Matayo 19
19
Dzulu ya marichano ga muche na mulume
(Mariko 10:1-12; Luka 16:18)
1Jeso ariphomala kwafunza atʼu, wauka Galilaya achenda jimbo ra Judea, ngʼambo ya muho wa Jorodani. 2Duu ra atʼu richimutuwa, naye achiaphoza okala ni akongo.
3Ndo Afarisayo anjine achimutuwa achendamuheza kwa kumuuza vivi, “Vidze, kutuwirizana na Shariya yehu, akale mutʼu unaidima kumuricha muchewe akosapho kosa rorosi?” 4#Mwa 1:27; 5:2Jeso achiaudzidza achiaamba, “Mukale mwimwi kʼamudzangwe kusoma kukala, Mulungu phapho mwanzo unaumba atʼu, waaumba mulume na muche, 5#Mwa 2:24na achiamba, ‘Gago ndigo gatumago hata mulume achihwala, undaatelephuka avyazie agwirikane na muchewe, na ao airi andakala mwiri umwenga’? 6Ndo ao andakala tsʼio airi kahiri, ela andakala dza kwamba ni mutʼu mumwenga. Kwa vivyo, Mulungu chochigwizanya, mudamu niatsʼichitsamule.” 7#Kʼumb 24:1-4; Mat 5:31Ao Afarisayo achimuuza kahiri vivi, “Kwadze sambi Shariya ya Musa yinaamba, mutʼu achihenza kuricha muchewe, niamwandikire baruwa konyesa kukala udzimuricha jeri, na amwambe ende vyakwe?” 8Jeso achiaudzidza achiamba, “Mulungu hangu phapho mwanzo, waumba mulume na muche atsʼirichane, hata Musa yiye wamuhenzeza kwaricha ache enu tu, kwakukala, kʼamugagwira gago ga Mulungu. 9#Mat 5:32; 1 Akor 7:10, 11Ndo ninamwambira mino, yeyosi amurichaye muchewe na hata kʼamugwirire na mutʼu, unazinga tu ahwalapho muche munjine.”#19:9 Nakala zinjine zinaonjeza: Na ahwalaye muche yerichwa, unazinga vivyo.
10Anafunzie ariphosikira gago, ámwamba, “Bee kʼona gago maneno ga muche na mulume gachikala ga vivyo, ni baha kutsʼahwala kamare.” 11Jeso naye achiaudzidza achiaamba, “Tsʼio alume osi aidimao kusagala andaka, itsʼiphokala aratʼu tu oajaliwa ni Mulungu. 12Maana, kuna visa vya namuna nyinji virichavyo mutʼu akatsʼahwala. Kuna anjine ávyalwa kʼaaokola kare, anjine ao áhendatulwa, na anjine kʼaahwala kwa ahenza amuhikirehikire Mulungu tu bahi. Kwa vivyo, aidimaye kurigwira funzo riro, naarigwire.”
Jeso unaahatsʼa anache adide
(Mariko 10:13-16; Luka 18:15-17)
13Atʼu anjine ámurehera Jeso anache adide, kwa hata aabandikire mikonoye aavoyere. Ela ahumwae achiagombera ao atʼu oareha. 14Jeso ariphoona gago waamba, “Mutsʼiazize ao anache, aricheni adze kwangu, mana, Ufalume wa Mulungu ni wa atʼu ario dza aa anache.” 15Ndo Jeso achiabandikira mikono achiahatsʼa, chisha achiphauka phapho.
Tajiri mumwenga
(Mariko 10:17-31; Luka 18:18-30)
16Tsʼiku mwenga, mutana mumwenga wakwenda kwa Jeso achendamuuza vivi, “Mwalimu, ni riphiro idzo ra kuhenda mino hata ndo niupate uo uzima uphya wa kare na kare?” 17Jeso naye achimuuza achimwamba, “Kwadze unaniuza mino, idzo ra kuhenda? Mulungu hicheye tu ndiye ariye mudzo. Kwa vivyo, uchihenza kuphenya uzimani, hʼaya tuwa malagizo ga Mulungu.” 18#Kul 20:13; Kʼumb 5:17; Kul 20:14; Kʼumb 5:18; Kul 20:15; Kʼumb 5:19; Kul 20:16; Kʼumb 5:20Yiye mutʼu achimuuza Jeso kahiri, “Malagizo ga Mulungu gaphigo?” Jeso achimuudzidza achimwamba, “Malagizo ga Mulungu gaambago, ‘Utsʼiulage, utsʼizinge, utsʼiiye, utsʼilavye ushaidi wa ulongo, 19#Kul 20:12; Kʼumb 5:16; Alaw 19:18aishime abayo na ameyo, na muhenze jiranio dza vivyo udzihenzavyo uwe mwenye.’ ” 20Yiye mutana achiamba, “Gago gosi bee ndigo nihendago mino. Sambi, ni riphiro ririro tsʼirihenda?” 21Jeso achimwamba, “Uchikala unahenza utsʼikale na ila yoyosi, hʼaya enda ukaguze miyoyo uriyo nayo, na pʼesa zondapata wapʼe achiya. Uchihenda vivyo, undakala udzidziikira mbeko mulunguni, hʼaya chidzako udze unituwe.” 22Ela yiye mutana ariphosikira gago, wauka na kushononeka, mana, wakala ni tajiri muno.
23Phapho Jeso achiaamba anafunzie, “Ninamwambira jeri, ni vikomu kwa matajiri kuphenya Ufalumeni kwa Mulungu. 24Na dzulu ya gago, kʼaviidimikika ngamia kuchira na tʼundu ya tsʼinzano, na kʼaviidimikika muno yenye tajiri kuphenya Ufalumeni kwa Mulungu!” 25Anafunzie ariphosikira gago, áangalala muno hata achimuuza vivi, “Bee ni ani sambi aidimaye kutivywa?” 26Ela Jeso achialola, chisha achiaamba, “Mudamu kʼagaidima gago, ela kwa Mulungu kʼakuna rishindaro.”
27Pʼetero achimwamba Jeso, “Hanga sino swi, hundapatani? Kwani vivyo hwaricha gosi huchikutuwa!” 28#Mat 25:31; Luk 22:30Jeso achiaamba, “Ninamwambira jeri, mimi Mutʼu yelaa dzulu nichisagala phangu chihini cha ubomu kutawala kwenye urumwengu uphya, hata mwimwi ahumwa angu kumi na airi onituwa namwi, mundasagala vihini vya utawala mutawale makabila kumi na mairi ga Iziraeli. 29Na yeyosi yericha mudzi wao, nduguze, avyazie, anae hebu mindaye kwa dzulu yangu, Mulungu undamupʼa mara gana ya gogaricha, na chisha apate uzima uphya wa kare na kare. 30#Mat 20:16; Luk 13:30Elako, anji ario ni a mwanzo vivi, andakudzakala a musindikizo, na anji ario ni a musindikizo vivi, andakudzakala a mwanzo.”
Currently Selected:
Matayo 19: CHIDUR
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo