Earce Mǝtalabangŋo, Ɓakuli mo nǝ ɓabumo mwashat, nǝ yilǝmo kat andǝ ɗenyicau mo kat.” # 22:37 Ɓalli gbal aɓa:
Nggur 6:5
.
38 Mǝnia ka nda nzongcau mǝdǝmbe andǝ mǝgule mǝnana kuti aɓea kat ka. 39Mǝnana kpate ka nda kǝla yì, ama: “Earce ɓeomǝkunɓala kǝla mǝnana a earce ɓamuro ka.”#22:39 Ɓalli gbal aɓa: Pǝris 19:18.
40 Nggurcau kat andǝ Akanigir mala amǝ'ɓangna mala Ɓakuli ka, à do amur anzongcau mǝnia ɓari ka.
Yesu ɗi amǝ Farisi amur Mezaya
(Markus 12:35-37; Luka 20:41-45)
41Lang amǝ Farisi ramǝna abanɓwáná ka, Yesu ɗia ama, 42“Mana nda ɗenyicau ma'wun amur Mezaya?#22:42 Mezaya: Ko “Kǝrǝsti” Muna mala yana?”
À eare ama, “Muna mala Dauda#22:42 Muna mala Dauda: Ko “Mǝkà Dauda.” na.”
43Yesu nea wia ama, “Ɓǝ̀ muna mala Dauda na ka, palang sǝ Dauda, nǝ́ kanì mala Bangŋo mala Ɓakuli a bumi ka, tunǝi ama ‘Mǝtalabangŋo?’ Acemǝnana yì Dauda ka bangŋa ama,
44 “ ‘Mǝtalabangŋo ne
Mǝtalem ama:
Do a buam mǝli,
she ɓǝ̀ ǝn tsǝngŋǝna
aɓeo-amǝbura aɓata
kusǝo ka.’ # 22:44 Ɓalli gbal aɓa:
Ang 110:1
.
45 Sǝ ɓǝ̀ Dauda tunǝ Mezaya ama ‘Mǝtalabangŋo’ ka, palang sǝ Mezaya nǝ̀ pǝlǝ muni?”
46Kǝɓwa gandǝ nyesǝi wi cau ɗang, sǝ àkǝ̀ pwari nì ka, kǝɓwa nyare ɗi ɗǝm ɗang.
Currently Selected:
Matiu 22: mbu
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2016