Matio 8
8
Cecoc kikehew iriniwa e micta omikiwapineritci
(Natawapata kaie Mark 1.40-45; Luc 5.12-16)
1Minawatc Cecoc ki pe pinisiwew matinariw. Micta mitcetiripana iriniwa ka nosanehikotc. 2Aci peikw iriniw e omikiwapinetc pe natcikapowictawew Cecoca. Ki nipiskoctawew e itatc: “Teperitcikein, kecpin ici nataweritamane, matci ki ka ki kikehin.”
3Cecoc ki icitcitcerictawew. Ki takinew, e itatc: “Nit ici naheriten. Ekoni ici kike!” Tecikotc ki kikew anahwe iriniw ocakak. 4Minawatc ki itiko Cecoca: “Wewerita natota: akawir awik arimotamo e ki kikehitan. Aric matca natawapam makatewokorew kitci ki wapamisk. Minawatc ki ka aiamihe pakitinikan, kotc ka ki itactatc Moïse kitci totcikaterik, otcitakotc kitci kiskeritakok aci tapwe e ki kikein.”
Cecoc e kikehatc kitci cimakanica otarotakaniw
(Natawapata kaie Luc 7.1-10; Jean 4.43-54)
5Apitc ka pitaketc Cecoc Capernaüm otenak, peikw Romain kitci cimakanica#8.5 Romain kitci cimakanica: Anahwe kitci cimakanic, enko na Romain iriniw ka tiperimatc Romain cimakanica. ki pe natawapamiko e nataweritamakotc kitci witcihatc, 6e itikotc: “Teperitcikein, nitarotakan mackociniw nete nimikiwamik. Niponesiw kirika micta nekatcitaw.”
7Cecoca itiko: “Ni ka ican kirika ni ka kikehaw.”
8Aric naskamo anahwe kitci cimakanic, e itatc: “Teperitcikein, nama ni tipi asiteritakosin kitci ki pe pitakein nimikiwamik. Aric tepirak peikw itewin ki ka itan, ekoni kitci kiketc anahwe nitarotakan. 9Kaie nin tawok ka tiperimitcik. Minawatc tawok cimakanicak nin ka tiperimakik. Kecpin peikw nicimakanicim itake: ‘Matca!’, kata matcaw. Kecpin kotak itake: ‘Petcimote!’, kata pe icaw. Kirika kecpin kiapatc kotak nitarotakan itake: ‘Anihe itotiske!’, kata itotiskew.”
10Ka petawatc Cecoc ani e iteritci, ki mamiskasitawew. Ki itew anahweriw iriniwa ka pa nosanehikospan: “Tapwe ohwe ka witamatakok: ekoni pitcerak e miskawak awik ota Israël askik e apitc asperimototawitc. 11Ki witamatinawaw kaie, micta mitcet iriniwok nte kata ototewok wapanok itekera, kaie nte nakapehonok kitci pe ototetcik. Kata pe nta natapiwok mitcisowakanatikok nete Kice Manito Okimawinik, kitci tca witapimatcik Abrahama, Isaka kaie Cakopa. 12Aric aniki kotakihik ka ki itacterikipan kitci taciketcik neta, kata orowepinakaniwiwok, e ici kiski tipiskarik kitci iciwepinakaniwitcik. Ekota ni ke taci matotcik kirika kitci kakiceapitecikik.”
13Minawatc Cecoc ki itew anihi kitci cimakanica: “Ekoni ici kiwe kimikiwamik. Ki ka mirikowin anihe ka ki ici nataweritaman, e tapweritaman.”
Ekoni mia apitc ka kikeritci anihi otarotakana.
Cecoc e kikehatc mitcet iriniwa ka akosiritci
(Natawapata kaie Mark 1.29-34; Luc 4.38-41)
14Minawatc Cecoc ki icaw nte Pien omikiwamirik. Osikosa Pien mackociniripana nipakanatikok e kisiswapineritci. 15Cecoc ki takinew otcitcirik. Tecikotc ki matcamakaniw e kisiswapineritci. Anahwe tca iskwew ki pasiko e nta atoskectawatc Cecoca.
16E iti otakocinik, mitcet iriniwa ki pe iciwitowakaniwiw Cecoc e ki pitciteheckakoritci matci manitowa. Tepirak e aiarimwetc, Cecoc ki orowiticohwew anahweriw matci manitowa. Kaie kaskina ki kikehew ka akosiritci. 17Ki itotiskew kitci ki otcitciparinik aniheriw ka ki iterispan anihi ka nikan tipatcimospan, Ésaïe ka icinikasospan:
“Kaskina ki otapinam e ici maskisiikw,
kirika ki ki maninamakono e ici akosiikw.” Ésaïe 53.4
Aniki ka wi nosanehwatcik Cecoca
(Natawapata kaie Luc 9.57-62)
18Ka wapamatc Cecoc e mitcetiritci iriniwa e waskakapowictakotc, ki itew owitcewakana akam sakihikanik kitci ici pimotetcik. 19Aci peikw iriniw ka kiskinohamakespan cota aiamihe irakonikewiniw ki pe natcikapowictawew, e itatc: “Kiskinohamake iriniw, ki ka pa nosanehitin kaskina wiec ite ke pa icain.”
20Aci ki naskamako Cecoca, e itikotc: “Wakocak takoniw owaciwaw, kaie pirecicak otcictoniwaw. Aric anahwe Ka ki pe iriniwihitisotc#8.20 anahwe Ka ki pe iriniwihitisotc: Arimomitiso ota Cecoc. nama takoniw wiec nte ke ki ici mackocik kitci ki arwepitc.”#8.20 arwepitc: Manawan: kitci ki arwecimotc.
21Minawatc ki iteriw kotakihi nta e taciritci owitcewakana: “Okimaw, pakitinici pitama kitci nta rikwaskatak notawi.”
22Aci naskamawew Cecoc, e itatc: “Nosanehoci! Pakitinakok aniki ka nipotcik e iteritakositcik kitci rikwaskatatcik ka niporitci.”
Cecoc e nakahak e micta rotinik
(Natawapata kaie Mark 4.35-41; Luc 8.22-25)
23Minawatc ki positcimew Cecoc, e nosanehikotc owitcewakana. 24Kek micta keskat rotiniw neta sakihikanik. Sisikahoteriw otcimaniwaw e micta mitcahanik. Aric Cecoc taci nipapan. 25Pe natcikapowictako owitcewakana. Kockoniko, e itikotc: “Teperitcikein, wikotcihicinan! Aci ki ka niponano!”
26Naskamo Cecoc e itatc: “Kekwan wetci micta sekisiekw? Nama micaw kit asperimowiniwaw!”
Ekoni e ici pasikotc Cecoc. Kaketin ki arimwew e nakahak e rotinik kirika e mitcahanik. Tecikotc ki acteraweriw kaie ki micta arwactaniw. 27Kaskina ki micta mamiskateritamok kirika ki itewok: “Awin ia anahwe iriniw, ka micta sapitakotc wawatc e rotinik kaie tca e mitcahanik sakihikaniw!”
E kikehakaniwitcik nicw iriniwok ka ki pitciteheckakotcik matci manitowa
(Natawapata kaie Mark 5.1-20; Luc 8.26-39)
28Nte ka iti takocik Cecoc neta akam sakihikanik Gadarénien iriniwok otaskiwak, nicw iriniwa ki pe nta nakickako, nte rikwaskanik e pe ototeritci. Aniki iriniwok ki pitciteheckakopanak matci manitowa. E apitc koctatikosiwakopanen, nama awiriwa wi pimoteripana neta meskanak ka ici taciketcik. 29Ki tepwewok e itetcik: “Kekwan ka nataweritamawiak, Kice Manito Okosa? Ki ki pe ican ia kitci nekatcihiak, aric aka moci e otcitciparik kitci tipaskonikaniwok?”
30Nama neta warawik mitcetiwakopan kokocak e pa nantowi mitcisotcik. 31Aci aniki matci manitowok ki pakoserimewok Cecoca, e itatcik: “Kecpin wi matceticohwiake, ni nataweritenan nete kokocak ka tatcik kitci ki pitcickowakitcik.”
32“Icakw!” ki itikowok Cecoca. Ekoni tca ka ici orowitcik nta irinik, nete kokoca e ki pitakeckowatcik. Tecikotc aniki kokocak ki nitcikowackotiwok e kickapiskarik sakihikanik e ici pakicinitcik. Kaskina tca ki kwapawewok.
33Tapanak neta iriniwok ka kanawerimatcik anahweriw kokoca. Ka wapatakik aniheriw ka ispariritci, ki ocimowok. Otenak tca ki icawok e ki nta tipatatakik kaskina aniheriw ka ki iciwepanik, kaie ka ki iciwepasiritci anihi nicw iriniwa ka ki pitciteheckakoritci matci manitowa. 34Aci kaskina iriniwok neta ka tacikewaspan otenak pe matcawok e pe nta nakickowatcik Cecoca. Ka wapamatcik ki pakoserimewok otcitakotc kitci matcaritci neta otaskiwak.
Currently Selected:
Matio 8: ATMK
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Canadian Bible Society, 2014